U sijbar taqꞌuin quir u yamtic u yet acsaꞌorirob
16
Bayiriꞌ bajeꞌrer,
jeꞌ in waꞌaric techex bic tabar caꞌ a muchꞌquintex a baꞌ ca bin a sijex quir a yamtiquex a wet acsaꞌorirex ich u cajar Jerusalén,
an ten bic caj in waꞌaraj tiꞌ a yacsmʌnob tu yorob ich u ruꞌumin Galacia caꞌ u betob xan,
bayiriꞌ xan,
caꞌ a betex xan.
2 Caꞌ bin cꞌuchuc tu qꞌuinin a cu yʌnxchun semana,
rajiꞌ domingo,
caꞌ a ricꞌsiquex junxotꞌ a baꞌ caj a jarex tu beyanʌjechex.
Jamach yajquintex aroꞌ,
soc caꞌ bin cꞌuchuquen mʌꞌ ja bin a muchꞌquintex a ray a taqꞌuinexoꞌ.
3 Jeroj tun,
caꞌ bin cꞌuchuquen tu yʌnechex,
jeroj,
jeꞌ in tsꞌibtic juꞌun soc a mac a cu bin u puricob a taqꞌuinex a caj a muchꞌquintex tiꞌ a wet acsaꞌorirex ich u cajar Jerusalén,
soc u yet bin a ray juꞌunoꞌ,
yejer a mac a caj a tetex quir u binob.
4 Wa tsoy tin tꞌʌn caꞌ xiquen robob caꞌ xiquenob yejerob.
Quir u bin Pablo
5 Chen jeꞌ in tar in wirechex wa ber caꞌ bin tsꞌocac in chꞌʌctic tu cotor u cajar ich u ruꞌumin Macedonia.
Mʌꞌ ja wirej,
bin in caꞌ chꞌʌctic u ruꞌumin Macedonia.
6 Jaj ix tiꞌ in pꞌatʌr ta wicnʌnex,
cax caꞌ bin cꞌuchuc tu qꞌuinin queꞌer.
Jeroj tun,
jeꞌ u cꞌuchur a worex a yamtiquenex quir in bin ich u jer ruꞌum,
wa cajar,
a tub in cꞌat in bin.
7 Quireꞌ mʌꞌ jin cꞌat in chen jamach iriquechex,
chen a tenoꞌ in cꞌat in pꞌatʌr ta wicnʌnex yaꞌab u qꞌuinin wa jic Jaj Tsꞌurirex u cꞌat.
8 Chen bajeꞌrer,
quin tucric in pꞌatʌr teraꞌ ich u cajar Efesio hasta cu man u qꞌuinin u quiꞌquiꞌ janʌn,
a Pentecostésoꞌ.
9 Quireꞌ jach cꞌuchij tu qꞌuinin quir in betic jach yaꞌab u beyaj teraꞌ tiꞌ in Tet Cꞌuj.
Chen yʌn yaꞌab mac xan mʌꞌ quet yor yejer u beyaj Cꞌuj,
quireꞌ cu pꞌacticenob a tenoboꞌ.
10 Wa cu cꞌuchur Timoteo tu yʌnechex,
yamtex a tiꞌoꞌ soc quiꞌ yor u pꞌatʌr ta wicnʌnex,
quireꞌ cu betic u jach beyaj Cꞌuj an ten bic a tenoꞌ.
11 Rajen mʌꞌ ja chaꞌiquex macob caꞌ pꞌastacob Timoteo.
Chen yamtex a tiꞌ,
soc mʌnaꞌ baꞌ cu tucric,
soc seb u cꞌuchur tu yʌnen,
quireꞌ quin pajic caꞌ bin uruc yejer u jer ij quet acsaꞌorirex.
12 Bayiriꞌ xan,
in cꞌat in waꞌaric techex ij quet acsaꞌorirex Apolos.
Caj in chich araj caꞌ xic tu yʌnechex,
soc u yet binac u yet acsaꞌorirob wa ber caꞌ bin xicob,
chen mʌꞌ ju cꞌat.
Rajen,
jeꞌ u bin,
caꞌ bin tac tu qꞌuinin.
Cu tsꞌocar u tꞌʌn Pablo
13 Quiꞌ pꞌir a wichex,
mʌꞌ ja chaꞌiquex mac u tusaric techex.
Caꞌ chichac a worex tiꞌ u tꞌʌn Cꞌuj.
Chichquint a worex soc mʌꞌ ja pꞌʌtiquex u tꞌʌn Cꞌuj.
Chichquin ta worex tiꞌ Cꞌuj soc irechex a mac jach xiboꞌ,
soc mʌꞌ irechex a chichanoꞌ.
Chichquint a worex tu ca wacsic ta worex.
14 Cax tu cotor a baꞌ ca betiquexeꞌ,
chaꞌ u yiriquechex mac bic a pacran yajquintiquex a bʌjex.
15 Bayiriꞌ xan,
a werex in wet acsaꞌorirex,
wa tu cotor u bʌjob Estéfanas,
wa robob a caj u yʌn acsob tu yorob ich u ruꞌumin Acaya.
Bayiriꞌ xan,
a werex robob rajraꞌ cu yamticob a mac a cu yacsicob tu yorob.
16 A tenoꞌ,
quin waꞌaric techex,
caꞌ a sʌjtex tu cotor mac a cu betic u beyaj a raꞌ cu beticoboꞌ.
Bayiriꞌ xan,
caꞌ a sʌjtex a mac a cu yamticob a mac a cu beyaj tiꞌ Cꞌuj.
17 Wa ber caj cꞌuchob Estéfanas yejer Fortunato yejer Acaico,
jach quiꞌjij in wor,
quij Pablo,
quireꞌ robob caj u yaꞌarob tu cotor bic tabar a betiquex,
cax mʌꞌ tiꞌ yʌnen tu yʌnechex.
18 Robob tu quiꞌquintob in wor wa ber caj u yaꞌarob ten techex,
an ten bic cu bin u quiꞌquintejob a worex wa ber jeꞌ u yaꞌaricob bic tabar a tenaꞌ tu yʌnen quin betic.
Yʌn surʌc tex mac a baxucoꞌ.
19 Tu cotor a yacsmʌnob tu yorob ich u ruꞌumin Asia,
cu tꞌʌniquechex.
Bayiriꞌ xan,
Aquila yejer u racꞌ Priscila,
cu tꞌʌniquechex.
Bayiriꞌ xan,
tu cotor a wet acsaꞌorirex a cu muchꞌquint u bʌjob quir u cꞌujinticob Cꞌuj ich yatoch Aquila yejer Priscila,
cu tꞌʌniquechex.
Jach manan cu tꞌʌnicob techex quireꞌ caj a wacsex ta worex tiꞌ Cristo.
20 Bayiriꞌ xan,
tu cotor a yacsmʌnob tu yorob teꞌ tu yʌnenaꞌ,
cu tꞌʌniquechex.
Bayiriꞌ xan,
pacran tꞌʌn a bʌjex.
21 A tenoꞌ in bʌjiriꞌ quin tsꞌibtic a jeꞌ tꞌʌnaꞌ yejer in cꞌʌb soc in tꞌʌniquechex xan.
22 Wa tiꞌ yʌn mac a mʌꞌ ju cꞌat u yajquintej Cristo,
arex u bin tu cu bin mucꞌyaj.
Cojen ic Jaj Tsꞌurirex,
seb a wuꞌur.
23 A tenoꞌ,
in jach cꞌat caꞌ u yam techex Cꞌuj an ten bic tsoy tu tꞌʌn ic Jaj Tsꞌurirex Jesucristo.
24 A tenoꞌ,
quin jach yajquintic techex quireꞌ a wacsmʌnex ta worex tiꞌ Jesucristo.