Pablo cu camsic bic tabar u tꞌʌnicob Cꞌuj soc u cʌnicob
2
Caꞌ in yʌn arej tech ajeraꞌ Timoteo,
caꞌ a tꞌʌnej Cꞌuj tiꞌ tu cotor mac,
cax a mʌꞌ yerob Cꞌuj.
Cꞌʌꞌotej tiꞌob,
caꞌ bin a tꞌʌnej Cꞌuj.
Arej tiꞌ Cꞌuj caꞌ u yamtej tu cotor mac.
Caꞌ bin tac mac quir u yamtic tech ta beyaj caꞌ a warej Cꞌuj:
―Bayoꞌ Cꞌuj,
tar u yamten tin beyaj.
Baxuc caꞌ a tꞌʌnej Cꞌuj mac tu cotor:
―Bayoꞌ Cꞌuj,
quechex tiꞌ,
quireꞌ tiꞌ yʌn tu cotor mac.
2 A baywoꞌ caꞌ a tꞌʌnej Cꞌuj caꞌ u yamtej rey ten Cꞌuj tu cu reyinticob ich yocꞌocab.
Caꞌ a tꞌʌnej Cꞌuj caꞌ u yamtej tu cu beyaj a jach tsꞌuroꞌ,
soc u chaꞌicob techex a beyajex.
Soc quiꞌ a worex,
soc mʌꞌ u tsꞌiquintiquechexob.
Caꞌ a tꞌʌnej Cꞌuj tiꞌ u jach tsꞌurirex a ruꞌuminex soc u chaꞌicob a cꞌujintiquex Cꞌuj cax tub a cꞌatex.
3 Mʌꞌ ja wirej,
jach tsoy aroꞌ quireꞌ u cꞌat Cꞌuj yubic a quiꞌ tꞌʌnic a tiꞌoꞌ.
A baywoꞌ tan a quiꞌquintic u yor Cꞌuj ij cʌjtaquirex.
4 Mʌꞌ ja wirej,
a Cꞌujoꞌ u cꞌat u taquic tu cotor mac.
Rajen Cꞌuj u cꞌat yiricob u cꞌʌmicob u tꞌʌn Cꞌuj.
5 Quireꞌ tiꞌ yʌn tuririꞌ Cꞌuj baxuc xan tiꞌ yʌn tuririꞌ yʌjsisquinyʌjir yor Cꞌuj quir u yamtic winic.
Rajiꞌ winic xan,
Jesucristo u cꞌabaꞌ.
6 A Jesúsoꞌ u bʌjiriꞌ tu chaꞌ u bʌj caꞌ quinsac u boꞌorir quir u taquic tu cotor mac.
Aroꞌ rajiꞌ caj u tsꞌaꞌb u najtic ten Cꞌuj wa ber caj cꞌuchij tu quimin.
7 Rajen quin waꞌaric caj u tetajen Cꞌuj uch tan yaꞌaric ten:
―Joqꞌuen,
xen,
tsecꞌt in tꞌʌn ich a mac a mʌꞌ u winiquirob judío.
Rajen tan in camsic tiꞌob u tꞌʌn Cꞌuj soc u yacsicob tu yorob u tꞌʌn Cꞌuj quireꞌ taj u tꞌʌn Cꞌuj.
A tenoꞌ mʌꞌ jin tus.
Taj quin waꞌaric tech,
Timoteo,
quireꞌ tin wacsaj tin wor tiꞌ Cristo.
8 Rajen in cꞌat in wirej xib a mac a jach taj tan yacsicob tu yorob caꞌ u tꞌʌnob Cꞌuj tu cu muchꞌquinticob u bʌjob.
In cꞌat in wiric u rʌc tꞌʌnicob Cꞌuj mʌꞌ pꞌujur u caꞌob soc mʌꞌ u pacran nunquicob u tꞌʌnob.
In cꞌat in wiric u rʌc tꞌʌnicob Cꞌuj taj.
In cꞌat in wiric u tꞌʌnicob Cꞌuj quireꞌ tsoy a pixamex quireꞌ mʌnaꞌ baꞌ ca tucriquex.
Tan u ricꞌsicob u cꞌʌbob irob mac tan u chich cꞌatic baꞌ tiꞌ Cꞌuj.
9 Baxuc xan in cꞌat in wir a xquicoꞌ caꞌ u buquintob u nocꞌ a jach tsoyoꞌ.
Tsoy u buquintic u nocꞌ tsoy,
quij,
quireꞌ mʌꞌ quir u pachtaꞌr ten xibiꞌ.
Chen caꞌ u buquint u nocꞌ soc tsoy yirir ten tu cotor mac.
Mʌꞌ quir u tus tsicꞌticob u joꞌr quir u yesicob u tsoyir u joꞌr.
Mʌꞌ quir u tus ujquinticob uj quir yesicob tsoyir u yujob.
Mʌꞌ quir u tus buquinticob nocꞌ quir u yesicob tsoyir u nocꞌob.
Baxuc,
mʌꞌ u buquinticob nocꞌ a jach manan coꞌoj.
Arej tiꞌob mʌꞌ u jitꞌicob u joꞌr yejer sʌc uj a jach coꞌojoꞌ.
Arej tiꞌob mʌꞌ u jitꞌicob yejer oro xan.
10 Chen a tenoꞌ in cꞌat in wirej a xquicoꞌ tan u yamticob u jer quireꞌ tsoy aroꞌ.
Mʌꞌ ja wirej,
baxucoꞌ jach tsoy tiꞌ a xquic quireꞌ yacsmʌnob tu yorob.
A baxucoꞌ tan u quiꞌquinticob yor Cꞌuj xan,
quireꞌ tan u manob tu tsoyir.
11 A xquicoꞌ caꞌ u cʌnob u tꞌʌn Cꞌuj.
Mʌꞌ u yʌn tꞌʌnob cu yubicob u tꞌʌnoꞌ caꞌ u quibob u tꞌʌn u jach tsꞌurirob a tu cu muchꞌquinticob u bʌjob.
12 Mʌꞌ ja wirej,
a xquicoꞌ mʌꞌ tsoy u camsicob u tꞌʌn Cꞌuj tiꞌ xibiꞌ ich tu cu muchꞌquinticob u bʌjob.
Mʌꞌ tsoy u chaꞌbʌr u tsꞌurintaꞌr a xquicoꞌ ten xib.
Caꞌ u nup u chiꞌob a xquicoꞌ.
Baxuc in cꞌat,
quij Pablo.
13 Quireꞌ caj betaꞌb winic ten Cꞌuj,
tu yʌn betaj Adán xib.
A xquic Eva,
pachir caj betaꞌb ten Cꞌuj.
14 Cꞌʌꞌotej a uchoꞌ mʌꞌ tabsaꞌb ten quisin Adán chen a xquicoꞌ tabsaꞌb ten quisin a Evajoꞌ.
Caj tar u siꞌpir quireꞌ mʌꞌ tu cʌnantaj u tꞌʌn Cꞌuj.
15 Rajen a xquicoꞌ mʌꞌ quir u camsicob xibiꞌ.
Chen quir u rochicob u chan ochir.
Chen quir u camsicob u chan parar soc u manob tu tsoyir.
Chen a xquicoꞌ caꞌ u cꞌʌmob u tꞌʌn Cꞌuj soc u yacsicob tu yorob quir u taquicob u bʌjob,
soc mʌꞌ u pachticob tu yorob cꞌas barej caꞌ u yajquintob Cꞌuj.