A baꞌ cu tsꞌic toꞌonex u Tajꞌor u Pixam Cꞌuj soc ic beyajex tiꞌ Cꞌuj
12
Rajen in wet acsaꞌorirex,
a tenoꞌ,
in cꞌat in wiriquex a najtex a baꞌ u Tajꞌor u Pixam Cꞌuj caj u sijaj toꞌonex a jujunturoꞌonex,
soc cꞌuchaꞌan ij corex ij querex bic tabar ic beyajex tiꞌ Cꞌuj.
2 Quireꞌ a raꞌ u qꞌuinin uchoꞌ,
mʌꞌ toy a werex Cꞌuj uch,
a techexoꞌ,
irechex mac satʌr u caꞌob,
quireꞌ caj manechex ich tu cotor u ruꞌumin tan a cꞌujintiquex u tus rʌquir cꞌuj uch.
3 Rajen,
a tenoꞌ,
in cꞌat a najtex wa mac yʌn u Tajꞌor u Pixam Cꞌuj tu pixam,
rajiꞌ mʌꞌ ju yaꞌarej cꞌas tiꞌ Jesús.
Bayiriꞌ xan,
mʌnaꞌ mac cuchaꞌan yor yaꞌaric:
“A Jesúsoꞌ,
rajiꞌ in Jaj Tsꞌurir jach jaj.”
Wa mʌꞌ tsꞌaꞌb u tucur ten u Tajꞌor u Pixam Cꞌuj tiꞌ.
4 Bajeꞌrer,
quin tsicbar techex tiꞌ u beyaj ic Tetex Cꞌuj.
Jujunturoꞌonex,
tij cꞌʌmajex baꞌ quir ic betiquex,
chen u tirir tiꞌ baꞌ quic betiquex.
Chen a Tajꞌor u Pixam Cꞌuj raꞌiriꞌ tiꞌ,
rajen rajiꞌ,
cu tsꞌic tiꞌ jujunturoꞌonex a baꞌ caꞌ ic betex.
5 Rajen tu cotor mac a cu betic u beyaj Cꞌuj,
robob u tirir tiꞌ u beyajob,
chen a baꞌ u beyaj cu beticob,
raꞌ u beyajob tiꞌ a raꞌiriꞌ u Tetob Cꞌuj.
6 Bayiriꞌ xan,
a mun robob u beyajob u tirir tiꞌ a baꞌ tu cꞌʌmob,
jujuntur quir u beticob,
a raꞌiriꞌ u Tetob Cꞌuj cu yamtic jujunturiꞌ yejer u beyaj a baꞌ caꞌ u betej.
7 Rajen,
a baꞌ tsꞌaꞌb ten u Tajꞌor u Pixam Cꞌuj jujunturoꞌonex quir ic betiquex,
raꞌ caj tsꞌab toꞌonex quir ic yamtiquex tu cotor mac.
8 Quireꞌ u Tajꞌor u Pixam Cꞌuj caj u tsꞌaj u jach er tiꞌ mac soc u tsicbar an ten bic Cꞌuj caj yaꞌaraj tiꞌ.
A raꞌiriꞌ u Tajꞌor u Pixam Cꞌuj caj u tsꞌaja tiꞌ u jer mac soc caꞌ u najtej bic tabar u camsic mac.
9 Baxuc xan,
a raꞌiriꞌ u Tajꞌor u Pixam Cꞌuj cu tsꞌic tiꞌ u jer mac u quiꞌ acsic tu yor soc mʌꞌ ju pec yor.
Raꞌiriꞌ u Tajꞌor u Pixam Cꞌuj cu tsꞌic tiꞌ u jer mac u mucꞌ quir u jawsic mac.
10 Baxuc xan,
a raꞌiriꞌ u Tajꞌor u Pixam Cꞌuj cu tsꞌic u jer mac u mucꞌ quir u betic jach carem beyaj.
Tiꞌ u jer mac tsꞌab u tucur quir u tsicbar a baꞌ u cꞌat Cꞌuj.
Tiꞌ u jer mac Cꞌuj cu tsꞌic u mucꞌ soc yer mac a cu jach beyaj tiꞌ Cꞌuj,
tsꞌab u mucꞌ soc yer mac a cu tus aric u tus beyaj tiꞌ Cꞌuj.
Tiꞌ u jer mac Cꞌuj cu tsꞌic u mucꞌ quir u tsicbar ich u jer tꞌʌn a mʌꞌ yer.
Tiꞌ u jer mac cu tsꞌic u mucꞌ soc yaꞌaric a baꞌ cu yaꞌaric u jer mac a mʌꞌ ju najtaꞌr ten mac.
11 Chen tu cotor aroꞌ,
raꞌiriꞌ u Tajꞌor u Pixam Cꞌuj,
a cu tar ich Cꞌuj,
rajiꞌ cu betic an ten bic u bʌjiriꞌ u cꞌat caꞌ u tsꞌa tiꞌ jujuntur baꞌ quir u betic,
chen u tirir tiꞌeꞌ.
Cax tuririꞌ ic winquirirex chen yaꞌab u xotꞌor ic winquirirex
12 Mʌꞌ ja wirej,
an ten bic ij winquirirex tuririꞌ yʌn,
chen yaꞌab u xotꞌor ich ij winquirirex,
chen tuririꞌ ic winquirirex.
Baxuc xan,
ic Jaj Tsꞌurirex Jesucristo,
rajiꞌ pꞌeriꞌchʌjij yejer a mac a yacsmʌnob tu yorob tiꞌ Cristo.
13 Tu cotoroꞌonex,
a raꞌiriꞌ u Tajꞌor u Pixam Cꞌuj,
a cu tar ich Cꞌuj,
rajiꞌ caj u pʌcteꞌquin toꞌonex soc quetoꞌonex yejer soc pꞌeriꞌoꞌonex yejer,
an ten bic ij winquirirex,
cax wa ju winiquirob judío,
cax wa ju winiquirob griego,
cax wa mac a yʌn u tsꞌurir,
cax wa mac a ju bʌjiririꞌ u tsꞌurir.
Mʌꞌ ja wirej,
jujunturoꞌonex tic jach cꞌʌmex a raꞌiriꞌ u Tajꞌor u Pixam Cꞌuj,
a cu tar ich Cꞌuj.
14 Mʌꞌ ja wirej,
ic winquirirex mʌꞌ chen tuririꞌ u xotꞌor,
chen ic winquirirex rajiꞌ caj betaꞌb yaꞌab u xotꞌor.
15 Wa jix tiꞌ,
ij coc cꞌuchaꞌan yor u tsicbar,
tan yaꞌaric:
“Quireꞌ a tenoꞌ,
mʌꞌ cꞌʌbeniꞌ,
quij,
rajen mʌꞌ ten u xotꞌor ic winquirir”,
quij.
Baxuc cu tus aꞌaric ij coc.
Cax cu tus aꞌaric aroꞌ,
chen tiꞌ toy yʌn ich ic winquirir.
16 Wa jix tiꞌ,
ic xiquin cuchaꞌan yor u tsicbar,
tan yaꞌaric:
“Quireꞌ a tenoꞌ,
mʌꞌ ichen,
rajen bajeꞌrer,
mʌꞌ xotꞌor ic winquirir.”
Baxuc cu yaꞌaric ij quich.
Cax cu yaꞌaric aroꞌ,
chen tiꞌ toy yʌn ich ic winquirir.
17 Wa tu cotor ic winquirirex chen ij quich,
tu quij cuyic tꞌʌn?
Wa jix tiꞌ tu cotor ic winquirirex chen ic xiquin.
Tu quij cuwiquex a baꞌ yʌn u boc xan?
18 Chen a Cꞌujoꞌ,
caj u tsꞌajaj a jeꞌ ic winquiriraꞌ jujuntur u xotꞌor an ten bic u cꞌat.
19 Bajeꞌrer,
wa jix tiꞌ,
robob tu cotor chen tuririꞌ u xotꞌor,
jeroj mʌnaꞌ ic winquirirex.
20 Chen u tajireꞌ,
yʌn yaꞌab u xotꞌor ich ic winquirirex,
chen toc tuririꞌ ic winquirirex.
21 Rajen,
ij quichoꞌ,
mʌꞌ cꞌuchaꞌan yor yaꞌaric tiꞌ a ij cꞌʌboꞌ:
“Mʌꞌ baꞌwir tech ten,
quij yaꞌaric a ij quichoꞌ.”
Baxuc a joꞌroꞌ,
mʌꞌ cꞌuchaꞌan yor yaꞌaric tiꞌ a yocoꞌ:
“Mʌꞌ baꞌwir tech ten,
quij yaꞌaric tiꞌ.”
22 Aroꞌ mʌꞌ tajiꞌ,
quireꞌ a baꞌ a quij quiriquex,
a tiꞌ yʌn ich ic winquirirex,
a mʌnaꞌ u mucꞌ tiꞌ,
aroꞌ jach manan ij cꞌatex tiꞌ.
23 A baꞌ quij quiriquex,
a tiꞌ yʌn ich ic winquirirex,
a quic tucriquex mʌꞌ coꞌojoꞌ tij quichex.
Raꞌ quic buquintiquex yejer a baꞌ jach manan tsoyir.
Bayiriꞌ xan,
quij cujintiquex xan,
irej wa jach manan tsoy.
Bayiriꞌ xan,
a baꞌ quij quiriquex,
a tiꞌ yʌn ich ic winquirirex,
a quic tucriquex mʌꞌ tsoy tiꞌ ij quichex,
quireꞌ quic chꞌic suraquirex tiꞌ.
Chen a toꞌonexoꞌ jach manan quic tsoyquintiquexiꞌ soc mʌꞌ yirir ten mac.
24 Chen u xotꞌor ic winquirirex a baꞌ quic tucriquex jach tsoy tiꞌ ij quichex,
robob mʌꞌ baꞌwir quic betiquex soc jach manan tsoy tu wich mac.
Chen Cꞌuj,
caj u chen quetquint ic winquirirex an ten bic u cꞌat soc ic surʌctiquex ic winquirirex,
tan ij quiꞌ cʌnantiquex tiꞌ cax mʌꞌ ne noj quic tucriquex.
25 Baxuc Cꞌuj caj u betaj soc mʌꞌ chʌcaꞌan yiric wa yʌn tutur xotꞌor ich ic winquirirex jach tsoy ij quiriquex chen u jer u yet xotꞌor ich ic winquirirex mʌꞌ tsoy ij quiriquex.
Cꞌuj caj u chen bet ic winquirirex soc pꞌeriꞌ quic surʌctic ic winquirirex.
26 Rajen wa yʌn tutur u xotꞌor ich ic winquirirex a cu mucꞌyaj,
jeroj tu cotor u xotꞌor ic winquirirex cu yubic yaj xan.
Bayiriꞌ xan wa jach tsoy u xotꞌor ic winquirirex,
jeroj,
tu cotor u yet xotꞌor pꞌeriꞌ quiꞌ yorob xan.
27 Bajeꞌrer tun,
tu cotorechex u winquirirechex Cristo,
tutur u xotꞌorechex u winquirirechex Cristo.
28 A baywoꞌ,
Cꞌuj caj u tetaj jun yarob ich a mac a yacsmʌnob tu yorob.
Jeroj,
caj u tetaj mac a caj u yʌn tuchiꞌtaj,
raꞌ yʌjꞌirob Cristo.
Jeroj,
caj u tetaj mac quir u tsꞌabʌr u tucur a tiꞌoboꞌ,
quir u tsicbarob a baꞌ u cꞌat Cꞌuj.
Jeroj,
caj u tetaj mac a cu camsicob u tꞌʌn Cꞌuj.
Jeroj,
caj u tetaj mac a cu beticob carem beyajob.
Jeroj caj u tetaj mac a cu jawsic a yajoꞌ.
Jeroj,
caj u tetaj mac a cu pʌyic u berob u beyaj u jer mac.
Jeroj caj u tetaj mac a yer u tsicbar ich u tꞌʌn u jer mac.
29 Arex ten baꞌ ca tucriquex bajeꞌrer.
Rʌc tetaꞌb wa caꞌ xicob an ten bic yʌjtseqꞌuirob tꞌʌn Cristo?
Mʌꞌ.
Rʌc tetaꞌb soc tsꞌabʌr u tucur tiꞌob quir u tsicbarob a baꞌ u cꞌat Cꞌuj?
Mʌꞌ.
Rʌc tetaꞌb wa soc u camsicob mac?
Mʌꞌ.
Rʌc tetaꞌb wa quir u beticob carem beyaj?
Mʌꞌ.
30 Rʌc tetaꞌb wa quir u jawsic u yajir mac?
Mʌꞌ.
Rʌc tetaꞌb wa quir u tsicbar ich u jer tꞌʌn a mʌꞌ rajiꞌ yeriꞌ?
Mʌꞌ.
Rʌc tetaꞌb wa quir u yaꞌaricob baꞌ caj u najtaj tiꞌ,
a cu tsicbar ich u jer u tꞌʌn a rajiꞌ mʌꞌ yeriꞌ?
Mʌꞌ.
31 Rajen yʌn cꞌatex tiꞌ Cꞌuj a baꞌ jach manan noj quir u tsꞌabʌr techex.
Chen bajeꞌrer,
bin in caꞌ in waꞌarej techex u jer baꞌ jach manan tsoy quir a jach cʌniquex a betiquexiꞌ.