Cu tsicbar a baꞌ Cꞌuj caj u sijatoꞌonex quir ic beyajex tiꞌ
14
Rajen,
caj a jach pꞌis a bʌjex soc a betiquex a baꞌ u cꞌat Cꞌuj.
Caꞌ a pacran yajquint a bʌjex.
Bayiriꞌ xan,
caꞌ a jach pacht a betiquex a baꞌ u Tajꞌor u Pixam Cꞌuj,
a cu tar ich Cꞌuj,
caj u tsꞌajaj techex u mucꞌ quir a betiquex.
Chen a baꞌ jach noj,
raꞌ caꞌ ic betex an ten bic Cꞌuj cu tsꞌic toꞌonex u tucur quir ic tsicbarex a baꞌ u cꞌat Cꞌuj.
2 Quireꞌ a mac a cu tsicbar ich u tꞌʌn wa mʌnaꞌ mac cu najtic,
rajiꞌ mʌꞌ ju tsicbar tiꞌ mac,
cu chen tsicbar tiꞌ Cꞌuj.
Rajen mʌnaꞌ mac cu najtic a baꞌ cu yaꞌaric,
quireꞌ u Tajꞌor u Pixam Cꞌuj caj u tsꞌajaj tiꞌ u mucꞌ quir u tsicbar a baꞌ mʌnaꞌ mac caj u najtaj uch.
3 Chen a mac a tsꞌab ten Cꞌuj u tucur soc u tsicbar a baꞌ u cꞌat Cꞌuj.
Rajiꞌ cu tsicbar tiꞌ mac soc u yamtic tiꞌ,
tan u chichquintaꞌr yorob tiꞌ yʌniꞌ.
Tan u chichquintaꞌr yorob tu cu mucꞌyaj soc u tar u yor a tiꞌoboꞌ.
4 Mʌꞌ ja wirej,
a mac a cu tsicbar ich u tꞌʌn wa mʌꞌ najtaꞌbir,
raꞌ cu chen yamtic u bʌjiririꞌ,
chen a mac a cu tsicbar an ten bic Cꞌuj u cꞌat,
quireꞌ tsꞌaꞌb u tucur ten Cꞌuj,
raꞌ cu yamtic tu cotor a yacsmʌnob tu yorob.
5 Jach tsoy wa cꞌuchaꞌan a worex a tsicbarex ich u tꞌʌn a mʌꞌ najtaꞌbir ten mac,
chen a baꞌ jach manan in cꞌat caꞌ tsibanʌquechex a baꞌ u cꞌat Cꞌuj,
quireꞌ rajiꞌ caj u tsꞌaj u tucur techex.
Mʌꞌ ja wirej,
a baywoꞌ,
ca yamtic a wet acsaꞌorirex wa ber ca tsicbarex a baꞌ u cꞌat Cꞌuj,
quireꞌ rajiꞌ caj u tsꞌajaj techex u tucur.
Cax mʌꞌ ja tsicbarex ich u tꞌʌn a mʌꞌ najtaꞌbir.
Chen ix tiꞌ,
wa yʌn mac a tsꞌab u mucꞌ quir u yaꞌaric tiꞌ mac a baꞌ cu yaꞌaric,
a mac a cu tsicbar ich u tꞌʌn a mʌꞌ najtaꞌbir,
jach tsoy aroꞌ,
quireꞌ cu yamtic u yet acsaꞌorirob.
Rajiꞌ quet yejer a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj.
6 Rajen in wet acsaꞌorirex,
wa jix tiꞌ,
quin cꞌuchur tuꞌ yʌnechex wa caꞌ bin tsicbanʌquen techex ich u tꞌʌn a mʌꞌ najtaꞌbir,
jeꞌ wa jin yamtic techex wa mʌꞌ jin waꞌaric techex a baꞌ cu tsꞌabʌr ten Cꞌuj tiꞌ in tucur soc in tsicbar a baꞌ u cꞌat Cꞌuj?
Wa mʌꞌ jin waꞌaraj techex a baꞌ tsꞌaꞌb ten Cꞌuj tiꞌ in tucur quir in tsicbar a baꞌ u cꞌat Cꞌuj,
mʌꞌ jin camsiquechex an ten bic tiꞌ yʌn ich u tꞌʌn Cꞌuj.
7 Baxuc xan,
wa jix tiꞌ yʌn pax,
cax chur,
a cu bin u pʌxic wa cu bin chur,
chen mʌꞌ ju yʌn irej wa tsoy u jum u pax wa ju chur tsoy soc u quiꞌ yuwic mac,
wa mʌꞌ ju yirej baxucoꞌ,
cꞌas cu bin yubej mac.
8 Wa yʌn xan,
u xurub quir u yustaꞌ soc u pʌyic u winiquirob soldado caꞌ u muchꞌquint u bʌjob soc u bin u quinsob a mac a cu tarob quinsbir xan.
Chen a mac a mʌꞌ ju quiꞌ ustaj caꞌ tacob,
jeꞌ wa ju tarobeꞌ?
Mʌꞌ ju bin u muchꞌquint u bʌjob.
9 Baxuc xan techex,
wa mʌꞌ ja quiꞌ tsicbarex caꞌ u najtej mac,
jeꞌ wa ju najtej a baꞌ ca tsicbarex?
Wa chen tꞌʌn a caꞌex caꞌ bin yubej.
10 Mʌꞌ ja wirej,
a teraꞌ ich yocꞌocabaꞌ,
yʌn yaꞌab u tꞌʌnob.
Jujuntur u tꞌʌnob cu najticob a mac a yerob.
11 Wa mʌꞌ jin najtej a baꞌ u jer winic cu tsicbar,
jeroj iren a mac tanxer ruꞌum cʌjaꞌanen tiꞌ a raꞌ cu tꞌʌnoꞌ.
Rajen a raꞌ cu tsicbar tenoꞌ,
rajiꞌ irej wa tanxer winic cu tsicbar ten xan.
12 Quireꞌ tan a jach pacht a betex a baꞌ a jeꞌ a cꞌʌmiquex tiꞌ Cꞌuj,
caꞌ a jach pꞌis a bʌjex quir a cꞌatiquex tiꞌ aroꞌ,
soc a yamtiquex a wet acsaꞌorirex.
13 Rajen,
wa mac cu tsicbar ich u tꞌʌn a mʌꞌ najtaꞌbir.
Arex tiꞌ caꞌ u tꞌʌnej Cꞌuj soc rajiꞌ cu tsꞌic u najtej quir u yaꞌaric a baꞌ tan tu yaꞌaric tiꞌ yet acsaꞌorir.
14 Quireꞌ wa quin tꞌʌnic Cꞌuj ich u tꞌʌn a mʌꞌ najtaꞌbir ten mac,
bayiriꞌ mʌꞌ jin najtic a ten xanoꞌ,
rajen a baꞌ tin tꞌʌnaj Cꞌuj mʌꞌ baꞌwir tiꞌ,
quireꞌ mʌꞌ ju yamtej mac.
15 An bic quin betic tun?
Jach manan tsoy caꞌ in tꞌʌnej Cꞌuj soc in najtic,
bayiriꞌ xan,
soc in wer baꞌ quir tiꞌ.
Bayiriꞌ xan,
jeꞌ in cꞌayic a baꞌ quin najtic yejer a baꞌ in wer.
16 Wa ber ca chen tsicbarex ich u tꞌʌn a mʌꞌ najtaꞌbir ten mac,
tan a waꞌaric:
“Bayoꞌ Cꞌuj.”
Bic tabar a mac a mʌꞌ tsꞌaꞌb u mucꞌ quir u najt a baꞌ ca tsicbarex jeꞌ wa ju cꞌuchur yor yaꞌaric:
“Amén”,
tu ca waꞌariquex:
“Bayoꞌ Cꞌuj”?
17 Cax a techexoꞌ,
tan a tsicbarex ich u tꞌʌn a mʌꞌ najtaꞌbir ten u jer mac a tiꞌ yʌn tu ca muchꞌquint a bʌjex quir a wuꞌyiquex u tꞌʌn Cꞌuj.
Tan a quiꞌ ariquex “Bayoꞌ Cꞌuj.”
Mʌꞌ ja yamtiquex a tiꞌoꞌ quireꞌ mʌꞌ ju najt a baꞌ ca tsicbarex.
18 A tenoꞌ quin waꞌaric:
“Bayoꞌ Cꞌuj”,
quireꞌ a tenoꞌ jach yaꞌab quin tsicbar ich u tꞌʌn a mʌꞌ najtaꞌbir chen cax jujuntur tu cotorechex.
19 Chen wa ber quin muchꞌquintic in bʌj yejer in wet acsaꞌorirob tu cu yubicob u tꞌʌn Cꞌuj.
Jach manan tsoy caꞌ tsicbanʌquen yejer cinco tꞌʌn a tan u najtic mac,
cax caꞌ tsicbanʌquen yejer diez mil tꞌʌn ich u tꞌʌn a mʌꞌ tan u najtaꞌr ten mac.
20 In wet acsaꞌorirex,
mʌꞌ ja chen tucriquex an ten bic a chichanoꞌ,
quireꞌ robob mʌꞌ ju najtob baꞌ.
Bayiriꞌ xan,
mʌꞌ ja betiquex a baꞌ jach cꞌasoꞌ,
chen cʌnex a chichanoꞌ,
quireꞌ robob mʌꞌ toy u betob a baꞌ cꞌasoꞌ.
Chen caꞌ a najtex baꞌ an ten bic mac toc chꞌijij.
21 Mʌꞌ ja wirej,
tiꞌ tsꞌibaꞌan ich u tꞌʌn Cꞌuj uch tu cu yaꞌaric:
“Jeꞌ in tsicbar tiꞌ a ray macoꞌ ich u tꞌʌn wa mʌꞌ ju najtob.
Jeꞌ in tsicbar tiꞌob ich u tꞌʌn a mac a tanxer cʌjaꞌanob,
chen mʌꞌ ju bin yubob in tꞌʌn cax baxuc quin waꞌaric tiꞌob.”
Cax baxuc cu yaꞌaric ich u tꞌʌn Cꞌuj uch.
22 Rajen wa ber Cꞌuj cu cꞌʌnic mac caꞌ tsꞌicbanʌc tiꞌ u tꞌʌn a mʌꞌ najtaꞌbir u tꞌʌn.
A jeꞌ tꞌʌnaꞌ quir u tsicbar tiꞌ a mac a mʌꞌ yacsmʌnob tu yorob quir u yesaꞌ tiꞌob bin u caꞌob ʌcʌtan tiꞌ Cꞌuj.
Mʌꞌ rajiꞌ tiꞌ a tu yacsajob tu yorob.
Chen a mac a tsꞌab u tucur ten Cꞌuj quir u tsicbar a baꞌ u cꞌat Cꞌuj,
raꞌ cu bin u yamtic a mac a yacsmʌnob tu yorob,
mʌꞌ tiꞌ a mac a mʌꞌ yerob Cꞌuj.
23 Wa tiꞌ yʌn tu cotor a yacsmʌnob tu yorob tu cu naj muchꞌquinticob u bʌjob quir yubicob u tꞌʌn Cꞌuj,
bayiriꞌ xan,
tu cotor mac a cu tsicbar,
cu chen tsicbar ich u tꞌʌn a mʌꞌ najtaꞌbir.
Wa jix tiꞌ cu yocar mac a mʌꞌ tan u najtic aroꞌ,
wa bayiriꞌ xan cu yocar u jer mac,
a mʌꞌ yer Cꞌuj,
baꞌ cu bin u yaꞌaricob?
Mʌꞌ wa,
jeꞌ u tucricob jach rocochʌjechex?
24 Chen wa tu cotor a mac a cu tsicbarob,
cu tsicbarob quireꞌ tsꞌaꞌb u tucur ten Cꞌuj quir u tsicbarob a baꞌ u cꞌat Cꞌuj.
Jeroj cax cu yocar tu ca muchꞌquint a bʌjex quir a wuꞌyiquex u tꞌʌn Cꞌuj a mac a mʌꞌ yer Cꞌuj,
wa mac a mʌꞌ ju najtic tu cotor baꞌ.
Chen wa ber cu yubic aroꞌ,
jeꞌ u cꞌasaꞌr tiꞌ wa yʌn u siꞌpir.
Jeroj tun,
jeꞌ u yubic tu yor a baꞌ cꞌasir caj u betaj uch.
25 Jeroj tun,
jeꞌ u cꞌʌꞌotic a baꞌ caj u betaj uch.
Jeroj tun,
jeꞌ u xontar quir u cꞌujintic Cꞌuj,
tan u toc aric wa jach taj tiꞌ yʌn Cꞌuj tu yʌnechex.
Bic tabar caꞌ a cꞌujintex Cꞌuj
26 Yʌn baꞌ quiriꞌ yaꞌab u jer caꞌ in waꞌaretechex in wet acsaꞌorirex.
Wa ber caꞌ bin a muchꞌquint a bʌjex quir a wuꞌyiquex u tꞌʌn Cꞌuj,
yʌn mac,
jeꞌ u cꞌay,
yʌn u jereꞌ jeꞌ u camsiquechex,
yʌn u jereꞌ,
jeꞌ u yaꞌaric a baꞌ tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj soc a werex.
Yʌn u jereꞌ,
jeꞌ u tsicbar ich u jer tꞌʌn wa rajiꞌ mʌꞌ yeriꞌ.
Yʌn u jereꞌ,
jeꞌ u yaꞌaric tiꞌ u yet acsaꞌorirob a baꞌ caj u yaꞌaraj a mac a tan tu tsicbar ich u jer tꞌʌn wa rajiꞌ mʌꞌ yeriꞌ.
Caꞌ a betex tu cotor aroꞌ soc cꞌuchaꞌan a worex a yamtiquex tu cotor mac.
27 Wa tiꞌ yʌn mac a cu tsicbar ich u jer tꞌʌn wa rajiꞌ mʌꞌ yeriꞌ,
arex caꞌ tsicbanʌc,
cax wa yʌn dos wa tres u cꞌat u tsicbarob xan.
Jariꞌ ar u tar tu pach a pʌyber tsicbanʌjij hasta jujuntur cu tsꞌocar u tsicbarob.
Arex tiꞌ u jer mac,
caꞌ u toc arej baꞌ cu yaꞌaricob a tsicbanʌjob ich u jer tꞌʌn,
a mʌꞌ yerob soc yerob u yet acsaꞌorirob.
28 Wa mʌnaꞌ mac tiꞌ yʌn quir u toc aric a baꞌ tsicbajnʌjij mac sam,
jeroj tun,
jach manan tsoy tiꞌ wa rajiꞌ caꞌ u yʌn mʌc u chiꞌ.
Arex tiꞌ mʌꞌ ju yʌn tsicbar tu cu muchꞌquinticob u bʌjob quir u yubicob u tꞌʌn Cꞌuj,
chen arex tiꞌ caꞌ tsicbanʌc tiꞌ Cꞌuj ich u jer u tꞌʌn,
wa rajiꞌ mʌꞌ yeriꞌ quir u yamtic u bʌjiriꞌ,
chen mʌꞌ tu cu cꞌujintic Cꞌuj.
29 Bayiriꞌ xan,
a mac a cu tsicbar quireꞌ tsꞌaꞌb u tucur ten Cꞌuj quir u yaꞌaric a baꞌ u cꞌat Cꞌuj.
Arex tiꞌ wa chen dos wa tres cu tsicbarob soc u jer mac a tiꞌ yʌnob cu tucricob tub u tar u tꞌʌn wa cu tar ich Cꞌuj wa mʌꞌ tiꞌ u tar ich Cꞌuj.
30 Chen wa tiꞌ yʌn mac tu ca cꞌujtinquex Cꞌuj,
a curucbaroꞌ,
wa Cꞌuj caj u tsꞌajaj u tucur quir u tsicbar a baꞌ u cꞌat Cꞌuj,
jeroj chaꞌex u tsicbar techex.
Arex tiꞌ mac a tiꞌ toy cu tsicbar caꞌ u jamach pꞌʌt u tsicbar.
31 A baxucoꞌ,
a techexoꞌ,
jeꞌ u cꞌuchur a worex a tsicbarex jujunturechex,
caꞌ bin cꞌuchuc ta qꞌuinex a baꞌ tsꞌaꞌb ten Cꞌuj ta tucurex quir a tsicbarex a baꞌ u cꞌat Cꞌuj soc tu cotor mac a tiꞌ yʌn tu ca cꞌujintiquex Cꞌuj jeꞌ u bin u cʌnicob.
Bayiriꞌ,
soc a rʌc chichquintiquex u yorob a wet acsaꞌorirex.
32 Quireꞌ tu cotor a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj,
yʌn caꞌ u picꞌ u bʌj soc caꞌ tsicbanʌc u jer,
cax wa ber u cꞌat Cꞌuj.
33 Quireꞌ Cꞌuj mʌꞌ ju cꞌat yiric mac xaxacaꞌan u tucur tu ca cꞌujintiquex Cꞌuj,
rajiꞌ u jach cꞌat yirej quet a worex.
A baxucoꞌ,
caꞌ u yʌn betob tu cotorob tu ca muchꞌquint a bʌjex quir a wuꞌyiquex u tꞌʌn Cꞌuj,
a mac a yacsmʌnob tu yorob.
34 A xquicoꞌ,
caꞌ u yʌn mʌc u chiꞌ wa ber cu muchꞌquinticob u bʌjob quir u yubicob u tꞌʌn Cꞌuj,
quireꞌ mʌꞌ tsoy u tsicbar quireꞌ ich u tꞌʌn Moisés cu yaꞌaric:
“Mʌꞌ ju ocar xquic tsꞌurir.”
Baxuc cu yaꞌaric Moisés uch.
35 Wa ju cꞌat u yaꞌaricob baꞌ,
quireꞌ mʌꞌ ju najtobiꞌ,
ar u cꞌatob tiꞌ u mam caꞌ bin uruc tu yatoch.
Quireꞌ a xquicoꞌ cu suractic mac wa cu tsicbarob tu cu muchꞌquint u bʌjob a yacsmʌnob tu yorob quir yubicob u tꞌʌn Cꞌuj.
36 Mʌꞌ ja chen tucriquex wa cꞌuchaꞌan a worex a bʌjiririꞌex a tetiquex a baꞌ cꞌuchaꞌan a worex a betex.
Quireꞌ u tꞌʌn Cꞌuj mʌꞌ pʌyber cꞌuchij techex.
Mʌꞌ chen techex a wacsmʌnex ta worex.
37 Wa tiꞌ yʌn mac tu yʌnechex a cu tucric wa rajiꞌ tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj,
wa tiꞌ yʌn u jer cu yaꞌaric tsꞌaꞌb u mucꞌ ten Cꞌuj quir u betic u beyaj Cꞌuj,
jeroj tun,
caꞌ u najtej a baꞌ caj in tsꞌibtaj tiꞌ quireꞌ,
jach taj Cꞌuj caj u yaꞌaraj ten.
38 Wa mʌꞌ ju najtaj quireꞌ mʌꞌ ju cꞌat,
chaꞌex tu junan quireꞌ Cꞌuj yer.
39 Rajen in wet acsaꞌorirex,
yʌn jach pꞌis a bʌjex quir a tsicbarex an ten bic Cꞌuj u cꞌat quireꞌ tsꞌaꞌb a tucurex ten Cꞌuj a techexoꞌ.
Bayiriꞌ xan,
mʌꞌ ja yʌn mʌꞌquic u ber a mac a ju cꞌat u tsicbar ich u tꞌʌn wa rajiꞌ mʌꞌ yeriꞌ.
40 Chen a techexoꞌ,
yʌn betex tu cotor yʌn betbir,
a jach tsoyoꞌ.
Yʌn betex jujuntur an ten bic toc araꞌan techex.