A JEꞌ JUꞌUNAꞌ, CAJ U YɅN BATꞌAN TSꞌIBTA PABLO TIꞌ TIMOTEO
1 TIMOTEO
Timoteo tsꞌibtaꞌb ten Pablo
1
Pablojen a tenoꞌ tuchiꞌtaꞌben ten Cꞌuj,
a mac ij cʌjtaquirex.
Bayiriꞌ xan tuchiꞌtaꞌben ten Jesucristo a mac a quic pajicoꞌ caꞌ ij quirej.
2 Tan in tsꞌibtic tech Timoteo,
a jeꞌ juꞌunaꞌ quireꞌ a techoꞌ u tajir in pararech.
Mʌꞌ ja wirej,
ta wacsaj ta wor u tꞌʌn Cꞌuj caj a wuꞌy in tsicbʌtech.
In cꞌat Cꞌuj caꞌ u yam tech quireꞌ rajiꞌ ic Tetex,
Timoteo.
Quireꞌ in cꞌat Cꞌuj,
ic Tetex,
caꞌ u yajquintech soc mʌnaꞌ baꞌ ca tucric.
Caꞌ quiꞌac a wor ten Cꞌuj soc mʌnaꞌ baꞌ ca tucric quireꞌ Cꞌuj ic Tetex,
yejer Jesucristo ic Jaj Tsꞌurirex xan.
Caꞌ u cʌnant a bʌj Timoteo quireꞌ a baꞌ tus camsaꞌ
3 Cꞌʌꞌotej Timoteo quireꞌ tiꞌ yʌn mac,
mʌꞌ yaꞌab,
cu camsicob u racꞌob ich u racꞌob Efeso.
Chen mʌꞌ u tꞌʌn Cꞌuj tan u camsicob.
Arej tiꞌob,
Timoteo caꞌ u pꞌʌtob u camsicob aroꞌ.
Rajen tin chich araj tech caꞌ pꞌataquech ich u cajar Efeso caj binenoꞌ tu ruꞌumin Macedonia.
4 Yʌn arej tiꞌob a yʌjcamsʌyʌjirob soc mʌꞌ u saricob u xiquinob tiꞌ a baꞌ tu yubob tiꞌ u nunquirob a mʌꞌ tajiꞌ.
Arej tiꞌob caꞌ u rʌc pꞌʌticob a rajraꞌ u xaquicob u tꞌʌn u nunquirob baxuc a tu ju tarob uch.
Mʌꞌ ja wirej,
u jer a cu yubicob a tiꞌoboꞌ cu nunquic u tꞌʌnob.
Tu cotor aroꞌ mʌꞌ ju yamtob caꞌ u najtob u beyaj Cꞌuj.
Chen cu bin u najtob u beyaj Cꞌuj wa ber qꞌuin cu quibicob a baꞌ tsꞌibaꞌan ich u tꞌʌn Cꞌuj.
5 A wer biquin quin chich aric tech caꞌ a chich camsej tiꞌob a jeꞌ tꞌʌnaꞌ?
A jeꞌ tꞌʌnaꞌ quir u yajquinticob u yet acsʌꞌorirob jerer.
A jeꞌ tꞌʌnaꞌ quir u yajquinticob a tiꞌoboꞌ u tajir tu yorob.
Tin chich arej tiꞌob caꞌ u yajquintob u yet acsʌꞌorirob soc jach tsoy u tucurob.
Tan in chich aric tiꞌob caꞌ yajquintacob a tiꞌoboꞌ quireꞌ tu yacsob tu yorob u tꞌʌn Cꞌuj soc taj u yajquintic.
6 Yʌn yʌjcamsayʌjirob,
mʌꞌ yaꞌabiꞌ tu yʌnech.
Tan u tus quiꞌ camsicob a baꞌ tin waꞌara tech sam.
Cu chen nunquicob u tꞌʌnob rajen mʌnaꞌ cu cʌnicob.
7 Aroꞌ tu pachticob u yocarob u camsicob u tꞌʌn Cꞌuj a tsꞌibtaꞌb ten u nunquirob Moisés uch.
Chen mʌꞌ ju najtob a baꞌ cu chich camsicob,
cax yaꞌaricob u neꞌerob u tꞌʌn Moisés.
8 Ic toc er tsoy u tꞌʌn Moisés wa mac u cꞌat u camsic u tꞌʌn Moisés an ten bic Cꞌuj u cꞌat.
9 Jariꞌ caꞌ a najtej a jeꞌraꞌ.
Wa ber caj tsꞌibta u tꞌʌn Cꞌuj Moisés uch caj u tsꞌibtaj tiꞌ a mac a cu manob tu siꞌpirob.
Mʌꞌ ju tsꞌibtaj quireꞌ a mac a cu manob tu tsoyir,
quireꞌ tan u toc quibicob u tꞌʌn Cꞌuj.
Mʌꞌ ja wirej,
a mac cꞌasoꞌ mʌꞌ ju yubob u tꞌʌn u nʌꞌ cax u tet xan.
A mac cꞌasoꞌ,
cu jach quinsicob u racꞌob tu cotor.
A mac a cꞌasoꞌ cu quinsicob u tet cax u nʌꞌ.
A mac cꞌasoꞌ mʌꞌ u cꞌujintob jach Cꞌuj.
A mac cꞌasoꞌ quireꞌ yʌn u siꞌpirob.
10 Mʌꞌ ja wirej,
u tꞌʌn Moisés caj tsꞌibtaꞌb tiꞌ a mac a cu man yejer u jer.
Tsꞌibtaꞌb tiꞌ a mac a cu man yejer u yet xibir.
U tꞌʌn Moisés tsꞌibtaꞌb tiꞌ a mac a cu yaꞌcric u jer winic.
Tsꞌibtaꞌb tiꞌ a mac a cu tus,
bayiriꞌ tiꞌ a mac a cu chen tus,
tan yaꞌaric u tajir a baꞌ cu tusic.
U tꞌʌn Moisés tsꞌibtaꞌb tiꞌ tu cotor a cꞌasoꞌ quireꞌ rajiꞌ jach taj u tꞌʌn Moisés.
11 A jeꞌ tꞌʌnaꞌ a quin camsiquech Timoteo,
raꞌiriꞌ caj u chich araj ten Cꞌuj caꞌ in tsecꞌtej uch.
Quireꞌ rajiꞌ jach manan tsoy u tꞌʌn a Cꞌujoꞌ quireꞌ jach tsoy a Cꞌujoꞌ.
Mʌnaꞌ u jer Cꞌuj a jach tsoyoꞌ.
Quiꞌ yor Pablo quireꞌ yajquintaꞌb ten Cꞌuj
12 Timoteo,
quin wac tiꞌ ic Jaj Tsꞌurirex Jesucristo:
―Bayoꞌ,
quen tiꞌ,
quireꞌ ta chichquint in mucꞌ soc in beyaj tech.
Quin wac tiꞌ:
―Bayoꞌ Jesús,
quireꞌ ta teten tiꞌ a beyaj quireꞌ caj a wiraj cꞌuchaꞌan in wor in yamtech.
13 Caj a teten tiꞌ a beyaj cax a uchoꞌ tin pꞌast a tꞌʌn.
Cꞌasen a uchoꞌ.
Caj in chuc u pachob a tu yacsob tu yorob tech quireꞌ in cꞌat chꞌesob.
Chen a techoꞌ Cꞌuj,
quen tiꞌ,
ta yajquin ten rajen ta yamten cax mʌꞌ toy in wacsej tin wor a tꞌʌn uch.
Rajen mʌꞌ in wer baꞌ tin betajiꞌ.
14 Barej ic Jaj Tsurirex caj u yamten quireꞌ jach carem cu yajquintiquen.
Quireꞌ tin wuꞌyaj mun quin yajquintic Cꞌuj raꞌ u qꞌuinin caj in wacsaj tin wor tiꞌ Jesucristo.
Rajen quin yajquintic tu cotor mac quireꞌ pꞌeriꞌ in wor yejer Cristo.
15 Uꞌyej baꞌ quin wac quireꞌ u jach tajir.
Tu cotor mac caꞌ u quibej xan.
Caj tarij Jesucristo teraꞌ ich yocꞌocab,
tar quir u taquic tu cotor mac a cu yac yʌn u siꞌpir a tiꞌoꞌ.
A tenoꞌ Pablojen.
Mʌnaꞌ u jer manan u siꞌpir bajenen a tenoꞌ.
Mʌꞌ yaꞌab u jer winiquirob a neyʌn u siꞌpirob.
16 Rajen a Cꞌujoꞌ caj u yajquin ten quir u yamtiquen.
Mʌꞌ ja wirej,
cax mʌnaꞌ u jer jach cꞌas iren a tenoꞌ.
Caj u yesa nemʌꞌ bic Jesúsiꞌ soc wa u jer winic cu cꞌuchur tu qꞌuinin yiric.
Cu quibic,
yacsic tu yor quir u cuxtar munt qꞌuin.
Mʌꞌ ja wirej,
tu yiraj Cꞌuj tu yajquin ten rajen cu yacsic tu yor.
17 Rajen caꞌ ij carex tiꞌ Cꞌuj:
―Jach caremech Cꞌuj.
U reyech munt qꞌuin.
Mʌnaꞌ u jer irech quireꞌ tuririꞌech.
Jaririꞌech a neꞌer tu cotor baꞌ.
Jaririꞌech munt qꞌuinech mʌꞌ a quimin.
Jaririꞌech cu bin sʌjtechob munt qꞌuin.
Mʌnaꞌ mac chʌcaꞌan yiriquech.
Jeroj.
18 Quin chich aric tech Timoteo in pararech soc a quiꞌ cʌnantic a jeꞌ tꞌʌnaꞌ.
A caj u tsecꞌta tech a wet acsʌꞌorir a tsꞌaꞌb u tucur ten Cꞌuj uch.
Mʌꞌ ja wirej,
wa taj ca cꞌʌmic u tꞌʌn Cꞌuj a wʌcꞌʌs tucur mʌꞌ ju tacꞌ a joꞌr.
Taj a wacsic ta wor xan.
19 Tiꞌ yʌn xib,
mʌꞌ yaꞌabiꞌ.
A mʌꞌ ju yubob u wʌcꞌʌs toꞌcar u joꞌr ten u tucurob,
rajen tu pꞌʌtob u yacsicob tu yorob.
20 Robob Himeneo yejer Alejandro.
Robob caj in cꞌubob tiꞌ quisin soc u mucꞌyajob soc u pꞌʌticob u pꞌasticob Cꞌuj.