Yʌn mac cu bin pꞌʌt u tꞌʌn Cꞌuj biqꞌuin
4
U Tajꞌor u Pixam Cꞌuj caj u toc araj toꞌonex:
―Jeꞌ u cꞌuchur tu qꞌuinin tabar u xur tꞌʌn,
quij,
cu bin u pꞌʌtob u tꞌʌn Cꞌuj jun yarob.
A cu bin u pꞌʌtob u tꞌʌn Cꞌuj,
bin u caꞌ sar u xiquinob tiꞌ a baꞌ camsaꞌb ten cꞌacꞌas quisin.
Bin u caꞌ u quibob a mac a cu tusarob a tiꞌoboꞌ.
2 A baꞌ cu bin camsaꞌ tiꞌob jeꞌ u camsaꞌ ten yʌjtabsayʌjirob,
a mac jach yer tus.
Aroꞌ jach manan u cꞌasir u tucurob ir a mac u tocar u chiꞌ ten quisin.
3 A ray xiboꞌ jeꞌ u camsaꞌr a tiꞌoboꞌ tan yaꞌaric:
“Mʌꞌ tsoy a raqꞌuintic xquic,
quij.
Mʌꞌ tsoy a mʌmintej xib.
Yʌn yoꞌoch u jer,
quij,
mʌꞌ tsoy a jantic.”
Baxuc cu bin u camsaꞌ a cu tus.
Mʌꞌ ja wirej,
a Cꞌujoꞌ caj u betaj a woꞌochex soc u jantaꞌ ten tu cotor mac.
Chen caꞌ u yʌn arej tiꞌ Cꞌuj:
“Bayoꞌ Cꞌuj”,
a mac a yacsmʌnob tu yorob tiꞌ Jesús.
4 Quireꞌ tu cotor a woꞌochex toc betaꞌb ten Cꞌuj soc a jantiquex.
Rajen cꞌʌmex tiꞌob.
Mʌꞌ a waꞌariquex:
―Mʌꞌ jin cꞌʌmob tiꞌob.
Chen a baꞌ yoꞌoch ca cꞌʌmiquex caꞌ a yʌn arex tiꞌ Cꞌuj:
―Bayoꞌ Cꞌuj ta tsꞌa tenob in woꞌoch.
5 Mʌꞌ ja wirej,
yʌn mac cu yaꞌaric mʌꞌ tsoy a jantiquex yoꞌoch u jer.
Barej yʌn tꞌʌnex Cꞌuj,
arex tiꞌ Cꞌuj:
―Bayoꞌ Cꞌuj.
A Cꞌujoꞌ mʌꞌ ju yaꞌarej:
―Mʌꞌ a jantiquex tiꞌob.
Tsoy a jantiquex tiꞌob.
A mac a cu quiꞌ beyaj tiꞌ Jesucristo
6 Uꞌyej baꞌ quin wac tech,
Timoteo.
Wa ca camsic a bʌjob an ten bic quin wac tech.
Jeroj u jach cꞌurewirech Jesucristo.
Jach tsoy u cꞌurewirech Timoteo tiꞌ,
quireꞌ caj a quib u tꞌʌn Cꞌuj.
Mʌꞌ chen tech tan a quibic u tꞌʌn Cꞌuj bayiriꞌ ten,
bayiriꞌ tu cotor xan a cu yacsob tu yorob u tꞌʌn Cꞌuj.
Mʌꞌ ja wirej,
mʌꞌ u tubur tech u tꞌʌn Cꞌuj an ten bic caj a wuꞌyaj in camsiquech.
7 Timoteo,
quiꞌ cʌnant a bʌj soc mʌꞌ a cʌnic u tꞌʌn a cu yaꞌaricoꞌ tiꞌ u tus Cꞌuj.
Jot aroꞌ mʌꞌ baꞌwir ca waꞌaric.
Barej chichquint a wor soc a quiꞌ cꞌujintic Cꞌuj soc rajraꞌ cu tajquintic a wor.
8 Chen tsoy cu chʌc tar u mucꞌ u winquirir mac tu cu beyaj.
Barej a mac a cu jach cꞌʌnic u tꞌʌn Cꞌuj soc u quiꞌ tar yor,
aroꞌ jach manan tsoyir.
Mʌꞌ ja wirej,
a jeꞌraꞌ cu yamtiquech soc u quiꞌ tar a wor bajeꞌrer.
A jeꞌraꞌ cu yamtiquech soc u pʌyiquech Cꞌuj caꞌ bin tac tu qꞌuinin.
9 Rajen Timoteo,
caꞌ a quibej a baꞌ tin waꞌaraj tech sam quireꞌ taj aroꞌ.
Rajen tu cotor mac caꞌ u quibob.
10 Rajen tan ic chich beyajex.
Rajen tan ic mucꞌtic u pꞌasticoꞌon,
quireꞌ ij quer Cꞌuj rajiꞌ a cuxaꞌanoꞌ.
Raꞌ u yʌjtaquir tu cotor mac.
Mʌꞌ ja wirej,
a Cꞌujoꞌ yʌjyamir tu cotor mac.
Jariꞌ a mac a yacsmʌnob tu yorob u tꞌʌn Cꞌuj,
rajiꞌ cu bin tacbir.
11 Timoteo,
quin toc ac tech.
Joqꞌuen cams a baꞌ a cʌna ten soc a chich aric tiꞌ a bʌjob tu ca bin a camsej tiꞌob.
12 Quiꞌ cʌnant a bʌj Timoteo soc mʌnaꞌ mac cu pꞌastiquech quireꞌ yiric mʌꞌ uch chꞌijiquecheꞌ.
Barej a bʌjob,
caꞌ u cʌnechob bic tabar tsoy u tsicbarob.
Caꞌ u cʌnechob bic tabar u yajquinticob u racꞌob.
Caꞌ u cʌnechob bic tabar u cuxtarob tiꞌ u tꞌʌn Cꞌuj ich u racꞌob.
Caꞌ u cʌnechob bic tabar ta wacsa ta wor.
Caꞌ u cʌnechob bic tabar soc mʌꞌ u caꞌ acsicob u siꞌpirob.
13 Quireꞌ tabaren.
Pꞌis a bʌj a xaquic u tꞌʌn Cꞌuj tu cu muchꞌquinticob u bʌjob a wet acsʌꞌorirob.
Bayiriꞌ xan,
quiꞌ chichquint u yorob quireꞌ tan a camsic tiꞌob u tꞌʌn Cꞌuj.
14 Timoteo,
mʌꞌ u nayʌr a wor quireꞌ a beyaj tsꞌaꞌb tech ten Cꞌuj.
Quireꞌ aroꞌ ta cꞌʌma tech tu qꞌuinin caj in tsꞌancꞌʌbtob tech ten yejer u tsꞌurirob a wet acsʌꞌorirob uch.
Caj tsꞌoc in tsꞌancꞌʌbtob tech,
caj oquech ta beyaj tiꞌ Cꞌuj.
Mʌꞌ ja wirej,
tin tsꞌancꞌʌbtob tech quireꞌ yaꞌarej tenob Cꞌuj.
15 Yʌn tsꞌajaꞌan a wor a cʌnej tu cotor a baꞌ tin toc arajech sam.
Yʌn quiꞌ tsꞌajaꞌan a wor a cʌnej u tꞌʌn Cꞌuj soc chʌcaꞌan yiric tu cotor mac.
Soc yerob bic tabar tan a quiꞌ quibic u tꞌʌn Cꞌuj.
16 Timoteo,
quiꞌ cʌnant a bʌj tu ca bin.
Bayiriꞌ xan quiꞌ cʌnant a baꞌ ca camsic tiꞌ a bʌjob.
Mʌꞌ u pec a wor tu ca camsic tiꞌob.
Wa ju tajir baxuc ca cʌnantic a bʌjiriꞌ jeꞌ a taquic a bʌj soc mʌꞌ ja bin cꞌacꞌ.
Bayirirꞌ xan bin u caꞌ u tacob u bʌjob a mac a cu yubicob a camsicob.