Chaꞌ yiricob a techexoꞌ u pararechex Cꞌuj
5
Quireꞌ u pararechex Cꞌuj a mac Cꞌuj,
cu yajquintic,
rajen caꞌ a pꞌisex a bʌj a cʌniquex Cꞌuj.
2 Caꞌ a yajquintex tu cotor mac an ten bic Cristo cu yajquintechex,
quireꞌ raji mʌꞌ tu yacꞌtaj u bʌj.
U jach yajoꞌonex rajen tu cꞌubaj u bʌj soc u quinsaꞌ tiꞌ toꞌonex.
Baxuc caj u betaj soc u quiꞌquintaj yor Cꞌuj quireꞌ u yajoꞌonex Cristo.
3 Yʌn mac a cu man.
Yʌn mac a cu betic cꞌas.
Yʌn mac a cu pachtic a baꞌ yʌn u jer mac,
cax aroꞌ cu tsicbarob tiꞌ a mac a mʌꞌ yerob Cꞌuj,
mʌꞌ a chaꞌiquex u tsicbarob ich techexoꞌ a mac yerob Cꞌuj quireꞌ Cꞌuj yʌnin techex.
4 Quireꞌ a techexoꞌ Cꞌuj yʌninechex,
mʌꞌ quet yejer yor Cꞌuj wa ca cʌrʌx tꞌʌntiquex mac,
cax mʌꞌ a soꞌsoc tꞌʌntiquex mac,
cax mʌꞌ a tsicbarex tiꞌ xib wa xquic tiꞌ a cꞌasoꞌ.
Caꞌ tsicbanʌquex a baꞌ quet yejer yor Cꞌuj.
Caꞌ a waꞌarex tiꞌ Cꞌuj.
“Bayoꞌ Cꞌuj.”
5 Mʌꞌ a yʌn cʌniquex a jeꞌraꞌ.
A mac a rajraꞌ cu manob,
bayiriꞌ a mac a rajraꞌ cu man tu cꞌasir.
Bayiriꞌ a mac a rajraꞌ cu pachtic a baꞌ yʌnin u racꞌob.
Mʌꞌ ja wirej,
a mac a cu pachtic a baꞌ yʌnin u taqꞌuin u jer mac raꞌ irej wa tus cꞌuj ten u cꞌujintic u taqꞌuin.
Robob,
mʌꞌ u bin acsaꞌbir tu cu bin u reyintej Cristo.
Mʌꞌ ju bin acsaꞌbir tu yʌn Cꞌuj xan.
6 Mʌꞌ a chaꞌiquex u tus aricob techex a mac a mʌꞌ tu yacsob tu yorob a tin waꞌaraj techex bajeꞌrer.
Mʌꞌ ja wirej,
robob tiꞌ toy cu manob tu cu cʌrʌxbeticob a baꞌ araꞌb ten Cꞌuj tiꞌob.
Jeꞌ u cꞌuchur tu qꞌuinin caꞌ bin yubob u tsꞌiquir Cꞌuj.
7 Rajen,
mʌꞌ a wet manex yejer a mac a tan u pʌyicob u siꞌpirob.
8 A uchoꞌ a techexoꞌ tan a manex ich yacꞌbirir quireꞌ tiꞌ toy ca manex ich a siꞌpirex.
Chen bajeꞌrer,
tan a manex ich u sasirir quireꞌ tsoyquintaꞌb a pixamex ten Cristo.
Rajen chaꞌex u yiricob techex mac bic caj tsoyjij a pixamex quireꞌ Cristo tu tsoyquintaj.
9 Quireꞌ tsoyjij ic pixamex,
jeꞌ u jocꞌar tiꞌ ic pixamex jach tsoy,
bayiriꞌ xan,
jeꞌ u jocꞌar tiꞌ ic pixam a jach taj,
bayiriꞌ xan jeꞌ u jocꞌar tiꞌ ic pixamex tu tajirir.
10 Caꞌ a cʌnex a baꞌ cu quiꞌquintic yor ic Jaj Tsꞌurirex.
11 Mʌꞌ a wet manex yejer a mac a cu manob tu cꞌasir quireꞌ robob cu manob ich yacꞌbirir.
Mʌꞌ ja wirej,
jach tsoy wa ca waꞌariquex tiꞌ u tꞌʌn Cꞌuj soc mʌꞌ u manob ich yacꞌbirir xan.
12 Quireꞌ u cꞌasirir tu cu manob,
jach manan cꞌas,
rajen quic chꞌic suraquirex ij carex tiꞌ quireꞌ jach cꞌas.
13 Quireꞌ wa jij cariquex tiꞌob u tꞌʌn Cꞌuj,
a baywoꞌ jeꞌ yiricob wa cu beticob jach cꞌas.
Jeroj,
wa cu yacsicob tu yorob wa tu pʌyob u siꞌpirob,
yʌn ix tiꞌ mac jeꞌ u cꞌaxicob tu yorob tan u pꞌʌticob u man ich u cꞌasir,
rajen jeꞌ u tsoytar u pixamob.
14 Rajen,
a baywoꞌ cu bin jocꞌar an ten cu yaꞌar:
A mac wenʌn u caꞌ ajenex a techexoꞌ.
Cojenex caꞌ wʌcꞌʌs cuxraquex tu mucaꞌanechex.
A Cristojoꞌ,
jeꞌ u tsoyquintic a pixamex soc a manex tu tsoyir.
Baxuc cu yaꞌaric.
15 Quiꞌ cʌnantex a bʌj an bic tabar a manex tub yʌnechex.
Caꞌ manaquex irechex a mac a u neꞌer baꞌ.
Mʌꞌ a manex irechex a mac jach chich u joꞌrob.
16 U manej qꞌuin caꞌ a betex a baꞌ jach tsoyoꞌ quireꞌ jach cꞌas a baꞌ u ber bajeꞌrer.
17 Rajen mʌꞌ a yʌn betex a mʌꞌ tsoy.
Caꞌ a cꞌatex tiꞌ Cꞌuj soc a werex baꞌ ca bin a betex.
18 Soc mʌꞌ a chen carchʌjʌrechex quireꞌ raꞌ cu pʌyiquechex quir a satarex.
Caꞌ a chaꞌex a tsꞌurintiquex u Tajꞌor Pixam Cꞌuj.
19 A werex a baꞌ jach manan tsoy,
wa ca pacran tsicbarex tiꞌ u tꞌʌn Cꞌuj,
quet yejer u cꞌay Cꞌuj.
Cꞌʌyex Cꞌuj ta pixamex.
Suꞌsuꞌ a tꞌʌniquex Cꞌuj.
20 Cax a baꞌ tu tsꞌa techex Cꞌuj,
cax a baꞌ tu yamtechex Cꞌuj,
cax wa yajechex,
caꞌ a waꞌarex tiꞌ Cꞌuj:
“Bayoꞌ ic Tetex Cꞌuj quireꞌ a baꞌ tu betaj ic Jaj Tsꞌurirex Jesucristo toꞌonex.”
Caꞌ a pacran quibechex wa cu yaꞌaric tech a wet acsʌꞌorirex
21 Caꞌ a sʌr a xiquinex tiꞌ u tꞌʌn a wet acsʌꞌorirex,
quireꞌ a baywoꞌ ca sʌjtex Cristo.
22 A xquicoꞌ,
caꞌ quib u tꞌʌn u mam,
a baywoꞌ tan u quibicob u tꞌʌn u Jaj Tsꞌurirob Jesucristo.
23 Quireꞌ a xiboꞌ,
raꞌ tu jach tsꞌurintaꞌr ten u racꞌ.
Raꞌiriꞌ irej an ten bic Cristo,
rajiꞌ ic Jach Tsꞌurirex a toꞌonexoꞌ,
a mac a tu yacsob tu yorob tiꞌ Cristo.
Mʌꞌ ja wirej,
a xquicoꞌ jeꞌ u tsꞌurintic u mameꞌ quireꞌ bin u caꞌ yamtaꞌbir ten u mam,
irej an ten bic Cristo caj ic tsꞌurintex caj u cꞌub u bʌj toꞌonex soc u quinsaꞌ.
24 Rajen an ten bic caꞌ ij quibex u tꞌʌn Cristo,
a toꞌonexoꞌ,
a tij cacsex tij corex tiꞌ Cristo quij quibiquex u tꞌʌn Cristo.
Baxuc a xquic xanoꞌ caꞌ u quibej u tꞌʌn u mam.
25 A techexoꞌ,
a xiboꞌ,
caꞌ u yajquint a racꞌ an ten bic Cristo Jesús caj u yajquintoꞌonex,
quireꞌ rajiꞌ tu cꞌub u bʌj soc u quinsaꞌ toꞌonex,
a mac a yacsmʌnob tu yor tiꞌob.
26 Rajiꞌ tu pꞌoꞌ ic pixamex yejer u tꞌʌn.
Mʌꞌ ja wirej,
tu acsaꞌb jaꞌ tic joꞌrex,
raꞌ quir u camsicoꞌonex pꞌoꞌaꞌan ic pixamex yejer u tꞌʌn a baywoꞌ caj u tsoyquint ic pixamex.
27 A baywoꞌ caj u betaj wa ber caj u pʌyoꞌonex.
Mʌꞌ ja wirej,
a mac a yacsmʌnob tu yorob mʌnaꞌ ic siꞌpirex chichin,
a toꞌonexoꞌ,
chen mʌnaꞌ cꞌasiroꞌonex,
mʌnaꞌ u jer chichin baꞌ toꞌonex.
A baywoꞌ irir ten mac u jach tsoyir ic pixamex a mac a yacsmʌnob tiꞌ Cristo.
28 Quin waꞌaric tiꞌ a xib xanoꞌ,
caꞌ u yajquint u racꞌ an ten bic u wʌcꞌʌs bʌjiriꞌ cu yajquintic u winquirir.
A mac a cu yajquintic u racꞌ,
u wʌcꞌʌs bʌjiriꞌ cu yajquintic xan,
quireꞌ pꞌeririꞌ yʌn u winquirir yejer u raqꞌueꞌ.
29 Mʌꞌ ja wirej,
mʌnaꞌ mac cu pꞌactic u wʌcꞌʌs bʌjiriꞌ u winquirireꞌ,
cu jansic u winquirir,
cu cʌnantic xan.
An ten bic Cristo cu jansicoꞌonex,
bayiriꞌ cu cʌnantic toꞌonex xan a mac a yacsmʌnob tiꞌ Cristojoꞌ tu yorob.
30 A toꞌonexoꞌ iroꞌonex waysaꞌboꞌonex u winquirir Cristo.
Mʌꞌ ja wirej,
iroꞌonex waysaꞌboꞌonex u bʌqꞌuer yejer u baquer Cristo quireꞌ cu cʌnantic toꞌonex.
31 “Rajen a xiboꞌ cu pꞌʌtic u tet yejer u nʌꞌ soc u chꞌic u racꞌ.
A raꞌiriꞌ u qꞌuininoꞌ,
rajiꞌ pꞌeriꞌ yejer u raqꞌueꞌ.”
32 Jach noꞌj aroꞌ cax mʌꞌ ic najtiquexiꞌ.
Mʌꞌ ja wirej,
raꞌ irej an ten bic tabar toꞌonex caj ic pꞌeriꞌquint ic bʌjex yejer Cristo,
a mac a yacsmʌnob tu yorob tiꞌ Cristo.
33 Bayiriꞌ xan,
raꞌ irej an ten bic tabar jujunturechex caꞌ a yajquintex a raqꞌuex an ten bic a wʌcꞌʌs bʌjiriꞌex ca yajquintex.
Bayiriꞌ xan,
raꞌ irej an ten bic tabar a racꞌ bin u caꞌ sʌjt u mam.