Bic tabar ic tetiquex u tsꞌurir tu cu muchꞌquinticob u bʌj
3
A jeꞌ tꞌʌnaꞌ jach taj.
Wa tiꞌ yʌn mac u cꞌat u yocar tsꞌurir u yet acsʌꞌorirob soc u yamticob u cꞌujinticob Cꞌuj.
Arej tsoy wa ju cꞌat yocarob.
2 A mac u cꞌat yocar u tsꞌurir caꞌ tetaꞌc ten u bʌjob quireꞌ tu yirob mʌnaꞌ mac u pʌcꞌmʌnin u pach.
Raꞌ a yʌn u racꞌ chen tuririꞌ xquic.
A mʌꞌ qꞌuex yoroꞌ.
A mʌꞌ u cheꞌej ten mac.
A toc quiꞌ yoroꞌ.
A sʌjtaꞌb ten tu cotor mac.
A mac a cꞌuchaꞌan yor u camsic u racꞌob.
A quiꞌ yor yacsic mac tu yatoch,
cax mʌꞌ yirmʌn uch.
3 A mac a cu bin ocar tu tsꞌurir mʌꞌ ju bin carchʌjʌr.
Mʌꞌ tsꞌic xan.
Mʌꞌ tsꞌut,
mʌꞌ ju pacht u tꞌajar u taqꞌuin.
Chen cu man u sisquintej yorob u racꞌob.
4 A mac a cu bin ocar tu tsꞌurir u yet acsʌꞌorirob.
Caꞌ a tetex a mac cu quiꞌ tsꞌurinticob u bʌj tu cotor a cʌjaꞌan yicnʌn soc quiꞌ yorob.
Caꞌ u quiꞌ tꞌʌn u parar xan soc tabar yubaꞌr u tꞌʌn tiꞌ.
5 Mʌꞌ ja wirej,
wa mac u cꞌat ocar tu tsꞌurir u yet acsʌꞌorirob.
Chen mʌꞌ ju quiꞌ tsꞌurintaꞌr a mac cʌjaꞌan ich yatoch,
jeꞌ wa ju cꞌuchur u yor tiꞌ u yet acsʌꞌorirob?
Mʌꞌ ju cꞌuchur yor tiꞌ.
6 Tetex a mac uch tu yacsaj tu yor.
Mʌꞌ tsoy a tetiquexiꞌ,
tan tu yacsic tu yor.
Mʌꞌ a wacsiquex a mac baxucoꞌ jeꞌxeꞌ bin u caꞌ yaꞌarej:
―Jach caremen a tenoꞌ.
Baxuc a quisinoꞌ caj yaꞌaraj uch:
―Jach caremen a tenoꞌ.
Rajen jocꞌsaꞌb quisin ten Cꞌuj uch.
7 A mac a cu bin tetbir yʌn sʌjtaꞌ ten a mac a mʌꞌ yacsmʌnob tu yorob.
Mʌꞌ ja wirej,
wa cu sʌjticob,
mʌꞌ ju pꞌastob mʌꞌ ju bin pʌcꞌbir u pach ten quisin.
Bic tabar yocar beyaj a mac a cu yamtic u bʌjob
8 A mac a cu bin tetbir ten u yet acsʌꞌorirob soc u yamtic u yet acsʌꞌorir tu cu cꞌayob.
Bayiriꞌ xan yʌn tetbir a cu bin sʌjtaꞌbir ten tu cotor mac.
Wa cu yaꞌaric baꞌ,
caꞌ u toc betej,
caꞌ a tetej a mac a mʌꞌ ju pachtej u tꞌajar u taqꞌuin.
A mac a mʌꞌ ju bin carchʌjʌr.
9 A mac tetaꞌb quir u yamtic u yet acsʌꞌorirob caꞌ u quiꞌ cʌnantej baꞌ toc araꞌb ten Cꞌuj tiꞌ tu cotor a yacsmʌnob tu yorob.
Arej caꞌ u quiꞌ cʌnantej soc jach tsoy u tucur xan.
10 A raꞌ xiboꞌ a cu bin tetbir ten u bʌjob bin u caꞌ u tumtej yirej wa tsoy yorob.
Cu tsꞌocar yiricob wa tsoy yorob,
mʌnaꞌ cꞌas tu betob arej tiꞌob,
caꞌ ocacob tu beyaj soc u yamticob u yet acsʌꞌorirob.
11 U racꞌ a xib xanoꞌ a cu yocar tu beyaj quir u yamticob u yet acsʌꞌorirob yʌn sʌjtaꞌ u racꞌ ten u yet xquiquiꞌ.
Mʌꞌ ju pʌcꞌar u pach ten mac.
Mʌꞌ qꞌuex yorob xan.
Tan u quiꞌ beyajob,
cax baꞌ tsꞌaꞌb tiꞌ quir u betej.
12 A mac a cu bin tetaꞌr ten u yet acsʌꞌorirob quir u yamticob.
Caꞌ u raqꞌuintob chen tuririꞌ xquic soc u quiꞌ tsꞌurinticob tu cotor mac a cʌjaꞌan tu yatoch yejer u parar soc quiꞌ yorob.
13 Mʌꞌ ja wirej,
a mac a cu bin tetaꞌr ten u yet acsʌꞌorirob quir u yamticob,
caꞌ bin sʌjtac ten tu cotor mac.
Mʌꞌ ja wirej,
rajen cꞌuchaꞌan yorob u tsicbʌticob tiꞌob u tꞌʌn Cꞌuj ich u racꞌob,
soc u yacsicob tu yorob u tꞌʌn Jesucristo.
U bʌjiriꞌ u muc u er baꞌ Cꞌuj a uchoꞌ
14 A tenoꞌ tan in pajic in tar in wirech Timoteo.
Mʌꞌ jin wer wa seb quin tar wa chan ber quin tar.
Rajen tan in tsꞌibtic tech a jeꞌ juꞌunaꞌ.
15 Quireꞌ wa amaꞌan quin tar toc yʌn tech a jeꞌ juꞌunaꞌ quir u camsiquech bic tabar a tꞌʌnic a racꞌob a wet acsʌꞌorirob tu cu muchꞌquinticob u bʌjob.
Soc u cꞌujinticob Cꞌuj.
Mʌꞌ ja wirej,
aroꞌ tu cu cꞌujinticob Cꞌuj tan u cꞌujinticob Cꞌuj a jach cuxaꞌanoꞌ.
Rajen caꞌ u cʌnantob u tꞌʌn Cꞌuj soc chʌcaꞌan yiricob u tajir mac ich yocꞌocab.
Bayiriꞌ xan tu cu muchꞌquinticob u bʌjob raꞌ quir u quiꞌ yamtic u yet acsʌꞌorirob.
16 Uꞌyej baꞌ quin wac quireꞌ mʌnaꞌ mac cu bin yaꞌaric:
―Mʌꞌ tajiꞌ.
Mʌꞌ bic tabar ic najtej mun jach carem Cꞌuj.
Mʌꞌ ju cꞌuchur ij cor ic najtic bic caj waysaꞌb Cꞌuj.
A Cꞌujoꞌ tu yesaj toc tsoy yor Jesús ber caj ricsaꞌb ten Cꞌuj.
Caj irir Jesús ten yʌjmasirob u tꞌʌn Cꞌuj caj u tsecꞌtob u tꞌʌn Cꞌuj soc yer mac tu cotor u jach tsoyir u tꞌʌn Cꞌuj.
Caj tsꞌoc u quimin Jesús caj wʌcꞌʌs bin caꞌanan.