6
A mac nanij u cꞌanantaꞌr ten u jach tsꞌur an ten bic a cꞌurewoꞌ.
Cax aroꞌ yacsmʌn tu yor u tꞌʌn Cꞌuj.
Cax cꞌʌnac ten u jach tsꞌurir caꞌ u sʌjt u jach tsꞌurir soc mʌnaꞌ mac cu pꞌastic Cꞌuj cax a baꞌ quij camsic.
2 U cꞌurew a tu yacsaj tu yor wa yʌn u tsꞌurir a tu yacsaj tu yor xan.
Arej tiꞌ a cꞌurewoꞌ mʌꞌ u pꞌactic u tsꞌurir quireꞌ u yet acsʌꞌorir,
cax mʌꞌ u chaꞌbʌr u bin.
Arej tiꞌ caꞌ quiꞌ quiꞌ beyanʌquiꞌ tiꞌ.
Jach manan caj u beyanʌc tiꞌ quireꞌ rajiꞌ u bʌjob quireꞌ tu yacsaj tu yor.
Arej tiꞌ,
a mac cu quiꞌ iric u bin beyaj tiꞌ u tsꞌurir cu bin yaꞌaric:
―Rajiꞌ u bʌjob jach tajir quireꞌ aroꞌ u jach yaj xan.
A mac a cu jach cꞌujintic Cꞌuj. Bayiriꞌ a mac jach manan quiꞌ yoroꞌ
3 A techoꞌ Timoteo quen.
Caꞌ a camsej a jeroj.
Bayiriꞌ caꞌ a tsecꞌt tiꞌob xan.
Wa tiꞌ yʌn mac cu tus camsic u jer tꞌʌn tan yaꞌaric:
―A jeꞌraꞌ u jach tꞌʌn Cꞌuj.
Chen wa mʌꞌ quet yejer u tꞌʌn ic Jaj Tsꞌurirex Jesucristo.
A mac a cu camsic aroꞌ mʌꞌ yer baꞌriꞌ.
4 Cax cu tucric tu yor yer tu cotor baꞌ.
Mʌꞌ ja wirej,
a mac a cu camsic baxucoꞌ cu chen pachtic u pꞌusic yor winic quir u nuncaꞌr u tꞌʌn ten mac.
Rajen cu tar a cꞌasoꞌ,
cu chen pachtic u pꞌusic yor winic quir u nuncaꞌr u tꞌʌn ten mac.
Rajen cu tar a cꞌasoꞌ,
irej a mac a cu pachtic a baꞌ yʌn tiꞌ u jer winic.
Rajen cu tar baꞌ quir u choquintic yor mac.
Rajen cu tar a baꞌ quir u pꞌastic u jer winic.
Tiꞌ aroꞌ cu tar u tsꞌurir yʌjpaqꞌuirob u pach winic a baꞌ jach cꞌas.
5 Mʌꞌ ja wirej,
a mac cu man u camsicob baxucoꞌ.
Rajraꞌ cu nuncaꞌr u tꞌʌn quireꞌ jach cꞌas a baꞌ cu tucricob.
Bayiriꞌ xan,
tan u manob tu cꞌasir.
Mʌꞌ yerob u tajir u tꞌʌn Cꞌuj quireꞌ tu pꞌʌtob uch.
Cu tus camsicob u tꞌʌn Cꞌuj,
quireꞌ u cꞌatob u jaricob u taqꞌuinob.
Toc pꞌʌt mac baxucoꞌ.
6 Mʌꞌ ja wirej,
a mac a cu cꞌujintic Cꞌuj u tajir,
cu jach man yejer Cꞌuj.
Mʌꞌ raꞌ u cꞌat quir u jaric u taqꞌuin.
Quireꞌ quiꞌ yor cax mʌꞌ yaꞌab u baꞌtac.
7 Arej Timoteo a baꞌ yʌn tech caj u rochech a nʌꞌ?
Mʌnaꞌ baꞌ yʌn tech caj u rochech a nʌꞌ.
Bayiriꞌ caꞌ bin quimcoꞌonex,
mʌnaꞌ baꞌ yʌn quic bin ic chꞌaꞌej.
Mʌnaꞌ baꞌ.
8 Rajen yʌn toꞌonex ij coꞌoch.
Yʌn toꞌonex ic nocꞌ.
Mʌꞌ wa tiꞌibiriꞌ quir u quiꞌquintic ij coriꞌ?
9 Cʌnej a jeꞌraꞌ.
A mac a ju cꞌat u tꞌajʌr u taqꞌuin soc yʌn yaꞌab bin u caꞌ tumtaꞌbir yor soc u yacsic u siꞌpir.
Bin u caꞌ u pacht a baꞌ cꞌasoꞌ quireꞌ mʌꞌ ju quiꞌ tucrej baꞌ.
Quireꞌ tu pacht u tꞌajʌr u taqꞌuin.
Rajiꞌ cu bin pʌyic u siꞌpir soc u quimin soc u saꞌtʌr u pixam.
10 Mʌꞌ ja wirej,
tub u tar a jach manan u siꞌpir?
Cu tar toꞌonex quireꞌ tic yajquintaj taqꞌuin.
Cꞌʌꞌotej,
yʌn yaꞌab mac tu chen pachtaj soc yʌn u taqꞌuin yaꞌab.
Caj u pꞌʌtob u cʌnicob u tꞌʌn Cꞌuj.
Rajen jach manan yajir u yorob.
Chichquint a wor soc mʌꞌ a pꞌʌtic u tꞌʌn Cꞌuj
11 Uꞌyej baꞌ quin wac tech Timoteo.
A techeꞌ,
tan a tsecꞌtic u tꞌʌn Cꞌuj.
Rajen mʌꞌ a cʌnic a cꞌasoꞌ a jach cꞌas a tin waꞌaraj tech sam.
Pꞌis a bʌj caꞌ a cʌnej u tꞌʌn Cꞌuj soc u tajtar a wor.
Cʌn a quiꞌ cꞌujintic Cꞌuj soc taj tan a wacsic ta wor.
Cʌn a yajquintic tu cotor mac.
Cʌn u tꞌʌn Cꞌuj soc nemʌꞌ biquechiꞌ.
Cʌn u tꞌʌn Cꞌuj soc mʌꞌ tsꞌiquechiꞌ soc mix pꞌujur xan.
12 Chichquint a wor soc mʌꞌ u tupsaꞌr a wor ten mac.
Quiꞌ acsej ta wor soc tech yʌnin a cuxtar munt qꞌuin.
Mʌꞌ ja wirej,
a Cꞌujoꞌ tu pʌyech soc tech yʌnin a cuxtar munt qꞌuin.
Cꞌʌꞌotej yʌn yaꞌab mac tu yubaj yaꞌaraꞌ a techoꞌ bic tabar caj a quib u tꞌʌn Cꞌuj uch.
13 Rajen tan in chich aric tech Timoteo ʌcʌtan tu wich Cꞌuj a mac a cu tsꞌic u cuxtar tu cotor baꞌ.
Tan in chich aric tech ʌcʌtan tu wich Jesucristo quireꞌ rajiꞌ tu yaꞌaraj baꞌ tiꞌ Poncio Pilato:
―A tenoꞌ u reyen u winiquirob judío.
14 Chich quin wac tech,
Timoteo,
caꞌ a quibej tu cotor baꞌ araꞌb ten Cꞌuj.
Caꞌ a quiꞌ cʌnant u tꞌʌn Cꞌuj soc mʌꞌ u cꞌaxicoꞌ mac,
soc mʌnaꞌ mac cu pꞌasticob u tꞌʌn Cꞌuj.
Caꞌ a quiꞌ cʌnant a baywoꞌ,
hasta tu qꞌuinin cu yur ic Jaj Tsꞌurirex Jesucristo.
15 Caꞌ bin cꞌuchuc tu qꞌuinin.
Jeꞌ u bin tuchiꞌbir Jesús ten Cꞌuj caꞌ tac teraꞌ.
Mʌꞌ ja wirej,
tuririꞌ Cꞌujoꞌ,
mʌnaꞌ u jer.
A Cꞌujoꞌ jach manan tsoy tiꞌ tu cotor mac.
A Cꞌujoꞌ rajiꞌ cu reyintaꞌr ten tu cotor rey.
Rajiꞌ cu tsꞌurintaꞌr tu cotor jach tsꞌur.
16 Chen rajiꞌ mʌꞌ ju quimin a Cꞌujoꞌ,
tiꞌ cʌjaꞌan tu sasir tub mʌnaꞌ mac cu cꞌuchur.
Mʌnaꞌ mac yirmʌn a Cꞌujoꞌ mʌꞌ cꞌuchaꞌan yor yiric xan.
Caꞌ sʌjtaꞌc Cꞌuj ten tu cotor mac quireꞌ a Cꞌujoꞌ rajraꞌ yʌn muntqꞌuin.
Jeroj.
17 Arej tiꞌob Timoteo.
A mac yʌn yaꞌab u baꞌtac bajeꞌrer,
a jach yʌn u taqꞌuineꞌ xan.
Arej tiꞌob soc mʌꞌ u tus tucricob tu yor:
―Jach tsoyen a tenoꞌ,
quireꞌ yʌn yaꞌab in baꞌtac.
Arej tiꞌob.
Mʌꞌ u tus tucricob wa jeꞌ u toꞌcar ten u taqꞌuinoꞌ.
Mʌꞌ ja wirej,
chen Cꞌuj cu bin taꞌquicob a tiꞌoboꞌ.
Mʌꞌ ja wirej,
cu xupur u taqꞌuinob wa cu rʌc sʌtic.
Rajen arej tiꞌob caꞌ u yacsob tu yorob tiꞌ Cꞌuj.
Mʌꞌ ja wirej,
a Cꞌujoꞌ,
cu tsꞌic toꞌonex tu cotor baꞌ soc quiꞌ ij corex.
Jach manan cu tsꞌic toꞌonex quir u quiꞌquintic ij corex.
18 Arej tiꞌob Timoteo.
A mac a neyʌn u taqꞌuineꞌ caꞌ manacob u yamtob mac.
A baywoꞌ jeꞌ u tꞌajar u quiꞌ beyaj ʌcʌtan tu wich Cꞌuj.
Arej tiꞌob caꞌ u jʌsob u baꞌtac tiꞌ u racꞌob soc mʌꞌ tsꞌut.
19 Wa tan u manob u betob aroꞌ bin u caꞌ ricꞌsob ich caꞌanan a baꞌ jach tsoyoꞌ.
Mʌꞌ ju xupur mʌꞌ ju satar.
Munt qꞌuin tiꞌ yʌn.
Mʌꞌ ja wirej,
bin u caꞌ cuxtarob bajeꞌrereꞌ.
Bin u cu caꞌ cuxtarob jach taj ich caꞌanan.
20 A techoꞌ,
Timoteo,
quin wac tech.
Quiꞌ cʌnant u tajir a tu tsꞌa tech Jesús.
Mʌꞌ a yʌn uꞌyic a mac a rajraꞌ cu tꞌʌn tan u nuncaꞌr u tꞌʌn,
a mac a cu yac u neꞌer baꞌ.
Mʌꞌ u jach er baꞌriꞌ.
Tus u caꞌ.
21 Tiꞌ yʌn mac cu tus aric:
in neꞌer tu cotor baꞌ ich u tꞌʌn Cꞌuj.
Rajen caj u jen mastaj u tajir u tꞌʌn Cꞌuj quireꞌ mʌꞌ ju jach quibaj u tꞌʌn Cꞌuj.
Caꞌ u quiꞌ cʌnan tech Cꞌuj Jeroj tsꞌoquij,
quij Pablo.