A JEꞌ JUꞌUNAꞌ CAJ U TSꞌIBTA PABLO TIꞌ FILEMÓN
A Pablojoꞌ tu tsꞌibtaj tiꞌ Filemón
1
A tenoꞌ Pablojen,
quin tsꞌibtic tech Filemón.
Toc chucaꞌanen ten u winiquirob romano,
Filemón,
quireꞌ u yajir u jach tsoyir u tꞌʌn Jesucristo.
A jeꞌ juꞌunaꞌ quin tsꞌibtic tech Filemón pꞌerir yejer Timoteo,
quin tsꞌibtiquech.
Ic jach yajex ic bʌj yejer Timoteo,
Filemón.
Mʌꞌ ja wirej,
a techoꞌ ij quet beyajech,
Filemón.
2 A jeꞌ juꞌunaꞌ,
tan in tsꞌibtic,
quir in tꞌʌnic a mac a cu yocar cꞌayobeꞌ ich a watoch,
Filemón.
Baxuc quin tꞌʌnic a xquicoꞌ,
Apia,
u cꞌabaꞌ xquic,
quireꞌ rajiꞌ in wet acsʌꞌorir.
Tan in tꞌʌnic xan Arquipo in wet acsʌꞌorir,
Arquipo.
Mʌꞌ ja wirej,
cu yamtiquenob tu quic tsecꞌtic u tꞌʌn Cꞌuj uch ich u cajar Efeso.
Tu yʌnechex bajeꞌrer.
3 Ij cꞌat,
caꞌ u yamtechex,
quireꞌ cu yajquintiquechex ic Tetex Cꞌuj yejer ic Jaj Tsꞌurirex Jesucristo.
In cꞌat caꞌ quiꞌac a worex tiꞌ ic Tetex Cꞌuj yejer ic Jaj Tsꞌurirex Jesucristo.
Cu yaꞌaric Pablo bic tabar Filemón caj u yajquintaj u racꞌob
4 A tenoꞌ,
quij Pablo,
suꞌsuꞌ quin tꞌʌnic Cꞌuj.
Quin waꞌaric tiꞌ Cꞌuj:
“Bayoꞌ Cꞌuj,
quireꞌ tu yacsa tu yor Filemón.”
Baxuc quin wac tiꞌ Cꞌuj caꞌ bin in tꞌʌnej Cꞌuj.
5 Quireꞌ caj in wuꞌyaj,
mun caj a yajquinta Jesucristo,
quet bayiriꞌ a racꞌob caj a yajquintaj.
Baxuc tech Filemón,
caj in wuꞌyaj taj ta wacsa ta wor u tꞌʌn Cꞌuj.
6 Rajen quin tꞌʌnic Cꞌuj caꞌ a quiꞌ najtex bic jach manan caj u yamtaj techex Jesucristo.
Bayiriꞌ ten caj u yamten.
Quireꞌ tech Filemón wa ber caj a tsecꞌtaj u tꞌʌn Cꞌuj tiꞌ a racꞌob,
Filemón caj u quibob u tꞌʌn Cꞌuj quireꞌ tan yacsicob tu yor.
7 Jach quiꞌ in wor,
quireꞌ caj in wuꞌyaj caj a jach yajquint a yacsmʌnob tu yorob Filemón quireꞌ tan a quiꞌquintic u yorob,
rajen caj in wuꞌyaj aroꞌ,
tan a chichquintic in wor Filemón xan.
Pablo cu cꞌatic tiꞌ Filemón caꞌ u yamt a cꞌurew Onésimo
8 Rajen quin tsꞌibtic tech juꞌun Filemón,
quir in chich cꞌatic tech.
Caꞌ a yam ten Filemón.
Quireꞌ caj u tuchiꞌten ic Jaj Tsꞌur Jesucristo,
rajen tsoy caꞌ in cꞌatej tech soc a yamtiquen.
9 Chen quin cꞌatic tech quireꞌ tech ta yajquinta Cristo,
rajen in wer jeꞌ a yamtiqueneꞌ.
Mʌꞌ ja wirej,
bajeꞌrereꞌ nuxiben,
quireꞌ u cꞌʌrʌmʌnenob u winiquirob romano quireꞌ tin tsecꞌta tiꞌob u tꞌʌn Cristo Jesús.
10 Quin chich aric tech Filemón caꞌ a yamt a cꞌurew uch Onésimo.
Mʌꞌ ja wirej,
caj yubaj in tsecꞌt u tꞌʌn Cꞌuj caj u yacsa tu yor u tꞌʌn Cꞌuj,
rajen in parar Onésimo.
Mʌꞌ ja wirej,
caj yub in tsecꞌt u tꞌʌn Cꞌuj Onésimo tu cꞌʌraꞌanen ich u winiquirob romano.
11 A uchoꞌ Filemón,
caj a waꞌaraj mʌꞌ baꞌwir tech a cꞌurew Onésimo.
Caj a waꞌaraj uch:
“Jot.”
Chen a bajeꞌrereꞌ tu yacsa tu yor u tꞌʌn Cꞌuj,
Onésimo.
Rajen tsoy,
caꞌ u yamtech Onésimo,
Filemón,
quireꞌ a bajeꞌrereꞌ tu yamtiquen Onésimo.
12 A bajeꞌrereꞌ,
tar u caꞌ,
Onésimo,
caꞌ bin in tuchiꞌtej Onésimo,
Filemón.
Quiꞌ acsej Onésimo ich a watoch Filemón quireꞌ in jach yaj Onésimo.
13 A uchoꞌ,
in jach cꞌat in wirej u pꞌatʌr Onésimo tin wicnʌn caꞌ u yamten Onésimo quireꞌ u chucmʌnen u winiquirob romano caj in tsecꞌtaj u tꞌʌn Cꞌuj uch.
Mʌꞌ ja wirej,
a techoꞌ,
tin wiraj Filemón mʌꞌ cꞌuchaꞌan a wor a yamten tub u chucmʌnen u winiquirob romano quireꞌ nach yʌnech a techoꞌ.
Rajen in chen cꞌat u pꞌatʌr Onésimo tu yʌnen.
14 Cax in jach cꞌat in wir u pꞌatʌr Onésimo tu yʌnen,
chen mʌꞌ in cꞌat in wirej wa cu pꞌatʌr Onésimo wa mʌꞌ tsoy ta tꞌʌn tech Filemón.
In cꞌat quet a wor yejer Onésimo.
15 A uchoꞌ caj a tucraj mʌnaꞌ Onésimo,
caj u putsurech,
jaj ix tʌco tsoy tu tꞌʌn Cꞌuj caj u putsꞌurech.
Bajeꞌrer wʌcꞌʌs tar u caꞌ tu yʌnech soc rajraꞌ cu bin beyaj tech.
16 Caꞌ bin uruc a cꞌurew Filemón,
mʌꞌ bic a cꞌurewiꞌ caꞌ bin uruquiꞌ quireꞌ tu yacsaj tu yor,
Onésimo.
A bajeꞌrereꞌ Filemón,
a witsꞌin Onésimo,
quireꞌ tu yacsaj tu yor.
Caꞌ a wacsej Onésimo,
an ten bic a mac a jach yajeꞌ.
Quireꞌ a tenoꞌ in jach yajquinta Onésimo xan.
A techoꞌ,
jach manan caꞌ a yajquintej Onésimo,
quireꞌ mʌꞌ chen a cꞌurew,
bayiriꞌ a witsꞌin.
Quireꞌ tu yacsaj tu yor u tꞌʌn Cristo.
17 Uꞌyej,
baꞌ quin waꞌaric Filemón,
wa ca tucric a nupꞌen in wet beyajech caꞌ a quiꞌ acsej Onésimo an ten bic a wacsiquen ich a watoch.
18 Wa tiꞌ yʌn baꞌ caj u tusaraj tech uch cax wa yʌn u berer tech.
Tsꞌibtej ten,
a tenoꞌ jeꞌ in boꞌotiquecheꞌ.
19 A tenoꞌ Pablojen,
tan in tsꞌibtic tin cꞌʌb tan in wac tech Filemón,
jeꞌ in boꞌotic u berer Onésimo techeꞌ.
Chen caꞌ in cꞌase tech Filemón,
cax mʌꞌ in cꞌat in wac tech.
Yʌn a berer,
ten,
quir a cuxtar.
Mʌꞌ wa ta wacsaj ta wor caj a wuꞌyaj in tsicbar tech uch?
20 Rajen quiꞌquintej in wor Filemón in bʌjobech quireꞌ tech ta wacsa ta wor u tꞌʌn Jaj Tsꞌur.
Chichquint in wor quireꞌ baxuc a mac a tu yacsa tu yor cu man yirej caj u chichquintej yor,
rajen caꞌ a jaws u siꞌpir Onésimo.
21 A tenoꞌ in tsꞌibtic tech quireꞌ in wer jeꞌ a wuꞌyic in tꞌʌneꞌ jerereꞌ.
In wer jach manan a wuꞌyic a baꞌ quin cꞌatic techeꞌ.
22 Bayiriꞌ xan,
cʌxtej tuririꞌ chꞌac tu quin wenʌn caꞌ bin taquen,
quireꞌ tan in pajic a Cꞌujeꞌ rajiꞌ cu bin u nunc a tꞌʌnex,
tu ca cꞌatiquex caꞌ u chaꞌ in bin Cꞌuj.
A baywoꞌ jeꞌ in wiriquexeꞌ.
Tsꞌocar u tꞌʌn Pablo tiꞌ Filemón
23 Epafras,
in wet cꞌaraꞌan winic quireꞌ tu tsecꞌtaj u tꞌʌn Cristo Jesús xan.
Rajiꞌ arej caꞌ in quiꞌ tꞌʌnech.
24 Bayiriꞌ xan in wet beyajob,
a cu yamticob in tsecꞌtej u tꞌʌn Cꞌujoꞌ.
Robob Marcos,
Aristarco,
Demas yejer Lucas.
Bayiriꞌ xan cu yaꞌaricob caꞌ in tꞌʌnech.
25 Caꞌ u quiꞌ cʌnantech Jaj Tsꞌur Jesucristo jeroj tsꞌoqui Filemón,
quij Pablo.