4
Rajen quin chich aric tech Timoteo quireꞌ Cꞌuj cu yiric baxuc Jesús cu yiric xan.
Quireꞌ raꞌ cu bin tar biqꞌuin quir yiric a mac yʌn u siꞌpir wa mʌnaꞌ u siꞌpir.
Jeꞌ yiric a macoꞌ cuxaꞌanoꞌ bayiriꞌ a mac a quimenoꞌ.
Quireꞌ a wer Timoteo,
caꞌ bin uruc Jesús jeroj bin u caꞌ u reyintej ich yocꞌocab.
2 Rajen caꞌ a tsecꞌt u jach tsoyir u tꞌʌn Cꞌuj.
Cax raꞌ u qꞌuinin tsoy yubic mac cax mʌꞌ raꞌ u qꞌuinin u cꞌat yub a tꞌʌn.
Chichquint a wor a wac tiꞌob,
soc a wesic a baꞌ siꞌpir yʌn tiꞌobeꞌ quir u yaꞌaric tiꞌ Cꞌuj caꞌ jawsac u siꞌpir ten Cꞌuj.
Chich a wac tiꞌob caꞌ u pꞌʌtob a cu pʌyic u siꞌpirob caꞌ a chichquint yorob a mac a cu quibicob u tꞌʌn Cꞌujoꞌ.
Jach nemʌꞌ biquech caꞌ a camsej tiꞌob u tꞌʌn Cꞌuj soc u cʌnicob.
3 Jeꞌ u cꞌuchur tu qꞌuinineꞌ a winicoꞌ,
mʌꞌ u cꞌat yub camsaꞌr u tajir u tꞌʌn Cꞌuj.
Bin u caj manob u cʌxtob u jer yaꞌab yʌjcamsʌyʌjirob hasta cu yubicob tsoy u camsaꞌr.
Mʌꞌ ja wirej,
u cꞌatob yubob camsaꞌr a baꞌ cu pachticob tu yoroboꞌ.
4 Jeꞌ u pꞌuspachticob u jach tsoyir u tꞌʌn Cꞌuj soc u saricob u xiquinob,
a baꞌ camsaꞌb ten u nunquir uchoꞌ.
Rajen chen tꞌʌn u caꞌob uch.
5 Barej a techoꞌ Timoteo,
quiꞌ cʌnant a pixam tu cotor baꞌ a cu bin taroꞌ.
Caꞌ a mucꞌtej wa cu tar u chuquicob a pach.
Quireꞌ raꞌ a beyaj a techoꞌ,
quir a tsecꞌtic u jach tsoyir u tꞌʌn Cꞌuj.
Quiꞌ tsecꞌt u tꞌʌn Cꞌuj,
soc tu cotor mac yer bic tabar u taquicob u bʌj.
6 Tabar in quinsaꞌr an ten bic quinsbir yʌrʌcꞌ a cu sijic tiꞌob Cꞌujoꞌ.
Cꞌuchij tu qꞌuinin in quinsaꞌr tiꞌ u yajir u beyaj Cꞌuj.
7 Tsꞌoc in beyaj.
Tin quiꞌ quibaj tu cotor a baꞌ yaraj ten Cꞌuj uch.
8 Rajen mʌꞌ in pꞌʌt in wacsic tin woriꞌ.
Bajeꞌrer quireꞌ cu yiric taj tin quibaj a Jesúsoꞌ,
soc u tsꞌic ten u boꞌorir tu manen tu tsoyir.
Raꞌ cu bin tsꞌa ten caꞌ bin xuruc tꞌʌn,
quireꞌ taj cu yiric baꞌquiriꞌ yʌn toꞌon.
Mʌꞌ chen ten cu bin tsꞌaꞌbʌriꞌ.
Baxuc bin u caꞌ u tsꞌaꞌbʌr tiꞌ a mac a tan u quiꞌ pajic u qꞌuinin caꞌ bin uruc Jesús.
Tsꞌoc u tꞌʌn Pablo tiꞌ Timoteo
9 Caꞌ taquech tin wicnʌn.
Seb a tar.
10 Quireꞌ tu xunpꞌʌten Demas.
Mʌꞌ ja wirej,
rajiꞌoꞌ caj u yajquint a baꞌ yʌn teraꞌ yocꞌocab,
rajen caj putsꞌij ich u cajar Tesalónica.
Bin Crescente ich u ruꞌumin Galacia.
A Titojoꞌ,
bin tu ruꞌumin Dalmacia.
11 Chen tiꞌ yʌn tin wicnʌn Lucas.
Caꞌ bin taquech,
toc pʌyej Marcos xan,
quireꞌ cꞌuchaꞌan yor u yamtiquen tin beyaj.
12 Tin tuchiꞌtaj caꞌ xic Tíquico ich u cajar Efeso.
13 Caꞌ bin taquecheꞌ,
toc chꞌa a pure ten u caꞌ yarir in nocꞌ,
a tin pꞌʌtaj quireꞌ tubten ich yatoch Carpo ich u cajar Troas.
Baxuc a ju cuchij in juꞌuneꞌ in xaquic yejer u juꞌunin a jin catsꞌmʌneꞌ.
A jeꞌ juꞌunaꞌ a jin necꞌateꞌ.
14 A Alejandrojoꞌ a mac yer a betaꞌr mascaboꞌ.
Tu jach cꞌasquinten.
Chen a Cꞌujoꞌ rajiꞌ cu bin u boꞌotic u boꞌorir u cꞌʌb quireꞌ cꞌas tu betaj.
15 A techoꞌ Timoteo,
quiꞌ cʌnant a bʌj tiꞌ Alejandroj xanoꞌ.
Quireꞌ tan u jach pꞌactic a baꞌ quij camsiqueꞌ.
16 Raꞌ u qꞌuinin,
caj u yʌn batꞌan ꞌuyij in tꞌʌn tu cu taꞌquicob in joꞌr ʌcʌtan u rey u winiquirob romano.
Mʌnaꞌ in bʌjob tar u yamten quij.
Tu rʌc pꞌʌtenob tin junan.
Quin tꞌʌnic Cꞌuj caꞌ jawsac u siꞌpirob a mac a tu pꞌʌtenoboꞌ.
17 Barej ic Jaj Tsꞌurirex pꞌat tin wicnʌn tan u chichquintic in wor.
Rajen cꞌuchaꞌan in wor in bin in tsecꞌtic tu cotor u tꞌʌn Cꞌuj ʌcʌtan a mac a mʌꞌ u winiquirob judío caꞌ yubob.
Rajen tu taquen soc mʌꞌ u puricob u chiꞌen barum.
18 Cʌnej a jeroj,
Timoteo.
Ic Jaj Tsꞌurirex bin u caꞌ taquiquen tiꞌ a mac a ju cꞌat u cꞌasquintiquenob ten.
Bin u caꞌ u cʌnanten hasta quin cꞌuchur tu ruꞌumin tu cu bin reyintic Cꞌuj ich caꞌanan.
Rajen quin wac tiꞌ:
“Jach caremech Cꞌuj.”
Rajiꞌ quin bin in wac tiꞌ munt qꞌuin.
Jeroj.
Cu chen tꞌʌnic u bʌjob Pablo
19 Quin tꞌʌnic Prisca yejer u mam Aquila u tiririꞌ yʌn,
bayiriꞌ a mac tiꞌ yʌn tu yatoch Onesíforo.
20 A Erastoeꞌ tiꞌ pꞌat tu cajar Corinto.
Yajij Trófimoj rajen pꞌat tu cajar Mileto.
21 Wa ber caꞌ bin taquech tin wicnʌn,
mʌꞌ a yʌn tar u qꞌuinin queꞌer.
Yaꞌaraj Eubulo caꞌ in tꞌʌnech.
Baxuc Pudente yejer Lino yejer Claudia yejer tu cotor ic bʌjobex.
22 Quin tꞌʌnic ic Jaj Tsꞌurirex Jesucristo caꞌ u quiꞌ cʌnantech tub yʌnech.
Bayiriꞌ quin cꞌatic tiꞌ Cꞌuj caꞌ u yamtej tu cotor mac tub yʌnech.
Jeroj,
tsꞌoquij,
quij Pablo.