A Pablojoꞌ tsꞌaꞌb u beyaj ten Cꞌuj soc u tsecꞌtic u tꞌʌn Cꞌuj ich mʌꞌ u winiquirob judío
3
Mʌꞌ ja wirej,
a uchoꞌ araꞌb ten Cꞌuj wa cu bin tꞌʌnbir a mac a mʌꞌ u winiquirob judío.
Rajen a tenoꞌ,
Pablojen,
rajen maquen ich tu cu maꞌcʌr winic quireꞌ binen in tsecꞌtej tiꞌ u tꞌʌn Cꞌuj techex,
a mac a mʌꞌ u winiquirob judío.
Quireꞌ tan in tꞌʌnic Cꞌuj tiꞌ techex.
2 Tin tꞌʌn,
caj a wuꞌyex tiꞌ ten wa ju jach tsoyir u pixam Cꞌuj caj u tsꞌaja ten in beyaj caꞌ xiquen in tsecꞌtej techex u tꞌʌn Cꞌuj.
3 A Cꞌujoꞌ,
caj u chaꞌ in wer tin pixam a baꞌ in nunquirob mʌꞌ chaꞌb yerob uch.
Rajen aroꞌ caj in tsꞌibtaj techex uch cax chichin tin waꞌaraj techex.
4 Rajen wa ber caꞌ bin a xaquex a jeꞌ juꞌunaꞌ,
a techexoꞌ jeꞌ a wiriquex wa Cꞌuj caj u chaꞌ in wertic tin pixam wa Cristo jeꞌ yiric tsoyirechex tiꞌ a techexoꞌ,
a mac mʌꞌ u winiquirob judío,
bayiriꞌ xan,
chʌcaꞌan jeꞌ u yamtic techex.
Raꞌ mʌꞌ yeroꞌ u winiquirob judío a uchoꞌ.
5 A chꞌic uchoꞌ,
mʌꞌ u chaꞌb Cꞌuj yerticob aroꞌ,
chen bajeꞌrer,
tu chaꞌ in werob,
a tenob,
a mac tetaꞌb ten Cristo quir in binob in tsecꞌticob u tꞌʌn yejer a mac a tu tsecꞌtajob u tꞌʌn Cꞌuj a uchoꞌ.
Mʌꞌ ja wirej,
quireꞌ u Tajꞌor u Pixam Cꞌuj tu chaꞌ in werob aroꞌ.
6 Chaꞌb in werob wa quet quic bin ij cꞌʌmiquex tiꞌ Cꞌuj a baꞌ cu bin u yamtic tu cotoroꞌonex,
cax wa ju winiquirob judío cax wa mʌꞌ u winiquirob judío.
Mʌꞌ ja wirej,
Cꞌuj tu pꞌeriꞌquintoꞌonex quireꞌ Jesucristo.
Caj toc araꞌb ten Cꞌuj,
quet quic bin ij cuxtarex munt qꞌuin,
quireꞌ tij cacsaj tij corex tiꞌ u jach tsoyir u tꞌʌn Cꞌuj.
7 A Cꞌujoꞌ caj u tsꞌajaj ten in beyaj quireꞌ u jach tsoyir u pixam.
Bayiriꞌ xan,
quireꞌ u jach tsoyir u pixam Cꞌuj caj u chichquint in wor soc cꞌuchaꞌan in wor in beyaj tiꞌ Cꞌuj.
8 A tenoꞌ,
quij,
mʌꞌ jach nojeniꞌ,
chen u jer in wet acsʌꞌorirob a mac Cꞌuj yʌninob,
robob jach manan nojob.
Cax wa mʌꞌ jach nojen a Cꞌujoꞌ caj u tsꞌaja in beyaj quireꞌ u jach tsoyir u pixam Cꞌuj,
mʌꞌ ja wirej,
tu chaꞌ in tsecꞌtic u tꞌʌn ich a mac a mʌꞌ u winiquirob judío.
Tin tsecꞌtaj tiꞌob u jach manan u tsoyir u pixam Cꞌuj quireꞌ Cristo,
soc mʌꞌ biqꞌuin mʌꞌ u tsꞌocor yerob biquiraꞌ u tsoyir u pixam Cꞌuj.
9 A tenoꞌ caj in tsecꞌtaj tiꞌ tu cotor mac,
tan in waꞌaric tiꞌob,
quet a Cꞌujoꞌ cu taquicoꞌonex,
cax a techexoꞌ a mʌꞌ u winiquirechex judío,
cax u winiquirob judío,
quet cu tocar tu cotor mac.
Mʌꞌ ja wirej,
baxuc Cꞌuj caj u tucraj u betej tu chꞌic chunin tu cotor baꞌ,
chen a mac cuxaꞌan a uchoꞌ mʌꞌ yerobiꞌ.
10 Caj yirob yʌjmasirob u tꞌʌn Cꞌuj bic tabar tij cacsex tij corex tiꞌ Jesús bajeꞌrer,
caj u yirob u jach tsꞌurir yʌjmasirob u tꞌʌn Cꞌuj ich caꞌanan,
caj u yirajob a Cꞌujoꞌ yer tu cotor baꞌ.
U jach tsꞌurir yʌjmasirob u tꞌʌn Cꞌuj tu yirob xan bic tabar Cꞌuj cu tucric u jer yaꞌab baꞌ.
11 Mʌꞌ ja wirej,
a Cꞌujoꞌ baxucoꞌ rajraꞌ tu tucraj ich u pixam wa jeꞌ u pꞌeriꞌquintajoꞌonex quireꞌ a baꞌ cu bin u betic Jesucristo ic Jaj Tsꞌurirex.
12 Mʌꞌ ja wirej,
quij,
quireꞌ a baꞌ caj u betaj Jesucristo yʌn toꞌonex u chichquintic ij corex quir ic binex ʌcʌtan tiꞌ Cꞌuj.
Mʌnaꞌ baꞌ quic tucriquex,
wa ber quic tsicbarex tiꞌ Cꞌuj,
mʌꞌ ic chꞌaꞌex sajaquirex,
quireꞌ tij cacsex tij corex tiꞌ u parar.
13 Rajen,
mʌꞌ a wacꞌtiquex a bʌjex,
cax tan in mucꞌyaj quireꞌ tin tsecꞌtaj u tꞌʌn Cꞌuj tiꞌ techex.
Tiꞌ yʌnen tu cu maꞌcʌr winic soc u jocꞌar tu tsoyir techex.
Jach manan u yajquinticoꞌonex Cristo
14 Rajen quin xontar ʌcʌtan tiꞌ ic Tet Cꞌujex.
Quireꞌ quin tꞌʌnic Cꞌuj tiꞌ techex.
15 Mʌꞌ ja wirej,
rajiꞌ ic Tetex,
Cꞌuj,
rajiꞌ ic Tetex yejer yʌjmasirob u tꞌʌn Cꞌuj ich caꞌanan,
cax toꞌonex ich yocꞌocab rajiꞌ ic Tetex Cꞌuj.
16 Rajen quin cꞌatic tiꞌ Cꞌuj,
soc u chichquintic a worex u Tajꞌor u Pixam Cꞌuj.
Jeꞌ u tsꞌic techex quireꞌ jach manan tsoyir u pixam a Cꞌujoꞌ.
17 A tenoꞌ,
quij,
quin cꞌatic tiꞌ Cꞌuj toc jumpꞌeriꞌ caꞌ u tsꞌurintej a pixamex Cristo quireꞌ ta wacsaj ta worex tiꞌ Cristo.
Quireꞌ u yajechex rajen caꞌ a yajquintex Cꞌuj.
A baywoꞌ,
cu bin u chichquintej a worex soc mʌꞌ u pec a worex.
18-19 A baywoꞌ toc quet yejer ij quet acsʌꞌorirex jeꞌ ij quiꞌ cʌniquex ich ic pixamex wa jach manan Cristo cu yajquinticoꞌonex.
Mʌꞌ bic tabar quic chꞌic u pꞌis ij querex bic tabar u yajoꞌonex,
a mac yʌnin Cꞌuj.
A tenoꞌ in jach cꞌat a werex wa Cristo u jach yajechex,
mʌꞌ cꞌuchaꞌan ij corex ic najtiquex mun u jach yajoꞌonex Cristo.
Wa baxuc ca wacsiquex ta worex,
a Cꞌujoꞌ jeꞌ u yocar ta pixamex soc jariꞌ ca bin a betex a baꞌ u cꞌat Cꞌuj caꞌ a betex.
20 A Cꞌujoꞌ rajraꞌ cu beyaj tic pixamex.
Mʌꞌ ja wirej,
a Cꞌujoꞌ cꞌuchaꞌan yor jach manan u beyaj tiꞌ a baꞌ quic tucriquex.
Cax wa mun quic tucriquex caꞌ ij cꞌatex tiꞌ Cꞌuj jach manan cꞌuchaꞌan yor u tsꞌic toꞌonex Cꞌuj.
21 Caꞌ ic sʌjtex Cꞌuj,
rajraꞌ caꞌ ic sʌjtex Cꞌuj,
cax munt qꞌuin caꞌ ic sʌjtex Cꞌuj tu cotoroꞌonex a mac a cu bin tacbir ten Jesucristo caꞌ ic sʌjtex Cꞌuj.