A JEꞌ JUꞌUNAꞌ, RAJIꞌ TIꞌ U YET ACSɅꞌORIROB ICH U RUꞌUMIN GALACIA. RAJIꞌ TU TSꞌIBTA PABLO
GÁLATAS
Pablo caj u yʌnxchun u tsꞌibtic a mac a yacsmʌnob tu yorob ich u ruꞌumin Galacia
1
A tenoꞌ Pablojen caj u toc teten caꞌ xiquen in tsecꞌt u tꞌʌn Cꞌuj.
Mʌnaꞌ xib tu teteniꞌ,
mʌꞌ pim xib tu teteniꞌ.
Chen a tenoꞌ u bʌjiriꞌ Jesucristo tu teten quet yejer in Tet Cꞌuj caj u tetenob.
A tenoꞌ tu teten Cristo a mac ricꞌsaꞌb ten Cꞌuj ich u quimirir.
Raꞌ caj u tsꞌaj ten in beyaj.
2 A tenoꞌ yejer in wet acsʌꞌorirob a teꞌ yʌn tu yʌnenaꞌ,
tan in tsꞌibticob techex a mac tiꞌ yʌnoꞌ ich u ruꞌumin Galacia.
Caj in tsꞌibtob techex a mac yacsmʌnob tu yorob u tꞌʌn Cꞌuj tu ruꞌumin Galacia.
3 A tenoꞌ in cꞌat caꞌ u tsꞌa techex ic Tetex a baꞌ tsoy tu tꞌʌn Cꞌuj,
baxuc xan caꞌ tac u quiꞌir a worex tiꞌ Cꞌuj.
A tenoꞌ in cꞌat caꞌ tac aroꞌ ich ic Tetex Cꞌuj.
Baxuc xan tiꞌ ic Jaj Tsꞌurirex Jesucristo.
4 Mʌꞌ ja wirej,
u bʌjiriꞌ Jesús caj u cꞌub u bʌj quir u quinsaꞌ u boꞌorir ic siꞌpirex quir u taquicoꞌonex.
Caj u cꞌub u bʌj soc mʌꞌ ic mʌnex tu cꞌasir a tiꞌ yʌn ich yocꞌocab bajeꞌrer.
Caj u cꞌub u bʌj quir u taquicoꞌonex quireꞌ baxuc jach tsoy tu tꞌʌn Cꞌuj.
5 Caj u cꞌub u bʌj Jesús quir u taquicoꞌonex mʌꞌ wa jach carem ij Cꞌujex,
caꞌ ij carex:
“Jach caremech Cꞌuj munt qꞌuin uch.”
Baxuc ij cꞌatexoꞌ.
Mʌnaꞌ u jer u tꞌʌn Cꞌuj quir u taquicoꞌonex
6 A tenoꞌ jach jacꞌ in wor caj in wuꞌyaj sep caj a pꞌʌtex u tꞌʌn Cꞌuj quir a tus uyiquex u jer.
Mʌꞌ ja wirej,
a Cꞌujoꞌ tu tꞌʌnechex quireꞌ caj u yajechex quireꞌ Cristo caj u yiraj otsirechex.
Chen bajeꞌrer caj a pꞌʌtex Cꞌuj quir a tus uyiquex u jer u tꞌʌn,
jaj ix tʌcoj cu bin u taquiquex.
7 Mʌnaꞌ u jer u jach tsoyir u tꞌʌn Cꞌuj quir u taquiquechex.
Jariꞌ a caj in waꞌaraj techex.
Mʌꞌ ja wirej,
caj tar mac quir u tubsic a worex quir u cꞌaxicob u tꞌʌn Cristo soc mʌꞌ a werex bic tabar a quibiquex u tꞌʌn Cꞌuj.
8 Barej wa toꞌonex cax wa ju jer turiꞌ yʌjmasir u tꞌʌn Cꞌuj cu tar caꞌanan caj u tsecꞌtaj techex u jer jach tsoyir u tꞌʌn Cꞌuj.
Wa mʌꞌ quet yejer u tꞌʌn Cꞌuj caj in tsecꞌtaj techex uch.
Caꞌ xic aroꞌ tu cu yerar winic ich cꞌaqꞌuir benaj quisin.
Quireꞌ mʌꞌ taj a baꞌ caj tsicbanʌjij.
9 A tenoꞌ caj in waꞌaraj techex sam chen bajeꞌrer quin wʌcꞌʌs aric techex:
Uꞌyex wa cu tar mac tan u tus tsecꞌtic u jer tꞌʌn mʌꞌ quet yejer a ta toc cꞌʌmajexiꞌ.
Arej tiꞌ caꞌ xic tu cu yerar munt qꞌuin ich cꞌacꞌ.
10 Wa bin a caꞌ tucriquex a Pablojoꞌ,
tan u quiꞌquintic yorob u racꞌob,
jeꞌ win quiꞌquintic yorob in racꞌob?
Mʌꞌ ja wirej,
a tenoꞌ in chen cꞌat in quiꞌquintic yor a Cꞌujoꞌ.
Mʌꞌ ja wirej,
wa quin chen quiꞌquintic yorob in racꞌob a tenoꞌ mʌꞌ taj quin beyaj tiꞌ Cꞌuj.
An ten bic Pablo tetaꞌb ten Cꞌuj quir u tsecꞌtic u tꞌʌn
11 Uꞌyex baꞌ quin bin in wac techex in wet acsʌꞌorirex.
U jach tsoyir u tꞌʌn Cꞌuj,
a caj in tsecꞌtaj techex uch,
mʌꞌ tiꞌ u tar ich u tucur winiquiꞌ.
12 Quireꞌ a tenoꞌ,
quij Pablo,
mʌꞌ jin cꞌʌm u tꞌʌn a winicoꞌ.
A tenoꞌ mʌꞌ ju camsen u jer maquiꞌ tiꞌ teniꞌ.
Chen u bʌjiriꞌ Jesús caj u tsꞌaj in tucur.
13 A techexoꞌ,
a toc uꞌyamʌnex uch bic tabar a tenoꞌ caj in cꞌujintaj Cꞌuj uch an ten bic nan u cꞌujintajob Cꞌuj u winiquirob judío.
A techexoꞌ a toc uꞌyamʌnex uch bic tabar a tenoꞌ jach tsꞌiquen a tenoꞌ.
Mʌꞌ ja wirej,
caj in chuc u pach a mac a cu yacsicob tu yorob.
A tenoꞌ caj in chꞌesob a tiꞌoboꞌ,
mʌꞌ otsir caj in wirob a tiꞌoboꞌ.
14 A tenoꞌ caj in jach pꞌis in bʌj caꞌ in quiꞌ cʌnej tu cotor a baꞌ tsꞌibtaꞌb ten ic nunquirex tiꞌ u winiquirob judío uch.
U jer in racꞌob a jin wet mʌnob mʌꞌ ju jach cʌn an ten bic ten,
quij.
A tenoꞌ jach manan caj in cʌn u tꞌʌn in nunquir.
15 Barej cax mʌꞌ toy u rochen in nʌꞌ uch a Cꞌujoꞌ caj u toc teten quir in beyaj tiꞌ.
Mʌꞌ ja wirej,
u jach yajen.
Caj u teten quireꞌ tsoy tu tꞌʌn Cꞌuj.
16 A Cꞌujoꞌ caj u chen esaj ten u parar Jesucristo wa jin wer rajiꞌ u parar Cꞌuj.
Yesaj ten u parar Cꞌuj soc quin bin in tsecꞌt u tꞌʌn Cꞌuj.
Rajen seb caj binen in tsecꞌt u jach tsoyir u tꞌʌn tiꞌ Jesús ich a mʌꞌ u winiquirob judío.
Raja caj binen mʌꞌ jin war in biniꞌ.
17 Mʌꞌ binen ich u cajar Jerusalén quir in tꞌʌnic a tiꞌoboꞌ a mac a yʌn tetaꞌb ten Cꞌuj quir u bin u tsecꞌticob u tꞌʌn.
Mʌꞌ ja wirej,
a tenoꞌ pachir caj u yʌn teten Cꞌuj,
a tenoꞌ.
Jeroj seb caj binen tu ruꞌumin Arabia.
Caj tsꞌoc u tsꞌic in tucur Cꞌuj tiꞌ u tꞌʌn caj sutpʌjen,
ich u cajar Damasco caj binen.
18 Caj tsꞌoc u man tres u yaxqꞌuinin aroꞌ caj binen ich u cajar Jerusalén.
Raꞌ u qꞌuininoꞌ caj in tꞌʌna Pedro.
A Pedrojoꞌ caj u yacsen tu yatoch.
Quince u qꞌuinin tiꞌ yʌnen tu yʌn Pedro.
19 Barej mʌꞌ jin wir u racꞌob,
Pedro u yet yʌjtseqꞌuirob u tꞌʌn Jesús.
Jariꞌ caj in wiraj Jacobo u yitsꞌin Ic Jaj Tsꞌurirex.
20 A baꞌ quin tsꞌibtic techex bajeꞌrer a Cꞌujoꞌ yer mʌꞌ jin tusechex.
Taj quin waꞌaric techex.
21 Pachir caj binen tu ruꞌumin Siria yejer u ruꞌumin Cilicia quir in tsecꞌtic tiꞌob u tꞌʌn Cꞌuj.
22 U winiquirob judío a yacsmʌnob tu yorob tu ruꞌumin Judea,
mʌꞌ yerob maqueniꞌ quireꞌ mʌꞌ ju yirob in wich quireꞌ mʌꞌ binen in wirobiꞌ.
23 Tu chen uꞌyob in jumintarob a tenoꞌ:
“A mac tu chucaj ic pachex uchoꞌ bajeꞌrer,
tan u mʌn u tsecꞌt u tꞌʌn Cꞌuj.
Caj u chich tsecꞌt u tꞌʌn Cꞌuj.
Caj u chich tsecꞌt u tꞌʌn Cꞌuj a tu pꞌast a uchoꞌ.”
24 Rajen bajeꞌrer cu yaꞌaricob tiꞌ Cꞌuj:
“Jach caremech Cꞌuj quireꞌ caj a tacaj Pablo a tu chꞌesic a winiquirob uchoꞌ.”