A JEꞌ JUꞌUNAꞌ, CAJ U YɅN BATꞌAN TSꞌIBTA PABLO TIꞌ U YET ACSɅꞌORIROB ICH U CAJAR TESALÓNICA
1 TESALONICENSES
A Pablojoꞌ quet u tsꞌib yejer u nupꞌ tu cu naj cꞌujinticob Cꞌuj tu cajar Tesalónica
1
A tenoꞌ,
Pablojen,
quin tsꞌibtic techex a jeꞌ juꞌunaꞌ yejer Silvano quin tsꞌibtic.
Yejer Timoteo quin tsꞌibtic techex xan.
Quin tsꞌibticob techex ij quet acsʌꞌorirex tu ca muchꞌquintiquex a bʌjex quir a cꞌujintiquex Cꞌuj ich u cajar Tesalónica.
Quin tsꞌibticob techex quireꞌ pꞌeriꞌ a worex yejer ic Tetex Cꞌuj.
Baxuc,
pꞌeriꞌ a worex yejer ic Jaj Tsꞌurirex Jesucristo xan.
A tenob,
quin tꞌʌnicob Cꞌuj techex caꞌ u yamtechex ic Tetex Cꞌuj.
Baxuc tiꞌ ic Jaj Tsꞌurirex Jesucristo.
Caꞌ quiꞌac a worex tiꞌ ic Tetex Cꞌuj soc mʌnaꞌ baꞌ ca tucriquex.
Baxuc tiꞌ ic Jaj Tsꞌurirex Jesucristo,
xan.
Taj tan u cꞌʌmicob u tꞌʌn Cꞌuj ich u cajar Tesalónica
2 U qꞌuinin quin cꞌʌꞌotiquechex quin tꞌʌnicob Cꞌuj techex:
“Bayoꞌ Cꞌuj”,
quen tiꞌ,
quireꞌ a mac a tiꞌ cʌjaꞌanob ich u cajar Tesalónica.
Rajraꞌ quin waricob tiꞌ Cꞌuj:
Bayoꞌ.
3 Wʌ ber quin tarob ʌcʌtan tiꞌ Cꞌuj quin tꞌʌnicob.
Quin cꞌʌꞌoticob bic tabar caj a wacsex ta worex tiꞌ Cristo rajen ca beyajex tiꞌ Cꞌuj.
Quireꞌ tan a pajiquex caꞌ bin tac Jesucristo ic Jaj Tsꞌurirex.
Rajen tan a chichquintiquex a worex soc mʌꞌ a pꞌʌtiquex u tꞌʌn Jaj Tsꞌur tu ca mucꞌyajex.
4 In bʌjobechex a mac a yajquintaꞌb ten Cꞌuj.
In werob tu tetechex Cꞌuj soc raꞌ yʌninechex.
5 Caj tarenob in camsiquechexob bic tabar a taꞌquiquex a bʌjex.
Mʌꞌ chen tꞌʌn in caꞌob uch caj in tsecꞌtob u tꞌʌn Cꞌuj chen yejer u mucꞌ u Tajꞌor u Pixam Cꞌuj caj in tsecꞌtajob techex.
Caj in tsecꞌtob uch quireꞌ in werob raꞌ jach taj u tꞌʌn Cꞌuj quin waricob techex,
a jach erex a tiꞌ cʌjaꞌanenob ich a cajarex quir in yamtiquechexob quir a cʌnex u tꞌʌn Cꞌuj uch.
6 A bʌjiriꞌ caj a cʌnmʌnenobexeꞌ baxuc caj a cʌnex Jaj Tsꞌur xan.
Quiꞌ a worex caj a cꞌʌmex u tꞌʌn Cꞌuj.
Caj u quiꞌquintaj a worex,
u Tajꞌor u Pixam Cꞌuj cax ca mucꞌyajnʌjex uch.
7 Baxuc caj u cʌnob a nachirob.
Baxuc caj u cʌna techex a mac cʌjaꞌan tu cajarob ich u ruꞌumin Acaya.
Bayiriꞌ xan,
a mac a cʌjaꞌan tu cajarob ich u ruꞌumin Macedonia.
Mʌꞌ ja wirej,
tu cʌnob techex quireꞌ tu yirob a quiꞌ acsmʌnex ta worex u tꞌʌn Cꞌuj.
8 Mʌꞌ jariꞌ ta wacsex ta worex chen caj binechex a tsecꞌtex u tꞌʌn Cꞌuj ich tu cotor u cajarob tu ruꞌumin Macedonia.
Bayiriꞌ tu ruꞌumin Acaya ta tsecꞌtex tiꞌob.
Baxuc ich tantanxer u ruꞌumin tu yubob bic ta wacsex ta worex u tꞌʌn Cꞌuj.
Mʌꞌ baꞌwir quin tsecꞌtic bic tabar ta wacsex ta worex quireꞌ tu toc uꞌyob.
9 Tu cotor mac u bʌjiriꞌ cu tsicbar tenob tiꞌ techex.
U bʌjiriꞌ cu tsicbarob tenob a cu cꞌuchur tu yʌnenob.
Caj u tsicbarob tenob,
raꞌ qꞌuinin caj tarenob in wiriquechex uch.
Caj yaꞌarob bic ta quiꞌ acsenobex,
tan a rʌc pꞌʌtiquex a tus cꞌujintiquex u rʌquir cꞌuj soc Jach Cꞌuj ca quiꞌ cꞌʌmiquex soc a beyajex tiꞌ Jach Cꞌuj.
Rajiꞌ ca beyajex tiꞌ jach cuxaꞌan.
Rajiꞌ jach Cꞌuj a cuxaꞌanoꞌ.
10 Rajiꞌob caj u tsicbatob a tenoboꞌ bic tabar bajeꞌrer tan a pajiquex Jesús ich caꞌanan.
Rajiꞌ u parar Cꞌuj,
caj wʌcꞌʌs ricꞌsaꞌb tu quimirir Jesús ten Cꞌuj.
Rajiꞌ a cu taꞌquicoꞌonex tu cu bin u jʌsicob Cꞌuj u qꞌuinin caꞌ bin xuruc tꞌʌn soc mʌꞌ ic binex erar ich cꞌacꞌ.