Quireꞌ u jach tsoyir u pixam Cꞌuj, rajen Cꞌuj caj u yajquintajoꞌonex
2
Mʌꞌ ja wirej,
a Cꞌujoꞌ caj u yirajechex jach manan cꞌas a pixamex,
rajen caj u tsꞌaja techex a cuxtarex quireꞌ Cristo.
2 Mʌꞌ ja wirej,
a techexoꞌ uch,
quij,
ta chen sayʌrex tu pachob a racꞌob,
cax tu cu binob uch.
A techexoꞌ,
caj a quibex a baꞌ u tar ta worex tiꞌ u tsꞌurir a mac yʌnin ich yocꞌocab,
rajiꞌ a quisinoꞌ.
Mʌꞌ ja wirej,
rajiꞌ rajraꞌ tan u beyaj ich a mac a mʌꞌ yerob Cꞌuj quir u manob tu cꞌasir.
3 A uchoꞌ,
baxuc tiꞌ yʌnoꞌonex ich ic racꞌobex.
Mʌꞌ ja wirej,
a baꞌ tu pachtaj ic winquirirex rajiꞌ tic betajex uch.
An ten bic tu cotorob ic racꞌobex baxuc a toꞌonex xan,
rajen caꞌ bin cꞌuchuc tu qꞌuinin jeꞌ u tsꞌaꞌbʌr u mucꞌyaj ten Cꞌuj caꞌ bin mucꞌyajnʌcoꞌonex.
4 Chen a Cꞌujoꞌ a jach yaj yiricoꞌonex rajen u yajoꞌonex,
caj u yirej otsiroꞌonex caj yajquintoꞌonex.
5 Quireꞌ ic siꞌpirex,
a Cꞌujoꞌ caj u yiraj toꞌonex iroꞌonex wa quimiroꞌonex.
Rajen,
quet caj u tsꞌajex toꞌon ij cuxtarex quet yejer Cristo wa ber caj u tsꞌaja u cuxtar Cristo caj u ricꞌsaj Cristo tu tꞌajaꞌan u baquer uch.
Quireꞌ u jach tsoyir u pixam rajen caj u yamtaj toꞌonex.
6 A Cꞌujoꞌ cu yiric toꞌonex an ten bic quet Cꞌuj caj u ricꞌsajoꞌonex wa ber caj ricꞌsaꞌb Jesús,
quet tan u tsꞌic toꞌonex ij cuxtarex xan.
Bayiriꞌ xan,
a Cꞌujoꞌ cu yiricoꞌonex an ten bic tu cuquintajoꞌonex a teꞌ caꞌananoꞌ quet yejer Cristo.
7 A baywoꞌ caj u yesaj toꞌonex Cꞌuj bic tabar u yajoꞌonex.
Mʌꞌ ja wirej,
u yajoꞌonex quireꞌ Jesucristo.
Jach manan u yajoꞌonex tu yesaj tiꞌ tu cotor mac.
Aroꞌ munt qꞌuin cu bin esbir u yajoꞌonex Cꞌuj.
8 Mʌꞌ ja wirej,
quireꞌ u jach tsoyir u pixam Cꞌuj,
caj u tacajoꞌonex wa ber tij cacsex tij corex tiꞌ Cristo.
Mʌꞌ u tacbaroꞌonex Cꞌuj cax a baꞌ tic betajex.
Mʌꞌ ja wirej,
tu tacaj toꞌonex quireꞌ a baꞌ u bʌjiriꞌ caj u betaj,
tu chen sija toꞌonex.
9 Mʌꞌ ja wirej,
quij,
mʌꞌ tu tacatoꞌonex Cꞌuj quireꞌ ic beyajex,
quireꞌ jeꞌ ic manex tan ij cariquex bic tabar tu tacajoꞌonex Cꞌuj soc a racꞌobex cu bin u tucricob techex jach caremechex.
10 Mʌꞌ ja wirej,
a Cꞌujoꞌ caj u betatoꞌonex,
rajen caj u sijtoꞌonex u ricꞌben cuxtar quireꞌ Jesucristo.
Rajen,
cꞌuchaꞌan ij corex ic manex tan ic betiquex a tsoyoꞌ.
Mʌꞌ ja wirej,
baxuc tu chꞌic chunin a Cꞌujoꞌ caj u tucraj caꞌ manacoꞌonex tan ic betiquex a jach tsoy.
Quireꞌ Cristo rajen pꞌeriꞌ ic tucurex bajeꞌrer
11 Yʌn cꞌaj techex,
a uchoꞌ,
quij,
u winiquirob judío mʌꞌ tu yirajechex an ten bic u pararechex Cꞌuj,
quireꞌ techex mʌꞌ ta cꞌʌmex a tsꞌiriquex a bʌqꞌuerex an ten bic nanij u beticob u winiquirob judío a tu cꞌʌmob uch.
12 Mʌꞌ u yʌn tubur techex bic tabarechex uch,
wa ber mʌꞌ toy a wacsex ta worex tiꞌ Cristo.
Quireꞌ u tirir tiꞌ u winiquirob israel,
cu tucricob u winiquirob israel mʌꞌ jach nojechex tiꞌ Cꞌuj.
Mʌꞌ ja wirej,
caj u tus tucrajob u winiquirob judío wa chen u winiquirob israel chen rajiꞌob cu bin tacbir ten Cꞌuj quireꞌ robob u pararob u chꞌic nunquir,
a mac u cꞌabaꞌ Israel.
Rajen mʌnaꞌ ta pajex u taquiquechex Cꞌuj quireꞌ mʌꞌ a werex Cꞌuj uch.
Mʌꞌ wa baxucoꞌ techex uch?
13 A techex uchoꞌ mʌꞌ a werex Cꞌuj,
chen bajeꞌrer a werex Cristo quireꞌ a techex tu pʌyechex ich Cꞌuj quireꞌ u bʌjiriꞌ Cristo tu cꞌub u bʌj soc u quinsaꞌr.
14 Rajen quireꞌ Jesucristo pꞌeriꞌ ic tucurex bajeꞌrer,
rajen mʌꞌ ic pacran tsꞌiquintic ic bʌjex.
Quireꞌ tu pꞌeriꞌquintajoꞌonex Cꞌuj uch a baꞌ mʌꞌ u periꞌquinmʌn Cꞌuj,
quireꞌ u tirir tiꞌ techex tiꞌ u winiquirob israel uch.
Rajen mʌꞌ ij quet pacran pꞌactic ic bʌjex quireꞌ Cristo tu pꞌeriquintoꞌonex bajeꞌrer.
15 Mʌꞌ ja wirej,
wa ber caj quinsaꞌb Jesús ich cruz caj u rʌc rucsaj a baꞌ tu ricsaj u tꞌʌnin Moisés uch.
A baywoꞌ caj u betaj Cristo soc u pꞌeriꞌquintic a toꞌonexoꞌ soc mʌꞌ ic tirir techex tiꞌ a tenob u winiquirenob judío.
Rajen quetoꞌonex bajeꞌrer,
ricꞌben winiquiroꞌonex quireꞌ tu pꞌeriquintaj toꞌonex.
16 Wa ber caj quimij ich cruz tiꞌ toꞌonex.
A baywoꞌ caj u wʌcꞌʌs pʌyajoꞌonex ich Cꞌuj.
Rajen jach pꞌeriꞌoꞌonex bajeꞌrer,
cax a tenob in tiriroꞌ tenob uch tiꞌ a techexoꞌ uch.
Rajen bajeꞌrer tsꞌoc ic pacran pꞌactic ic bʌjex.
17 Mʌꞌ ja wirej,
caj tarij Cristo quir u tsicbar toꞌonex u jach tsoyir u tꞌʌn Cꞌuj soc quetoꞌonex cu bin tacbiroꞌonex ten Cꞌuj.
Cax a techexoꞌ mʌꞌ a werex Cꞌuj uch,
cax a tenob uch rajraꞌ in werob Cꞌuj.
18 Cax a tenoboꞌ yejerechexoꞌ uch mʌꞌ quetoꞌonex,
bajeꞌrer quetoꞌonex wa ber quic tsicbarex tiꞌ Cꞌuj.
Mʌꞌ ja wirej,
chen pꞌeriꞌ yʌn toꞌonex u Tajꞌor u Pixam Cꞌuj a mac quic tsꞌurintiquex.
19 Rajen mʌꞌ u tirir tiꞌ techex tiꞌ a tenob u winiquirenob judío.
Ʌcʌtan tu wich Cꞌuj tsꞌoc u yiric mʌꞌ u winiquirechex judío techex,
quij.
Pꞌeriꞌ ic ruꞌumex tu quic binex.
Pꞌeriꞌ Cꞌuj yʌninoꞌonex,
quet bayiriꞌoꞌonex u pararoꞌonex Cꞌuj bajeꞌrer.
20 Mʌꞌ ja wirej,
cu yaꞌaric yiroꞌonex bajen yatochoꞌonex Cꞌuj a tiꞌ toy tsꞌʌpquintaꞌ bajeꞌrer.
Ca wiric u tunichiroꞌ a pʌyber tsꞌʌpquintaꞌb tu cu paꞌtetic yatoch tu cu nupic u jer u paꞌteꞌ,
raꞌiriꞌ u tunichiroꞌ jach manan noꞌj quireꞌ rajiꞌ Jesucristo.
A ray tunichoꞌ a cu bin u tsꞌʌpquintej ich yocꞌor u jer tunich chan ber u bin chichtar u mucꞌ a tu cu tsꞌʌpquintic a tunichoꞌ.
A jeꞌ tunichaꞌ a cu tsꞌʌpquintaꞌ ich yocꞌor u jer,
robob yʌjtseqꞌuirob u tꞌʌn Cꞌuj uch yejer a mac tsꞌaꞌb u tucurob ten Cristo quir u tsicbarob a baꞌ u cꞌat Cristo uch.
21 Quireꞌ chen Jesucristo baxuc chan chan ber cu tsꞌʌpquintic yatoch.
Mʌꞌ ja wirej,
chan chan ber u jer mac cu yacsic tu yor cu bin tsꞌʌpquinbir hasta caꞌ bin cꞌuchuc tu qꞌuinin jeroj cu waysic yatochoꞌonex tu cu bin cꞌujinbir ic Jaj Tsꞌurirex.
22 Mʌꞌ ja wirej,
quireꞌ a techexoꞌ caj a wacsajex ta worex tiꞌ ic Jaj Tsꞌurirex,
rajen a techexoꞌ tu cotorechex jun xotꞌ techex a ray yatochoꞌ xan.
Rajen waysaꞌboꞌonex iroꞌonex yatochoꞌonex Cꞌuj quireꞌ tiꞌ yʌn tic pixamex u Tajꞌor u Pixam Cꞌuj.