A JEꞌ JUꞌUNAꞌ, PACHIR CAJ U CAꞌ TSꞌIBTA PABLO TIꞌ U YET ACSɅꞌORIROB ICH U CAJAR TESALÓNICA
2 TESALONICENSES
Tsꞌibtaꞌb a jeꞌ juꞌunaꞌ ten Pablo yejer u nupꞌob soc u xaquicob u yet acsʌꞌorirob tu cajar Tesalónica
1
A tenoꞌ,
Pablojen,
quin tsꞌibtic techex a jeꞌ juꞌunaꞌ yejer Silvano quin tsꞌibtic.
Yejer Timoteo quin tsꞌibtic techex xan.
Quin tsꞌibticob techex ij quet acsʌꞌorirex tu ca muchꞌquintiquex a bʌjex quir a cꞌujintiquex Cꞌuj ich u cajar Tesalónica.
Quin tsꞌibticob techex quireꞌ pꞌeriꞌ a worex yejer ic Tetex Cꞌuj.
Baxuc,
pꞌeriꞌ a worex yejer ic Jaj Tsꞌurirex Jesucristo xan.
2 A tenob,
quin tꞌʌnicob Cꞌuj techex caꞌ u yamtechex ic Tetex Cꞌuj.
Baxuc tiꞌ ic Jaj Tsꞌurirex Jesucristo.
Caꞌ quiꞌac a worex tiꞌ ic Tetex Cꞌuj soc mʌnaꞌ baꞌ ca tucriquex.
Baxuc tiꞌ ic Jaj Tsꞌurirex Jesucristo,
xan.
A Cꞌujoꞌ bin u caꞌ yaꞌarej wa tsoyoꞌonex wa mʌꞌ tsoyoꞌonex winiquiꞌ caꞌ bin uruc Cristo
3 A tenoboꞌ rajraꞌ quin waꞌaricob tiꞌ Cꞌuj:
“Bayoꞌ Cꞌuj” quireꞌ a mac a yacsmʌnob tu yorob tu cajar Tesalónica.
Quin wacob tiꞌ:
Bayoꞌ Cꞌuj,
quireꞌ jach tsoy aroꞌ.
Mʌꞌ ja wirej,
taj tan u quibicob a tꞌʌn Cꞌuj,
quenob tiꞌ.
Bayiriꞌ xan,
Cꞌuj,
quenob tiꞌ.
Jach manan u yajquinticob tu cotor u yet acsʌꞌorirob quireꞌ tan u pacran yajquinticob u bʌjob.
4 Rajen quiꞌ in worob in tsicbarob tiꞌ a bʌjobex tu cu muchꞌquinticob u bʌjob quir yubicob a techex.
Mʌꞌ ja wirej,
nemʌꞌ biquechex cax a mac a cu chuquicob a pachex.
Cax tan u tsꞌic a mucꞌyajex tan a mucꞌticobex.
A baxucoꞌ tan a wesiquex tiꞌ tu cotor mac bic tabar ta quibex u tꞌʌn Cꞌuj.
5 Mʌꞌ ja wirej,
a baywoꞌ Cꞌuj tan yesic bic jach taj cu yiricoꞌonex.
Quireꞌ caꞌ bin tsꞌocac yiric wa tsoy ij corex tu quic mucꞌyajex bin u caꞌ u quiꞌ quiꞌ acsoꞌonex tu cu bin u reyintic Cꞌuj.
6 Mʌꞌ wa taj a Cꞌujoꞌ caꞌ u boꞌotej tu cotor mac a cu chuquicob a pachex?
A Cꞌujoꞌ cu chꞌaꞌic ic mucꞌyajex soc
7 caꞌ ic jesex ic bʌjex caꞌ bin uruc ic Jaj Tsꞌurirex,
Jesucristo.
Yet tarob u yʌjmasirob u tꞌʌn Cꞌuj a mac a jach chich u mucꞌob.
Yet tar cꞌacꞌ,
a tar u tar caꞌananoꞌ.
8 Quir u boꞌotic u boꞌorir a mac a mʌꞌ yer Cꞌuj.
Baxuc cu bin u boꞌotej u boꞌorir a mac a mʌꞌ tu quibob u jach tsoyir u tꞌʌn Cꞌuj.
9 Robob a mac a mʌꞌ yerob Cꞌuj quet yejer a mac a mʌꞌ u quibob u jach tsoyir u tꞌʌn Cꞌuj,
yʌn boꞌotaꞌ ten Cꞌuj.
Tar binoꞌ cu yerar munt qꞌuin.
Bin u caꞌ jocꞌsaꞌbir ten Cꞌuj soc mʌꞌ yiricob u wich ic Jaj Tsꞌurirex.
Mʌꞌ ju bin yiricob u mucꞌ ic Jaj Tsꞌurirex a mac a jach manan tsoyiroꞌ.
10 Caꞌ bin u boꞌotacob tiꞌob ten Cꞌuj raꞌ u qꞌuinin caꞌ bin sʌjtaꞌbir ten a mac tu yacsajob tu yorob.
Jesús bin u caꞌ sʌjtaꞌbir ten a yacsmʌnob tu yorob.
Raꞌ u qꞌuinin caꞌ bin uruc ic Jaj Tsꞌurirex.
A mac a cu yacsicob tu yorob tiꞌeꞌ bin u caꞌ u yaꞌarob mun jach carem ic Jaj Tsꞌurirex.
Bin u caꞌ u yaꞌarob aroꞌ tiꞌ ic Jaj Tsꞌurirex quireꞌ caj u yacsob tu yorob a tiꞌoꞌ.
Baxuc a techex xanoꞌ quireꞌ ta wacsex ta worex u tꞌʌn caj in tsecꞌtob techex uch.
11 Rajen tan in tꞌʌnicob Cꞌuj soc yiriquechex jach tsoyechex.
Wa cu yiriquechex jach tsoyechex quireꞌ ta toc quibex u tꞌʌn.
Jeꞌ u quiꞌ acsiquechex tu ruꞌumin tu cu bin u reyintic Cꞌuj.
Rajen tan in tꞌʌnicob Cꞌuj techex soc u tsꞌiquex a muqꞌuex Cꞌuj.
Soc u nupꞌur a baꞌ ta tsꞌibtenob a techexoꞌ quireꞌ tsoy.
Rajen quin tꞌʌnicob Cꞌuj techex soc u tsꞌiquex a muqꞌuex Cꞌuj soc cꞌuchaꞌan a worex a manex tu tsoyir.
12 Mʌꞌ ja wirej,
a baywoꞌ bin u caꞌ sʌjtaꞌbir ten tu cotor mac ic Jaj Tsꞌurirex,
quireꞌ tu yubob taj ta cꞌʌmex u tꞌʌn ich u cajar Tesalónica.
Bayiriꞌ a Cꞌujoꞌ,
bin u caꞌ u sʌjbensirtic techex,
quireꞌ ta sʌjtex u parar Cꞌuj Jesucristo.
Bin u caꞌ u sʌjbensirbir techex quireꞌ cu yajquintiquechex Cꞌuj quir u yamtic techex ic Jaj Tsꞌurirex Jesucristo.