4
Rajen mʌꞌ biqꞌuin tupsaꞌan in worob quireꞌ Cꞌuj,
a cu tucric macoꞌ,
caj u cꞌubenob beyajob,
raꞌ quir in manob in tsecꞌtob u tꞌʌn.
2 Toc jumpuriꞌ mʌꞌ in betob a cꞌasoꞌ,
bayiriꞌ xan,
mʌꞌ jin pachtob in tusaricob tiꞌ mac,
mʌꞌ jin jenmastob u tꞌʌn Cꞌuj xan.
Mʌꞌ jin sosoꞌ arob u tꞌʌn Cꞌuj quireꞌ taj quin waꞌaricob tiꞌ,
soc mac tu cotor cꞌuchaꞌan yorob yiricob wa tsoy in beticob ʌcʌtan tiꞌ Cꞌuj.
3 Jach taj u tꞌʌn Cꞌuj a quin tsecꞌticob tiꞌ mac soc yerob bic tabar u jawʌr u siꞌpirob,
raꞌ mʌꞌ quet cu najticob a mac a cu satʌroboꞌ.
4 Mʌꞌ ja wirej,
a quisinoꞌ,
a mac a cu pʌyic u ber a mac a mʌꞌ yer Cꞌuj.
A quisinoꞌ mʌꞌ ju tsꞌ u tucur mac soc u najticob u tꞌʌn ic Jaj Tsꞌurirex,
bayiriꞌ soc u cꞌʌmicob u jach tsoyir u tꞌʌn Cꞌuj.
Rajen mʌꞌ cꞌuchaꞌan yor yerob u caremir ic Jaj Tsꞌurirex,
a mac irej u bʌjiriꞌ ic Tetex Cꞌuj.
5 A tenoboꞌ mʌꞌ in tsecꞌticob bic tabar a tenob.
A tenob quin tsecꞌticob bic tabar ic Jaj Tsꞌurirex.
Quin waꞌaricob wa quin yamticob mac tu cotor quireꞌ Jesucristo ic Jaj Tsꞌurirex a ju yajoꞌonex.
6 A tenoboꞌ quin tsecꞌticob u tꞌʌn Cristo quireꞌ Cꞌuj,
rajiꞌ caj u yaꞌaraj:
“A quiboꞌ caꞌ u sasiquint tu yacꞌbirir.”
Baxuc tu yaꞌaraj Cꞌuj.
Mʌꞌ ja wirej,
caj u tsꞌaj in najticob rajen in werob biquiraꞌ Cꞌuj,
a mac jach manan caremoꞌ an ten bic Cristo tu tsꞌaj u tucur Cꞌuj tiꞌ a tenoboꞌ.
Bic tabar quic manex tu tsoyir
7 Chen a tenobob mʌꞌ patarenobiꞌ a mac a yʌn a jeꞌ jach tsoy u tꞌʌnaꞌ soc chʌcaꞌan yiricob mac jach manan carem ij Cꞌujirex,
a mac jach chich u mucꞌ xan.
A tenob,
mʌꞌ chen ten yʌnin a ray u mucꞌoꞌ quireꞌ Cꞌuj yʌnin.
8 Yʌn baꞌ in berob tu quin binob.
Chen a Cꞌujoꞌ cu rucꞌsaꞌr u cꞌʌbob tenob soc mʌꞌ u chuquiquenob.
A tenoboꞌ cꞌʌs tucur in caꞌob,
chen mʌꞌ choc in worob tenob.
9 Wa ber cu chuquicob in pachob mʌꞌ jin wuꞌyob wa tu pꞌʌtajenob Cꞌuj.
Cax jatsꞌob in pachob chen mʌꞌ chꞌesaꞌbenobiꞌ.
10 Cax tu quin cꞌuchurob,
quin cꞌubic in bʌjob soc in quinsaꞌob an ten bic Cristo caj u betaj,
a mac quinsaꞌb ich cruz.
Quireꞌ a jeroj mac tu cotor jeꞌ u yerticobeꞌ wa Jesús rajiꞌ a mac cuxaꞌan quir u yamtenob a tenob.
11 Chen a tenob tiꞌ toy cuxaꞌanenob,
chen yʌn mac u cꞌat u quinsiquenob quireꞌ raꞌ u yajir in wacsic tin wor tiꞌ Jesucristo.
A baywoꞌ cꞌuchaꞌan yor yiricob mac wa Cristo tan u yamtiquenob soc in cuxtarob teꞌ ich yocꞌocab.
12 A tenoboꞌ jach yaꞌab tan in mucꞌyajob,
bayiriꞌ xan tabar in quiminob,
chen Cꞌuj tan u beyaj yejerechex soc a cuxtarex.
13 Uꞌyex baꞌ cu yaꞌaric ich u tꞌʌn Cꞌuj:
“A tenoꞌ quin wacsic tin wor tiꞌ a tꞌʌn rajen tsicbʌnʌjen.”
Baxuc cu yaꞌaric ich u tꞌʌn Cꞌuj.
A tenoboꞌ quin wacsic tin worob an ten bic mac caj u tsꞌibtaj a ray tꞌʌnoꞌ,
a baywoꞌ quin tsicbarob u tꞌʌn quireꞌ tin wacsob tin worob.
14 A tenoboꞌ in werob Cꞌuj jeꞌ u ricꞌsicoꞌonex ich u quimirir soc ij cuxtarex yejer Jesucristo quireꞌ tu ricꞌsaj ic Jaj Tsꞌurirex ich u quimirir soc u cuxtar.
Jeroj pꞌeriꞌoꞌonex ich caꞌanan jeꞌ ij cuxtarex.
15 Baxuc caj u betaj Cꞌuj techex.
Mʌꞌ ja wirej,
a techexoꞌ,
a mac Cꞌuj yʌninechex,
jeꞌ a jach pimtarex quireꞌ jeꞌ u man u tꞌʌn Cꞌuj nach ich tanxer ruꞌum.
A baywoꞌ yaꞌab mac,
quireꞌ tsoy tu tꞌʌn Cꞌuj,
bin u caꞌ yaꞌarob:
“Bayoꞌ Cꞌuj.”
A baywoꞌ cu yesicob bic jach carem ij Cꞌujex.
16 Rajen mʌnaꞌ baꞌ cu tupsic in worob,
cax tan u jach nuxibchʌjʌr in winquirob,
a jin pixamob,
rajraꞌ tan u chichquintaꞌr u mucꞌob ten u Tajꞌor u Pixam Cꞌuj.
17 A tenoboꞌ tan in cꞌʌs mucꞌyajob bajeꞌrer.
Mʌꞌ ja wirej,
a jeꞌ mucꞌyaj a quin mucꞌyajob bajeꞌrer tan u pʌyiquenob u tsoyir Cꞌuj a mʌꞌ u tsꞌocar biqꞌuinoꞌ.
18 A tenoboꞌ mʌꞌ tan in tucricob tiꞌ a baꞌ chʌcaꞌan in wiricob a teraꞌ ich yocꞌocab.
Chen a tenoboꞌ tan in tucricob a baꞌ toꞌonex mʌꞌ toy ij quirex.
Mʌꞌ ja wirej,
a baꞌ quij quiriquex bajeꞌrer mʌꞌ yaꞌab u qꞌuinin tiꞌ yʌn,
chen a baꞌ mʌꞌ toy ij quirex aroꞌ munt qꞌuin tiꞌ yʌniꞌ.