Bic tabar caꞌ ic yajquintex mac
13
Wa tin cꞌʌmaj Cꞌuj u mucꞌ quir in tsicbar ich u tꞌʌn u jer mac,
cax u tsꞌa ten u mucꞌ quir in tsicbar an ten bic u yʌjmasir u tꞌʌn Cꞌuj cu tsicbar,
chen mʌꞌ jin yajquintic mac,
an ten bic Cꞌuj u cꞌat.
A baꞌ quin betiqueꞌ jot ʌcʌtan u wich Cꞌuj.
2 Wa yʌn ten u mucꞌ quir in tsicbar a baꞌ Cꞌuj cu yaꞌaric.
Bayiriꞌ xan,
wa yʌn ten u mucꞌ quir in najtic a baꞌ cu tar ich Cꞌuj,
a mʌꞌ najtaꞌbir uch.
Bayiriꞌ,
wa yʌn ten u mucꞌ quir in najtic tu cotor baꞌ soc ij querex.
Bayiriꞌ xan,
wa tin cꞌʌmaj u mucꞌ Cꞌuj soc jach manan taj caj in wacsaj tin wor,
mʌꞌ ju pec in wor chichin soc cꞌuchaꞌan in wor,
caꞌ in waꞌarej tiꞌ wits:
“Caꞌ xiquech”,
jeroj cu quibic in tꞌʌn,
cu bin.
Chen wa mʌꞌ jin yajquintic mac an ten bic Cꞌuj u cꞌat,
jach jot a tenoꞌ.
3 Wa quin rʌc jʌsic tu cotor in baꞌtac quir in tsꞌic tiꞌ mac jach otsichʌjij.
Bayiriꞌ,
wa quin cꞌubic in winquirir quir u tocꞌar ich cꞌacꞌ.
Chen wa mʌꞌ jin yajquintej mac an ten bic Cꞌuj u cꞌat,
a raꞌ caj in betajoꞌ,
mʌꞌ ju yam ten.
4 Quireꞌ a mac a cu yajquintic u jer mac an ten bic Cꞌuj u cꞌat,
rajiꞌ nemʌꞌ biquiꞌ,
jach tsoy yor xan.
A mac a cu yajquintic u jer mac an ten bic Cꞌuj u cꞌat,
rajiꞌ mʌꞌ ju tsꞌictar,
quireꞌ cax cu yiric tu cotor mac yʌn tiꞌ,
chen u bʌjiriꞌ mʌnaꞌ tiꞌ.
Mʌꞌ ju tucrej u bʌjiriꞌ wa jach noj,
mʌꞌ ju tucrej tu yor wa carem.
5 A mac a cu yajquintic u jer mac an ten bic Cꞌuj u cꞌat,
rajiꞌ cu surʌctic u racꞌob,
mʌꞌ ju chen tucr u nonoj bʌjiriꞌ,
mʌꞌ ju tsꞌictar,
mʌꞌ ju yajtar u yor quireꞌ a cu betaꞌ cꞌas tiꞌ.
6 A mac a cu yajquintic u jer mac an ten bic Cꞌuj u cꞌat,
rajiꞌ mʌꞌ ju quiꞌtar yoriꞌ quireꞌ a caj u yiraj a manob tu cꞌasir,
cu chen quiꞌquintic yor quireꞌ a mac cu yiric a ju manob tu tsoyir.
7 Mac a cu yajquintic u jer mac,
cu mucꞌtic tu cotor baꞌ tiꞌ.
Mʌꞌ ju yaꞌaric baꞌ tiꞌ mac.
Rajiꞌ,
tsꞌajaꞌan yor u quibic a baꞌ jach tsoy tiꞌ mac.
Bayiriꞌ,
cu pajic a baꞌ jach tsoy tiꞌ mac xan,
cax robob acaꞌan tu siꞌpirob uch.
A mac a cu yajquintic mac cu mucꞌtic baꞌ mʌꞌ ju wʌcꞌʌs tupsej yor.
8 Rajen,
mʌꞌ ju cꞌuchur tu qꞌuinin wa ber caꞌ ic yʌn pꞌʌt ic yajquintiquex mac,
mʌꞌ biqꞌuin.
Quireꞌ rajraꞌ caj ic yajquintex mac.
Chen a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj,
raꞌ cu bin tsꞌocar a tiꞌoꞌ.
Baxuc a mac a tu cꞌʌm u mucꞌ tiꞌ Cꞌuj quir u tsicbar ich u jer tꞌʌn,
a rajiꞌ mʌꞌ yeriꞌ,
raꞌ cu bin tsꞌocar xan.
Baxuc a mac a tu cꞌʌm u mucꞌ tiꞌ Cꞌuj soc yer tu cotor baꞌ a tiꞌ yʌn,
raꞌ cu bin tsꞌocar xan.
9 Quireꞌ a baꞌ ij querex bajeꞌrer,
bayiriꞌ xan,
a baꞌ quic tsicbarex an ten bic Cꞌuj cu yaꞌaric,
mʌꞌ toy ij quiꞌ rʌc najtexiꞌ.
10 Chen caꞌ bin cꞌuchuc tu qꞌuinin u caꞌ bin u nupꞌsej tu cotor baꞌ,
a ray u qꞌuininoꞌ a tu cotor baroꞌ,
jeꞌ ic rʌc najtiquexeꞌ,
mʌꞌ ju tꞌirir tiꞌ a baꞌ mʌꞌ jic najtiquexeꞌ.
11 Wa ber chichanen uch,
quin tsicbar an ten bic a chichan cu tsicbar.
A uchoꞌ,
caj in tucraj an ten bic a chichan cu tucric.
Bayiriꞌ xan,
caj in najtaj baꞌ an ten bic a chichan cu najtic baꞌ.
Chen wa ber caj chꞌijen a tenoꞌ jach xiben,
jeroj caj in pꞌʌtaj baꞌ nanij caj in betaj tin chichanin.
12 Chen bajeꞌrer,
quij quiriquex irej wa toꞌonex quic pʌctiquex ich nen,
tic chen cay irex,
chen caꞌ bin cꞌuchuc tu qꞌuinin,
jeroj,
jach taj quic bin ij quirex.
Bajejer,
mʌꞌ toy in rʌc najtej tu cotor baꞌ,
chen caꞌ bin cꞌuchuc tu qꞌuinin,
jeꞌ in rʌc najtic tu cotor baꞌ an ten bic Cꞌuj yeren a tenoꞌ.
13 Chen tiꞌ yʌn baꞌ cu bin pꞌatʌr munt qꞌuin,
yʌn tres.
Tuririꞌ,
tuj ij cacsex tij corex tiꞌ Cꞌuj,
munt qꞌuin cu pꞌatʌr aroꞌ.
U jer baꞌ,
cu bin pꞌatʌr munt qꞌuin,
a baꞌ quic pajiquex caꞌ tac.
U jer baꞌ,
a cu bin pꞌatʌr munt qꞌuin,
caꞌ ic yajquintex mac an ten bic Cꞌuj u cꞌat.
Chen ich a ray tresoꞌ,
yʌn tuririꞌ jach manan tsoy,
caꞌ ic yajquintex u jer mac an ten bic Cꞌuj u cꞌat.