A JEꞌ JUꞌUNAꞌ, PACHIR CAJ U CAꞌ TSꞌIBTA PABLO TIꞌ U YET ACSɅꞌORIROB ICH U CAJAR CORINTO
2 CORINTIOS
Pablo caj u tsꞌibtaj tiꞌ a mac a cu muchꞌquinticob u bʌjob quir u yubicob u tꞌʌn Cꞌuj ich u cajar Corinto
1
A tenoꞌ Pablojen,
pꞌeriꞌen yejer Timoteo,
ij quet acsaꞌorirex,
tan in tsꞌibticob techex a jeꞌ juꞌunaꞌ.
Cꞌuj caj u teten soc yʌj tseqꞌuiren Jesucristo quir in beyaj tiꞌ,
quireꞌ tsoy tu tꞌʌn Jesús,
rajen quin tsecꞌtic u tꞌʌn.
Tan in tuchiꞌticob a jeꞌ juꞌunaꞌ soc a xaquiquex,
a mac a yacsmʌnob tu yorob ich u cajar Corinto quet yejer a mac Cꞌuj yʌninob,
a mac a cʌjaꞌan ich tu cotor u ruꞌumin Acaya.
2 A tenoꞌ in cꞌat Cꞌuj ic Tetex caꞌ u yam techex soc mʌnaꞌ baꞌ ca tucriquex.
Bayiriꞌ xan,
in cꞌat techex aroꞌ ic Jaj Tsꞌurirex Jesucristo.
A baꞌ mucꞌyajnʌjij Pablo tiꞌ a mac a mʌꞌ yerob Cꞌuj
3 Caꞌ ij carex tiꞌ Cꞌuj,
a mac u Tet ic Jaj Tsꞌurirex Jesucristo:
“Bayoꞌ Cꞌuj,
tech ta tucrenob,
rajraꞌ tan a chichquintic in worob.”
4 Mʌꞌ ja wirej,
rajiꞌ cu chichquintic ij corex wa ber cu cꞌuchur toꞌonex tu cotor mucꞌyaj.
Rajen,
cꞌuchaꞌan ij corex ic chichquintiquex u yorob ij quet acsaꞌorirex wa ber cu mucꞌyajob,
quireꞌ Cꞌuj caj u chichquintaj ij corex tu mucꞌyajnʌjoꞌonex uch.
5 Mʌꞌ ja wirej,
a mac a yacsmʌnob tu yorob,
bin u caꞌ tar u mucꞌyajob an ten bic mucꞌyajnʌjij Cristo uch soc u cʌnicob Cristo,
chen rajiꞌ cu chichquintic ij corex wa ber quic mucꞌyajex.
6 A tenoboꞌ tan in mucꞌyajob bajeꞌrer soc cꞌuchaꞌan in worob in chichquinticob a worex,
bayiriꞌ soc jeꞌ u toꞌcar a pixamex.
Wa ber Cꞌuj cu chichquintic in worob,
jeroj jeꞌ a wiriquex bic tabar xan cu bin chichquintic a worex Cꞌuj.
Bayiriꞌ bic tabar cu bin tacbir a pixamex ten Cꞌuj.
Quireꞌ wa ber cu tar techex a mucꞌyajex an ten bic mucꞌyajnʌjenob,
a tenoboꞌ in cꞌatob a quiꞌ mucꞌtiquex a mucꞌyajex a tan u tar techex.
7 Mʌꞌ nacʌr in worob quireꞌ a techexoꞌ.
Mʌꞌ ja wirej,
in werob wa ca mucꞌyajex xan an ten bic a tenoboꞌ mucꞌyajnʌjenob jeꞌ u chichquintaꞌr a worex xan.
8 A tenoboꞌ in cꞌat in cꞌasicob techex,
in wet acsaꞌorirex bic tabar mucꞌyajnʌjenob tar ich u ruꞌumin Asia.
Quireꞌ jach manan mucꞌyajnʌjenob soc orac mʌnaꞌ in worob,
rajen in werob wa jeꞌ in quimenobeꞌ.
9 A tenob in werob jeꞌ u cꞌubiquenobeꞌ a tenoboꞌ soc in quinsaꞌob.
Mʌꞌ ja wirej,
a baꞌ in ber a tenoboꞌ tarij quireꞌ Cꞌuj soc in cꞌubic in bʌjob tiꞌ Cꞌuj,
a mac cu ricꞌsic mac ich u quimirir soc u wʌcꞌʌs cuxtar.
Tarij soc in cʌnicob wa mʌꞌ in mucꞌticob in bʌjiriꞌob tin junanob.
10 Chen Cꞌuj caj u jocꞌsen a tenoboꞌ tu tabar u chꞌesiquenob a tenoboꞌ.
Raꞌiriꞌ Cꞌuj xan jeꞌ u jocꞌsiquen a tenob a raꞌ u qꞌuinin a cu taroꞌ,
rajen quin wacsic tin worob wa jeꞌ u rajraꞌ jocꞌsiquenob soc in toꞌcarob a tenoboꞌ.
11 Wa ca yamtiquenobex quireꞌ tan a tꞌʌnic tenob Cꞌuj.
Wa jaj ix tiꞌ,
yaꞌab mac cu tꞌʌnicob Cꞌuj tenob,
yaꞌab mac cu bin yaꞌarej:
“Bayoꞌ Cꞌuj” quireꞌ ta wesaj a tenob u jach tsoyir a pixam.
Biquin mʌꞌ seb binij Pablo ich u cajar Corinto
12 A tenob jach quiꞌ in worob caj in wuꞌyajob quireꞌ caj in betob tsoy techex,
a mac a tiꞌ yʌnob ich yocꞌocab.
A tenoboꞌ caj in pꞌis in bʌjob soc in manob tu tsoyir.
A baywoꞌ caj in betob wa ber tiꞌ yʌnenob yejerechex uch,
quireꞌ tu yamtajenob Cꞌuj.
A tenoboꞌ mʌꞌ jin najtob baꞌ an ten bic mac ich yocꞌocab cu chen najticob baꞌ.
13 A techexoꞌ,
a werex aroꞌ jach taj.
A tenoboꞌ mʌꞌ tin waꞌarajob u jer tꞌʌnob ich u jer u juꞌunin caj in tuchiꞌtechex uch,
jariꞌ a baꞌ cꞌuchaꞌan a worex a xaquex a wirex.
Bayiriꞌ a baꞌ tan a najtiquex,
an bic quin pajicob cu cꞌuchur tu qꞌuininin jeꞌ a quiꞌ najtiquexeꞌ.
14 Mʌꞌ ja wirej,
ta chʌc najtex chichin rajen jeꞌ u quiꞌ tar a worex quireꞌ a tenoboꞌ,
bayiriꞌ xan jeꞌ u quiꞌtar in worob quireꞌ a techexoꞌ caꞌ bin cꞌuchuc tu qꞌuinin caꞌ bin uruc ic Jaj Tsꞌurirex Jesucristo.
15 A tenoꞌ in jach er tu jaj aroꞌ.
Rajen in wer in man pʌyber tu yʌn techex soc a baywoꞌ quic pacran iric ic bʌjex tu caꞌten,
mʌꞌ chen tuririꞌ quij quiric ic bʌjexiꞌ.
16 Quireꞌ in wer wa ber quin bin ich u ruꞌumin Macedonia tiꞌ quin bin man tu yʌnechex.
Bayiriꞌ caꞌ bin uquen tu ruꞌumin Macedonia tiꞌ quin bin wʌcꞌʌs man tu yʌnechex.
In cꞌat a yamtiquenex soc cꞌuchaꞌan in wor in bin tu ruꞌumin Judea.
17 Raꞌ in jach cꞌat in wirechex uch,
chen a tenoꞌ mʌꞌ tareniꞌ.
Jaj ix tʌcoj ca tus tucriquex a tenoꞌ quin betic an ten bic mac cʌjaꞌan teꞌ ich yocꞌocab cu chen beticob.
Robob cu yaꞌaricob cu bin u beticob baꞌ,
chen robob yerob mʌꞌ ju bin u beticobiꞌ.
18 Mʌꞌ ja wirej,
a Cꞌujoꞌ,
rajiꞌ jach taj yor Cꞌuj,
rajen mʌꞌ in manob in cacay tsicbʌtob.
19 A tenoboꞌ caj in tsecꞌtob techex u tꞌʌn Jesucristo uch,
rajiꞌ u parar Cꞌuj aroꞌ mʌꞌ cacay caj in tsecꞌtob xan.
Bayiriꞌ xan,
caj in tsecꞌtechex quet yejer Silvano yejer Timoteo.
Tu cotorenob caj in tsecꞌtob techex caj in waꞌarob techex wa Cristojoꞌ rajiꞌ taj.
20 Mʌꞌ ja wirej,
rajiꞌ Cristo caj u nupꞌsaj tu cotor u tꞌʌn Cꞌuj a tu toc araj Cꞌuj uch.
Rajen tan ic sʌjtiquex Cꞌuj wa quij cacsiquex tij corex tiꞌ u parar Cꞌuj.
21 U bʌjiriꞌ Cꞌuj tan u chichquintic ij corex soc mʌꞌ ic pꞌʌtiquex Cristo soc pꞌeriꞌ ij corex yejer Cristo.
Rajiꞌ Cꞌuj caj u tsꞌaja tenob in beyajob.
22 A Cꞌujoꞌ caj u tetenob soc rajiꞌ yʌninenob a tenoboꞌ.
In werob quireꞌ tu chaj u Tajꞌor u Pixam Cꞌuj u cʌjtar tin pixamob soc in werob yʌn toj quir u tar u nupꞌsej a baꞌ u toc aramʌn Cꞌuj.
23 A tenoꞌ quin waꞌaric techex ʌcʌtan Cꞌuj rajiꞌ yer wa taj quin waꞌaric techex.
A tenoꞌ in wer mʌꞌ jin tar in wirechex uch quireꞌ in wer bin in caꞌ in qꞌueyechex quireꞌ a baꞌ ta betajex uch.
24 A tenob mʌꞌ in cꞌat a tsꞌurintiquenex,
mʌꞌ jin tsꞌʌrob a pachex quir a wacsiquex ta worex.
Mʌꞌ ja wirej,
pꞌeriꞌ in beyajob yejerechex soc quiꞌ a worex quireꞌ tan a quiꞌ acsiquex ta worex ti Cristo.