A Pablojoꞌ cu tꞌʌnic u yet acsaꞌorirob
13
Bajeꞌrer,
jeꞌ in wʌcꞌʌs tar in wirechex tu yʌnechex,
aroꞌ mʌnaꞌ u nup u tenin caj taren in wirechex.
Wa yʌn mac u cꞌat u taꞌquic u joꞌr u yet acsaꞌorirob,
jeroj caꞌ u pʌyej dos wa mʌnaꞌ u nup yʌjirirob soc u jocꞌar u tajir.
2 Wa ber tiꞌ toy yʌnen yejerechex uch,
caj in waꞌaraj techex,
cax bajeꞌrer,
mʌꞌ tiꞌ yʌnen yejerechex tan in wʌcꞌʌs ara techex.
A tenoꞌ caj in waꞌaraj mac a caj u pʌy u siꞌpirob uch,
bayiriꞌ caj in waꞌaraj techex uch xan,
jeꞌ in wʌcꞌʌs tar tu yʌnechex,
jeroj mʌꞌ jin bin in jaws u siꞌpirob.
3 Jeroj jeꞌ a tumtic a wirex a ca cʌxtiquex wa Cristo cu tsꞌic u tꞌʌn ten quir in tsicbar techex.
Mʌꞌ ja wirej,
a Cristojoꞌ mʌꞌ rajiꞌ chan ber u tꞌʌn wa ber cu pʌyiquechex chich u tꞌʌn.
4 Cax Cristo mʌꞌ ju yesaj wa chich u mucꞌ wa ber caj sinij yejer u cruz,
chen bajeꞌrer cuxaꞌan,
bayiriꞌ tan u man ich u mucꞌ Cꞌuj.
Baxuc,
a ten xanoꞌ,
bayiriꞌ xan,
in wet man Cristo,
a baywoꞌ jeꞌ u chichquintic in mucꞌ Cꞌuj ich u tꞌʌn,
a quin bin in tsicbar techex wa ber caꞌ bin cꞌuchuquen tu yʌnechex.
5 Tumtex ta wor a wʌcꞌʌs bʌjiriꞌex wa tan a quiꞌ acsiquex ta worex tiꞌ Cristo soc a werex wa ja wet manex Cristo.
Wa mʌꞌ a wet manex yejer Cristo mʌꞌ taj a wacsmʌnex ta worexiꞌ.
6 A tenoꞌ tin tꞌʌn,
jeꞌ a wuꞌyiquex ta worex wa taj in wet man Cristo,
soc quet bayiriꞌ,
a werex mʌꞌ jin tus ar techex.
7 A tenoꞌ caj in chich tꞌʌna Cꞌuj soc mʌꞌ a pʌyiquex a siꞌpirex,
chichin.
Chen mʌꞌ jin tucr in beyaj a tin betaj a tu yʌnechex.
Jariꞌ in chen cꞌat caꞌ manaquechex tu tsoyir.
Tsireꞌej u jer cu tucricob mʌꞌ tsoy in beyaj.
8 A tenoꞌ mʌꞌ nanij in mʌꞌquintic mac a cu yacsic tu yor a baꞌ taj.
Mʌꞌ ja wirej,
tan in beyaj quireꞌ in cꞌat wa mac caꞌ u yacsej tu yor.
9 Rajen chen quiꞌ in wor wa ber quin wuꞌyic yocꞌor ten wa mʌꞌ tan in chich tsicbar.
A tenoꞌ in chen cꞌat caꞌ chichac a worex tiꞌ u tꞌʌn Cꞌuj.
A tenoꞌ quin tꞌʌnic Cꞌuj techex soc a quiꞌ manex tu tsoyir.
10 Mʌꞌ toy xiquen tu yʌnechex quir in tꞌʌniquechex tan in tuchiꞌtic techex a jeꞌ juꞌunaꞌ.
A jeꞌ juꞌunaꞌ cu chich aric techex cax tiꞌ yʌnen nachir.
A jeꞌ beyajaꞌ a quin betic raꞌ tu tsꞌa ten Cꞌuj a tenoꞌ.
A tenoꞌ caj in cʌxta bic tabar in chichquintic a worex tiꞌ u tꞌʌn Cꞌuj.
Mʌꞌ jin cʌxte bic tabar in chꞌesic a wacsiquex ta worex tiꞌ Cristo.
11 Bajeꞌrer in wet acsaꞌorirex caꞌ u yamtej techex Cꞌuj.
Cʌxtex a manex tu tsoyir.
In cꞌat Cꞌuj caꞌ u yamtej techex soc mʌnaꞌ baꞌ ca tucriquex.
Caꞌ a pacran yajquint a bʌjex.
Wa ta nuncajex u tꞌʌn a wet acsaꞌorirex,
sisquint a worex.
Wa baxuc ca betiquex,
jeroj,
tan a betiquex a baꞌ u cꞌat Cꞌuj.
Bayiriꞌ xan,
a Cꞌujoꞌ mʌꞌ ju jʌs u bʌj techex munt qꞌuin.
12 Caꞌ a pacran quiꞌ tꞌʌn a bʌjex soc yerob mac a wet acsaꞌorirex.
13 Tu cotor a wet acsaꞌorirex yejeroꞌonex tan u tꞌʌniquechex.
14 A tenoꞌ in cꞌat caꞌ u yam techex ic Jaj Tsꞌurirex Jesucristo.
Caꞌ u yajquin techex Cꞌuj.
Caꞌ u pʌy a berex u Tajꞌor Pixam Cꞌuj.
Soc a wet manex yejer u Tajꞌor Pixam Cꞌuj.