5
A toꞌonex ic winquirirex irob yatoch a ju rabʌrob tu quij cʌjarex.
Rajen ic toc erex tiꞌ yʌn u jer ricꞌben ich caꞌanan tu quic binex cʌjtarex wa jic winquirirex cu chꞌejar.
A ray u winquiriroꞌ,
mʌꞌ irej yatoch a xiboꞌ cu cꞌʌxicoꞌ quireꞌ aroꞌ cu rabʌr.
U winquirir a cu bin tsꞌabir ten Cꞌuj toꞌonex mʌꞌ ju rabʌr quireꞌ Cꞌuj cu bin u betic tiꞌ,
soc munt qꞌuin tiꞌ yʌn.
2 Jach taj a toꞌonexoꞌ,
a mac yer Cꞌuj jach tucur ij caꞌex quireꞌ tiꞌ toy yʌnoꞌonex ich yocꞌocab.
Quireꞌ quic jach pachtiquex ij cʌjtarex ich caꞌanan ich Cꞌuj soc yʌn toꞌonex ricꞌben ic winquirirex.
3 Tu quic bin ij cʌjtarex ich caꞌanan,
jeꞌ u yʌntarex ricꞌben ic winquirirex,
rajen mʌꞌ cꞌuchaꞌan ij corex ij cariquex mʌnaꞌ ij winquirirex.
4 A mun u qꞌuinin tiꞌ toy yʌnoꞌonex teꞌ ich yocꞌocab quic xobex quireꞌ tan ic mucꞌyajex.
A tenoꞌ mʌꞌ in cꞌat in waꞌaric wa in cꞌat in pꞌʌtic in winquiriroꞌ.
Chen a tenoꞌ in cꞌat in cꞌʌmic u jer ricꞌben.
Chen jach manan tsoy caꞌ xicoꞌonex ich caꞌanan tu yʌn Cꞌuj quir ij cʌjtarex tu mʌꞌ ju quimin mac.
5 Mʌꞌ ja wirej,
a Cꞌujoꞌ tu toc nupꞌsa a baꞌ tu tucraj quireꞌ tu toc bet aroꞌ.
Bayiriꞌ xan,
tu tuchiꞌt u Tajꞌor u Pixam Cꞌuj soc u pꞌatʌr tij quicnʌnex,
rajen ij querex jeꞌ u jocꞌar u tajir a cu bin u tsꞌic toꞌonex aroꞌ tsoy.
6 Rajen jach manan quiꞌ in worob quireꞌ in werob tiꞌ toy cuxaꞌanenob teꞌ ich yocꞌocab mʌꞌ toy xiquenob ich tu yʌn ic Jaj Tsꞌurirex.
7 Chen tan ij quet manex yejer mac a ju tꞌʌn a tij quibex a mac a mʌꞌ ij quirex.
8 Jach quiꞌ ij corex.
Mʌꞌ ja wirej,
tsꞌajaꞌan ij corex ij cʌjtarex tu yʌn ic Jaj Tsꞌurirex soc ic pꞌʌtiquex a jeꞌ ic winquirirex.
9 Rajen in cꞌat in quiꞌquinticob u yor ic Jaj Tsꞌurirex,
cax wa cuxaꞌanenob teꞌ ich yocꞌocab,
cax wa cuxaꞌanenob tu yʌn ic Jaj Tsꞌurirex.
10 Mʌꞌ ja wirej,
tan u tar u qꞌuinin u xur tꞌʌn wa ber cu tumtic ij corex tu cotoroꞌonex Cristo an ten bic cuxrajaꞌanonex teꞌ ich yocꞌocab uch.
A raꞌ u quininoꞌ jeꞌ u tsꞌabʌr ten Cristo tiꞌ jujunturoꞌonex u boꞌorir a baꞌ tic betex u qꞌuinin tiꞌ yʌnoꞌonex ich yocꞌocab uch cax wa tsoy cax wa mʌꞌ tsoy.
Cristo tu quetquint ij corex tiꞌ Cꞌuj
11 Quireꞌ rajen aroꞌ quin chꞌic sajquirob tiꞌ Cꞌuj,
rajen quin man in tsicbatob Cꞌuj soc u yacsicob tu yorob tiꞌ Cristo.
A Cꞌujoꞌ yer a baꞌ tan in camsicob bayiriꞌ xan,
in cꞌatob a werex ta worex xan a baꞌ tan in camsicob.
12 A tenoboꞌ mʌꞌ tan in waꞌaricob techex wa jach tsoyenob xiben,
chen a tenoboꞌ in cꞌatob a quiꞌquintiquex a worex yejeren soc a werex bic tabar a nunquiquex a mac a quiꞌ yoroboꞌ yejer mac a tus tsoyoꞌ,
chen mʌꞌ u jach erob biquiraꞌ u pixam.
13 Jot a baꞌ cu tucric mac a tenoboꞌ,
cax cu tucricob mʌꞌ in wer baꞌ quin beticob quir in yamtiquechexoꞌ.
A tenoboꞌ,
jeꞌ in beticob a baꞌ u cꞌat Cꞌuj cax a baꞌ quiriꞌ u cꞌat a tiꞌoꞌ.
14 Mʌꞌ ja wirej,
a Cristojoꞌ jach manan u yajenob rajen quin jach pꞌisic in bʌjob quir in beticob a baꞌ u cꞌat.
Mʌꞌ ja wirej,
a Cristojoꞌ caj quimij tiꞌ tu cotor mac,
rajen robob irob rʌc quimenob.
15 Cristo caj quimij soc u taquic tu cotoroꞌonex.
Bajeꞌrer mʌꞌ jic tucrex ic bʌjiriꞌex ic betiquex.
Jariꞌ bajeꞌrer quij cuxtarex quir ic betiquex a baꞌ u cꞌat Cristo,
a mac quimij caꞌ wʌcꞌʌs riqꞌuij.
16 Rajen tu qꞌuinin bajeꞌrer hasta quij quiminex mʌꞌ jic yʌn iriquex mac irej wa chen winic.
Cax a uchoꞌ caj in wiraj Cristo irej wa chen winic.
A bajeꞌrer a tenoꞌ mʌꞌ tan in wiric Cristo an bic chen winic quireꞌ tin cꞌaxaj tin tucur bajeꞌrer.
17 Rajen a mac a tu yacsob tu yorob tiꞌ Cristo robob ricꞌbenchʌjob u pixamob.
A baꞌ cu tucricob bajeꞌrer toc cꞌaxaꞌan,
rajen tu pꞌʌtob a tu cu manob uch.
An bic cu manob bajeꞌrer toc ricꞌben.
18 Tu cotor aroꞌ caj betaꞌb ten Cꞌuj quireꞌ Cristo.
Mʌꞌ ja wirej,
a Cꞌujoꞌ caj u masaj toꞌonex ich a ricꞌben bejoꞌ.
Bajeꞌrer tsoy yiricoꞌonex Cꞌuj quireꞌ Cristo tu toc boꞌot u boꞌorir ic siꞌpirex.
Caj u tsꞌajaj a tenob in beyajob soc in manob in waꞌarej tiꞌ u jer macob soc tsoy yiricob Cꞌuj.
19 Uꞌyex bic tabar a ray tꞌʌnoꞌ.
A Cꞌujoꞌ caj u tuchiꞌta Cristo quir u quetquintic yor Cꞌuj yejer mac soc pacran tsoy ij quiriquex ic bʌjex,
rajen Cꞌuj mʌꞌ ju tucrej wa yʌn ic siꞌpirex.
Rajiꞌ tu tsꞌajaj a tenob in beyajob caꞌ manquenob in waꞌarob bic tabar u jawar u siꞌpir mac.
20 Rajen tarenob yʌjtseqꞌuirenob Cristo quir in beyajob tiꞌ.
A tenoboꞌ quin tsecꞌticob u tꞌʌn Cꞌuj,
chen Cꞌuj,
rajiꞌ tan u chich aric tiꞌ mac.
A tenoboꞌ quin chich aricob techex ʌcʌtan tiꞌ Cristo:
“Caꞌ yiriquechex tsoyechex Cꞌuj.”
21 A Cristojoꞌ mʌnaꞌ u siꞌpir chen tar quir u boꞌotic u boꞌorir ic siꞌpirex,
a Cꞌujoꞌ caj u tuchiꞌtaj caꞌ quinsaꞌ ich cruz tiꞌ ic siꞌpirex.
Rajen ʌcʌtan tu wich Cꞌuj wa ber toꞌonex quij cacsiquex tij corex tiꞌ Cristo,
jeroj toc rucꞌsaꞌb ic siꞌpirex.