Caꞌ u cʌnej bajen soldado tiꞌ Jesucristo
2
A techeꞌ in pararech Timoteo quireꞌ caj a quib u tꞌʌn Cꞌuj caj in tsecꞌtech uch.
Caꞌ a chaꞌej Cꞌuj caꞌ u chichquint a wor quireꞌ tu yamtech caꞌ a wacsej ta wor u tꞌʌn Cristo Jesús.
Tu yamtajech quireꞌ u yajech.
2 Cꞌʌꞌotej Timoteo,
in tꞌʌn caj in tsecꞌtaj uch ʌcʌtan yaꞌab winic.
A tꞌʌnoꞌ a ta wuꞌyaj uch caꞌ a camsej tiꞌ u jer winic,
a mac a tu jach quib u tꞌʌn Cꞌuj xan.
A pꞌeriꞌ yoroboꞌ tiꞌ u beyaj Cꞌuj.
Camsej tiꞌob a tsoy yoroboꞌ soc u caꞌ camsic tiꞌ u jer winic.
Camsej tiꞌob a mac cꞌuchaꞌan yorob u wʌcꞌʌs camsicob tiꞌ u jer winic.
3 A techoꞌ Timoteo chichquint a wor quir a mucꞌyaj.
Mʌꞌ ja wirej,
caꞌ a mucꞌtej an bic u mucꞌtic soldado soc jach tsoyech u soldadojech Jesucristo.
4 Mʌꞌ ja wirej,
a mac a cu yocar soldado mʌꞌ ju bin yir u cor.
Bayiriꞌ a baꞌ yʌn tu yatoch.
Quireꞌ u cꞌat u quiꞌquintic u yor u jach tsꞌurir soldado.
Baxuc toꞌon tiꞌ ij Jaj Tsꞌurirex xan.
5 Bayiriꞌ xan a mac a cu chich acaboꞌ.
Caꞌ u quiꞌ cꞌʌne yacab an ten bic tsꞌibaꞌan tu juꞌunin.
Wa mʌꞌ ju cꞌʌne yacab baxucoꞌ mʌꞌ u chiꞌ u jer a yet chich acabeꞌ.
Cax cu yʌn cꞌuchur pʌyber.
Mʌꞌ tiꞌ binij quir u cꞌʌmic a baꞌ cu bin sijbir tiꞌ.
Baxuc toꞌon tiꞌ ic Jaj Tsꞌurirex.
Caꞌ ij quib u tꞌʌn soc u quiꞌ acsic toꞌonex.
6 Baꞌiriꞌ xan,
a mac a cu jach pʌqꞌuic a coroꞌ,
quireꞌ chich beyanʌjij tsoy caꞌ u yʌn batꞌan jantej a baꞌ tu pʌcꞌaj.
Cax mʌꞌ rajiꞌ yʌnin u cor.
Tsoy u chan ber jantic.
Baxuc toꞌon tiꞌ ic Jaj Tsꞌurirex.
Caꞌ chich beyanʌcoꞌon tiꞌ soc u tsꞌic toꞌon a baꞌ u cꞌat Cꞌuj soc yʌn baꞌ toꞌon ich caꞌanan.
7 Rajen quiꞌ tucrej Timoteo a baꞌ quin wac tech.
Mʌꞌ ja wirej,
a Jaj Tsꞌur Cꞌujoꞌ bin u caꞌ yam tech caꞌ a najtej tu cotor baꞌ.
8 Cꞌaj tech Timoteo tiꞌ Jesucristo a ricꞌsaꞌb ich u quimrir ten Cꞌuj quireꞌ cuxaꞌan bajeꞌrer.
Cꞌaj tech xan rajiꞌ u chꞌic mam a Davidoꞌ u nunquir Jesús.
A Davidoꞌ rajiꞌ tu reyintaj tu ruꞌumin Judea uch.
Baxuc tin tsecꞌtaj tiꞌ mac tu cotor quireꞌ jach tsoy a jeꞌ tꞌʌnaꞌ.
9 Mʌꞌ ja wirej,
quireꞌ tin tsecꞌtaj a jeꞌ u tsoyir u tꞌʌn Cꞌuj caj u chuquenob u winiquirob romano.
Tan in mucꞌyaj quireꞌ cꞌʌraꞌanen tu cu maꞌcʌr winic,
iren a mac jach cꞌas.
Cax cꞌʌraꞌanen,
u tꞌʌn Cꞌuj mʌꞌ cꞌʌraꞌan.
Tan u manob u jumintob u tꞌʌn Cꞌuj.
10 Rajen tu cotor baꞌ quin mucꞌtic quir in yamtic a mac a yacsmʌnob tu yorob,
quireꞌ robob tetaꞌb ten Cꞌuj.
A mac a yacsmʌnob tu yorob jeꞌ yiricob bic tabar in mucꞌtic,
jeꞌ u chichtar u yorob.
Tan in mucꞌtic soc pꞌeriꞌob.
A baywoꞌ,
bin u caꞌ tacbirob rajen bin u caꞌ pʌybirob ten Cristo Jesús soc munt qꞌuin tiꞌ yʌnob tu yicnʌn.
Robob bin u caꞌ u yamtob Cꞌuj tu cu bin u reyintej Cꞌuj.
11 A jeꞌ tꞌʌn a quin tsꞌibtic tech Timoteo jach taj.
Rajen caꞌ ij cacsej tij cor tiꞌ.
Uꞌyej baꞌ cu yaꞌaric tech:
Quet bayiriꞌ quimoꞌonex yejer Cristo caj quimij ich cruz,
baxuc cu yiricoꞌonex Cꞌuj.
Quet bayiriꞌ cuxaꞌanoꞌonex yejer Cristo,
caj riqꞌuij,
baxuc cu yiricoꞌonex Cꞌuj.
12 Wa quic mucꞌyajex tiꞌ u tꞌʌn Cꞌuj quic bin ic reyintiquex yejer Cꞌuj.
Wa quij cariquex mʌꞌ ij querex Cristo an ten bic ij cʌjtaquirex,
baxuc xan bin u caꞌ yaꞌarej toꞌonex mʌꞌ yeroꞌonex macoꞌonex xan caꞌ bin xicoꞌonex ʌcʌtan Cꞌuj.
13 Wa toꞌonex tic pꞌuspachtex tu tij cacsajex tij corex,
a tiꞌoꞌ mʌꞌ ju pꞌuspachtoꞌonex mʌꞌ biqꞌuin.
Baxuc cu yaꞌaric Cꞌuj.
Mʌꞌ u cꞌax u tꞌʌn a Cꞌujoꞌ a baꞌ tu toc aroꞌ.
Rajiꞌ irir jach tsoy ten Cꞌuj
14 Timoteo quen.
Cꞌasej tiꞌob a baꞌ tin chich araj tiꞌ u tꞌʌn Cꞌuj.
Arej tiꞌob wa ʌcʌtan tu wich Cꞌuj mʌꞌ ju nuncob u tꞌʌn mac.
Mʌꞌ ja wirej,
aroꞌ mʌꞌ ju yamtej mac quir u cʌnic Cꞌuj,
cu chen choquintic u yorob a mac a cu yubicob u nunquicob u tꞌʌn.
15 Quiꞌ sar a xiquin Timoteo caꞌ a quiꞌ cʌn u tꞌʌn Cꞌuj soc rajiꞌ Cꞌuj cu bin u yac tech:
―Jach tsoyech Timoteo quireꞌ ta quiꞌ quibaj a baꞌ tin waꞌaraj tech.
Jeꞌ u yac tech aroꞌ wa taj ca tsecꞌtic u tꞌʌn Cꞌuj a baꞌ jach taj.
Rajen mʌꞌ a chꞌic suraquir tiꞌ a beyaj.
Rajen pꞌis a bʌj ta beyaj.
16 Quiꞌ cʌnat a bʌj tiꞌ a mac a cu nunquicob u tꞌʌnob.
Quireꞌ tꞌʌntꞌʌnan u caꞌob.
Baxuc u tꞌʌnob quireꞌ mʌꞌ ju sʌjtob Cꞌuj,
rajen tan u manob ich cꞌas hasta cu wayʌr jach cꞌas.
17 A baꞌ cu camsicob ir a iqꞌuer u caꞌoꞌ.
Mʌꞌ ju xur u man hasta chꞌejar mac.
Cꞌʌꞌotej Himeneo yejer u racꞌob Fileto.
Quireꞌ irej iqꞌuer u caꞌ u camsicob.
18 Robob caj u pꞌʌtob u camsicob u tajir u tꞌʌn Cꞌuj.
Tan u camsicob a baꞌ jach cꞌas,
quireꞌ yʌn jun yarob a yacsmʌnob tu yorob tu quibob a baꞌ camsaꞌbob.
Mʌꞌ ja wirej,
camsaꞌbob tsꞌoc u riqꞌuirob mac tu quimen.
Caj u camsaꞌbob mʌꞌ u yʌn yʌn wʌcꞌʌs riqꞌuir mac tu quimen.
Rajen a macoꞌ tu pꞌʌtob u tꞌʌn Cꞌuj.
19 Chen mʌꞌ a chꞌic sajquir Timoteo,
tiꞌ a mac a cu tus camsicob a ray tꞌʌnoꞌ.
Chichquint a wor,
quireꞌ a mac a cu yacsicob tu yorob tiꞌ u tꞌʌn Cꞌuj mʌꞌ ju chꞌejar quireꞌ caj u yaꞌaraj Cꞌuj.
Mʌꞌ ja wirej,
toc tsꞌibaꞌan ich u tꞌʌn Cꞌuj uch a cu yaꞌaric:
“A Cꞌujoꞌ yer a mac a cu yaꞌaric:
A tenoꞌ in wer Cristo.
Rajen caꞌ u pꞌʌtej tu cotor u cꞌasiꞌ.
A baywoꞌ Cꞌuj yer mac tu quibajiꞌ.”
20 A toꞌonexoꞌ a tij cacsex tij corex tiꞌ yʌn yaꞌab toꞌonex,
barej u tiriꞌ tiꞌ ic beyajex.
Mʌꞌ ja wirej,
a toꞌonexoꞌ iroꞌonex u rʌquir yoꞌoch ich jach carem naj.
Tu japnin naj cu cꞌʌnicob u rʌquir a betaꞌb tiꞌ oro wa betaꞌb tiꞌ sʌc taqꞌuin.
Tiꞌ yʌn xan,
cu cꞌʌnicob u rʌquir a betaꞌb tiꞌ cꞌʌt wa betaꞌb tiꞌ cheꞌ.
Yʌn u rʌquir cu cꞌʌnicob u qꞌuinin cu chen quiꞌ quiꞌ janʌnob.
U tiriꞌ u rʌquir a rajraꞌ u cꞌʌnicob.
21 Rajen quin wac tech Timoteo,
quireꞌ tech ca camsic tiꞌ u tꞌʌn Cꞌuj.
Mʌꞌ a xactic a bʌj yejer a tus yʌjcamsʌyʌjirob u tꞌʌn Cꞌuj,
soc a Cꞌujoꞌ cu cꞌʌniquech irech u rʌquir betaꞌb tiꞌ oro.
Mʌꞌ ja wirej,
a Cꞌujoꞌ cu cꞌʌnic a mac a tu ricꞌsaj u bʌj tiꞌ cꞌas soc mʌꞌ ju bin tu cꞌasir.
Soc caꞌ bin cꞌuchuc tu qꞌuinin a Cꞌujoꞌ.
Toc cꞌuchaꞌan yor quir u quiꞌ beyaj tiꞌ Cꞌuj.
22 A techoꞌ Timoteo soc baxuquech caꞌ u cꞌʌnech Cꞌuj.
Caꞌ a pꞌʌt a baꞌ ca pachtic ta wor a cꞌasoꞌ an ten bic mac mʌꞌ toy quiꞌ xuruc u baquer cu pachtic cꞌas.
Caꞌ a cʌn u tꞌʌn Cꞌuj soc Cꞌuj cu yamtiquech soc tsoy a wor.
Caꞌ a cʌnej u tꞌʌn Cꞌuj soc mʌꞌ a pꞌusic mac.
Caꞌ a cʌn u tꞌʌn Cꞌuj soc a yajquintic tu cotor mac.
Caꞌ a yajquintej Cꞌuj,
soc taj ca wacsic ta wor.
Cʌxtej u quiꞌtar a wor an ten bic a taj tu yacsaj tu yor u tꞌʌn Cꞌuj,
a mac a cu tꞌʌnicob Cꞌuj.
23 Mʌꞌ a yʌn nunquic u tꞌʌn a mac a mʌꞌ tu cʌnicob Cꞌuj.
Quireꞌ mʌꞌ yer baꞌ u cꞌat Cꞌuj.
Ca wiric cu chen nunquicob tꞌʌn,
a cu pꞌusicob yorob mac.
24 Cꞌʌꞌotej Timoteo a mac a cu beyaj tiꞌ Cꞌuj mʌꞌ ju nunc u tꞌʌn mac.
Mʌꞌ ja wirej,
tsoy cu tꞌʌnic tu cotor mac.
Bayiriꞌ xan,
nemʌꞌ biquiꞌ tu cu camsic u tꞌʌn Cꞌuj.
Mʌꞌ seb cu choquintic u yor mac.
25 Rajiꞌ chanber cu tajquintic a mac a mʌꞌ ju cꞌʌmʌn u tꞌʌn Cꞌuj.
Ca wiric,
mʌꞌ ij querex wa Cꞌuj cu chaꞌbʌr u cꞌaxicob yorob soc u jawʌrob u siꞌpirob quir u yacsicob tu yorob.
26 Jaj ix tʌco wa cu jepsicob yorob tiꞌ a mac a tabsaꞌb ten quisin uch,
soc yerob cꞌanaꞌan ten quisin aroꞌ.
Soc u tocar ten Cꞌuj.