Bic tabar ij quiꞌ cꞌujintiquex Cꞌuj
13
Mʌꞌ a pꞌatiquex a yajquintiquex a wet acsʌꞌorirex.
2 Quiꞌ acsex a mac a cu cꞌuchur ta watochex.
Mʌꞌ ja wirej,
yʌn mac a tu yacsaj mac tu yatoch caj u yacsaj u yʌjmasirob u tꞌʌn Cꞌuj,
cax mʌꞌ yirmʌn mac,
caꞌ tu yacsaj tiꞌ.
3 Yajquintex a mac a cꞌʌraꞌan tu cu maꞌcʌr winicob irechex wa ja bʌj cꞌʌraꞌan yejerob tu cu maꞌcʌr winicob.
Yajquintex a mac chucaꞌan u pachob quireꞌ periꞌ cʌjaꞌanechex yejerob ich yocꞌocab.
4 Tu cotorechex,
a yʌn a raqꞌuex,
bayiriꞌ xan,
a yʌn u mamoꞌ,
mʌꞌ a yʌn manex yejer a mac chꞌajaꞌan ten u jer mac quireꞌ a Cꞌujoꞌ jeꞌ u tsꞌictar yejer tu cotor mac a cu manob yejer a mʌꞌ chꞌaꞌan winic,
quet bayiriꞌ,
yejer a mac a cu manob yejer toc chꞌaꞌan winic xan.
5 Mʌꞌ a pachtiquex a taqꞌuinex.
Quiꞌquint a worex yejer a baꞌ yʌn techex,
quireꞌ a Cꞌujoꞌ tu toc araj mʌꞌ u pꞌʌtechex ta junanex,
mʌꞌ ju bin u pꞌuspachtiquechex Cꞌuj.
6 Rajen,
caꞌ ij quiꞌ quibex tiꞌ an ten bic ic nunquirex uch.
Mʌꞌ ja wirej,
caj tsꞌibtaꞌb uch:
Raꞌ cu yamtiquen in Jaj Tsꞌur Cꞌuj,
rajen mʌꞌ in wacꞌtic in bʌj,
cax cu chuquicob in pach in racꞌob.
7 Caꞌ a cʌnex a jach tsꞌurirex a tu tsecꞌtatechex u tꞌʌn Cꞌuj uch.
Cʌnex bic tabar caj manob tu tsoyir soc a sayʌrex tu pachob,
tan a wacsic ta worex an ten bic tu yacsob tu yorob a jach tsꞌurirex uch.
8 A ic Jaj Tsꞌurirex Jesucristojoꞌ u bereroꞌ,
mʌꞌ u cꞌaxic mʌꞌ biqꞌuin,
rajiꞌ u wʌcꞌʌs bʌjiriꞌ a joꞌrajoꞌ,
rajiꞌ u wʌcꞌʌs bʌjiriꞌ bajeꞌrer,
rajiꞌ u wʌcꞌʌs bʌjiriꞌ saman xan.
9 Mʌꞌ a yʌn cʌniquex a baꞌ a cu naj tus camsicob mac tiꞌ u Cꞌuj.
Jach manan tsoy caꞌ a quibex a baꞌ cu yaꞌaric Cꞌuj soc u chichquintic a worex Cꞌuj,
quireꞌ a Cꞌujoꞌ u yajechex.
Mʌꞌ ja wirej,
mʌꞌ a yʌn cʌniquex a yaꞌab baꞌ an ten bic cu tus camsicob tiꞌ mac ich yocꞌor u yoꞌoch a cu janticob.
Quireꞌ mʌꞌ baꞌwir tiꞌ a mac a tiꞌ yʌn a cu cꞌujinticob Cꞌuj.
10 Bajeꞌrer tij cacsex tij corex tiꞌ Cristo a mac jocꞌ u qꞌuiqꞌuer ich cruz.
Chen a sacerdotejoꞌ tiꞌ a quet u tꞌʌnoꞌ,
a uchben tꞌʌnoꞌ,
mʌꞌ cꞌuchaꞌan yorob u yacsicob tu yorob tiꞌ Cristo,
a robob a tiꞌ toy cu sayʌrob tu pach a ray u quet u tꞌʌnoꞌ.
11 Bayiriꞌ xan,
tu qꞌuinin u mucꞌ a quet u tꞌʌnoꞌ,
a uchben tꞌʌnoꞌ,
a tu tsꞌibtaj Moisés uch,
caj cꞌuchij sacerdote,
a jach noꞌjoꞌ tu yʌn u cuchir a raꞌ cu jacꞌʌr yor macoꞌ.
Rajiꞌ a sacerdote,
a jach noꞌjoꞌ cu cꞌuchur yejer u qꞌuiqꞌuer yʌrʌcꞌ,
a quinsaꞌb,
raꞌ quir u rucꞌsic u siꞌpirob u yet winiquirob israel ten Cꞌuj.
Chen u bʌqꞌuer a yʌrʌcꞌoꞌ,
a tsꞌoc u quinsic quir u jocꞌsic u qꞌuiqꞌuer.
A raꞌ bʌqꞌueroꞌ,
caj u puraj ich tancab tu cajar soc u rʌc toꞌquic.
12 Baxucoꞌ,
ic Jaj Tsꞌurirex Jesucristo caj sinij ich cruz ten u winiquirob romano soc u quimij ich tancab tu cajar Jerusalén.
A tiꞌ taroꞌ,
caj jocꞌ u wʌcꞌʌs qꞌuiqꞌuer soc a Cꞌujoꞌ caj u jawsaj u siꞌpirob a mac tan u tocar ten Cꞌuj.
13 Rajen caꞌ ij cacsex tij corex tiꞌ ic Jaj Tsꞌurirex Jesucristo tan ic sayʌrex tu pach.
Caꞌ ic pꞌʌtiquex u mucꞌ a quet u tꞌʌnoꞌ,
a uchbenoꞌ,
cax cu pꞌasticoꞌonex ij quet winiquirex israel an ten bic caj u pꞌastob Jesús ij quet winiquirex israel.
14 Mʌꞌ ja wirej,
ic toc erex,
a toꞌonexoꞌ,
mʌꞌ ic bin ij cʌjtarex teꞌ ich yocꞌocab munt qꞌuin.
Chen ic toc erex wa rajiꞌ cu bin u yacsicoꞌonex ich caꞌanan munt qꞌuin quireꞌ tij cacsex tij corex.
15 Quireꞌ ic toc erex aroꞌ,
rajen caꞌ ij quibex ic Jaj Tsꞌurirex Jesucristo,
mʌꞌ tan ic pꞌʌtiquex ij cariquex tiꞌ Cꞌuj:
“Bayoꞌ Cꞌuj”,
tan ij quiꞌ tꞌʌntiquex Cꞌuj yejer ij caqꞌuex tu quij cꞌʌꞌotiquex u mucꞌ Cꞌuj.
16 Manenex tu tsoyir tan a yajquintex a mac a otsichʌjob,
caꞌ a yamtex tiꞌ quireꞌ aroꞌ jach tsoy tu wich Cꞌuj.
17 Caꞌ a sʌjtex a tsꞌurirex tu ca muchꞌquintiquex a bʌjex quir a wuꞌiquex u tꞌʌn Cꞌuj.
Caꞌ a quibex a baꞌ cu yaꞌacob tiꞌ techex,
quireꞌ raꞌ u beyajob a tsꞌurirex,
tiꞌ techex,
soc taj ca wacsaj ta worex tiꞌ u tꞌʌn Cꞌuj.
Robob bin u caꞌ u toc nuncob tiꞌ Cꞌuj quireꞌ a pixamex.
Manenex tu tsoyir soc mʌꞌ u tucriquechex a tsꞌurirex soc quiꞌ yorob quireꞌ techex.
Quireꞌ wa mʌꞌ a manex tu tsoyir an bic caj u camsechex a tsꞌurirex,
mʌꞌ baꞌwir tiꞌ yaj yubicob.
18 Tꞌʌnex Cꞌuj tiꞌ toꞌonex.
Mʌꞌ ja wirej,
ij querex tan ic manex tu tsoyir.
Bayiriꞌ xan,
tan ic pachtiquex soc rajraꞌ quic manex tu tsoyir.
19 A tenoꞌ in jach cꞌat caꞌ a tꞌʌnex Cꞌuj caꞌ chabʌquen caꞌ sutnʌquen soc tabar in wiriquechex.
Cu tꞌʌnic u bʌjob
20 Rajiꞌ,
ij Cꞌujirex,
a cu yamticoꞌonex,
soc tiꞌ yʌn ij corex.
Rajiꞌ tu wʌcꞌʌs ricꞌsaj ic Jaj Tsꞌurirex tu quimirir.
Rajiꞌ cu cʌnantic toꞌonex irej a mac a cu cʌnantic u yʌrʌcꞌ tʌmʌn yuc.
Mʌꞌ ja wirej,
a Jesúsoꞌ,
caj u cꞌubaj u bʌj caꞌ quinsac quir u jocꞌar u qꞌuiqꞌuer.
Rajen toc nupꞌaꞌan a baꞌ tsꞌibaꞌan ich u tꞌʌn Cꞌuj uch,
soc bajeꞌrer tiꞌ yʌn a quet u tꞌʌnoꞌ,
a ricꞌben tꞌʌnoꞌ.
21 A tenoꞌ quin pachtic u tsꞌic tiꞌ techex Cꞌuj tu cotor a baꞌ jach tsoy,
soc caꞌ a betex a baꞌ u cꞌat Cꞌuj.
Caꞌ ic tsꞌiquex ic pixamex quir ij quiꞌquintiquex u yor Cꞌuj yejer Jesucristo xan,
caꞌ ic betex a baꞌ u cꞌat Cꞌuj,
caꞌ ij caremquintej u cꞌabaꞌ munt qꞌuin.
Jeroj.
22 A tenoꞌ caj in chich cꞌataj techex in wet acsʌꞌorirex caꞌ a quibex u tꞌʌn Cꞌuj.
Mʌꞌ neyaꞌab caj in tsꞌibtaj techex,
rajen mucꞌ techex a baꞌ tin chich araj techex.
23 Tan in waꞌaric caꞌ a najtex wa cu chaꞌbʌr Timoteo ij quet acsʌꞌorirex tu cu maꞌcʌr winicob.
Wa seb cu cꞌuchur Timoteo tu yʌnen,
quet caꞌ bin taquenob tu yʌnechex quir in wiric techex.