2
Rajen in wer wa jach tsoy mʌꞌ jin wʌcꞌʌs tar in wirechex,
quireꞌ wa taren caꞌch jariꞌ u yajij a worex ta wuꞌyajex caꞌch.
Quireꞌ a tenoꞌ wa taren caꞌch bin in caꞌ in qꞌueyechex quireꞌ a baꞌ caj a betex uch.
2 Mʌꞌ ja wirej,
wa ja tenoꞌ caj in yajquint a worex caꞌch mac cu bin u quiꞌquintic in wor a tenoꞌ?
Jariꞌ techex cꞌuchaꞌan a worex a quiꞌquintiquex in wor.
Chen mʌꞌ cꞌuchaꞌan a worex a quiꞌquintiquex in wor wa ber quin qꞌueyiquechex quireꞌ jeꞌ u yajtar a worex teneꞌ.
3 A tenoꞌ caj in tsꞌibtaj techex a raꞌ tꞌʌn uch soc mʌꞌ in tucur wa ber quin cꞌuchur tu yʌnechex.
Mʌꞌ ja wirej,
in cꞌat a quiꞌquintiquex in wor quireꞌ in wer a bʌjiriꞌex jeꞌ u quiꞌtar a worex wa ber ca wiriquex quiꞌ in wor quireꞌ techex quiꞌ a worex.
4 Wa ber caj in tsꞌibtaj techex a ray juꞌunoꞌ uch,
choc in wor tin pixam,
bayiriꞌ jach cꞌux in wor quireꞌ techex a baꞌ ta betex.
Jach ocꞌar in caꞌ quireꞌ techex ta betex baꞌ.
Mʌꞌ ja wirej,
mʌꞌ in cꞌat in yajquintic a worex,
chen in cꞌat caꞌ a cꞌʌꞌotex biquinin jach manan in yajquintiquechex tu cotor.
Jawsex u siꞌpir a mac a tu raqꞌuintaj u racꞌ u yum
5 Wa mac tu cꞌuxquinta yor mac,
mʌꞌ tu chen cꞌuxquinta tin wor a tenoꞌ,
tu cꞌuxquinta ta worex techex.
Mʌꞌ ja wirej,
tu cꞌuxquintaj orac tu cotor a worex.
6 An bic ta qꞌueyex a ray xiboꞌ a tu pʌy u siꞌpir caꞌch,
tiꞌtiꞌ bajeꞌrer.
Arex tiꞌ a wet acsaꞌorirex soc u tsꞌocsic u qꞌueyaꞌr quireꞌ qꞌueyaꞌb ten yaꞌab mac.
7 Chen a bajeꞌreroꞌ caꞌ a yʌn jawsex u siꞌpir,
caꞌ a chichquintex u yor soc mʌꞌ u tupsaꞌr yor,
soc mʌꞌ u bin tu pach.
8 Rajen quin waꞌaric techex caꞌ a tsꞌajex yer soc caj a jach yajquintex a tiꞌoꞌ.
9 Rajen caj in tsꞌibtaj a ray juꞌunoꞌ tiꞌ techex soc in wuꞌyic wa ta mucꞌtex wa ber caj in tumt a worex.
A tenoꞌ in cꞌat in wuꞌyic wa rajraꞌ ca bin a quibex in tꞌʌn a quin toc aric techexoꞌ.
10 Wa ber ca jawsex u siꞌpir mac baxuc a tenoꞌ quin jawsic u siꞌpir xan.
A tenoꞌ caj in jawsaj u siꞌpir ʌcʌtan Cristo wa yʌn baꞌ quir in jawsic,
quin jawsic quireꞌ techex.
11 Mʌꞌ ja wirej,
caꞌ ic jawsex u siꞌpir soc cꞌuchaꞌan ij corex tiꞌ a quisinoꞌ.
Baxuc quin waꞌaricoꞌ quireꞌ ij querex bic tabar cu tucric a quisinoꞌ.
A baꞌ jacꞌsaꞌb yor Pablo ich u cajar Troas
12 Caj cꞌuchen ich u cajar Troas uch quir in tsecꞌtic u jach tsoyir u tꞌʌn Cristo,
u winiquirob tu cajar caj u pachtob yubob u tꞌʌn Cristo quireꞌ Cꞌuj toc tʌr u pixamob.
13 Chen mʌꞌ tsoy in tucur quireꞌ mʌꞌ jin nupa tiꞌ taroꞌ in wet acsaꞌorir Tito.
Rajen caj in tꞌʌnaj tiꞌob a ray winiquirob quireꞌ bin in caꞌ caj binen ich u ruꞌumin Macedonia.
Jeꞌ u jocꞌar u tsoyir tu cotor baꞌ quireꞌ Cristo
14 Caꞌ ij carex tiꞌ Cꞌuj:
“Bayoꞌ Cꞌuj,
quireꞌ rajraꞌ tech tan a yamtiquenob soc cꞌuchaꞌan in worob tu cotor baꞌ quireꞌ tech Cꞌuj ta pꞌeriꞌquin tenob yejer Cristo.”
Rajen Cꞌuj caj yam toꞌonex soc ic masiquex u tꞌʌn ich tu cotor mac ich yocꞌocab soc yerob biquiraꞌ Cꞌuj.
Bayiriꞌ tan u quiꞌquintic ij corex u tꞌʌn cꞌuj.
15 A baywoꞌ,
tan ij quiꞌquintiquex u yor Cꞌuj quireꞌ cu yiric toꞌonex tan ic tsecꞌtiquex u tꞌʌn Cristo ich tu cotor mac.
Wa ber mac cu yubicob ic tsecꞌtiquex u tꞌʌn Cꞌuj yʌn mac cu yacsicob tu yorob tiꞌ u tꞌʌn Cꞌuj,
jeroj rajiꞌob toc ten Cꞌuj.
Yʌn mac u jer mʌꞌ ju yacsejob tu yorob tiꞌ u tꞌʌn Cꞌuj,
jeroj rajiꞌob satʌr u caꞌob.
16 Rajen yʌn mac jeꞌ u toc satʌr quireꞌ mʌꞌ u cꞌat u tꞌʌn Cꞌuj.
Bayiriꞌ xan yʌn mac jeꞌ u bin tocar ten Cꞌuj quireꞌ u cꞌatob u tꞌʌn Cꞌuj.
Ay,
bic tabar yaj ic beyajex!
17 Mʌꞌ ja wirej,
a tenoboꞌ mʌꞌ in betob an ten bic u jer mac tan u beticob,
rajiꞌob tan u masicob u tꞌʌn Cꞌuj quir u jaricob u taqꞌuinob.
A tenoboꞌ ʌcʌtan tiꞌ Cꞌuj tsꞌajaꞌan in worob in tsecꞌticob u tꞌʌn Cꞌuj quireꞌ rajiꞌ tu tuchiꞌtenoboꞌ.
A tenob quin tsecꞌticob a baꞌ tajoꞌ.