Bic tabar a winicoꞌ caꞌ bin cꞌuchur tu qꞌuinin xur tꞌʌn
3
Cꞌʌꞌotej a baꞌ quin wac tech Timoteo.
Raꞌ u qꞌuininoꞌ tabar u xur tꞌʌn jach pajar u mucꞌyajob cu bin yubejob.
2 Raꞌ u qꞌuininoꞌ yaꞌab mac cu chen bin u cʌxt u taqꞌuinob.
Cu chen bin u cʌxt a baꞌ cu quiꞌquinticob u yorob.
U wʌcꞌʌs bʌjiriꞌ cu chen tucric mʌꞌ ju tucrej Cꞌuj.
A baywoꞌ rajraꞌ yacob mun u yaꞌabir u baꞌtac yʌn a tiꞌoboꞌ.
Mʌꞌ ja wirej,
u cꞌat caꞌ u tubsej yorob a mac a mʌnaꞌ u baꞌtʌcob.
Seb cu bin u pꞌasticob Cꞌuj,
baxuc xan bin u caꞌ pꞌasticob yet xibir xan.
3 Mʌꞌ ju bin yub u tꞌʌn u nʌꞌ mʌꞌ ju bin yub u tꞌʌn u tet xan.
Mʌꞌ ju bin yaꞌarej:
“Bayoꞌ.”
Rajraꞌ u tsꞌicob quireꞌ mʌꞌ yacsmʌnob tu yorobiꞌ.
Mʌꞌ ju bin yajquintob mac.
Chen choc yorob,
chen amaꞌan u sistar yorob.
Seb cu pʌqꞌuicob u pach u jer.
Mʌꞌ ju cꞌuchur u yorob u maꞌquinticob a baꞌ cꞌasir cu pachticob.
Mʌꞌ ju bin u yajquintob a baꞌ tsoyoꞌ.
Mʌꞌ quiꞌ yorob yiricob a mac jach tsoyoꞌ.
Seb cu bin cꞌuchurob mac soc u quinsaꞌrob.
4 Mʌꞌ ju tucrob a baꞌ cu tsicbaroboꞌ baxuc a baꞌ cu yiricob.
Cu chen tucricob tu yorob:
“Jach caremenob”,
quij,
cax mʌꞌ caremobiꞌ.
Cu chen pachticob tu yorob a cꞌasoꞌ,
chen mʌꞌ ju bin u yajquintob Cꞌuj.
5 Wa mac cu yiricobeꞌ cu tus cꞌujinticob Cꞌuj.
Barej mʌꞌ ju quibob Cꞌuj.
Barej mʌꞌ ja manob Timoteo yejerob.
6 A baxucoꞌ a raꞌ u qꞌuininoꞌ,
jeꞌ u tar mac quir u tabsaꞌr mac.
Bin u caꞌ manob u tus camsicob u tꞌʌn Cꞌuj soc u tus acsic tu yatoch xquic.
Rajen cu tus camsicob baꞌ soc u quibicob xquic a mʌꞌ chich u yoroboꞌ.
Ca wiric a xquicoꞌ jach chich u joꞌrob.
A jeꞌ xquicaꞌ u jach tsꞌurir u cꞌasir a cu pachticob tu yoroboꞌ.
Rajen jach yʌn u siꞌpirob.
7 A jeꞌ xquicaꞌ,
rajraꞌ u chen cꞌat u cʌnicob u tꞌʌn a baꞌ tsoy tu xiquinob.
Yubicob rajen mʌꞌ ju cꞌʌmob u tꞌʌn Cꞌuj a baꞌ jach tajoꞌ.
Mʌꞌ ju cꞌuchur yorob tiꞌ.
8 Cꞌʌꞌotej Timoteo tu qꞌuinin a tiꞌ yʌn ic nunquir Moisés uch.
Yʌn caꞌtur xib,
a tu pꞌastob Moisés xan uch.
Janes u cꞌabaꞌ tuririꞌ,
yejer u jer u cꞌabaꞌ Jambres.
Baxuc xan a yʌjtus camsʌyʌjirob a tin waꞌaraj tech,
caj u pꞌastob u jach tsoyir u tꞌʌn Cꞌuj.
A jeꞌ u tus ʌjcamsʌyʌjirob jach manan cꞌasir u tucurob.
Mʌꞌ ja wirej,
Timoteo,
tu tus acsob tu yorob u tꞌʌn Cꞌuj.
9 Cꞌaj tech uch Timoteo,
baꞌ u berob tiꞌ Janes yejer Jambres a caj u pꞌastob Moisés?
Caj irir ten tu cotor u winiquirob judío mʌꞌ cꞌuchij yorob tiꞌ Moisésiꞌ.
Raꞌiriꞌ cu bin yirob tu cotor mac bic tu tusarob tiꞌ mac a tus yʌjcamsʌyʌjirob tu yʌnech.
Tabar yiricob tu cotor mac a tus yʌjcamsʌyʌjirob mac.
Pablo caj u chich araj tiꞌ Timoteo
10 Chen a techoꞌ Timoteo,
caj a cꞌʌm u tꞌʌn Cꞌuj a tin camsech uch.
Tan a quiꞌ quibic a techoꞌ.
Ta wiraj bic tabar in cuxtar tu yʌnech uch.
Ta wiraj bic caj in pꞌis in bʌj tin beyaj.
Ta wiraj bic caj in wacsaj tin wor.
Ta wiraj mʌꞌ jin bʌbʌ pꞌʌte in beyajiꞌ.
Tech ta wira nemʌꞌ biqueniꞌ.
Tech ta wira caj in yajquintaj tu cotor mac.
11 Tech ta wiraj quireꞌ tin tsecꞌtaj u tꞌʌn Cꞌuj tiꞌ yʌnech caj u chucob in pach.
A techoꞌ Timoteo,
ta wiraj baꞌ in ber a tenoꞌ ich u cajar Antioquia yejer u cajar Iconio yejer u cajar Listra.
A wer jach manan tu chucob in pach.
Barej tu taquen Jaj Tsꞌur.
12 Cꞌʌꞌotej a jeꞌ tꞌʌnaꞌ.
A mac a jach manan u cꞌat u quiꞌ cʌnej Cꞌuj soc u quiꞌ sayʌr tu pach quir u cʌnic u tꞌʌn Jesucristo.
Jeꞌ u mucꞌyajtiqueꞌ,
quireꞌ bin u caꞌ chucbirob u pach ten u racꞌob.
13 Barej a mac jach cꞌasoꞌ yejer a mac u tusarbaroꞌ,
bin u caꞌ man tu cꞌasir hasta jach manan u cꞌasirob.
A mac cu tusaricob,
u wʌcꞌʌs bʌjiriꞌ cu yʌn bin tusarbir tiꞌ.
14 Barej uꞌyej bar quin wac tech Timoteo.
Caꞌ a chichquint a wor a baꞌ ta cʌnaj.
Ta toc acse ta wor tiꞌ,
quireꞌ taj aroꞌ.
Quireꞌ a wer mac tu camsech uch a tsoy yoroꞌ.
15 Quireꞌ toc chichanech caj a cʌnaj u tꞌʌn Cꞌuj,
rajen a neꞌer u tꞌʌn Cꞌuj quireꞌ caj a quibaj u tꞌʌn Jesucristo caj.
Mʌꞌ ja wirej,
u tꞌʌn Cꞌuj a tsꞌibaꞌanoꞌ,
cꞌuchaꞌan yor u camsic mac soc u quibic soc u yacsic tu yor tiꞌ Cristo Jesús.
16 Cꞌʌꞌot a jeroꞌ Timoteo.
Tu cotor a baꞌ yarmʌn Cꞌuj tiꞌ tsꞌibaꞌan ich u tꞌʌn Cꞌuj soc u camsicoꞌon a baꞌ caꞌ ij quibej.
Tiꞌ tsꞌibaꞌan quir ij cꞌaxic ij cor.
Tiꞌ tsꞌibaꞌan quir u chich aric toꞌon soc ic man tu tsoyir.
Tiꞌ tsꞌibaꞌan quir u chich aric toꞌon soc mʌꞌ jic bin tu cꞌasir.
17 A Cꞌujoꞌ tu tsꞌaj toꞌon u tꞌʌn,
soc cꞌuchaꞌan ij cor ic beyaj tiꞌ Cꞌuj.
Rajen ic neꞌer baꞌ u cꞌat Cꞌuj soc ic man tu cotor tu tsoyir.