A chichanoꞌ yejer u tet yejer u nʌꞌ
6
A chichanoꞌ,
cax xib,
cax xquic,
caꞌ u quib u tꞌʌn u tet yejer u nʌꞌ.
A baywoꞌ,
ca betiquex a tsoyoꞌ,
quireꞌ ta wacsex ta worex tiꞌ Cristo.
2-3 “Sʌtex a tetex yejer a nʌꞌex,
rajen jeꞌ u jocꞌar tsoyirechex.
A baywoꞌ,
jach amaꞌan caꞌ bin quimiquex.”
Baxuc cu yaꞌaric ich u tꞌʌn Cꞌuj uch.
Rajiꞌ pʌyber tu yʌn araj Cꞌuj tu cu bin yamticoꞌonexeꞌ wa quij quibiquex aroꞌ.
4 A techexoꞌ,
a mac a yʌn a pararexoꞌ.
Mʌꞌ a tiquin qꞌueyiquex a pararex soc mʌꞌ u jocꞌar yorob a pararex.
Quireꞌ acaꞌan ta pixamex ic Jaj Tsꞌurirex soc jach tsoy ca bin a tꞌʌniquex a tiꞌoboꞌ.
Tsoy a qꞌueyiquex a tiꞌoboꞌ an ten bic u cꞌat ic Jaj Tsꞌurirex.
Quireꞌ wa tsoy ca tꞌʌniquex a pararex jeꞌ u quibicob a tꞌʌnexeꞌ.
5 A techexoꞌ,
u cꞌurewechex mac quireꞌ tu mʌnechex.
Caꞌ a quib u tꞌʌn a tsꞌurirex.
Caꞌ a chꞌaꞌex sajaquirex a tiꞌoboꞌ.
Caꞌ a sʌjtex a tiꞌoboꞌ.
Caꞌ quiꞌ beyanʌquex tiꞌob an ten bic caj quiꞌ beyanʌjechex tiꞌ Cristo.
6 Mʌꞌ a chen quiꞌ beyajex tiꞌ a tsꞌurirex wa ber cu yiricob techex tu ca beyajex soc yaꞌaricob,
jach tsoyechex,
quij.
Rajraꞌ quiꞌ beyanenex tiꞌob quireꞌ quiꞌ a worex.
Quiꞌ beyanenex tiꞌoꞌ quireꞌ baxuc u cꞌat Cꞌuj,
quireꞌ u curewechex Cꞌuj xan.
7 Wa ber ca beyajex tiꞌ a jach tsꞌurirex,
beyanenex yejer u tsoyir a pixamex.
Yʌn cꞌaj techex,
ca beyajex tiꞌ ic Jaj Tsꞌurirex Jesucristo,
mʌꞌ a chen beyajex tiꞌ a jach tsꞌurirex ich yocꞌocab.
8 Yʌn cꞌaj techex xan,
ic Jaj Tsꞌurirex jeꞌ u boꞌotic u boꞌorir a cꞌʌbex tu quic beyajex.
Quireꞌ a baꞌ beyaj tic betex wa jach tsoy,
cax beyanʌjoꞌonex tiꞌ ic Jaj Tsꞌurirex cax u bʌjiriꞌ u tsꞌurir u bʌj cu beyaj.
9 A techexoꞌ,
a mac a yʌn u cꞌurewoꞌ.
Caꞌ a betiquex a baꞌ jach tsoy tiꞌ a cꞌurewex.
Mʌꞌ a yʌn tiquin qꞌueyiquex a cꞌurewex quireꞌ a werex tiꞌ yʌn mac ich caꞌanan a yʌninechex,
a Jaj Tsꞌurirex.
Mʌꞌ ja wirej,
rajiꞌ cu yajquintic tu cotor mac,
mʌꞌ ju chen yajquinta jun yarob macoꞌ.
A baꞌ cu tsꞌic toꞌonex raꞌ quir ic chiꞌex a quisinoꞌ
10 Jariꞌ a jeꞌraꞌ bin in tsꞌibtej techex.
Mʌꞌ ja wirej,
in wet acsʌꞌorirechex quireꞌ mʌnaꞌ u chichir a muqꞌuex ta pixamex ta junanex,
rajen caꞌ a cꞌʌmex u chichir u mucꞌ u pixam ic Jaj Tsꞌurirex,
quireꞌ pꞌeriꞌechex yejer ic Jaj Tsꞌurirex.
11 Toc chꞌajex a wʌcꞌʌs a bʌjiriꞌexeꞌ a baꞌ tu tsꞌa techex Cꞌuj quir a cʌnantic a pachex,
bayiriꞌ xan quir u yamtic techex tiꞌ a baꞌ cu tar ʌcʌtan techex.
A baywoꞌ cꞌuchaꞌan a worex tiꞌ a quisinoꞌ.
Caꞌ a betex aroꞌ irej a soldadojoꞌ a cu buquintic u noqꞌuir mascab quir u cʌnantic u bʌj quir u yocar baꞌ teꞌ.
12 Quireꞌ mʌꞌ jic tsꞌictarex yejer a mac a quet u winquirir yejeroꞌonex,
mʌꞌ quet ij qꞌuiqꞌuer yejeroꞌonexiꞌ.
Tan ic tsꞌictarex yejer a mac a mʌꞌ chʌcaꞌan ij quiriquex,
a mac mʌnaꞌ u winquiriroꞌ.
Rajiꞌ,
a quisinoꞌ,
a mac u jach tsꞌurir quisinoꞌ,
yejer robob u tsꞌurirob u siꞌpirob,
a teꞌ yʌn ich yocꞌocabaꞌ.
Robob yʌn yaꞌab mac a cu quibicob u tꞌʌnoꞌ wa ber cu yacob a tiꞌoboꞌ.
13 Rajen caꞌ a toc chꞌajex tiꞌ a bʌjirex a tu cotor tu tsꞌajex tech Cꞌuj,
a baywoꞌ cꞌuchaꞌan a worex tiꞌ a quisin wa ber caꞌ bin tac u tumt a worex.
Wa ca toc chꞌiquex tiꞌ a bʌjirex a baꞌ tu tsꞌa techex Cꞌuj,
jeroj a quisinoꞌ mʌꞌ ju cꞌuchur yor techex.
14 Wa ber caꞌ bin xic tu baꞌteꞌ soldado,
toc tsꞌaꞌb tiꞌob baꞌ quir u binob.
Yʌn cꞌax u nʌcꞌ quir u cꞌʌxic u nʌcꞌ.
Yʌn u boxer u cꞌʌb quir u cʌnantic u bʌj.
Yʌn u noqꞌuir mascab quir u buquintic.
Baxuc techex xan,
caꞌ a betex soc a cʌnantex a bʌj yejer u tꞌʌn Cꞌuj,
a baꞌ tajiꞌ,
bayiriꞌ xan,
caꞌ manaquechex tu tsoyir.
15 Wa ber caꞌ bin xic a soldadojoꞌ ich baꞌteꞌ,
toc tsꞌab tiꞌ pechꞌ xʌnab quir u binob.
Baxuc techex xan,
toc tsꞌajan a worex a binex a tsecꞌtex u jach tsoyir u tꞌʌn Cꞌuj,
soc mʌnaꞌ baꞌ cu tucricob mac a cu cꞌʌmicob Cristo.
16 A soldadojoꞌ cu cuchic u boxer u cꞌʌb caꞌ bin xic tu baꞌteꞌ,
rajiꞌ cu cuchic soc mʌꞌ u bin jurbir ten mac a cu tar quinsbir a tiꞌoꞌ.
Baxuc techex xan,
caꞌ a quiꞌ acsex ta worex soc cꞌuchaꞌan a worex tiꞌ a quisinoꞌ.
17 A soldadojoꞌ caꞌ bin xic ich baꞌteꞌ,
cu pꞌoquintic u boxer u joꞌr,
a mascaboꞌ,
soc u cʌnantaꞌr u joꞌr.
Baxuc techex xan,
caꞌ a cʌnantex a bʌj,
rajraꞌ caꞌ a tucrex bic caj toquechex soc a cuxtarex munt qꞌuin.
A soldadojoꞌ caꞌ bin xic tu cu baꞌteꞌ,
u mʌchmʌn u mascab soc cꞌuchaꞌan yor tiꞌ a mac a cu tar.
Baxuc techex xan,
caꞌ a cꞌʌniquex u tꞌʌn Cꞌuj,
a tsꞌab ten u Tajꞌor Pixam Cꞌuj soc cꞌuchaꞌan a worex tiꞌ a quisinoꞌ.
Mʌꞌ ja wirej,
caj a wacsex ta worex bin u caꞌ tacbirechex ten u Tajꞌor u Pixam Cꞌuj,
aroꞌ irej a baꞌ cu cʌnantic a joꞌrex.
U tꞌʌn Cꞌuj,
a cu yaꞌaric techex u Tajꞌor u Pixam Cꞌuj raꞌ ir a mascabex.
18 Rajraꞌ tꞌʌnex Cꞌuj.
Cꞌatex tiꞌ Cꞌuj caꞌ u yam techex.
Caꞌ a tꞌʌniquex Cꞌuj an ten bic u Tajꞌor u Pixam Cꞌuj cu pʌyic a berex.
U yʌn pꞌir a wichex caꞌ a chichquint a worex soc rajraꞌ ca tꞌʌniquex Cꞌuj tiꞌ a mac a quet yejerechex a yacsmʌnob tu yorob tiꞌ Cristo.
19 Caꞌ a tꞌʌnex Cꞌuj ten xan,
soc a Cꞌujoꞌ cu tsicbar ten a baꞌ quin waꞌaric tiꞌ mac bic tabar cu bin tacbirob ten Cꞌuj,
cax mʌꞌ u winiquirob judío bajeꞌrer.
20 Mʌꞌ ja wirej,
teꞌ yʌnenenaꞌ cꞌʌraꞌanen yejer mascab tu cu maꞌcʌr winic quireꞌ quin tsecꞌtic u tꞌʌn Cꞌuj.
Caꞌ a tꞌʌnex Cꞌuj ten soc u chichquintic in wor soc mʌꞌ u jacꞌʌr in wor in tsecꞌtej u tꞌʌn Cꞌuj quireꞌ a baywoꞌ caꞌ in tsecꞌtej.
Cu tꞌʌnic u yet acsʌꞌorirob
21 Ij quet acsʌꞌorirex Tíquico,
tiꞌ cu tar tu yʌnechex.
Caꞌ bin cꞌuchuc tu yʌnechex jeꞌ u tsicbʌtic techex a baꞌ in ber ten.
Rajiꞌ in jach yaj,
rajraꞌ tan u beyaj tiꞌ ic Jaj Tsꞌurirex.
22 A tenoꞌ tan in tuchiꞌtic techex Tíquico soc a wuꞌyiquex a tenob jach quiꞌ in worob,
a baywoꞌ bin u caꞌ u chichquint a worex.
23 A tenoꞌ quin tꞌʌnic ic Tetex Cꞌuj techex,
bayiriꞌ quin tꞌʌnic ic Jaj Tsꞌurirex techex soc mʌnaꞌ baꞌ ca tucriquex.
Bayiriꞌ xan,
soc a yajquintex tu cotor mac,
bayiriꞌ soc a quiꞌ acsiquex ta worex.
24 Quin tꞌʌnic Cꞌuj soc a werex u jach tsoyir u pixam Cꞌuj,
a techexoꞌ yejer tu cotor mac a cu quiꞌ yajquinticob ic Jaj Tsꞌurirex.
Jeroj tsꞌoqui,
quij Pablo.