A JEꞌ JUꞌUNAꞌ, RAJIꞌ TIꞌ U YET ACSɅꞌORIROB ICH U CAJAR FILIPOS. RAJIꞌ TU TSꞌIBTA PABLO
FILIPENSES
A Pablojoꞌ caj u yʌnxchun u tsicbar tiꞌ ij quet acsʌꞌorirex
1
A tenoꞌ Pablojen,
quet yejer in wet acsʌꞌorir Timoteo,
a tenoboꞌ,
u cꞌurewenob Jesucristo.
A tenoboꞌ,
tan in tꞌʌnicob techex ich a jeꞌ u juꞌuninaꞌ.
Tan in tsicbarob techex,
a mac a cʌjaꞌanob ich u cajar Filipos quireꞌ quet yejer toꞌonex Jesucristo quireꞌ rajiꞌ yʌninoꞌonex.
Tan in tsicbarob techex xan,
a mac oc caꞌ tsꞌurintaꞌc ten u yet acsʌꞌorirob bayiriꞌ xan,
techex a mac a caꞌ tsꞌurirex a wet acsʌꞌorirex.
2 Quin tꞌʌnicob Cꞌuj,
a mac ic Tetex Cꞌuj,
quet yejer ij Jaj Tsꞌurirex caꞌ u yam techex an bic tsoy tu tꞌʌnob,
a baywoꞌ mʌnaꞌ baꞌ ca bin a tucrex.
Baxucoꞌ Pablo caj u tꞌʌnaj Cꞌuj tiꞌ u yet acsʌꞌorirob
3 Wa ber quin cꞌʌꞌotiquechex quin waꞌaric tiꞌ Cꞌuj:
“Bayoꞌ Cꞌuj,
quen tiꞌ,
quireꞌ in wet acsʌꞌorirob a cu yacsicob tu yorob a tꞌʌn.”
A baywoꞌ quin waꞌaric tiꞌ Cꞌuj.
4 Mʌꞌ ja wirej,
wa ber quin tꞌʌnic Cꞌuj techex,
jach quiꞌ in wor quireꞌ pꞌeriꞌ ij corex quic beyajex tiꞌ Cꞌuj.
5 Raꞌ u qꞌuinin caj a wacsex ta worex tiꞌ Cꞌuj hasta u qꞌuinin bajeꞌrer.
Rajen,
u jach tsoyir u tꞌʌn Cꞌuj tan u man tu cotor mac.
6 A tenoꞌ,
in wer a jeꞌraꞌ,
a Cꞌujoꞌ a mac a tu yʌnxchun u beyaj ta pixamex,
rajiꞌ Cꞌuj cu bin u beyaj tic pixamex aroꞌ.
Rajraꞌ cu betic hasta caꞌ bin cꞌuchuc tu qꞌuinin cu yuꞌur ic Jaj Tsꞌurirex.
7 Jach tsoy wa baxucoꞌ caꞌ in cꞌʌꞌotechex.
Mʌꞌ ja wirej,
in jach yajechex,
quireꞌ quet toꞌonex yejer Cꞌuj caj u yajquinoꞌonex rajen cax cꞌʌraꞌanen a teraꞌ tu cu maꞌcʌr winic,
quet toꞌonex cꞌuchaꞌan ij corex ic pacran yamtiquex ic bʌjex xan.
Mʌꞌ ja wirej,
tan ic pacraj yamtiquex ic bʌjex xan wa cu puriquenob ʌcʌtan ich juez soc a tiꞌ taroꞌ quin toc aric tiꞌob u jach tsoyir u tꞌʌn Cꞌuj.
8 A Cꞌujoꞌ yer wa jin jach yajechex an ten bic Jesucristo u yajoꞌonex.
9 A tenoꞌ tan in tꞌʌnic Cꞌuj techex soc a jach quiꞌ erex Cꞌuj,
bayiriꞌ soc Cꞌuj u chaꞌic a werex a baꞌ jach tsoy,
soc cꞌuchaꞌan a worex a yajquintiquex mac soc a yajquintiquex mac jach manan.
10 A baywoꞌ cꞌuchaꞌan a worex a tetiquex a baꞌ jach manan tsoyir.
Jeroj tuneꞌ,
wa ber caꞌ bin tac Cristo quir u pʌyicoꞌonex caꞌanan,
a ray u qꞌuinino,
jeꞌ u yiric Cristo u jach tsoyir ta pixamex.
Quireꞌ Cristo jeꞌ u yiric mʌnaꞌ mac tu pꞌuspachtajob Jesús quireꞌ a baꞌ ta betex taj uch.
11 A baywoꞌ cꞌuchaꞌan a worex a betex tu cotor a baꞌ jach taj quireꞌ Jesucristo tan u beyaj ta pixamex.
A baywoꞌ,
a Cꞌuj xanoꞌ bin u caꞌ sʌjtaꞌbir ten u jer mac quireꞌ techex,
rajen jeꞌ u bin u tsicbarob an ten bic jach tsoy a Cꞌujoꞌ quireꞌ techex tan a manex tu tsoyir.
Jach manan quiꞌ yor Pablo wa cu sʌjtaꞌ Cristo ten mac
12 In wet acsʌꞌorirex,
a tenoꞌ in cꞌat a werex cax a baꞌ in ber a tenoꞌ mʌꞌ jin mʌꞌquintaj u jach tsoyir u tꞌʌn Cꞌuj cax tiꞌ yʌnenaꞌ tu cu maꞌcʌr winicob.
Yaꞌab mac tu toc yubajob u jach tsoyir u tꞌʌn Cꞌuj.
13 Ich tu cotor yatochob a soldadojoꞌ u winiquirob romano tu cajaꞌanob,
cax a soldadojoꞌ u rey César,
robob ti taroꞌ xan,
yubmʌnob tiꞌ yʌnen tu cu maꞌcʌr winicob quireꞌ quin sayʌr tu pach Jesucristo.
Tiꞌ yʌn u jer mac yaꞌab yubmʌnob xan.
14 Quireꞌ tiꞌ yʌnen tu cu maꞌcʌr winicob yʌn yaꞌab in wet acsʌꞌorirob jach chichij yorob ʌcʌtan tiꞌ Cꞌuj.
Rajen,
tan u manob u masicob u jach tsoyir u tꞌʌn Cꞌuj.
Tsꞌoc u chꞌic sajquirob bajeꞌrer.
15 Tu cotor tan u tsecꞌticob Cristo.
Yʌn mac qꞌuex yorob tu cu tsecꞌticob quireꞌ u cꞌat yiric wa cꞌuchaꞌan yorob an ten bic quin tsecꞌtic ten.
Yʌn mac tan u tsecꞌticob u jach tsoyir u tꞌʌn Cꞌuj quireꞌ tsoy u pixamob.
16-17 Aroꞌ cu tsecꞌticob quireꞌ u yajenob.
Yʌn mac u jer qꞌuex yorob ten rajen tan u manob u tsecꞌticob u jach tsoyir u tꞌʌn Cꞌuj.
U cꞌat yiricob in mucꞌyaj a tenoꞌ,
cax wa ber tu mʌcaꞌanen tu cu maꞌcʌr winicob quireꞌ u cꞌat u yiricob u chuquiquenob.
18 A ray winicoꞌ,
mʌꞌ jach noꞌj tiꞌ teniꞌ wa baxuc cu tucricob tu yorob.
Mʌꞌ ja wirej,
a baꞌ jach noꞌj tiꞌ ten wa cu tsecꞌticob Cristo,
cax mʌꞌ tan u tsecꞌticob quireꞌ tsoy u pixamob.
Jach quiꞌ in wor wa cu tsecꞌticob Cristo.
Mʌꞌ tucur in caꞌiꞌ.
19 Mʌꞌ jarariꞌ,
quireꞌ ca tꞌʌniquex Cꞌuj ten.
U Tajꞌor u Pixam Cꞌuj,
a mac tuchiꞌtaꞌb ten Cristo,
jeꞌ u yamtiqueneꞌ.
Rajen in wer jeꞌ in siptareꞌ.
20 A tenoꞌ jach manan in cꞌat wa mʌꞌ in chꞌaꞌej suraquir wa ber caꞌ bin uruc Cristo.
A tenoꞌ in jach er,
jeꞌ u yamtiqueneꞌ,
rajen,
jeꞌ in man in toc araj tiꞌob Cristo soc u sʌjtaꞌ ten mac quireꞌ a tenoꞌ,
cax quimiquen.
21 Tiꞌ toy cuxaꞌanen teꞌraꞌ ich yocꞌocab,
a tenoꞌ,
quin chen pachtic wa Cristo jeꞌ u bin sʌjtaꞌbir quireꞌ a tenoꞌ tin tsecꞌtaj Cristo.
Rajen,
wa quin quimin,
a Cristojoꞌ jach manan cu bin sʌjtaꞌbir.
22 Wa tiꞌ toy cuxaꞌanen teꞌraꞌ ich yocꞌocab,
a baywoꞌ jeꞌ in chen beyaj tiꞌ Cristo.
Rajen,
mʌꞌ in wer a baꞌ in chen cꞌat in betej.
23 A tenoꞌ,
mʌꞌ in wer a baꞌ quin tetic ich a caꞌturoꞌ.
A tenoꞌ in cꞌat in pachtej in quimin soc caꞌ xiquen caꞌanan tu yʌn Cristo,
quireꞌ jach manan tsoy a ich caꞌananoꞌ.
24 Quireꞌ mʌꞌ cꞌuchaꞌan a worex ta junanex,
rajen,
jach nojen a tenoꞌ wa tiꞌ toy quin pꞌatʌr in yamtiquechex.
25 Quin wuꞌyic tin wor,
rajen in wer jeꞌ in toc cuxtareꞌ soc jeꞌ in yamtiquechex a quiꞌ acsex ta worex tiꞌ Cristo.
Bayiriꞌ jeꞌ u chichtar u mucꞌ a pixamexeꞌ.
Wa ca quiꞌ acsiquex ta worexeꞌ,
in wer jeꞌ u nequiꞌtar a worexeꞌ.
26 Rajen,
wa ber quin wʌcꞌʌs tar tu yʌnechex,
jach manan ca bin a waꞌariquex tiꞌ Cristo:
“Bayoꞌ Cristo,
quireꞌ siptaꞌb Pablo tu cu maꞌcʌr winicob.”
27 Yʌn manenex tu tsoyir.
Mʌꞌ ja wirej,
aroꞌ jach nojechex quireꞌ a techexoꞌ ta wacsex ta worex tiꞌ u jach tsoyir u tꞌʌn Cꞌuj,
a cu tsicbar Cristo.
Wa cu siptiquenoboꞌ jeꞌ in tar in wiriquechexeꞌ,
a baywoꞌ jeꞌ in wiric bic tabarechex.
Wa mʌꞌ ju siptenoboꞌ jeꞌ in wuꞌyic u tsicbar mac techexeꞌ.
Chichquint a worex.
Toc pꞌeriꞌquint ja worex.
Mʌꞌ ja wirej,
a baywoꞌ quet ca bin a pꞌisiquex a bʌjex quir a masiquex u jach tsoyir u tꞌʌn Cꞌuj.
28 Mʌꞌ a chꞌiquex sajquirechex chichin tiꞌ a mac a cu pꞌactiquechexoꞌ.
Cax cu pꞌactiquechexob,
a baywoꞌ chʌcaꞌan yiricob wa ju bʌjiriꞌob jeꞌ u bin sʌtbirob.
Chen a toꞌonexoꞌ a mac a tu mucꞌtaj tu cu chuquicob ic pachex,
jach manan ij querex a Cꞌujoꞌ cꞌuchaꞌan yor u yamticoꞌonex a Cꞌujoꞌ.
29 Mʌꞌ ja wirej,
a Cꞌujoꞌ tu tetoꞌonex mʌꞌ quir ic chen acsiquex tij corex tiꞌ Cristo.
A Cꞌujoꞌ caj u tetoꞌonex caꞌ ic mucꞌtex u chucur ic pachex quireꞌ tij cacsex tij corex tiꞌ Cristo.
30 Rajen,
quet caꞌ ij cꞌʌmex u chucur ic pachex caꞌ ij quibex tu cotoroꞌonex cu chucur ic pachex.
A uchoꞌ ta wuꞌyex tu chucob in pach,
bayiriꞌ bajeꞌrer tan a wuꞌyiquex teꞌraꞌ tan u chuquicob in pach xan.