A JEꞌ JUꞌUNAꞌ, CAJ U YɅN BATꞌAN TSꞌIBTA PABLO TIꞌ U YET ACSɅꞌORIROB ICH U CAJAR CORINTO
1 CORINTIOS
A Pablojoꞌ caj u tsꞌibtaj a jeꞌ juꞌunaꞌ tiꞌ a yacsmʌnob tu yorob ich u cajar Corinto
1
A tenoꞌ,
Pablojen,
quireꞌ jach tsoy tu tꞌʌn Cꞌuj caj u pʌyen Cꞌuj soc yʌjtseqꞌuiren u tꞌʌn Jesucristo.
A tenoꞌ,
Pablojen,
baxuc in wet acsaꞌorir Sóstenes quin tꞌʌnicob techex.
2 Quin tsꞌibtic techex a jeꞌ juꞌunaꞌ,
a mac a yacsmʌnob tu yorob ich u cajar Corinto,
soc a xaquiquex tu ca muchꞌquintiquex a bʌjex.
Mʌꞌ ja wirej,
Cꞌuj yʌninechex,
quireꞌ caj a wacsex ta worex tiꞌ u parar,
Jesucristo.
A Cꞌujoꞌ,
cu pʌyiquechex soc a cꞌujintiquex Cꞌuj.
Mʌꞌ chen techex cu pʌyaꞌr ten Cꞌuj quir a cꞌujintiquex Cꞌuj,
tan u pʌyic tu cotor mac cax tu cʌjaꞌanob,
a mac a yacsmʌnob tu yorob tiꞌ ic Jaj Tsꞌurirex.
Mʌꞌ ja wirej,
pꞌeriꞌoꞌonex quireꞌ yejeroꞌonex Jesucristo.
3 A tenoꞌ,
in jach cꞌat Cꞌuj caꞌ u quiꞌ cʌnantechex,
soc mʌnaꞌ baꞌ ca bin a tucrex.
Baxuc quin cꞌatic tiꞌ ic Jaj Tsꞌurirex Jesucristo techex xan.
Bic tabar caj u yam toꞌonex Jesucristo
4 A tenoꞌ,
quin waꞌaric tiꞌ Cꞌuj:
“Bayoꞌ,
Cꞌuj,
quireꞌ caj a wacsaj tiꞌob ta tsoyirob,
a mac a yacsmʌnob tu yorob tiꞌ Jesucristo,
a robob a tiꞌ yʌnob tu cajarob Corinto.”
Rajraꞌ quin waꞌaric tiꞌ Cꞌuj.
5 Mʌꞌ ja wirej,
quin waꞌaric:
“Bayoꞌ tiꞌ Cꞌuj”,
quireꞌ wa ber caj a wacsex ta worex tiꞌ Jesús,
caj a cꞌʌmex tu cotor a baꞌ jach tsoy soc cꞌuchaꞌan a worex a quiꞌ tsecꞌtiquex u tꞌʌn Cꞌuj.
Bayiriꞌ xan,
caj a quiꞌ najtex a baꞌ tiꞌ yʌn ich u jach tajir u tꞌʌn Cꞌuj.
6 Rajen jach chich a worex tiꞌ u tꞌʌn Cꞌuj,
quireꞌ caj a cꞌʌmex tu cotor a baꞌ jach tsoyoꞌ,
caj a wuꞌyex in tsecꞌtob Cristo tuꞌ yʌnechex.
7 Mʌꞌ ja wirej,
ca manex a quiꞌ tsecꞌtiquex u tꞌʌn Cꞌuj.
Bayiriꞌ xan,
ca quiꞌ najtiquex a baꞌ tiꞌ yʌn ich u tajir u tꞌʌn Cꞌuj,
quireꞌ raꞌ tsꞌabij techex ten Cꞌuj.
Quireꞌ caj a jach cꞌʌmex u jach tsoyir u tꞌʌn,
a caj in tsecꞌtob techex uch.
Quireꞌ ca quiꞌ pajiquex u qꞌuinin caꞌ bin uruc ic Jaj Tsꞌurirex Jesucristo.
A ray u qꞌuininoꞌ,
cu jocꞌar u tajir tu cotor baꞌ.
8 Chen a Cꞌujoꞌ,
jeꞌ u chichquintic a worex hasta a ray u qꞌuininoꞌ,
caꞌ bin xuruc tꞌʌn soc mʌnaꞌ mac cꞌuchaꞌan yor u pʌqꞌuic a pachex,
cax tu qꞌuinin cu yocar Jesucristo juez.
9 Mʌꞌ ja wirej,
a Cꞌujoꞌ,
rajraꞌ cu betic an ten bic caj u toc araj uch tiꞌ mac.
Rajiꞌ caj u pʌyechex raꞌ u qꞌuinin caj a wuꞌyex u tꞌʌn Cꞌuj,
soc a wet manex yejer Jesucristo,
quireꞌ rajiꞌ u parar,
bayiriꞌ xan ic Jaj Tsꞌurirex.
Pꞌeriꞌquint a worex
10 A tenoꞌ,
Pablojen,
quin chich cꞌatic techex in wet acsaꞌorirex,
quireꞌ tsꞌaꞌb in beyaj ten ic Jaj Tsꞌurirex Jesucristo.
Rajen quin waꞌaric techex caꞌ a pꞌeriquintex a tꞌʌnex tu cotorechex,
soc quet a worex,
soc pꞌeriꞌ a tucurex xan.
Mʌꞌ ja wirej,
mʌꞌ tsoy tu tꞌʌn Cꞌuj wa ca pꞌusiquex a bʌjex,
caꞌ a chen pꞌeriꞌquintex a bʌjex.
11 In wet acsaꞌorirex caj in wuꞌyaj yaꞌaraꞌ ten a mac a cʌjaꞌan ich u yatoch Cloé,
ca pacran nunquiquex a tꞌʌnex tuꞌ yʌnechex.
12 Uꞌyex baꞌ u cꞌat yaꞌaric aroꞌ.
Jujunturechex ca waꞌariquex:
“Pablo,
rajiꞌ yʌninen quireꞌ tan in cʌnic u tꞌʌn.”
U jer,
tan yaꞌaric:
“A tenoꞌ,
Apolos,
rajiꞌ yʌninen,
quireꞌ tan in cʌnic u tꞌʌn.”
U jer,
tan yaꞌaric:
“A tenoꞌ,
Cefas rajiꞌ yʌninen quireꞌ tan in cʌnic u tꞌʌn.”
U jer tan yaꞌaric:
“A tenoꞌ,
Cristo,
rajiꞌ yʌninen quireꞌ tan in cʌnic u tꞌʌn.”
13 Barej caj a nunquex a tꞌʌnex irechex wa tan a jʌsiquex jun xotꞌ Cristo techexiꞌ.
Mʌꞌ ja wirej,
a Cristojoꞌ,
rajiꞌ yʌnin tu cotor mac a yacsmʌnob tu yorob.
Arex wa Pablo caj sinij ich u cruz quir u boꞌotic u boꞌorir a siꞌpirex?
A werex,
mʌꞌ tajiꞌ.
Arex ten,
caj acsaꞌb jaꞌ ta joꞌrex a uchoꞌ,
caj acsaꞌb jaꞌ ta joꞌrex soc ten yʌninechex?
A werex mʌꞌ tajiꞌ.
14 Quin chen aꞌaric tiꞌ Cꞌuj:
“Bayoꞌ Cꞌuj quireꞌ caj in chen acsaj jaꞌ tu joꞌr Crispo yejer Gayo.”
Mʌꞌ jin wacsaj jaꞌ tu joꞌr u jer mac ich techex.
15 Rajen,
mʌnaꞌ mac cꞌuchaꞌan yor u sosoc aric:
“A tenoꞌ,
acsaꞌb jaꞌ tin joꞌr ten Pablo soc in cʌnicob u tꞌʌn Pablo.”
16 Jaj bʌcaꞌan,
cꞌaj ten,
caj in wacsaj jaꞌ tu joꞌrob u bʌjob ich yatoch Estéfanas.
Mʌꞌ jin wacsaj jaꞌ tu joꞌr u jer,
mʌꞌ jin cꞌʌꞌoman bajeꞌrer.
Tin tꞌʌn,
mʌnaꞌ u jer.
17 Biquinin chen mʌꞌ yaꞌab caj in wacsaj jaꞌ tu joꞌrob,
quireꞌ Cristo caj u chen tuchiꞌten quir in man in tsecꞌt u jach tsoyir u tꞌʌn,
mʌꞌ quir in wacsic jaꞌ tu joꞌrob mac,
caj u yaꞌaraj.
Caꞌ in tsecꞌt u tꞌʌn,
mʌꞌ jin nonoj cꞌʌnej u tꞌʌnob a mac a ju neꞌer baꞌ ich yocꞌocab,
soc mac cu chen bin u quibicob u nonoj tꞌʌnob,
mʌꞌ ju yacsicob tu yorob tiꞌ Jesús,
a mac a quimij ich u cruz quir u boꞌotaꞌr u siꞌpirob.
Cristo a mac u chichir u mucꞌ Cꞌuj bayiriꞌ u neꞌer Cꞌuj
18 Mʌꞌ ja wirej,
a mac a mʌꞌ ju cꞌʌm u tꞌʌn Cꞌuj,
a cu chen pꞌastic tu cu yubic a mac a caj u tsecꞌtaj bic tabar quimij Cristo ich u cruz,
a caj u yaꞌaraj,
mʌꞌ tajiꞌ,
rajiꞌob cu bin erarob ich cꞌacꞌ.
Chen toꞌonexoꞌ,
a mac a u cꞌʌmʌnob u tꞌʌn Cꞌuj,
ij querex a jeꞌ tꞌʌnaꞌ,
raꞌ u jach chichir u mucꞌ Cꞌuj quir u taquicoꞌonex.
19 Rajen caj u tsꞌibtaj uch,
a mac a tsꞌab u tucur ten Cꞌuj quir u tsꞌibtic uch,
caj u yaꞌaraj:
A tenoꞌ,
quij Cꞌuj,
bin in caꞌ in rucꞌsic u tꞌʌn a mac a ju netus er tu cotor baꞌ.
Bayiriꞌ a cu tus aricob cu najticob tu cotor baꞌ.
Baxuc caj araꞌb ten Cꞌuj uch.
20 Rajen,
a Cꞌujoꞌ,
caj u yesaj toꞌonex jach jot,
a baꞌ a cu tus aricob u neꞌer tu cotor baꞌ,
cax u neꞌer juꞌunob,
cax a netꞌojob tu cu tsicbarob ich u yet tꞌojirob.
Mʌꞌ ja wirej,
mʌꞌ cꞌuchaꞌan yorob u quetquinticob a baꞌ u neꞌerob mac yejer a baꞌ u neꞌer Cꞌuj.
21 Quireꞌ jach tsoy tu tꞌʌn Cꞌuj,
rajen caj u tucraj u taꞌquic a mac a cu yacsicob tu yorob tiꞌ Cristo,
caj u cꞌʌnenob a mac a tsꞌaꞌb u tucur ten Cꞌuj soc in tsecꞌticob u tꞌʌn cax caj u pꞌastajob bic tabar u quimij Cristo ich u cruz.
Mʌꞌ ja wirej,
Cꞌuj caj u tucraj wa mʌꞌ ju chaꞌbar mac u yerob u bʌjiriꞌ Cꞌuj a cu tus aricob u neꞌer tu cotor baꞌ ich yocꞌocab.
22 A ju winiquirob judíojoꞌ,
caj u cꞌatob jach carem beyaj an bic cu betic Cꞌuj,
soc yerob wa yʌn u mucꞌ Cꞌuj Jesús,
soc caꞌ yacsob tu yorob tiꞌ Cristo.
Chen u winiquirob griego,
caj u cʌxtob bic tabar yerob Cꞌuj an ten bic u cʌnicob u neꞌer baꞌ.
23 Chen a tenoboꞌ,
quin man in tsecꞌticob u tꞌʌn Cristo,
mʌꞌ jin wesob carem beyaj an bic cu betic Cꞌuj ich u winiquirob judío.
Mʌꞌ jin camsob ich u winiquirob griego a raꞌ u neꞌer baꞌ.
Quin tsecꞌticob Cristo an bic caj quimij ich u cruz.
Rajen u winiquirob judío cu choctar u yorob,
bayiriꞌ xan,
u winiquirob griego cu yaꞌaricob:
“Jot a Cristojoꞌ”,
quireꞌ quimij ich u cruz.
24 Chen yʌn u winiquirob judío,
yejer u winiquirob griego,
a tetaꞌb ten Cꞌuj caj u yacsajob tu yorob.
Rajen robob yerob a Cristojoꞌ jach chich u mucꞌ tu quimij ich u cruz.
Bayiriꞌ yerob xan,
a baꞌ cu tucric Cꞌuj tiꞌ Cristo jach manan tsoy.
25 Mʌꞌ ja wirej,
a baꞌ cu yaꞌaricob mac,
a tiꞌ yʌn ich yocꞌocab,
tiꞌ Cꞌuj:
“Jot a Cꞌuj,
an ten bic cu yaꞌaric u tacoꞌonexoꞌ.”
Chen a Cꞌujoꞌ,
jach manan tsoy caj u yiraj aroꞌ.
Bayiriꞌ a mac a tiꞌ yʌn ich yocꞌocab cu yaꞌaricob:
“Quireꞌ Cristo quimij ich u cruz mʌnaꞌ u mucꞌ.”
Barej a Cꞌujoꞌ,
jach manan u chichir u mucꞌ caj u yiraj aroꞌ.
26 Quiꞌ cꞌʌꞌotex bic Cꞌuj caj u tetechex in wet asaꞌorirex.
Tu tetaj wa yaꞌab a ju neꞌer baꞌ?
Mʌꞌ ju tetaj,
quireꞌ baxuc cu teticob mac teraꞌ ich yocꞌocab.
A Cꞌujoꞌ,
mʌꞌ ju tetaj techex quir u tsꞌurintiquex mac.
Mʌꞌ ju tetaj techex Cꞌuj,
quireꞌ rochaꞌbechex ten a nʌꞌ ich yatoch rey wa gobernador.
Chʌc yʌn ich techex u tajir,
chen mʌꞌ yaꞌabiꞌ.
27 U bʌjiriꞌ Cꞌuj caj u tetechex quireꞌ tsoy tu tꞌʌn caj u tetechex.
Mʌꞌ ja wirej,
a mac teraꞌ ich yocꞌocab cu yaꞌaric techex:
“Mʌꞌ ja jach uꞌyex tꞌʌn irej wa mʌnaꞌ a xiquinex.”
Chen a Cꞌujoꞌ caj u tetechex soc u suraꞌquinticob a mac a cu tus neꞌer tu cotor baꞌ.
Mʌꞌ ja wirej,
caj u tetechex Cꞌuj,
cax a mac teꞌ yʌn ich yocꞌocabaꞌ,
cu yaꞌaricob:
“Jot a mac a yacsmʌnob tu yorob.”
Caj u tetechex quir u suraꞌquinticob a mac a cu pꞌasticob techex,
quireꞌ u bʌjiriꞌ cu tucricob jach chich u mucꞌ.
28 A Cꞌujoꞌ,
caj u tetaj mac,
cax pꞌastaꞌb ten u racꞌob.
Cax cu tucricob a racꞌobex:
“Irechex u pꞌupꞌirechex robir”,
caj u tetechex Cꞌuj soc u chꞌesic a mac a cu tsicbarob baxuc cu yaꞌaric u pꞌupꞌirechex robir.
29 A baywoꞌ,
caj u tetoꞌonex Cꞌuj soc mʌnaꞌ mac cu bin yaꞌaric ʌcʌtan tiꞌ Cꞌuj:
“Caj u tetajen Cꞌuj quireꞌ caj u yiraj jach manan tsoyiren.”
30 U bʌjiriꞌ Cꞌuj,
caj u pꞌeriꞌquintechex yejer Cristo,
quireꞌ caj a wacsajex ta worex.
Rajen a wet manex Cristo,
rajen quij cariquex:
“A Cristojoꞌ,
rajiꞌ cu camsicoꞌonex soc ij querex Cꞌuj.”
Mʌꞌ ja wirej,
quireꞌ caj ij cacsex tij corex tiꞌ Cristo,
rajen cu cꞌʌmicoꞌonex Cꞌuj.
Quireꞌ caj ij cacsex tij corex tiꞌ Cristo,
quic beyajex tiꞌ Cꞌuj.
Quireꞌ caj ij cacsex tij corex tiꞌ Cꞌuj,
jeroj bin u caꞌ u tacoꞌonex Cꞌuj.
31 Soc u nupꞌur a baꞌ cu yaꞌaric ich u tꞌʌn Cꞌuj,
arex tiꞌ a mac yaꞌaric tiꞌ u wʌcꞌʌs bajiriꞌ:
“Jach tsoyen a tenoꞌ.”
Caꞌ a waꞌarej:
“Jach tsoyech a techoꞌ Jaj Tsꞌurir,
quireꞌ a baꞌ caj a betaj tech a tenoꞌ.”
Baxuc cu yaꞌaric u tꞌʌn Cꞌuj a tsꞌibaꞌan uchoꞌ.