U tꞌʌn ten Pablo tiꞌ a baꞌ caj u betaj Cristo caj quimij ich cruz
2
Caj taren uch tu yʌnechex,
quir in tsecꞌtic techex in wet acsaꞌorirex.
Caj in tsecꞌtaj u tajir u tꞌʌn Cꞌuj.
Mʌꞌ jin tsecꞌtaj an ten bic mac u jach er u tsecꞌtic,
mʌꞌ yejer u tꞌʌn a mac a ju jach neꞌer tsicbar.
2 A tenoꞌ,
caj in pꞌisaj in bʌj caꞌ in chen camsechex tiꞌ Cristo,
soc a werex biquinin caj quimij ich u cruz.
Rajen mʌꞌ taren irej mac a ju neꞌer bareꞌ.
3 Caj in tsecꞌtaj techex,
mʌꞌ jach tiꞌ yʌn in wor,
quin babacʌncʌr,
quireꞌ jach sajquen mʌꞌ ja wacsex ta worex tiꞌ u tꞌʌn Cꞌuj.
4 Barej caj tsicbanʌjen techex u jach tsoyir u tꞌʌn Cꞌuj tuj in tsecꞌtaj techex.
Mʌꞌ ja wirej,
mʌꞌ jin cꞌʌnaj tꞌʌn iren a mac a caj u neꞌer tꞌʌn.
Chen in cꞌʌnaj tꞌʌn a tu tsꞌaja ten u Tajꞌor u Pixam Cꞌuj ten,
rajen caj a wacsex ta worex,
quireꞌ raꞌ u mucꞌ Cꞌuj.
5 Rajen caj a wacsex ta worex tiꞌ u tꞌʌn Cꞌuj caj a quibex,
quireꞌ rajiꞌ u Tajꞌor u Pixam Cꞌuj.
Mʌꞌ ja wacsex ta worex quireꞌ u tꞌʌn mac,
a ju neꞌer tꞌʌn.
Chen u Tajꞌor u Pixam Cꞌuj cu tsꞌic ij querex Cꞌuj
6 Chen a tenoꞌ,
wa ber quin tsicbar tiꞌ a mac a chich yor tiꞌ u tꞌʌn Cꞌuj,
a ray u qꞌuininoꞌ quin tsicbar raꞌ u jach er tꞌʌnoꞌ.
Chen a ray tꞌʌnoꞌ,
mʌꞌ raꞌ u tꞌʌnoꞌ a cu tar teꞌ ich yocꞌocab,
chen tiꞌ u tar caꞌanan a ray tꞌʌnoꞌ.
A ray tꞌʌnoꞌ mʌꞌ u tiꞌ u tar ich u jach tsꞌurir,
a cu tsꞌurinticob a mac a tiꞌ ich yʌnob yocꞌocab,
quireꞌ jeꞌ u chꞌejar a ray tꞌʌnoꞌ,
cax bajeꞌrer tan u chꞌejaꞌriꞌ.
7 A baꞌ quin tsicbarob,
raꞌ mʌꞌ quet yejer a baꞌ cu tsicbarob,
a mac a tiꞌ yʌn ich yocꞌocab.
Mʌꞌ ja wirej,
u neꞌer Cꞌuj a quin tsicbarob tiꞌ mac,
a raꞌ u mucu neꞌer Cꞌuj,
quireꞌ mʌꞌ toy yertob a mac a mʌꞌ yerob Cꞌuj ich yocꞌocab.
Quireꞌ a Cꞌujoꞌ,
cax mʌꞌ toy betac a jeꞌ ruꞌum uch,
tu chꞌic chunin tu cotor baꞌ,
Cꞌuj caj u tucraj bic tabar cu bin u yacsicoꞌonex,
soc pꞌeriꞌoꞌonex quic bin ic reyintiquex Cꞌuj ich u sasirir Cꞌuj.
8 Mʌꞌ ja wirej,
a mac a cu tsꞌurinticob mac ich yocꞌocab,
a caj u yaꞌarob caꞌ quinsac Cristo ich u cruz,
robob mʌꞌ yerob u neꞌer Cꞌuj quireꞌ wa yerob uch,
mʌꞌ biqꞌuin u quinsob Cristo ich u cruz.
Quireꞌ ic Jaj Tsꞌurirex jach manan tsoy.
9 A tenoꞌ,
quin tsecꞌtic an ten bic caj u tsꞌibtaj a mac tsꞌaꞌb u tucur ten Cꞌuj quir u tsꞌibtic uch.
Uꞌyex baꞌ cu yaꞌaric Cꞌuj:
U ricꞌsamʌnoꞌonex Cꞌuj bajeꞌrer,
tiꞌ mac a cu yajquinticob Cꞌuj.
Mʌnaꞌ mac caj u chen uꞌyaj,
mʌnaꞌ mac caj u tucraj a baꞌ caj u ricꞌsaj toꞌonex Cꞌuj,
quireꞌ jach manan a baꞌ cu tucric mac.
10 Chen a Cꞌujoꞌ,
caj u yesaj toꞌonex a cu yajquinticob Cꞌuj,
a baꞌ mʌꞌ yerob a cu tsꞌurinticob mac.
Mʌꞌ ja wirej,
caj u yesaj toꞌonex a neꞌer Cꞌuj.
A raꞌ u cꞌat yaꞌaric,
caj u yesaj toꞌonex Cristo,
a mac tuchiꞌtaꞌb ten Cꞌuj ich yocꞌocab.
A toꞌonexoꞌ,
mʌꞌ cꞌuchaꞌan ij corex ic najtex aroꞌ,
wa mʌꞌ ju yesaj toꞌonex u Tajꞌor u Pixam Cꞌuj.
Mʌꞌ ja wirej,
a mac a cu yajquintic Cꞌuj,
quet yejer a mac a tan u toꞌcar ten Cꞌuj,
toc yʌn u Tajꞌor u Pixam Cꞌuj.
Rajen rajiꞌ cu yesic tiꞌob a baꞌ u chen er Cꞌuj,
cax a baꞌ cu jach tar tam ich u tucur Cꞌuj.
Quireꞌ raꞌ u beyaj u Tajꞌor u Pixam Cꞌuj,
quireꞌ cu cʌxtic soc yer tu cotor a baꞌ cu tucric Cꞌuj.
11 Mʌꞌ ja wirej,
baxuc yejeroꞌonex xan.
Mʌnaꞌ mac yer a baꞌ cu tucric mac,
chen u bʌjiriꞌ u pixam yer.
Mʌꞌ wa baxuc a Cꞌujoꞌ?
Mʌnaꞌ mac yer a baꞌ cu tucric Cꞌuj wa mʌꞌ ju Tajꞌor u Pixam Cꞌuj cu yesic toꞌonex.
U Tajꞌor u Pixam Cꞌuj,
rajiꞌ yer tu cotor baꞌ tiꞌ Cꞌuj.
12 A toꞌonexoꞌ,
a mac caj u yacsaj tu yor tiꞌ Cristo,
mʌꞌ jic chen tucrex an ten bic tu cotor mac cu tucricob,
quireꞌ quic tucriquex an ten bic u Tajꞌor u Pixam Cꞌuj u cꞌat a ray u qꞌuinin caj u tsꞌaja toꞌonex Cꞌuj u Tajꞌor u Pixam Cꞌuj.
Rajiꞌ caj u tsꞌaja toꞌonex u Tajꞌor u Pixam Cꞌuj soc ij querex tu cotor u tsoyir a caj u tsꞌaja toꞌonex Cꞌuj.
13 Rajen quij cariquex a baꞌ caj u camsoꞌonex u Tajꞌor u Pixam Cꞌuj toꞌonex.
A ray tꞌʌnob,
mʌꞌ ju tꞌʌn a camsaꞌb ten xib,
a ju neꞌer tꞌʌn ich yocꞌocab.
Mʌꞌ ja wirej,
quic toc ariquex a baꞌ caj u camsoꞌonex u Tajꞌor u Pixam Cꞌuj toꞌonex,
soc ij cariquex tiꞌ a mac a toc yʌn u Tajꞌor u Pixam Cꞌuj.
14 Chen a mac a mʌnaꞌ u Tajꞌor u Pixam Cꞌuj tiꞌ,
mʌꞌ cꞌuchaꞌan yor u cꞌʌmic u tajir a baꞌ camsaꞌb ten u Tajꞌor u Pixam Cꞌuj.
Mʌꞌ ju bin u jach najtej quireꞌ cu yaꞌaric:
“Jach jot,
quij,
mʌꞌ bʌꞌ wir.”
Mʌꞌ ja wirej,
wa rajiꞌ mʌnaꞌ u Tajꞌor u Pixam Cꞌuj tiꞌ,
mʌꞌ cꞌuchaꞌan yor yiric a baꞌ jach manan coꞌojoꞌ,
a cu tsꞌabʌr ten u Tajꞌor u Pixam Cꞌuj tiꞌ mac.
15 A mac a yʌn u Tajꞌor u Pixam Cꞌuj tiꞌ,
cꞌuchaꞌan yor u najtic tu cotor a baꞌ tsꞌab ten u Tajꞌor u Pixam Cꞌuj.
Chen a mac a mʌnaꞌ u Tajꞌor u Pixam Cꞌuj tiꞌ,
mʌꞌ ju najtej a mac a yʌn u Tajꞌor u Pixam Cꞌuj tiꞌ.
16 Mʌꞌ ja wirej,
a mac a yʌn u Tajꞌor u Pixam Cꞌuj tiꞌ,
cꞌuchaꞌan yor u najtic tu cotor baꞌ,
quireꞌ yʌn u tucur Jesucristo tiꞌ.
Rajen a mac a mʌnaꞌ u Tajꞌor u Pixam Cꞌuj tiꞌ,
mʌꞌ ju najtej a mac a yʌn u Tajꞌor u Pixam Cꞌuj tiꞌ.
Uꞌyex,
baꞌ cu yaꞌaric a mac a tsꞌab u tucur quir u tsꞌibtic u tꞌʌn Cꞌuj uch.
“A mac yer u tucur Cꞌuj?
Mʌnaꞌ mac.
Jeꞌ wa ju cꞌuchur tu qꞌuinin cu camsic tiꞌ Cꞌuj mac?
Mʌnaꞌ mac cu bin u camsej.”
Chen a toꞌonexoꞌ,
yʌn u tucur Jesucristo.