A JEꞌ JUꞌUNAꞌ, CAJ U TSꞌIBTA PABLO TIꞌ TITO
Pablo cu tsꞌibtic tiꞌ Tito
1
A tenoꞌ Pablojen,
u cꞌurewen Cꞌuj.
A tenoꞌ Pablojen,
caj u tuchiꞌten Jesucristo,
Tito.
Caj tu tuchiꞌten quir in camsic a mac a tu tetajob Cꞌuj.
A tenoꞌ caj u tuchiꞌten quir in yamtic a mac a tetaꞌanob ten Cꞌuj,
soc u quiꞌ acsicob tu yorob tiꞌ u tꞌʌn Cꞌuj.
A tenoꞌ caj u tuchiꞌten Cꞌuj quir in yamtic tiꞌob soc u quiꞌ najticob u tꞌʌn Cꞌuj soc u quiꞌ cꞌujinticob Cꞌuj.
2 Ca wiric,
a tenoꞌ quin beyaj tiꞌ Cꞌuj,
quireꞌ tan in pajic u qꞌuinin quir in cuxtar munt qꞌuin.
Mʌꞌ ja wirej,
tu toc araj Cꞌuj:
―Jeꞌ in tsꞌic tech a cuxtar munt qꞌuineꞌ.
A Cꞌujoꞌ mʌꞌ ju tus.
Mʌꞌ ja wirej,
tu chꞌic chunin caj u yaꞌaraj Cꞌuj uch:
―Jeꞌ in tsꞌic tech a cuxtar munt qꞌuineꞌ,
quij.
3 A bajeꞌrereꞌ,
caj u toc esa toꞌon Cꞌuj quir ij quiric bic tabar ij cuxtar munt qꞌuin.
Quireꞌ ij cuꞌyaj u tsecꞌtic u tꞌʌn Cꞌuj uch.
Caj u chich araj ten Cꞌuj,
quij Pablo:
―Xen tsecꞌt in tꞌʌn.
Baxuc caj u yaꞌaraj yʌjtaquiroꞌon ten.
4 A jeꞌ juꞌunaꞌ Tito,
tin tsꞌibtech quireꞌ,
Tito,
irech in pararech quireꞌ,
caj a wacsa ta wor u tꞌʌn Cꞌuj,
Tito.
Baxuc tenoꞌ,
quij Pablo.
In cꞌat Tito,
caꞌ u yamtech Cꞌuj ic Tet.
Baxuc xan in cꞌat caꞌ u yamtech Jesucristo ij cʌjtaquir,
Tito.
In cꞌat caꞌ u yajquin tech Cꞌuj,
Tito.
Baxuc Jesucristo.
In cꞌat caꞌ quiꞌac a wor Tito tiꞌ Cꞌuj baxuc tiꞌ Jesucristo,
soc mʌnaꞌ baꞌ ca tucric.
Tiꞌ cu beyaj a Titojoꞌ ich u petenin cꞌacꞌnab. Creta u cꞌabaꞌ
5 Tito,
quen.
Caj in pꞌʌtech ta beyaj ich u petenin cꞌacꞌnab.
Creta u cꞌabaꞌ u petenin cꞌacꞌnab.
Caj in pꞌʌtech ta beyaj Tito soc a toc tsꞌocsic in beyaj soc a quiꞌ tajquintic.
“Bin in caꞌ Tito”,
quen tech.
A techoꞌ quir a tetic u tsꞌurirob ich a wet acsʌꞌorirob tu cu muchꞌquinticob u bʌj.
Caꞌ a tet u jach tsꞌurirob tu cu muchꞌquinticob u bʌj.
Jujuntur u tsꞌurirob,
quireꞌ u tirir tiꞌ u cajar tu cu cꞌayob xan.
6 A mac a bin tetbir ten u bʌjob tu cu cꞌayob Tito.
Arej u tetob a mʌꞌ u pacꞌʌꞌrob u pach ten u racꞌoboꞌ.
Caꞌ u teticob u tsꞌurirob tu cu cꞌayob,
a yʌn tuririꞌ u raqꞌueꞌ.
A yʌn u pararoꞌ,
a tu yacsob tu yoroboꞌ.
A yʌn u pararoꞌ,
a mʌꞌ tan u manob tu cꞌasir,
cax baxuc cu yaꞌaric u racꞌoboꞌ tan u manob tu cꞌasir,
quij.
A yʌn u pararoꞌ a cu quibicob u tꞌʌn u teteꞌ.
7 A mac bin u caꞌ tetbir ten u bʌjob tu cu cꞌayob.
Arej tiꞌob caꞌ u tetob a mac a mʌꞌ u pʌcꞌ u pachob u racꞌoboꞌ.
Quireꞌ robob cu bin tetbir quir u beyaj yejer Cꞌuj.
Caꞌ u tetob a mʌꞌ seb cu pꞌujur u yoroboꞌ.
A mac a mʌꞌ ju tucrej tu yorob:
―Jach caremen,
a tenoꞌ.
Mʌꞌ u yʌn teticob a cu carchʌjʌreꞌ.
A mʌꞌ ju pꞌuse yorob u racꞌobeꞌ.
A mʌꞌ ju nepachtob u taqꞌuin u racꞌobeꞌ.
8 Rajen arej u tetob a cu man tu tsoyir,
a cu bin ocar tu tsꞌurir tu cu cꞌayob.
Ar u cʌxtob a mac a nanij u yacsic mac tu yatocheꞌ.
Cʌxt a mac a tu cʌna Cꞌujoꞌ.
Cʌxt a mac a nemʌꞌ biquiꞌ.
Cʌxt a mac a cu cʌnantic u bʌj tiꞌ a cꞌasoꞌ.
9 Cʌxt a tetej a mac a cu quiꞌ cʌnantic u tajir u tꞌʌn Cꞌuj.
A mac a cu man u chiquint u yorob u racꞌoboꞌ.
A cu camsic u tajir ich u tꞌʌn Cꞌuj,
cax pꞌastaꞌb ten mac,
an bic camsaꞌb a tiꞌoboꞌ.
Tan u camsic tiꞌob a baꞌ taj tiꞌ u tꞌʌn Cꞌuj.
Bayiriꞌ,
a cꞌuchaꞌan yor u yesic u tꞌʌn Cꞌuj tiꞌ a mʌꞌ u quibicob u tꞌʌn Cꞌuj.
Cax cu chen nunquicob u tꞌʌn Cꞌuj.
Jaj ix tʌcoj cu cꞌaxicob tu yorob u tucurob tiꞌ u tꞌʌn Cꞌuj a mʌꞌ tu quibob u tꞌʌn Cꞌuj,
jaj ix tiꞌ jeꞌ u quibicob u tꞌʌn Cꞌuj xaneꞌ.
10 A baywoꞌ arej tiꞌob caꞌ u tetob u tsꞌurir an ten bic tin waꞌaraj tech.
Mʌꞌ ja wirej,
yʌn yaꞌab mac mʌꞌ tan u quibicob u tꞌʌn Cꞌuj.
Tan u chen tꞌʌnob.
Mʌꞌ ju tucrob a baꞌ cu man yaꞌarob.
Tan u tusaricob tiꞌ u racꞌob.
Baxucoꞌ aroꞌ mʌꞌ taj u tsicbar ich u winiquirob judíojiꞌ.
11 Rajen arej tiꞌ u tsꞌurir a wet acsʌꞌorirob a tetaꞌb ten u bʌjoboꞌ caꞌ u yaꞌarej tiꞌob:
―Caꞌ u nupꞌob u chiꞌob.
Mʌꞌ ja wirej,
Tito,
tan u rʌc xaxacꞌticob u tucurob,
a tiꞌ pꞌeriꞌ cʌjricoboꞌ.
Quet yejer u xaxacꞌticob u tucurob,
tan u tus camsicob tiꞌ u tꞌʌn Cꞌuj,
quir u jaricob u taqꞌuin,
cax mʌꞌ taj a baꞌ cu camsicoboꞌ.
12 Cꞌaj tech wa Tito,
a uchoꞌ,
tiꞌ yʌn yʌjtseqꞌuir u tꞌʌn a cu tar ich u petenin Creta,
caj u yaꞌaraj:
―A jin racꞌoboꞌ u bur u qꞌuinin tan u man tus.
A jin racꞌoboꞌ jach cꞌas,
irob bʌcꞌ,
tsꞌic.
A jin racꞌoboꞌ jach coch u nʌcꞌob.
Mʌꞌ jach cꞌorob xan.
13 A baꞌ caj u yaꞌaraj tiꞌ u racꞌob,
yʌjtsqꞌuir u tꞌʌn uch taj,
quen.
Rajen caꞌ a chich qꞌueyob a tiꞌoboꞌ a mac a cʌjaꞌanob ich u petenin Creta,
soc u quibicob a baꞌ jach tsoyoꞌ.
14 Chich qꞌuey a tiꞌoboꞌ soc mʌꞌ ju cʌnicob a baꞌ cu sosoc aricob,
u winiquirob judío.
Quireꞌ aroꞌ,
mʌꞌ taj a cu yaꞌaricoboꞌ.
Arej tiꞌob soc mʌꞌ u yʌn quibicob a mac a tu pꞌuspachtob u tꞌʌn Cꞌuj.
15 Mʌꞌ raꞌ cu pacꞌʌr u siꞌpirob a baꞌ camsaꞌb ten u nunquirob uch.
Mʌꞌ ja wirej,
tu cotor baꞌ tsoy tiꞌ a mac a rucꞌsaꞌb u siꞌpirob ten Cꞌuj.
Chen a mac a mʌꞌ tsoy yorob,
cꞌas cu tucricob.
Rajiꞌ cu pacꞌʌr u siꞌpirob a baꞌ camsaꞌb ten u nunquir.
Quireꞌ mʌꞌ ju yacsob tu yorob quir u rucꞌsicob u siꞌpirob.
Rajen xaxacꞌaꞌan u tucurob.
Rajen mʌꞌ yer bic tabar u manob tu tsoyir.
16 Robob cu tus aꞌaricob:
―In wet manob Cꞌuj.
Chen mʌꞌ ju manob tu tsoyir,
rajen ij quer tus u caꞌob.
Mʌꞌ ja wirej,
robob caj pꞌactaꞌboboꞌ ten Cꞌuj quireꞌ mʌꞌ ju quibicob u tꞌʌn mac.
Rajen mʌꞌ ju cꞌuchur u yorob u manob tu tsoyir.