Quireꞌ u Tajꞌor u Pixam Cꞌuj tu pꞌeriꞌoꞌonex
4
A tenoꞌ,
Pablojen,
a mac tiꞌ yʌnen tu cu maꞌcʌr winicob quireꞌ raꞌ u beyaj Cꞌuj.
Bajeꞌrer tan in chich aric techex quireꞌ Cꞌuj caj u pʌyajechex soc raꞌ yʌnin techex Cꞌuj.
Rajen yʌn a manex tu tsoyir quireꞌ rajiꞌ yʌninex Cꞌuj.
2 Mʌꞌ a yʌn tucriquex wa chen jach nojechex,
mʌꞌ a tucriquex wa jach caremechex.
A baywoꞌ pacran jawsex a baꞌ cꞌasir caj betaj u jer a tiꞌ yʌn tuꞌ yʌnechex.
Jeroj tuneꞌ,
tu cotor mac jeꞌ u yiricob wa ca pacran yajquintiquex a bʌjex.
3 Mʌꞌ ja wirej,
caj u toc pꞌeriꞌquintajechex u Tajꞌor u Pixam Cꞌuj,
rajen mʌꞌ a pacran jʌsiquex a bʌj tiꞌ a wet acsʌꞌorirex.
Caꞌ a cʌnex mun jach noꞌj aroꞌ soc mʌꞌ a jʌsiquex a bʌj.
4 Raꞌ u qꞌuinin caj u pꞌeriꞌquintaj toꞌonex u Tajꞌor Pixam Cꞌuj a mac a tu yacsob tu yorob tiꞌ Jesús,
bayiriꞌ chen tuririꞌ yʌn u Tajꞌor Pixam Cꞌuj a tij cꞌʌmajex.
Bayiriꞌ xan,
tuririꞌ ij cuxtarex caꞌ bin ij cꞌʌmiquex wa ber caꞌ bin cꞌuchucoꞌonex caꞌanan,
quireꞌ quetoꞌonex caj u pʌyajoꞌonex Cꞌuj.
5 Tuririꞌ ic Jaj Tsꞌurirex,
bayiriꞌ xan tuririꞌ tꞌʌn,
quij,
caj tij cacsex tij corex tiꞌ tuririꞌ xan.
Bayiriꞌ xan,
chen tuririꞌ tu cu yacsic jaꞌ tu joꞌr mac tuririꞌ xan.
6 Tuririꞌ xan,
ic Tetex Cꞌuj,
rajiꞌ pꞌeriꞌ ic Tetex tij cotorex.
Jariꞌ rajiꞌ cu yaꞌaric toꞌonex.
Rajiꞌ quic tsꞌurintex soc ic yamtiquex tiꞌ.
Rajiꞌ tiꞌ yʌn tic pixamex.
7 Quireꞌ u jach tsoyir u pixam Cꞌuj rajen caj u tsꞌaja tiꞌ jujunturoꞌonex soc caꞌ ij cʌniquex ic neꞌer baꞌ.
Mʌꞌ ja wirej,
a Cꞌujoꞌ caj tsꞌaꞌb tiꞌ u neꞌer baꞌ Cristo,
rajen a Cristojoꞌ quireꞌ u jach tsoyir u pixam xan caj u tsꞌaja tiꞌ toꞌonex ic neꞌerex baꞌ.
8 Mʌꞌ ja wirej,
cu yaꞌaric ich u tꞌʌn Cꞌuj a uchben tꞌʌnoꞌ,
Cristo cu tsicbariꞌ:
Jeꞌ u rʌc chꞌesic u beyajob a mac a cu pꞌacticob tiꞌ,
pachir jeꞌ u wʌcꞌʌs bin ich caꞌanan.
Wa ber caꞌ bin wʌcꞌʌs xic ich caꞌanan jeꞌ u tuchiꞌtaꞌ tiꞌ toꞌonex ich yocꞌocab a baꞌ cu bin u yamte toꞌonex.
Baxuc cu yaꞌaric ich u tꞌʌn Cꞌuj,
a uchben tꞌʌnoꞌ.
9 Mʌꞌ ja wirej,
cu yaꞌaric:
“Jeꞌ u wʌcꞌʌs bin ich caꞌanan” quireꞌ tarij uch ich caꞌanan,
caj cꞌuchij ich yocꞌocab.
Mʌꞌ chen cꞌuchij ich yocꞌocab,
tiꞌ binij tu quimen mac.
10 Rajiꞌ Cristo caj cꞌuchij ich yocꞌocab.
Bayiriꞌ xan,
rajiꞌ wʌcꞌʌs binij ich caꞌanan.
Raꞌiriꞌ xan,
tiꞌ yʌn ich caꞌanan soc rajiꞌ quic bin ic tsꞌurintex tu cotor baꞌ,
quij,
cax caꞌanan,
cax ich yocꞌocab,
cax a tu cu bin mac a quimen.
11 Rajiꞌ caj u tsꞌajaj a tenob in neꞌerob baꞌ,
quij.
Yʌn mac tub yʌnoꞌonex a tsꞌaꞌb tiꞌ u neꞌer baꞌ ten Cristo tiꞌob soc robob yʌjtseqꞌuirob u tꞌʌn Cristo.
Yʌn mac ich a yacsmʌnob tu yorob a tsꞌaꞌb u neꞌer baꞌ soc u tsicbar an ten bic Cꞌuj cu yaꞌaric.
Yʌn mac ich a yacsmʌnob tu yorob,
a tsꞌaꞌb tiꞌ ten Cꞌuj u neꞌer baꞌ soc ic tsꞌurintiquex u quet acsʌꞌorirex.
Yʌn mac ich a yacsmʌnob tu yorob,
a tsꞌaꞌb tiꞌ ten Cꞌuj u neꞌer baꞌ soc u camsicob u yet acsʌꞌorirob u tꞌʌn Cꞌuj.
12 Baxuc jeraꞌ caj u betaj Cꞌuj tiꞌ a mac a tetaꞌb ten Cꞌuj,
soc caꞌ bin cꞌuchuc tu qꞌuinin a mac tetaꞌan ten Cꞌuj cu bin cꞌʌmbir soc quir u yamtic u beyajob Cꞌuj.
A baxucoꞌ cu bin chichquinbir yorob tiꞌ u tꞌʌn Cꞌuj.
13 A baywoꞌ,
chan chan ber jeꞌ u chꞌijir hasta caꞌ bin cꞌuchuc tu qꞌuinin toc quet tan ij cacsic tij corex,
soc quet ij querex u parar Cꞌuj Cristo.
A baywoꞌ toꞌonex yʌn u chichir ic mucꞌex tic pixamex,
a baywoꞌ jeꞌ ij cꞌuchurex pꞌeriꞌoꞌonex yejer Cristo.
14 Mʌꞌ ic yʌn cʌniquex a chichanoꞌ quireꞌ seb cu quibicob a baꞌ cu tar tiꞌ.
Wa quij cʌniquex a chichanoꞌ yʌn u qꞌuinin caꞌ bin ij cuꞌyiquex tic pixamex quiꞌ ij corex quireꞌ tan ij cʌniquex Cꞌuj.
Chen sansam tan ic pꞌuspachtiquex Cꞌuj.
Rajen mʌꞌ tsoy ij cʌniquex a chichanoꞌ.
A baꞌ cu tar cu quibicob a chichanoꞌ rajen irob a baꞌ cu cuchur ten icꞌ.
Rajen caꞌ bin tac a mac a cu tus aricob u neꞌer baꞌ tiꞌ u tꞌʌn Cꞌuj.
Jeroj seb cu quibicob a mʌꞌ quet yejer u tꞌʌn Cꞌuj.
15 Caꞌ ij quibiquex u tꞌʌn Cꞌuj a baꞌ jach taj.
Caꞌ ic yajquintiquex mac tu cotor.
Caꞌ ij cʌniquex u pixam Cristo quireꞌ rajiꞌ ic joꞌrex.
16 Mʌꞌ ja wirej,
rajiꞌ quic tsꞌurintiquex Cristo.
Rajen toc quet tsoyir ic beyajex.
A baywoꞌ quic pacran yamtiquex ic bʌjex soc caꞌ bin tsꞌocac u beyaj Cꞌuj.
A baywoꞌ xan,
cu chichquintic ij corex quireꞌ quic pacran yajquintiquex ic bʌjex.
Tiꞌ u tar ij cuxtarex ich caꞌanan, a ricꞌben cuxtaroꞌ
17 Quireꞌ tu tsꞌajaj ten in mucꞌ ic Jaj Tsꞌurirex,
rajen quin waꞌaric techex a jeꞌraꞌ.
Quin chich aric techex a jeꞌraꞌ mʌꞌ a cʌniquex a mac cuxaꞌan ich yocꞌocab quireꞌ a mʌꞌ yerob Cꞌuj,
quireꞌ cꞌas cu tucricob.
Caꞌ a pꞌʌtex aroꞌ.
18 Mʌꞌ ja wirej,
u pixamob tiꞌ yʌn ich yacꞌbirir,
quireꞌ mʌꞌ tu cꞌʌmob u cuxtarob a ricꞌbenoꞌ.
Mʌꞌ tu cꞌʌmob quireꞌ jach cꞌas u pixamob.
Mʌꞌ ja wirej,
mʌꞌ u cꞌatob u yacsicob tu yorob.
19 Toc jumpuriꞌ caj u cʌnob a cꞌasoꞌ,
rajen cu chen tucricob bic tabar cu pʌyicob mac soc u manob.
U bʌjiriꞌob mʌꞌ u pꞌʌticob,
mix chichin,
quireꞌ jach manan quiꞌ yorob a mac a cu manob ich u cꞌasir.
20 Mʌꞌ ta cʌniquex Cristo quir a manex an ten bicob a tiꞌoboꞌ a cu manob tu cꞌasir.
21 Caj a wuꞌyex tiꞌ Cristo caj u camsechex tiꞌ Cristo caj a cʌnajex u tꞌʌn a jach tajoꞌ,
rajen caj a sayex tu pach Jesús.
22 Rajen tsireꞌej a manex an ten bic caj manechex uch an bic tabar a betex uch.
Mʌꞌ ja wirej,
ojij satoꞌonex uch quireꞌ quic tucriquex ic betiquex cꞌas a quic pachtiquex ic betiquex.
23 Caꞌ a quiꞌ tucrex tiꞌ a ricꞌben cuxtarex,
a yʌn techex bajeꞌrer.
24 Caꞌ a pachtex a ricꞌben cuxtarex soc quir u tajquintic a pixamex.
Mʌꞌ ja wirej,
ij cꞌatex ic pixamex jach tsoy an ten bic u pixam Cꞌuj.
25 Rajen tsireꞌej tu cotor tus.
Caꞌ a pacran ariquex a tajoꞌ.
Mʌꞌ ja wirej,
toc quetoꞌonex tu quic binex ich Cꞌuj.
26 Wa ix tiꞌ ca tsꞌictarex,
quiꞌ irej soc mʌꞌ a pʌyiquex a siꞌpirex.
Seb caꞌ sisquintic a worex.
Mʌꞌ a tsꞌictarex u bur u qꞌuinin.
27 Mʌꞌ ja wirej,
wa ja tsꞌictarex jach seb a quisinoꞌ cu bin u tsꞌʌric a pachex soc a pʌyiquex a siꞌpirex.
Rajen quiꞌ cʌnantex a bʌjex tiꞌ a quisinoꞌ.
28 A techoꞌ a mac tu yaꞌcraj baꞌ a uchoꞌ,
bajeꞌrer mʌꞌ u yʌn aꞌcric baꞌ.
A raꞌ winicoꞌ caꞌ u jaric u taqꞌuin.
Rajiꞌ xan caꞌ betej a baꞌ jach tsoy soc u yamtic a mac jach otsichʌjij.
29 Mʌꞌ a yʌn cʌrʌxtꞌʌnex.
Ca chen tsicbatiquex a tsoyoꞌ,
quir a yamtiquex a mac a cu yubicob a tsicbʌtiquex.
A baywoꞌ a cu yubicob a tꞌʌnobex cu bin yamtaꞌbir soc u manob tu berir a tsoyoꞌ.
30 Mʌꞌ a tupsiquex yor u Tajꞌor u Pixam Cꞌuj a baꞌ ta betajex.
Mʌꞌ ja wirej,
u Tajꞌor u Pixam Cꞌuj irej a baꞌ a cu tsꞌibticob tu pach wacax soc yer raꞌ yʌnin a wacaxoꞌ.
Raꞌ irej toꞌonex xan,
tu tsꞌaj toꞌonex u Tajꞌor u Pixam Cꞌuj soc ij querex rajiꞌ yʌninoꞌonex Cꞌuj caꞌ bin cꞌuchuc tu qꞌuinin cu bin u taquicoꞌonex.
31 Pꞌʌtex u chʌctar a wichex,
bayiriꞌ tsireꞌej u jocꞌar a worex tu ca tsꞌictarex.
Mʌꞌ a yʌn jocꞌsiquex u yor mac,
mʌꞌ a manex ich a cꞌasiroꞌ.
32 Toc pacran yajquint a bʌjex.
Chaꞌ u yiricob mac u jach tsoyir a pixamex.
Toc pacran jawsex a siꞌpirex an ten bic Cꞌuj quireꞌ Cristo caj u jawsaj a siꞌpirex.