A JEꞌ JUꞌUNAꞌ, TIꞌ U YET ACSɅꞌORIROB ICH U CAJAR COLOSAS. RAJIꞌ TU TSꞌIBTA PABLO
COLOSENSES
A Pablojoꞌ cu tsꞌibtic tiꞌ a mac a yacsmʌnob tu yorob tu cajar Colosas
1
1-2 A tenoꞌ Pablojen,
yʌjtseqꞌuiren Jesucristo quireꞌ baxuc u cꞌat Cꞌuj.
A tenoꞌ quet yejer in wet acsʌꞌorir Timoteo quin tꞌʌniquechex in wet acsʌꞌorirex ich u cajar Colosas quireꞌ ta wacsex ta worex tiꞌ Jesucristo.
A tenoboꞌ in cꞌatob caꞌ u yam techex Cꞌuj,
ic Tetex,
bayiriꞌ xan in cꞌatob caꞌ u yam techex Cꞌuj soc mʌnaꞌ baꞌ ca tucriquex.
A Pablojoꞌ cu tꞌʌnic Cꞌuj tiꞌ a mac a yacsmʌnob tu yorob
3 A tenoboꞌ,
quin tꞌʌnicob ic Tetex Cꞌuj,
a mac u Tet ic Jaj Tsꞌurirex Jesucristo.
Rajraꞌ quin tꞌʌnicob Cꞌuj,
tan in waꞌaricob tiꞌ:
“Bayoꞌ Cꞌuj”,
quireꞌ ij quet acsʌꞌorirex a tiꞌ yʌnob ich u cajar Colosas.
A baywoꞌ quin tꞌʌnicob Cꞌuj tiꞌ.
4 Mʌꞌ ja wirej,
quin waꞌaricob “Bayoꞌ tiꞌ Cꞌuj”,
quireꞌ tin wuꞌyob bic jach taj ta wacsex ta worex tiꞌ Cristo Jesús.
Tin wuꞌyob xan,
bic caj a yajquintex tu cotor a wet acsʌꞌorirex.
5 Quireꞌ wa ber ta yʌn batꞌan uꞌyex u tajir u tꞌʌn Cꞌuj,
raꞌ u jach tsoyir u tꞌʌn Cꞌuj,
raꞌ ta wuꞌyex a baꞌ ca pajiquex ich Cꞌuj,
rajen ca wacsiquex ta worex,
rajen ca chen yajquintiquex a wet acsʌꞌorirex.
6 Mʌꞌ ja wirej,
u jach tsoyir u tꞌʌn Cꞌuj tu cu cꞌuchur ich mac cu cꞌaxicob u cuxtarob soc mʌꞌ u cꞌat yacsicob u siꞌpirob.
Rajen cu yacsicob tu yorob tiꞌ Cꞌuj,
bayiriꞌ xan,
cu yajquinticob u yet acsʌꞌorirob an ten bic techex.
A rayoꞌ ir a techexoꞌ ta wuꞌyex u jach tsoyir u tꞌʌn Cꞌuj caj a najtex tu jach tajir u jach tsoyir u tꞌʌn Cꞌuj.
7 Raꞌ ta cʌnex tiꞌ Epafras,
a mac in yajob,
quij Pablo,
tu quin beyajob tiꞌ Cꞌuj.
Mʌꞌ ja wirej,
rajiꞌ cu chichiquintic a worex Epafras tu cu beyaj tiꞌ Cristo tiꞌ tenob tu yʌnechex.
8 Caj urij Epafras tin wicnʌnob caj u tsicbataj in wuꞌyob bic ca jach yajquintiquenobex,
quireꞌ pꞌeriꞌoꞌonex ich u Tajꞌor u Pixam Cꞌuj.
9 Rajen rajraꞌ quin tꞌʌnicob Cꞌuj techex,
raꞌiriꞌ qꞌuinin tin wuꞌyob ta wacsex ta worex tiꞌ Cristo.
Quin tꞌʌnicob Cꞌuj soc u yamtiquechex quir a najtiquex a baꞌ cꞌasoꞌ,
bayiriꞌ a baꞌ tsoyoꞌ,
tan a yamtaꞌrex ten u Tajꞌor u Pixam Cꞌuj.
10 Wa tan a najtiquex aroꞌ quireꞌ u Tajꞌor u Pixam Cꞌuj tan u yamtiquechex,
jeroj cꞌuchaꞌan a worex a manex tu tsoyir an bic u cꞌat ic Jaj Tsꞌurirex,
rajraꞌ tan a quiꞌquintiquex u yor ic Jaj Tsꞌurirex xan.
Bayiriꞌ bin a caꞌex a quiꞌ cʌnex Cꞌuj.
11 Quin tꞌʌnicob Cꞌuj caꞌ u chuquej techex u jach mucꞌ Cꞌuj soc cꞌuchaꞌan a worex a mucꞌtex a baꞌ cu tar techex.
Soc quiꞌ a worex ca bin a mucꞌtex quireꞌ nemʌꞌ biquechex.
12 Quin tꞌʌnicob Cꞌuj xan,
caꞌ a cʌnex a waꞌarex tiꞌ Cꞌuj:
“Bayoꞌ,
quechex tiꞌ,
ic Tetex Cꞌuj,
quireꞌ ta quiꞌ yajquintenob.”
Mʌꞌ ja wirej,
a Cꞌujoꞌ tu tsꞌaja toꞌonex u mucꞌ soc u jʌsic a baꞌ yʌn ich caꞌananoꞌ a tu ricꞌsaj tiꞌ mac a Cꞌuj yʌninoꞌ,
a tiꞌ yʌn tu sasirir Cꞌujoꞌ.
13 A Cꞌujoꞌ caj u tacoꞌonex tiꞌ a quisinoꞌ,
a mac ic jach tsꞌurintiquex a uchoꞌ.
Quireꞌ a uchoꞌ quic manex ic yacꞌbirir a quisinoꞌ.
Caj u masoꞌonex a Cꞌujoꞌ soc ij quiꞌ tsꞌurintiquex u parar Cꞌuj,
quireꞌ u jach yaj u parar a Cꞌujoꞌ.
14 Mʌꞌ ja wirej,
Jesucristo tu tacoꞌonex caj u jawsaj ic siꞌpirex quireꞌ jocꞌ u qꞌuiqꞌuer toꞌonex,
u boꞌorir ic siꞌpirex.
U bʌjiriꞌ Cꞌuj caj u wʌcꞌʌs masoꞌonex caj quimij Cristo soc rajiꞌ yʌninoꞌonex
15 A jach Cꞌujo mʌꞌ irir ten wa mac,
chen ber tu chꞌaj u winquirir Jesús,
jeroj tij quirex Cꞌuj.
Mʌꞌ ja wirej,
cax mʌꞌ toy betaꞌc yocꞌocab uch,
quij,
tiꞌ toc yʌn a Cꞌujoꞌ chꞌic uch,
u beriꞌ tiꞌ toc yʌn Jesucristo.
16 A Cristojoꞌ caj u betaj tu cotor a baꞌ tiꞌ yʌn ich caꞌananoꞌ,
bayiriꞌ xan,
a tiꞌ yʌn teraꞌ ich yocꞌocab.
Cax a quij quiriquex,
cax a baꞌ mʌꞌ jij quirex,
rajiꞌ tu betaj.
Tu cotor a macoꞌ a yʌn u mucꞌoꞌ ich caꞌananoꞌ a cu tsꞌurintaꞌr a baꞌ tiꞌ yʌn tiꞌ taroꞌ cax a tiꞌ yʌnob ich yocꞌocab,
robob toc betaꞌb ten Cristo.
Mʌꞌ ja wirej,
toc betaꞌb ten Cꞌuj tu cotor baꞌ yejer Cristo soc u rʌc cꞌujintaꞌr Cristo quireꞌ jach carem.
17 Tu chꞌic chunin,
cax mʌnaꞌ baꞌ betaꞌb,
mʌnaꞌ ich caꞌanan,
mʌnaꞌ ich yocꞌocab,
u beriꞌ tiꞌ yʌn Cristo.
A Cristojoꞌ cu tsꞌurintaꞌr ten tu cotor baꞌ soc mʌꞌ u jubur.
18 Raꞌiriꞌ Cristo u Jaj Tsꞌurirob a mac a yacsmʌnob tu yorob,
quireꞌ rajiꞌ u joꞌr,
rajen a toꞌonexoꞌ iroꞌonex u winquirir Cristo.
Quireꞌ rajiꞌ yʌn batꞌan riqꞌuij tu quimirir rajen jeꞌ ic riqꞌuirex xan,
a baywoꞌ,
jach manan u mucꞌ tiꞌ tu cotor baꞌ,
a tiꞌ yʌnoꞌ.
19 Mʌꞌ ja wirej,
a baywoꞌ,
rajiꞌ Cristo quireꞌ rajiꞌ jach Cꞌuj u tajir.
20 Mʌꞌ ja wirej,
a Cꞌujoꞌ u jach cꞌat u yamticoꞌonex quireꞌ rajiꞌ Jesucristo.
Rajen tu betaj soc cꞌuchaꞌan yor tsoy yiric tu cotor mac ich yocꞌocab,
bayiriꞌ ich caꞌanan.
Caj rʌc chꞌatoꞌonex u bʌjiriꞌeꞌ wa ber caj jocꞌ u qꞌuiꞌquer Cristo caj quimij ich cruz.
21 Cꞌaj wa techex xan,
ta pꞌactex Cꞌuj,
mʌꞌ a cꞌatex a tiꞌoꞌ quireꞌ tan a manex ta cꞌasirex uch.
Bayiriꞌ xan,
jach cꞌas a baꞌ ta tucrex uch.
Chen a Cꞌujoꞌ tu wʌcꞌʌs payechex yicnʌn u bʌjiriꞌeꞌ.
22 Mʌꞌ ja wirej,
quimij u parar ich cruz u boꞌorir a siꞌpirex.
A baywoꞌ tu tsoyquintaj a pixamex soc jach tsoy,
soc mʌnaꞌ u cꞌasir ta pixamex.
Mʌꞌ ja wirej,
ʌcʌtan tu wich Cꞌuj,
mʌnaꞌ a siꞌpirex,
quij.
23 Baxuc jeꞌ u betic techex wa ca quiꞌ acsiquex ta worex tiꞌ,
wa ca pꞌeriꞌquintic a worex yejer,
wa mʌꞌ u tupsic a worex tiꞌ u jach tsoyir u tꞌʌn Cꞌuj.
Bayiriꞌ xan,
mʌꞌ tan a sutex ta pachex tiꞌ u jach tsoyir u tꞌʌn Cꞌuj a ta wuꞌyex.
Tu cotor mac tu yubob a ray tꞌʌnoꞌ,
a raꞌ quin tsecꞌticoboꞌ.
A Pablojoꞌ toc araꞌb tiꞌ quir u camsic u tꞌʌn Cꞌuj tiꞌ a yacsmʌnob tu yorob
24 Cax bajeꞌrer toc cꞌʌraꞌanen ich u cajar Roma,
quiꞌ in wor,
quireꞌ tan in mucꞌyaj techex soc in yamtiquechex.
Mʌꞌ ja wirej,
baxuc mucꞌyajnʌjij Cristo,
rajen quin mucꞌyaj techex,
a mac a yacsmʌnob tu yorob.
Quin mucꞌyaj jun xotꞌ tu mucꞌyajnʌjij Cristo xan quir in nupsic u tiꞌar a yacsmʌnob tu yorob.
25 Bayiriꞌ tetaꞌben ten Cꞌuj quir in beyaj tiꞌ.
Mʌꞌ ja wirej,
tu cꞌub in beyaj raꞌ quir in rʌc tsecꞌtic u tꞌʌn Cꞌuj techex,
bayiriꞌ soc yer mac tu cotor xan.
26 A Cꞌujoꞌ tu tsꞌaj in beyaj a tenoꞌ uch,
soc in toc aric tiꞌ mac,
a baꞌ a mʌꞌ araꞌan ten Cꞌuj tiꞌ mʌnaꞌ mac uch.
Mʌnaꞌ mac yer,
quireꞌ mʌꞌ araꞌan tiꞌ a mac tsꞌaꞌb u tucur ten Cꞌuj quir u tsicbarob a baꞌ cu yac Cꞌuj,
cax tu chꞌic chunin mʌnaꞌ mac yeriꞌ.
Chen a Cꞌujoꞌ tu toc araj tiꞌ a mac a tu yacsob tu yorob bajeꞌrer.
Robob tsꞌab u najticob ten Cꞌuj.
27 Mʌꞌ ja wirej,
a Cꞌujoꞌ caj u tucraj caꞌ u chaꞌbʌr ij querex,
a toꞌonex a mac a yacsmʌnob tu yorob tiꞌ ratiꞌ.
Mʌꞌ ja wirej,
tan u yamtiquechex Cꞌuj a mac a mʌꞌ u winiquirob judío.
A baꞌ u ber jach manan tsoy quireꞌ,
quij,
a wet manex Cristo rajen a werex bin a caꞌex caꞌananex.
28 Rajen a tenoboꞌ quin binob in tsecꞌticob tiꞌ mac tu cotor,
tan in waꞌaricob tiꞌob tiꞌ Cristo.
Tan in chich aricob tiꞌob soc mʌꞌ u betob a baꞌ cꞌasoꞌ.
Bayiriꞌ tan in quiꞌ camsicob a tiꞌoboꞌ soc taj yerob u tꞌʌn Cꞌuj.
Tan in quiꞌ camsicob u tꞌʌn Cꞌuj soc cꞌuchaꞌan in worob in wacsicob tu cotor mac ʌcʌtan tiꞌ Cꞌuj soc taj cu yacsicob tu yorob tiꞌ Cristo.
29 Rajen,
quin jach beyaj quireꞌ tin cꞌʌmaj u chichir u mucꞌ Cristo a mac a tiꞌ yʌn tin pixam.
Rajen quin pꞌisic in bʌj chich beyaj.