A JEꞌ JUꞌUNAꞌ, RAJIꞌ TIꞌ U YET ACSɅꞌORIROB ICH U CAJAR EFESO. RAJIꞌ TU TSꞌIBTA PABLO
EFESO
A Pablojoꞌ caj u yʌnxchun u tsicbar tiꞌ yet acsʌꞌorirob teꞌ ich u cajar Efeso
1
A tenoꞌ Pablojen.
A tenoꞌ yʌjtsꞌeqꞌuiren u tꞌʌn Jesucristo quireꞌ baxuc u cꞌat Cꞌuj.
A tenoꞌ,
tan in tsicbar yejerechex ich a jeꞌ juꞌunaꞌ.
Tan in tsꞌibtic techex a mac a cu jach quibicob a baꞌ araꞌb ten Jesús tiꞌ techex quireꞌ ta wacsex ta worex tiꞌ.
Tan in tsꞌibtic tiꞌ techex a mac a tiꞌ yʌnob ich u cajar Efeso.
2 A tenoꞌ in cꞌat Cꞌuj caꞌ u yamtej techex,
bayiriꞌ xan,
in cꞌat caꞌ u yamtej techex Jesucristo ic Jaj Tsꞌurirex soc caꞌ quiꞌac a worex soc mʌnaꞌ baꞌ ca tucriquex.
Caj quiꞌ quintaꞌb u yorob ten Cꞌuj quireꞌ a baꞌ betaꞌbob tiꞌob ten Cristo
3 Caꞌ ij carex tiꞌ Cꞌuj,
a mac Cꞌuj,
bayiriꞌ a mac u Tet ic Jaj Tsꞌurirex,
Jesúsristo,
raꞌ caꞌ ij carex tiꞌ:
“Bayoꞌ Cꞌuj,
quireꞌ tu cotor a baꞌ ta tsꞌaj tenob quireꞌ Cristo.
Ta quiꞌquintaj ij corex Cꞌuj quireꞌ a baꞌ tu cotor a ta tsꞌajaj tiꞌ tenob Cꞌuj quireꞌ Jesucristo.”
4 A Cꞌujoꞌ mʌꞌ toy u betaj a jeꞌ yocꞌocabaꞌ,
caj u tetaj toꞌonex soc rajiꞌ yʌninoꞌonex quireꞌ Jesucristo.
Caj u tetaj toꞌonex Cꞌuj soc u tajquintic ij corex soc mʌnaꞌ ic siꞌpirex ʌcʌtan tu wich Cꞌuj.
5 Mʌꞌ ja wirej,
a Cꞌujo caj u yajquintaj toꞌonex,
rajen,
tu chꞌic chunin tu cotor baꞌ uch,
caj u toc araj tu cotor baꞌ quir u chꞌic pararinquintic toꞌonex quireꞌ Jesucristo.
Rajen a Cꞌujoꞌ caj u betaj baxuc tiꞌ toꞌonex,
quireꞌ baxuc u cꞌat.
6 Rajen caꞌ ij carex tiꞌ Cꞌuj:
“Bayoꞌ Cꞌuj,
ca yajoꞌonex quireꞌ u tsoyir a pixam.”
Caꞌ ij carex tiꞌ Cꞌuj:
“A yajquinticoꞌonex quireꞌ jach manan tsoy ta tꞌʌn tech ca yajquinticoꞌonex,
quireꞌ a pararenob Jesucristo.”
7 Mʌꞌ ja wirej,
jach manan Cꞌuj cu yajquintic toꞌonex,
rajen caj u tuchiꞌtaj u parar Cristo quir u quinsaꞌ ich cruz quir u boꞌotic u boꞌorir ic siꞌpirex.
Rajen,
tu tacoꞌonex bajeꞌrer,
quireꞌ tu rʌc rucsaj ic siꞌpirex.
8 Baxuc caj u betaj tiꞌ toꞌonex Cꞌuj quireꞌ tu tsoyir u pixam,
bayiriꞌ xan,
quireꞌ cu yajquinticoꞌonex.
Mʌꞌ ja wirej,
quireꞌ tu tsoyir u pixam,
caj u tsꞌaja toꞌonex caꞌ ij querex tu cotor baꞌ.
9 Bayiriꞌ xan,
caj u tsꞌaja toꞌonex u tucur Cꞌuj soc ic najtex a baꞌ tu muc u tucraj Cꞌuj uch.
Bajeꞌrer caj u chaꞌic ic najtiquex a baꞌ caj tu tucraj uch,
quij.
10 Mʌꞌ ja wirej,
a Cꞌujoꞌ caj u chaꞌ ij querex a baꞌ tu tucraj wa ber caꞌ bin tsꞌabac u beyaj ten Cꞌuj tiꞌ Cristo soc cu bin tsꞌurinbir tu cotor baꞌ.
Cax a baꞌ tiꞌ yʌn ich caꞌanan,
cax a baꞌ tiꞌ yʌn ich yocꞌocab,
rajiꞌ Jesús cu bin tsꞌurinbir.
11 Quireꞌ tu cotor baꞌ a caꞌ bin tac caꞌ bin cꞌuchuc tu qꞌuinin,
raꞌ cu bin tar quireꞌ Cꞌuj tu toc araj uch,
rajen baxuc cu bin tar tu jach jajir.
Quireꞌ baxuc u cꞌat Cꞌuj quireꞌ rajiꞌ yʌninoꞌonex quireꞌ Cristo.
Baxuc Cꞌuj caj u tucraj,
tu chꞌic chunin,
rajen toc nupꞌaꞌan bajeꞌrer.
12 Rajen caꞌ ij carex tiꞌ Cꞌuj:
“Bayoꞌ Cꞌuj quireꞌ ta yamtenob.”
Baxuc caꞌ in waꞌarob tiꞌ Cꞌuj,
rajraꞌ,
a tenob pʌyberenob caj in wacsaj tin worob tiꞌ Jesucristo.
13 A baꞌ in berob tenob uch,
bayiriꞌ xan tiꞌ techex uch,
ber ta wuꞌyajex u jach tsoyir u tꞌʌn Cꞌuj,
raꞌ quir u taquic techex,
jeroj,
ta wacsex ta worex.
A baywoꞌ xan,
u Tajꞌor u Pixam Cꞌuj an ten bic ta wuꞌyajex jeꞌ a bin cꞌʌmex.
Rajiꞌ jeꞌ u tsꞌic techex Cꞌuj quir ij querex rajiꞌ yʌnenoꞌonex.
14 U Tajꞌor u Pixam Cꞌuj,
a mac tij cꞌʌmajex,
rajiꞌ quir u yesic toꞌonex wa jeꞌ ij cuxtarex ich caꞌanan.
Quireꞌ tic toc cꞌʌmajex a baꞌ tu toc araj Cꞌuj wa jeꞌ ij cꞌʌmajex.
Mʌꞌ ja wirej,
u Tajꞌor u Pixam Cꞌuj rajiꞌ cu yesic tiꞌ toꞌonex rajiꞌ tu mana toꞌonex.
Rajen,
jeꞌ u cꞌuchur tu qꞌuinin u tar u bisicoꞌonex ich yicnʌn caꞌanan.
Rajen,
caꞌ ij carex tiꞌ Cꞌuj:
“Bayoꞌ Cꞌuj quireꞌ a yajoꞌonex quireꞌ otsir ta wiraj tiꞌ toꞌonex.”
A Pablojoꞌ tan u tꞌʌnic Cꞌuj
15 Caj tsꞌoc in wuꞌyic tiꞌ techex ta wacsaj ta worex tiꞌ Jesucristo,
ic Jaj Tsꞌurirex.
Bayiriꞌ xan,
caj in wuꞌya tiꞌ techex an ten bic caj a yajquintajex tu cotor a wet acsʌꞌorirex cax tu yʌnob.
16 Rajen,
wa ber caj in wuꞌyaj tiꞌ techex caj in tꞌʌnaj Cꞌuj uch,
caj in waꞌara tiꞌ:
“Bayoꞌ Cꞌuj quireꞌ a mac a tantan xer tan u yacsicob tu yorob tiꞌ tech Cꞌuj.”
Baxuc caj in waꞌaraj tiꞌ Cꞌuj.
U beriꞌ bajeꞌrer tan in tꞌʌnic Cꞌuj tiꞌ techex,
tan in cꞌʌꞌotic techex.
17 A Cꞌujoꞌ,
rajiꞌ u Cꞌujir ic Jaj Tsꞌurirex Jesucristo,
rajiꞌ u Tet a jach manan tsoyir u pixam,
rajiꞌ quin tꞌʌnic soc u tsꞌic techex u tucur Cꞌuj soc a werex tu cotor baꞌ.
18 Tan in tꞌʌnic Cꞌuj tiꞌ techex xan,
soc u sasichʌjʌrex a wichex quet yejer a tucurex soc a werex caꞌ bin cꞌuchuquechex ich caꞌanan quireꞌ rajiꞌ caj u tꞌʌnechex.
A baywoꞌ a werex a baꞌ jach manan tsoy wa ber caꞌ bin cꞌuchucoꞌonex ich caꞌanan quir ic rʌc cꞌʌmiquex a baꞌ yʌn tiꞌ Cꞌuj.
19 A baywoꞌ a werex Cꞌuj yʌn jach manan u mucꞌ,
bayiriꞌ xan soc a werex raꞌ u mucꞌ a jach manan tan u beyaj ta pixamex,
a wacsmʌnex ta worex tiꞌ Cꞌuj.
20 An ten bic u beyanʌjij Cꞌuj caj u cꞌʌnaj u mucꞌ uch,
quij,
caj u ricꞌsaj Cristo ich u quimirir soc u wʌcꞌʌs cuxtar.
Jeroj,
pachir caj cuquintac Cristo ich u noj ich caꞌanan quir u sʌjtaꞌ ten tu cotor mac,
a baxucoꞌ Cꞌuj,
tan u yamtic toꞌonex bajeꞌrer yejer u chichir u mucꞌ.
21 Rajen,
tan u sʌjtaꞌ Cristo ten Cꞌuj quireꞌ tsꞌaꞌb u beyaj ten Cꞌuj tiꞌ Cristo a jach noꞌoj.
Rajiꞌ tu tsꞌajaj u tꞌʌn tiꞌ tu cotor presidente cax rey,
cax a mac a cu beyajob tiꞌ gobierno,
cax a mac a cu tsꞌurinticob mac teꞌ ich yocꞌocab.
Mʌnaꞌ mac u jer jach sʌjtaꞌb ich yocꞌocab an ten bic Cristo,
cax bajeꞌrer,
cax u qꞌuinin caꞌ bin tac.
Chen ic Jaj Tsꞌurirex cu bin sʌjtaꞌbir.
22 A Cꞌujoꞌ caj u tetaj Cristo quir u tsꞌurintic tu cotor mac.
Bayiriꞌ xan,
Cꞌuj caj u chaꞌ ic tsꞌurintiquex Cristo xan a mac a yacsmʌnob tu yorob tiꞌ Cristo.
A Cristojoꞌ caj cuquintaꞌb ten Cꞌuj soc rajiꞌ ic Jaj Tsꞌurirex irej ic joꞌrex.
23 Rajen a toꞌonexoꞌ irej wa u winquiriroꞌonex Cristo,
a tenob a yacsmʌnob tu yorob tiꞌ Cristo,
a baywoꞌ tij cꞌʌmajex u jach tsoyir u pixam Cꞌuj,
a mac cu tsꞌurintic tu cotor baꞌ.