U tꞌʌn Cꞌuj irej wa ricꞌben
3
Wa ber caj in tsꞌibtob techex aroꞌ,
a techexoꞌ mʌꞌ a yʌn turiquex wa tan in wʌcꞌʌs aricob wa tsoyir in bʌjob soc a tus tucriquex wa jach caremenob.
A tenoboꞌ mʌꞌ baꞌ wir quir in wesic techex juꞌun a cu tsicbar jach tsoy tꞌʌn a tenoboꞌ.
A bʌjiriꞌex a werex bic tabar a tenoboꞌ,
bayiriꞌ xan u jer yerob xan.
2 Mʌꞌ ja wirej,
chʌcaꞌan yiric mac wa tin betob a tsoyoꞌ tu yʌnechex uch,
quireꞌ a techexoꞌ caj a cꞌax ta worex tiꞌ Cꞌuj caj a pꞌʌt a manex ich a siꞌpirex.
A baywoꞌ chʌcaꞌan yiricob a racꞌobex biquiraꞌ a pixamex.
3 Robob chʌcaꞌan yiricob wa irechex tuririꞌ juꞌun toc tsꞌibtaꞌb ich yocꞌor ten u bʌjiriꞌ Cristo.
A raꞌ juꞌunoꞌ tin toc cꞌubob tiꞌ a racꞌobex ich a cajarex.
A baꞌ tsꞌibaꞌan ich yocꞌor mʌꞌ tsꞌibtaꞌb yejer u jach aꞌarir tsꞌib,
chen tsꞌibtaꞌb ten u Tajꞌor u Pixam Cꞌuj a mac cuxaꞌan.
U tꞌʌn caj u tsꞌibtaj aroꞌ mʌꞌ tsꞌibaꞌan ich yocꞌor tunich an ten bic uch tu qꞌuinin in nunquirob Moisés caj tsꞌibtaꞌb ten Cꞌuj.
Mʌꞌ ja wirej,
tiꞌ tsꞌibaꞌan ich a pixamex.
4 Rajen taj quin wuꞌyic tin worob quireꞌ Cꞌuj.
Mʌꞌ ja wirej,
Cristo caj u betaj aroꞌ.
5 A tenoboꞌ quin wuꞌyicob tin worob wa jin nonoj bʌjiriꞌob mʌꞌ cꞌuchaꞌan in worob tiꞌ a ray beyajoꞌ,
chen a Cꞌujoꞌ cu chichquintic in mucꞌob soc in beyajob tiꞌ soc in man in tsecꞌtob u jach tsoyir u tꞌʌn,
a ricꞌbenoꞌ.
A jeꞌ tꞌʌnaꞌ,
mʌꞌ raꞌ u tꞌʌn a uchbenoꞌ a tu tsꞌibt in nunquirirob Moisés a uchoꞌ.
6 Mʌꞌ ja wirej,
u tꞌʌn Moisés raꞌ cu yaꞌaric bin ij caꞌ quiminex quireꞌ tan ic manex ich ic siꞌpirex.
Chen u tꞌʌn a quin tsecꞌticob raꞌ u tꞌʌn a cu camsic u Tajꞌor u Pixam Cꞌuj.
A jeꞌ tꞌʌnaꞌ cu tsꞌic ij cuxtarex.
7 Jach jaj jach tsoy u tꞌʌn Cꞌuj a uchbenoꞌ a tsꞌibaꞌan ich tunich uch.
Jariꞌ raꞌ cu taquic ic joꞌrex quireꞌ yʌn ic siꞌpirex.
A ray u qꞌuininoꞌ Moisés caj u cꞌʌmaj u tꞌʌn Cꞌuj,
u wich Moisés caj u chucaj u sasirir Cꞌuj tu chꞌicaꞌan yejer Cꞌuj.
Rajen u winiquirob israel mʌꞌ cꞌuchaꞌan yor u pʌcticob uch u wich Moisés quireꞌ u sasirir cax tabar u jawʌr u sasirir Cꞌuj u wich ich Moisés.
8 Chen a techexoꞌ a werex jach manan tsoy u tꞌʌn Cꞌuj a tu tsꞌaja toꞌonex u Tajꞌor u Pixam Cꞌuj.
9 Jach taj u tꞌʌn Cꞌuj a uchbenoꞌ a caj tsꞌab ten Cꞌuj tiꞌ Moisés a uchoꞌ.
A raꞌ u qꞌuininoꞌ caj u chꞌaj sajquirob u winiquirob israel.
Cax cu taꞌquic u joꞌrob quireꞌ yʌn u siꞌpirob,
cax quic chꞌic sajquirex tiꞌ u tꞌʌn a ricꞌbenoꞌ,
jach manan tsoy quireꞌ cu yaꞌaric bic tabar Cꞌuj cu cꞌʌmicoꞌonex.
10 Mʌꞌ ja wirej,
a uchoꞌ jin werob a tꞌʌnoꞌ a uchbenoꞌ jach tsoy an ten bic tsꞌabir ten Cꞌuj,
chen u tꞌʌn a ricꞌbenoꞌ,
a yʌn toꞌonex bajeꞌrer jach manan tsoy.
11 A tꞌʌnoꞌ a ricꞌbenoꞌ,
a jeꞌ tꞌʌnaꞌ jeꞌ u pꞌatʌr munt qꞌuin quireꞌ jach manan tsoy.
Chen u tꞌʌn a uchbenoꞌ cax tsoy,
u tsoyir tan u man.
12 Rajen mʌꞌ in chꞌaꞌej sajquirob in tsecꞌticob u tꞌʌn Cꞌuj.
13 Mʌꞌ ja wirej,
a tenoboꞌ mʌꞌ irenob in nunquirob Moisés,
quireꞌ rajiꞌ tu pix u wich yejer nocꞌ soc u winiquirob israel mʌꞌ u pʌcticob u wich quir u yiricob wa ju sasir u wich tabar u jawar u sasirir Cꞌuj tu wich Moisés.
14 U winiquirob israel u berer bajeꞌrer mʌꞌ ju najtob a baꞌ tu tsꞌibt u nunquirob Moisés uch,
cax cu quiꞌ cʌxticob a baꞌ tsꞌibaꞌan tiꞌ ich u tꞌʌn a uchbenoꞌ,
mʌꞌ ju najtobiꞌ.
Quireꞌ mʌꞌ ju najtob wa Cristo tu toc rʌc nupꞌsaj a baꞌ tiꞌ yʌn a tiꞌoꞌ.
15 Jach taj u berer bajeꞌrer rajiꞌob mʌꞌ ju najtob cax cu quiꞌ cʌxtic ich u tꞌʌn u nunquirob Moisés.
16 Caꞌ bin cꞌuchuc tu qꞌuinin cu yacsicob tu yorob tiꞌ ic Jaj Tsꞌurirex,
jeroj jeꞌ u najticobeꞌ.
17 Mʌꞌ ja wirej,
ic Jaj Tsꞌurirex yejer u Tajꞌor u Pixam Cꞌuj robob quet bayiriꞌ.
Jeroj a mac a ju yet man u Tajꞌor u Pixam Cꞌuj toc rucꞌsaꞌb tiꞌ u tꞌʌn Moisés,
a raꞌ cu yaꞌaric mac cu bin tsꞌaꞌbir u mucꞌyaj.
Toc siptaꞌb tiꞌ.
18 Mʌꞌ ja wirej,
mʌnaꞌ baꞌ cu pixic ij quichex.
A tenoboꞌ irenob nen tan in wesicob u jach caremir Cꞌuj.
Quireꞌ chan chanber tan u waysicoꞌonex soc tsoyoꞌonex an ten bic tsoy ic Jaj Tsꞌururex.
Jesús tan u betic toꞌonex aroꞌ quireꞌ acaꞌan tic pixamex u Tajꞌor u Pixam Cꞌuj.