Caj u chich araj Pablo tiꞌ Timoteo bic tabar u man tu tsoyir ich u bʌjob
5
Mʌꞌ a yʌn qꞌueyic a mac uch chꞌijicoꞌ.
Barej caꞌ a chen arej tiꞌob caꞌ u sar u xiquinob a baꞌ ca wac irech wa robob a tetob.
Bayiriꞌ xan,
quij,
tucrej a mʌꞌ xuraꞌan u baquerob irob wa ja witsꞌinob.
2 Quiꞌ tucrej a xquic a uch chꞌijicoꞌ an ten bic ca tucric a nʌꞌ.
Quiꞌ tucrej a mʌꞌ xuraꞌan xquicoꞌ an ten bic ca yajquintic a witsꞌinob.
Soc wa cu yubic a tꞌʌn mʌꞌ ju pʌcob a pachoꞌ.
3 Yamt a xquicoꞌ a quimen u mam uchoꞌ wa jach otsirchʌjoꞌ.
4 Barej wa raꞌiriꞌ xquic a quimen u mamoꞌ yʌn u parar cax u parar u parar.
Arej tiꞌob caꞌ u yʌn cʌnant u bʌjob quireꞌ baxuc caꞌ u betob a mac a cu yacsicob tu yorob.
Caꞌ u cʌnantob u mim cax u chich quireꞌ quimen u mam.
Raꞌ u boꞌorir tu chꞌisaꞌb.
A jeroj jach tsoy quireꞌ tan u quiꞌquinticob yor Cꞌuj.
5 Mʌꞌ ja wirej,
a mac jach quimen u mam wa cu cʌjtar tu junʌn.
Cax wa mʌnaꞌ mac tucric chen Cꞌuj tucric quireꞌ tu yacsa tu yor tiꞌ Cꞌuj.
Mʌꞌ ja wirej,
aroꞌ mʌꞌ u pꞌʌtic u tꞌʌnic Cꞌuj,
cax chun qꞌuin,
cax acꞌbir.
6 Yʌn a xquicoꞌ a quimen u mamoꞌ,
cu pachticob cꞌas.
Aroꞌ mʌꞌ cuxaꞌan yiric Cꞌujiꞌ.
Quireꞌ mʌꞌ tan u jach tucric Cꞌujiꞌ.
7 Toc arej tiꞌob in wet acsʌꞌorir in tꞌʌn tiꞌ a xquicoꞌ a quimen u mamoꞌ,
Timoteo.
A baxuc ta wuꞌyaj soc mʌnaꞌ mac cu bin qꞌueyic a tiꞌoboꞌ.
8 Barej wa tiꞌ yʌn maquix mʌꞌ tan u jansic u bʌjob,
cax a mac jach cʌjaꞌan tu yatoch.
Rajiꞌ jach manan cꞌas.
A mac a mʌꞌ tu yacsaj tu yor u tꞌʌn Cꞌuj mʌꞌ necꞌasiꞌ cax mʌꞌ tan u jansic u bʌjob.
9 Tu juꞌunin tu ca tsꞌibtic u cꞌabaꞌ a xquic a quimen u mamoꞌ.
A cu beyaj ich tu cu muchꞌquinticob u bʌjob.
Ca chen tsꞌibtic a mac a tu yiraj sesenta yaxqꞌuin.
A tu mʌmintajob chen tuririꞌ u mamoꞌ.
10 Tech caꞌ a quiꞌ irej ich u yet cajarob wa uch quiꞌ beyanʌj a xquicoꞌ a quimen u mamoꞌ.
Caꞌ a quiꞌ irej wa tu quiꞌ camsaj u pararob,
wa tan u quiꞌ chꞌisic uch.
Caꞌ a wuꞌye wa tu yacsaj u yet acsʌꞌorirob tu yatoch cax mʌꞌ yirmʌn uch.
Cax u pꞌoꞌic yoc uch quireꞌ ecꞌ yoc,
quireꞌ u yet acsʌꞌorirob,
u yaj.
Caꞌ a wuꞌyej wa tu chichquintaj yor a mac tan u mucꞌyaj uch.
Caꞌ a wuꞌyej wa yʌn u jer u quiꞌ beyaj tu cʌjaꞌanoꞌ.
Rajiꞌob caꞌ a tsꞌibt u cꞌabaꞌ ich u juꞌunin tu cu muchꞌquinticob u bʌj.
11 Arej tiꞌob Timoteo.
Mʌꞌ tsoy u tsꞌibticob u cꞌabaꞌ ich u juꞌunin a xquicoꞌ a quimen u mamoꞌ,
wa mʌꞌ cꞌuchaꞌan sesenta yaxqꞌuin.
Mʌꞌ ja wirej,
raꞌ cu bin u pachtej tu yor u mʌmint u jer u mam.
Rajen cu tubur tiꞌ u tꞌʌn Cristo a camsaꞌb tiꞌob uchoꞌ.
12 Wa cu mʌmintic u jereꞌ,
jeꞌ u taꞌcaꞌr u joꞌr ten Cristo quireꞌ mʌꞌ u quibob a baꞌ araꞌb ten xquic tiꞌ Cristo uch.
13 Tu caꞌten a xquic a quimen u mamoꞌ,
a mʌꞌ cꞌuchaꞌan sesenta yaxqꞌuinoꞌ,
bin u caꞌ sut u bur u qꞌuinin ich u jer naj.
Cu cʌnicob mʌꞌ cꞌoriꞌ.
Mʌꞌ jariꞌ cu cʌnic mʌꞌ cꞌoriꞌ,
cu tus pʌqꞌuicob u pachob u racꞌob.
Tan u manob yaꞌarej a baꞌ mʌꞌ jach tsoy.
14 Rajen Timoteo in cꞌat in wirej a tiꞌoboꞌ,
a xquic a chichan a quimen u mam,
caꞌ u mʌmintob u jer u mam.
Jach tsoy,
caꞌ u rochob u jer u parar quireꞌ tu chꞌ u jer u mam.
A baywoꞌ jeꞌ u jansicob u parar.
Caꞌ u jansob u mam xan.
A xquicoꞌ a quimen u mamoꞌ a cu cʌnic u betej aroꞌ mʌꞌ cꞌuchaꞌan yorob u pacꞌaꞌr u pachob xquic a quimen u mam uch ten a mac a u pꞌacticob u tꞌʌn Cꞌuj.
15 Quireꞌ toc yʌn xquic a quimen u mamoꞌ.
A mʌꞌ cꞌuchaꞌan sesenta yaxqꞌuin caj ju pꞌʌtob u tꞌʌn Cꞌuj.
Caj bin u tus pʌybir u berob ten quisin.
16 Arej tiꞌob Timoteo.
Wa tiꞌ yʌn xquic,
a yacsmʌnob tu yorob.
U wʌcꞌʌs bʌjob rajiꞌ caꞌ u janse wa quimen u mam.
Rajiꞌ caꞌ u jansej soc mʌꞌ u jansicob u yet acsʌꞌorirob tu cu muchꞌquinticob u bʌjob.
A baywoꞌ u yet acsʌꞌorirob cꞌuchaꞌan yorob u jansicob a mac otsirchʌjij a tajoꞌ a quimen u mamoꞌ.
17 Camsej tiꞌob Timoteo.
Caꞌ u quiꞌ sʌjtob u jach tsꞌurirob tu cu muchꞌquinticob u bʌj,
quireꞌ cu quiꞌ beyaj.
Rajen caꞌ u sʌjtob u jach tsꞌurirob.
Caꞌ u quiꞌ sʌjtob u jach tsꞌurirob a mac a cu camsicob u tꞌʌn Cꞌuj.
A cu quiꞌ tsecꞌticob u tꞌʌn Cꞌuj,
xan.
Arej tiꞌob caꞌ u quiꞌ boꞌotob a tiꞌoboꞌ.
18 Rajen cꞌʌꞌotej a baꞌ cu yac tu tsꞌibaꞌan tꞌʌn Cꞌuj.
A cu yaꞌaric:
“Mʌꞌ tsoy a cꞌʌxic u chiꞌ a wʌrʌcꞌ wacʌx tu cu beyaj ta corex Tsireꞌej u janan a wʌrʌcꞌ wacʌxeꞌ,”
quij.
U jer tsꞌibaꞌan ich u tꞌʌn Cꞌuj cu yaꞌaric:
“A mac a cu beyaj ich u jer winic caꞌ boꞌotaꞌc u boꞌorir u cꞌʌb,
quij.”
19 Camsej tiꞌob Timoteo.
Wa ju cꞌat u taꞌquicob u joꞌr turiꞌ u jach tsꞌurir u yet acsʌꞌorirob.
Arej tiꞌob caꞌ u chen quib u tꞌʌn caꞌtur wa tres yʌjirirob.
A mac a tu yirob jach taj tu yacsaj u siꞌpir.
20 Caꞌ u qꞌuey u jach tsꞌurir a yacsmʌnob tu yor ʌcʌtan tu cotor mac tu cu muchꞌquinticob u bʌjob quir yubicob u tꞌʌn Cꞌuj.
Caꞌ u qꞌuey u jach tsꞌurir a nanij yacsic tu siꞌpir soc u chꞌiꞌicob sajaquir tiꞌ u racꞌob soc mʌꞌ u yacsicob tu siꞌpir xan,
irob u jach tsꞌurir.
21 A tenoꞌ Pablojen.
Bajeꞌrer ʌcʌtan tu wich Cꞌuj.
Bayiriꞌ ich ʌcʌtan u wich Cristo Jesús,
quin toc aric tech Timoteo.
Bayiriꞌ ich ʌcʌtan u wich yʌjmasirob u tꞌʌn Cꞌuj a tetaꞌanob ten Cꞌuj caꞌ a quibej tu cotor a baꞌ tin camsech Timoteo.
Caꞌ a toc betej a baꞌ quin camsiquech mʌꞌ coyen a camsic,
rʌc quet a camsic.
22 Mʌꞌ seb a yʌn tetic u jach tsꞌurir tu ca muchꞌquintiquex a bʌj.
Mʌꞌ ja wirej,
wa cu yacsic u siꞌpir a mac ta tetaj jeroꞌ a racꞌob bin u caꞌ pʌcꞌ a pachex.
Rajen caꞌ a quiꞌ cʌnant a bʌj.
23 Quireꞌ suꞌsuꞌ u yajtar a nʌcꞌ Timoteo.
Mʌꞌ a chen uqꞌuic a jaꞌ.
Tumtej chichin yoꞌoch u cꞌab uva.
Jeꞌ u jawʌr a nʌqꞌueꞌ.
24 Wa cu tar u taꞌquicob u joꞌr mac ʌcʌtan tech Timoteo.
Wa mʌꞌ chʌcaꞌan a wiric a baꞌ u siꞌpir yʌn tiꞌ.
Caꞌ a cʌxtej wa taj cu taꞌquicob u joꞌr.
U jer wa jach chʌcaꞌan a wiric baꞌ cꞌasir caj u betaj quireꞌ tu rʌc irob u racꞌob.
25 Baxuc xan chʌc yʌn mac cu man u yamt u racꞌob.
Yer aroꞌ cu man u yamticob u racꞌob.
Barej yʌn u jer tan u man u yamt u racꞌob chen mʌꞌ yer u racꞌob wa tan u man u yamtic a tiꞌoboꞌ.
Chen jeꞌ u cꞌuchur tu qꞌuinin cu bin najt u racꞌob.