Bic tabar mac jeꞌ u riqꞌuir ich u quimirir
15
Bajeꞌrer in wet acsaꞌorirex,
a tenoꞌ in cꞌat in wʌcꞌʌs cꞌasic techex soc a wʌcꞌʌs cꞌʌꞌotiquex an ten bic caj in waꞌaraj techex uch yocꞌor u jach tsoyir u tꞌʌn Cꞌuj.
Quireꞌ caj a cꞌʌmajex aroꞌ,
bayiriꞌ xan,
jach chichij a worex tiꞌ u tꞌʌn Cꞌuj.
2 Quireꞌ aroꞌ xan,
tacaꞌanechex.
Mʌꞌ ju bin tsꞌabir a mucꞌyajex wa ca quiꞌ cʌnantiquex a baꞌ caj in waꞌaraj techex.
Chen wa mʌꞌ ta quiꞌ cʌnan ta worex,
jeroj jot tu ta wacsex ta worex.
3 A tenoꞌ,
caj in masaj techex a baꞌ caj in cꞌʌmaj tiꞌ Cꞌuj,
a baꞌ jach nojoꞌ.
Caj in waꞌaraj techex Cristo caj quimij quir u boꞌotic u boꞌorir ic siꞌpirex an ten bic caj yaꞌaraj tu tsꞌibaꞌan u tꞌʌn Cꞌuj.
4 Caj in waꞌaraj techex butꞌaꞌan u baquer ich u japnin tunich.
Jeroj,
caj riqꞌuij quir u wʌcꞌʌs cuxtar mʌnaꞌ u nup u qꞌuinin.
Baxuc tiꞌ tsꞌibaꞌan ich u tꞌʌn Cꞌuj xan.
5 Jeroj tuneꞌ,
Jesús caj u yes u bʌj soc u wʌcꞌʌs irir ten Pedro.
Jeroj tuneꞌ,
caj u wʌcꞌʌs es u bʌj soc yirir ten tu cotor u camsʌwinicob a caj u tuchiꞌtaj caꞌ xicob u tsecꞌtob u tꞌʌn,
a docejoꞌ.
6 Jeroj pachir caj irir ten a manan quinientos yet acsaꞌorirob tu muchꞌaꞌanob.
Toc jumpuriꞌ caj u yirajob Jesús.
A ray winicoboꞌ robob,
tiꞌ toy cuxaꞌan yaꞌab,
chen yʌn jun yarob xan quimenob.
7 Jeroj caj u yes u bʌj tiꞌ Jacobo,
caj tsꞌoc aroꞌ,
caj u yes u bʌj tiꞌ tu cotor mac a caj u tuchiꞌtaj caꞌ u tsecꞌtob u tꞌʌn.
8 Jach pachir tu cotor aroꞌ,
Jesús caj u yesaj u bʌj ten quir u tetiquen caꞌ in tsecꞌt u tꞌʌn an ten bic caj u tetaj u camsʌwinicob uch.
Chen yʌn mac u soꞌsoc aricob wa mʌꞌ ju tetajen Jesús a ray u qꞌuininoꞌ.
9 Mʌꞌ ja wirej,
a tenoꞌ ich a mac a yʌjtseqꞌuirob Cristo,
a tenoꞌ mʌꞌ nojeniꞌ.
Quin wuꞌyic tin wor jach joten,
chen quireꞌ tsoy tu tꞌʌn Cꞌuj,
rajiꞌ caj u tetajen soc yʌjtseqꞌuiren Cristo.
10 Chen quireꞌ tsoy tu tꞌʌn Cꞌuj a baꞌ caj u betaj ten Cꞌuj,
rajen a tenoꞌ a ten biquen bajeꞌrer.
Quireꞌ tsoy tu tꞌʌn Cꞌuj a baꞌ betaꞌb ten Cꞌuj ten,
mʌꞌ tu sʌtajiꞌ.
Mʌꞌ ja wirej,
jach manan a tenoꞌ beyanʌjen tiꞌ u beyajob tu cotor a mac a tuchiꞌtaꞌb ten Cristo quir u tsecꞌtaꞌr u tꞌʌn.
Chen aroꞌ caj in betaj yejer u mucꞌ Cꞌuj,
quireꞌ jach maman tsoy tu tꞌʌn Cꞌuj caj u betaj ten.
11 Rajen quin waꞌaric techex,
cax wa quin tsicbar a tenoꞌ,
wa cu tsicbarob a mac a tuchiꞌtaꞌb ten Cristo,
raꞌiriꞌ tꞌʌn caj in tsecꞌtajob techex,
raꞌiriꞌ xan a baꞌ ca wacsiquex ta worex a tiꞌoꞌ.
Bic tabar ic riqꞌuirex ich ij quimirirex
12 Quireꞌ caj in tsecꞌtob techex,
rajiꞌ Cristo toc ricꞌsaꞌb ten Cꞌuj ich u quimirir,
biquinin yʌn jun yarob tu yʌnechex a cu yaꞌaricob wa ju quimirir mʌꞌ ju bin ricꞌsaꞌbir ten Cꞌuj quir u wʌcꞌʌs cuxtarob?
13 Wa raꞌ taj a baꞌ cu yaꞌaricob,
aroꞌ u cꞌat yaꞌaric mʌꞌ ricꞌsaꞌb Cristo ich u quimirir.
14 Mʌꞌ ja wirej,
wa mʌꞌ ricꞌsaꞌb Cristo ich u quimirir,
jeroj tun,
mʌnaꞌ baꞌ quir in tsecꞌticob,
bayiriꞌ xan,
mʌnaꞌ baꞌ quir a wacsiquex ta worex tiꞌ.
15 Mʌꞌ ja wirej,
wa mʌꞌ tajiꞌ caꞌ ricꞌsac mac ich u quimirir,
jeroj tun,
bayiriꞌ xan,
mʌꞌ tajiꞌ wa ricꞌsaꞌb Cristo ten Cꞌuj ich u quimirir uch.
16 Quireꞌ wa mʌꞌ ju riqꞌuij mac ich u quimirir jeroj tun,
a Cristojoꞌ,
tiꞌ toy yʌn ich u quimirir.
17 Bayiriꞌ xan,
wa mʌꞌ ricꞌsaꞌb Cristo ten Cꞌuj ich u quimirir mʌꞌ baꞌwir caj a wacsajex ta worex tiꞌ Cristo,
quireꞌ mʌꞌ boꞌtaꞌb u boꞌorir a siꞌpirex.
18 Bayiriꞌ xan,
a mac a toc yacsmʌnob tu yorob tiꞌ Cristo,
a mac bajeꞌrer quimenob,
jeroj tun,
jeꞌ u bin tsꞌabir u mucꞌyajob.
19 Wa tiꞌ toy cuxaꞌanoꞌonex ich yocꞌocab,
quic pajiquex wa pachir jeꞌ u taquicoꞌonex Cristo caꞌ bin quimicoꞌonex,
chen ix tiꞌ u tusabar ten Cristo toꞌonex.
Ay quen,
jach manan otsichʌjenob ich yococab.
20 Chen jach taj Cristo caj riqꞌuij ich u quimirir.
Rajiꞌ pʌyber ich a mac a riqꞌuij ich u quimirir,
ich tu cotor mac a quimenoboꞌ.
21 An ten bic tu cotor mac,
tu yʌnxchun a baꞌ u ber tiꞌob,
rajen quij quiminex quireꞌ a baꞌ caj u betaj Adán uch.
Bayiriꞌ xan,
tu cotor mac,
jeꞌ u riqꞌuir ich u quimirir quireꞌ a baꞌ caj u betaj Cristo.
22 Quireꞌ tu cotor mac quimij,
quire a baꞌ caj u betaj Adán.
Mʌꞌ ja wirej,
rajen caj u masa u siꞌpir Adán tiꞌ tu cotor mac.
Bayiriꞌ xan,
tu cotor mac wa cu yacsic tu yor tiꞌ Cristo jeꞌ u riqꞌuir ich u quimirireꞌ.
23 A ju qꞌuininoꞌ,
raꞌ toc tetaꞌb ten Cꞌuj uch wa ber caꞌ bin ricꞌsacoꞌonex.
Mʌꞌ ja wirej,
a Cristojoꞌ,
rajiꞌ pʌyber riqꞌuij.
Jeroj caꞌ bin cꞌuchuc tu qꞌuinin cu yuꞌur Cristo,
tu cotor a mac a yacsmʌnob tu yorob tiꞌ jeꞌ u riqꞌuir ich u quimirir xan.
24 Cu tsꞌocar u xur tꞌʌn,
wa ber rajiꞌ cu bin u cꞌubic tiꞌ ic Tetex Cꞌuj a baꞌ tsꞌaꞌb u reyintej uch.
Mʌꞌ ja wirej,
a raꞌ u quininoꞌ,
jeꞌ u rucꞌsic tu cotor rey a tu cu reyinticob u winiquirob.
Jeꞌ u rucꞌsic xan,
tu cotor jach tsꞌur yejer a mac a cu beticob a baꞌ u cꞌat teꞌ ich yococab.
25 Quireꞌ Cristo caꞌ u yʌn reyintej caꞌ tac chꞌejsaꞌbir ten Cꞌuj tu cotor mac a cu pꞌacticob a tiꞌoꞌ,
soc rajiꞌ cu bin u reyintic tu cotor baꞌ.
26 Pachir tu cotor baꞌ,
jeroj tuneꞌ,
cu bin u chꞌejsic tu cotor baꞌ a quic pꞌactiquex,
raꞌ ic quimirirexoꞌ.
27 Quireꞌ,
baxuc tiꞌ tsꞌibaꞌan:
“Tu cotor baꞌ a tiꞌ yʌnoꞌ,
a Cꞌujoꞌ,
caj u tetaj,
soc rajiꞌ caꞌ reyintac ten tu cotor baꞌ,
a tiꞌ yʌn.”
Chen wa ber caj u yaꞌaraj:
“Tu cotor baꞌ a tiꞌ yʌn caꞌ reyintac”,
aroꞌ mʌꞌ ju cꞌat yaꞌarej wa Cristo cu bin u reyintej Cꞌuj.
Mʌꞌ ja wirej,
rajiꞌ caj u tsꞌaj u mucꞌ quir u reyintic tu cotor baꞌ a tiꞌ yʌn.
28 Wa ber cu bin ocar u reyinbir Cristo tu cotor baꞌ a tiꞌ yʌn,
jeroj tun,
rajiꞌ Jesús xan,
cu reyintic Cꞌuj a mac a tsꞌaꞌb u mucꞌ quir u reyintaꞌ ten tu cotor baꞌ a tiꞌ yʌn,
soc rajiꞌ ic Tetex Cꞌuj jach manan rey.
29 Bayiriꞌ in cꞌat in wʌcꞌʌs aric techex,
wa mʌꞌ ju riqꞌuir a mac a quimin,
biquinin acsaꞌb jaꞌ tu joꞌr mac quir u yamtic a mac quimen?
Biquinin,
wa yʌn acsaꞌbir jaꞌ tu joꞌr mac quireꞌ u baquer a mac xan?
30 Rajen baꞌwir quin mucꞌtic u chuquicob in pach tu cotor u qꞌuinin wa ja cu quiminoꞌ mʌꞌ ju bin ricꞌsaꞌ?
31 In wet acsaꞌorirex,
rajraꞌ quin wuꞌyic wa tabar in quinsaꞌ.
A tenoꞌ,
quin waꞌaric techex aroꞌ quireꞌ ic pacran er ic bʌjex,
quireꞌ caj ij cacsajex tij corex tiꞌ ic Jaj Tsꞌurirex Jesucristo.
32 Bajeꞌrer,
a tenoꞌ,
caj baꞌteꞌnʌjenoꞌ yejer cꞌaxir bʌcꞌ ich u cajar Efesio,
quireꞌ in jach bʌjiriꞌ in cꞌat,
baꞌwir ten wa quin betic aroꞌ wa mʌꞌ ju riqꞌuir mac ich u quimirir?
Yʌn mac cu tus tucric wa ber caꞌ bin quimic,
jeroj tsꞌoquij baꞌ,
mʌnaꞌ.
Biquinin,
mʌꞌ ju chen aꞌar:
“Cux caꞌ janacoꞌonex,
caꞌ ucꞌurnʌcoꞌonex xan,
quireꞌ tabar ij quiminex,
jaj ix tʌcoj samʌn.”
33 Mʌꞌ ja chaꞌiquex mac u tus aric techex,
quireꞌ araꞌb a mac a cu manob tu cꞌasir a cu pʌyicob u jer mac quir u yacsic u siꞌpir xan,
wa rajiꞌ ix tiꞌ cu sayʌr tu pachob.
34 Toc pꞌʌtex a baꞌ ca soꞌsoꞌ tucriquexoꞌ soc a quiꞌ tucriquex an ten bic caꞌ a yʌn betex.
Mʌꞌ ja wirej,
tiꞌ yʌn yaꞌab mac ich a cajarex Corintio mʌꞌ toy u najtajob Cꞌuj.
Aroꞌ quin waꞌaric techex soc a pʌyic a surʌquirex.
Bic tabar cu bin riqꞌuir mac ich u quimirir
35 Chen yʌn mac jeꞌ u yaꞌariqueꞌ:
“Bic tabar cu bin ricꞌsaꞌbir u quimirir soc u wʌcꞌʌs cuxtar?
Bic tabar u winquirirob wa ber caꞌ bin ricꞌsacob ten Cꞌuj ich u quimirir?”
36 A mac a cu tsicbar a baxucoꞌ,
jach chich u joꞌr.
Mʌꞌ ja wirej,
wa mʌꞌ ju quimij u winquirir a yijiroꞌ,
mʌꞌ ju jocꞌar u pixam u yijir xan.
37 U yijir a baꞌ ca pʌqꞌuiquex,
cax wa yijir trigo wa ju jer a pʌcꞌarex,
chen a baꞌ cu jocꞌar quir u chꞌijir,
u tirir tiꞌ u winquirir.
38 Chen a Cꞌujoꞌ,
cu betic a baꞌ u cꞌat,
tu cotor pʌcꞌar rajiꞌ cu cuxquintic soc u yʌntar u winquirir.
Rajen,
jujuntur pʌcꞌar a cu chꞌijir yʌn u winquirir an ten bic yʌn tiꞌ uch.
39 Bayiriꞌ xan,
tu cotor u bʌqꞌuer mʌꞌ raꞌiriꞌ,
chen u tirir tiꞌ.
Mʌꞌ ja wirej,
a winicoꞌ u tirir tiꞌ u bʌqꞌuer.
A bʌcꞌoꞌ,
u tirir tiꞌ xan.
A chꞌichꞌoꞌ u tirir tiꞌ xan.
A cʌyoꞌ u tirir tiꞌ xan.
40 U tirir tiꞌ a baꞌ yʌn ich caꞌanan xan.
Mʌꞌ quet yejer a baꞌ tiꞌ yʌn a baꞌ a teraꞌ yocꞌocab.
A baꞌ tiꞌ yʌn ich caꞌananoꞌ,
jach manan tsoy caj betaꞌb soc tiꞌ yʌn ich caꞌanan.
Bayiriꞌ xan,
a baꞌ betaꞌb soc tiꞌ yʌn ich yocꞌocab,
jach manan tsoy caj betaꞌb.
41 A ic yumoꞌ,
u tirir tiꞌ u sasirir,
bayiriꞌ xan,
ic nʌꞌ,
u tirir tiꞌ u sasirir.
Bayiriꞌ xan,
a saboꞌ,
u tirir tiꞌ u sasirir,
chen u tirir tiꞌ u sasirir tiꞌ jujuntur a saboꞌ.
42 Bayiriꞌ xan,
caꞌ bin cꞌuchuc tu qꞌuinin cu riqꞌuir mac ich u quimirir.
Wa ber caj muc u bʌqꞌuer mac,
cu toc rʌc tsꞌucur.
Chen wa ber caꞌ bin wʌcꞌʌs ricꞌsac u baqꞌuer mac mʌꞌ ju bin quimin mʌꞌ biqꞌuin.
43 Wa ber caj mucaꞌb u bʌqꞌuer mac,
jot aroꞌ.
Chen wa ber caꞌ bin ricꞌsac,
jeroj jeꞌ u jocꞌar jach manan tsoyeꞌ.
Wa ber caj mucaꞌb u baqꞌuer mac,
raꞌ mʌnaꞌ u mucꞌ a tiꞌoꞌ,
chen caꞌ bin wʌcꞌʌs ricꞌsac,
jeroj jeꞌ u tar u mucꞌ jach manan chichir u mucꞌ.
44 Wa ber caꞌ bin mucuc u baqꞌuer mac,
rajiꞌ irej an ten bic tu cotor u baqꞌuer mac a mucbir.
Chen wa ber caꞌ bin ricꞌsac quir u wʌcꞌʌs cuxtaroꞌ,
jeroj,
u tirir tiꞌ,
quireꞌ Cꞌuj caj u waysaj soc ricꞌben.
Jeꞌ u tirir tiꞌ,
tu cotor a bʌqꞌuer mac,
a tiꞌ yʌn uch,
quireꞌ a Cꞌujoꞌ,
jeꞌ u waysic soc ricꞌben u winquirir.
45 A baxucoꞌ,
caj tsꞌibtaꞌb ten a mac a tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌuj.
Rajiꞌ caj u yaꞌaraj tu cu tsꞌib:
“A Adánoꞌ,
a mac a pʌyber xiboꞌ,
a betaꞌb ten Cꞌuj caj tsꞌaꞌb u cuxtar ten Cꞌuj.”
Chen Cristo,
a mac pachir,
a rajiꞌ u tsꞌajmʌn toꞌonex ricꞌben cuxtaroꞌ.
46 Quireꞌ mʌꞌ raꞌ u yʌn batꞌan tar a ricꞌben winquiriroꞌ,
a caj tar pʌyber,
chen a raꞌ u jach winquiriroꞌ a tu yʌnx chun tu betaj,
jeroj pachir jeꞌ u tar a ricꞌben winquirireꞌ.
47 Mʌꞌ ja wirej,
a pʌyber xiboꞌ,
tiꞌ u tar tiꞌ a jeꞌ ruꞌumaꞌ,
rajiꞌ betaꞌb tiꞌ a jeꞌ ruꞌumaꞌ.
Chen a xiboꞌ a ju jeroj,
a tar u tar ich caꞌananoꞌ,
rajiꞌ Cristo.
Quireꞌ an ten bic a pʌyber xiboꞌ,
caj betaꞌb tiꞌ a jeꞌ ruꞌumaꞌ,
bayiriꞌ xan,
tu cotor mac a tiꞌ yʌn xan.
48 Mʌꞌ ja wirej,
an ten bic u winquirir tiꞌ a mac a caj tarij ich caꞌanan uch,
bayiriꞌ xan jeꞌ u yʌn tar u winquirirob a mac a jeꞌ u bin caꞌananoꞌ.
49 Quireꞌ a toꞌonex tiꞌ yʌnoꞌonex an ten bic pʌyber a xiboꞌ,
a betaꞌb ten Cꞌuj tiꞌ u noy ruꞌum,
baxuc xan,
a toꞌonexoꞌ jeꞌ ic yʌn tarex an ten bic a xiboꞌ a tarij ich caꞌananoꞌ.
50 Rajen in wet acsaꞌorirex,
quin waꞌaric wa jic winquirirex a yʌn toꞌonex bajeꞌrer,
rajiꞌ mʌꞌ cꞌuchaꞌan yor u yocar ich caꞌanan tu quic bin ic reyintex Cꞌuj.
Quireꞌ raꞌ cu bin quimin,
mʌꞌ biqꞌuin cꞌuchaꞌan yor u yocar tu mʌnaꞌ cꞌʌs baꞌ cu bin quimin.
51 A bajeꞌreraꞌ,
quin bin in waꞌaric techex a baꞌ Cꞌuj caj u tsꞌajaj in najtic a tenoꞌ,
a baꞌ mʌꞌ ju tsꞌajaj u najtic tiꞌ mʌnaꞌ mac uch.
Tu cotoroꞌonex mʌꞌ jic bin quiminex,
chen tu cotoroꞌonex cu bin cꞌʌmbir u jer ic winquirirex a ricꞌbenoꞌ.
52 Jach seb bajen jun muts a ichoꞌ,
wa ber cu bin ustaꞌbir u mascabir quir u yustaꞌr,
a rajiꞌ yʌnin Cꞌujoꞌ.
Quireꞌ wa ber cu bin ustaꞌbir u mascabir a raꞌ yʌnin Cꞌujoꞌ quir u yustaꞌr,
jeroj tun,
a mac a quimij uch,
jeꞌ u riqꞌuir toc yejer u ricꞌben u winquirirob,
a mʌꞌ ju quiminoboꞌ mʌꞌ biqꞌuin.
A ray u qꞌuinin xanoꞌ,
a toꞌonex xanoꞌ,
jeꞌ ij cꞌʌmiquex ic ricꞌben winquirirexeꞌ.
53 Quireꞌ a jeꞌ winquiriraꞌ a cu quimineꞌ,
yʌn waysaꞌbir soc mʌꞌ ju quimin.
Mʌꞌ ja wirej,
a jeꞌ ic winquirirexeꞌ jeꞌ u quimineꞌ,
rajen yʌn waysaꞌbir soc mʌꞌ ju quimin.
54 Rajen,
a jeꞌ ic winquirirex a cu bin quimin bin u caꞌ waysaꞌbir ten Cꞌuj,
soc mʌꞌ ju quimin,
soc mʌꞌ biqꞌuin cu bin quimin.
Jeroj tuneꞌ,
jeꞌ u nupꞌsic a baꞌ araꞌb ich u tꞌʌn Cꞌuj tu cu yaꞌaric:
“A ju quimiriroꞌ toc tsꞌoquij,
mʌꞌ biqꞌuin cu bin quimin mac.
55 Teꞌen mac cu bin quimin bajeꞌrer?
Teꞌen a mac yʌn bin mucbir,
tu yʌnobiꞌ?”
Baxuc caj yaꞌaraj ich u tꞌʌn Cꞌuj uch.
56 Jeroj,
wa jix tiꞌ mʌnaꞌ u siꞌpir,
jeroj xan,
mʌnaꞌ mac jeꞌ u quimin.
Bayiriꞌ xan,
wa mʌnaꞌ u tꞌʌn Moisés,
mʌꞌ ju bin esbir wa yʌn u siꞌpir mac.
57 Rajen a toꞌonexoꞌ,
quij cariquex tiꞌ Cꞌuj:
“Bayoꞌ Cꞌuj caj otsir a wirenob.”
Quireꞌ mʌꞌ ju cꞌuchur u yor toꞌonex a ij quimiriroꞌ quireꞌ a baꞌ caj u betaj Jesucristo toꞌonex.
58 Rajen in wet acsaꞌorirex,
jach pꞌis a bʌjex caꞌ sayʌquex tu pach Jesucristo.
Mʌꞌ ja pꞌʌtex u tꞌʌn Cꞌuj.
Toc betex u beyaj Cꞌuj,
quireꞌ a werex a baꞌ beyaj ca betiquex tiꞌ Cꞌuj mʌꞌ ju bin satʌr.