Ij quet beyajex yejer Cꞌuj
3
Rajen in wet acsaꞌorirex,
mʌꞌ cꞌuchaꞌan in wor in tꞌʌniquechex an ten bic in tꞌʌnic a mac a toc yʌn u Tajꞌor u Pixam Cꞌuj.
Quin chen tꞌʌniquechex an bic mac a cu man ich yocꞌocab cu tꞌʌnic a chichanoꞌ.
Mʌꞌ ja wirej,
chichanechex tiꞌ u tꞌʌn Cꞌuj.
2 Caj in camsechex u tꞌʌn Cꞌuj uch,
raꞌ quir a cꞌʌmiquex Cꞌuj.
A tenoꞌ,
iren mac a cu tsꞌic u chuch chan och.
Biquinin caj in chen camsechex uch baxucoꞌ?
Quireꞌ mʌꞌ toy cꞌuchuc a worex tiꞌ u tꞌʌn Cꞌuj a tiꞌ a mac a chichij yor tiꞌ u tꞌʌn Cꞌuj.
Quireꞌ irechex chan och a mʌꞌ cꞌuchuc tu qꞌuinin u chiꞌic yoch bʌcꞌ.
U berer bʌjeꞌrer,
mʌꞌ toy cꞌuchuc tu qꞌuinin in camsiquechex u tꞌʌn Cꞌuj a tiꞌ a mac a chichij tiꞌ u tꞌʌn Cꞌuj.
3 Mʌꞌ ja wirej,
caj a manex ich a cꞌasoꞌ irechex a mac a mʌꞌ yerob Cꞌuj,
quireꞌ robob cu tsꞌurinticob a cꞌasoꞌ.
Wa ber tiꞌ yʌn mac tu yʌnechex caj qꞌuexij yorob.
Wa ber tiꞌ yʌn mac tu yʌnechex caj u nuncob u tꞌʌnob,
mʌꞌ wa taj quin waꞌaric ca manex ich u cꞌasir an ten bic mac a mʌꞌ yerob Cꞌuj?
Rajen quin waꞌaric,
mʌꞌ ja manex irechex mac a pay u berob ten u Tajꞌor u Pixam Cꞌuj.
4 Quireꞌ wa ber cu yaꞌaric mac tu yʌnechex:
“A tenoꞌ,
quij,
jach taj rajiꞌ yʌninen Pablo,
quireꞌ caj in cʌn u tꞌʌn.”
U jer caj u yaꞌaraj:
“A tenoꞌ,
jach taj raji yʌninen Apolos,
quireꞌ caj in cʌn u tꞌʌn.”
Mʌꞌ wa jach taj mʌꞌ tan a manex irechex a mac a pay u ber ten u Tajꞌor u Pixam Cꞌuj?
5 Rajen quin bin in waꞌaric techex.
Apolos yejerenob xan,
a tenoboꞌ u cꞌurewenob Cꞌuj quir in tsecꞌticob u tꞌʌn Cꞌuj techex,
soc a wacsiquex ta worex tiꞌ Cristo.
Chen u tiririꞌ tiꞌ in beyajob,
caj tsꞌaja a tenoboꞌ Cꞌuj a tenoboꞌ.
6 Mʌꞌ ja wirej,
a tenoꞌ,
caj in tsecꞌ techex u tꞌʌn Cꞌuj caj a wacsex ta worex,
rajen caj a yʌnxchun a muchꞌquintajex a bʌjex quir a wuꞌyiquex u tꞌʌn Cꞌuj.
Rajen iren yʌjpʌqꞌuiren a narex ich a corex.
A Apolosoꞌ,
caj tarij tuꞌ yʌnechex soc u camsiquechex u tꞌʌn Cꞌuj soc a quiꞌ acsiquex ta worex tiꞌ Cristo.
Rajen a Apolosoꞌ,
irej a mac a cu joꞌyaꞌtic u yijir ta corex quir u jocꞌar.
Chen a Cꞌujoꞌ,
caj u chꞌisaj u pʌcꞌar soc u nunctar.
7 Uꞌyex baꞌ u cꞌat yaꞌaric aroꞌ.
A mac a cu pʌqꞌuic u yijir quet yejer a mac a cu joꞌyaꞌtic u yijir cax noj,
chen a Cꞌujoꞌ,
a cu chꞌisic u yijir,
jach manan noj.
8 A tenoꞌ,
pꞌeriꞌ in beyajob yejer Apolos cax u tiririꞌ tiꞌ in beyajob,
quireꞌ Apolos,
rajiꞌ irej a mac a cu joꞌyaꞌtic u yijir.
A tenoꞌ,
iren a cu pʌqꞌuic u yijir.
Caꞌ bin cꞌuchuc tu qꞌuinin,
a Cꞌujoꞌ cu bin u boꞌotic u boꞌorir in cꞌʌbob jujunturenob,
an ten bic caj beyajnʌjenob.
9 Mʌꞌ ja wirej,
a tenoboꞌ,
quet in beyajob yejer Cꞌuj,
Apolos yejeren.
A techexoꞌ,
irechex in corob tu beyajnʌjenob Apolos yejeren,
quireꞌ techex caj a wacsajex ta worex tiꞌ Cristo,
bajeꞌrer ca sayirex tu pach jach Cꞌuj.
Bayiriꞌ xan,
cꞌuchaꞌan ij corex ij cariquex irechex u najirechex Cꞌuj,
quireꞌ Cꞌuj cu cꞌʌxic techex irej mac a cu cꞌʌxic u yatoch.
10 Quireꞌ tsoy tu tꞌʌn Cꞌuj,
rajen tsꞌaꞌb in beyaj ten Cꞌuj tu quin yʌnxchun in tsecꞌtic u tꞌʌn Cꞌuj caꞌ in muchꞌquint mac quir u yubic u tꞌʌn Cꞌuj.
Rajen iren a mac neꞌer u tsꞌʌpquintic tunich quir u cꞌʌxic yatoch.
A tenoꞌ,
caj in tsꞌʌpquinta tunichir soc u chichtar u yoc yatoch.
Mʌꞌ ja wirej,
tu quin yʌnxchun in tsecꞌtic tiꞌ mac soc u yacsic tu yor tiꞌ Cristo.
Aroꞌ irej tunich tu cu yʌnxchun u tsꞌʌpquintic quir u cꞌʌxic yatoch.
Caj tsꞌoc in tsꞌʌpquintic u tunichir,
a cu yʌnxchun,
jeroj,
u jer mac cu bin u cꞌuchur quir u tsꞌʌpquintic u jer tunich.
Aroꞌ irej u jer mac cu cꞌuchur ta wicnʌnex,
quir u camsiquechex u tꞌʌn Cꞌuj.
Chen quin chich aric tiꞌ jujuntur mac:
“Quiꞌ irej bic tabar u tsꞌʌpquintic.”
Mʌꞌ ja wirej,
jujunturoꞌonex,
bin in caꞌex ich ʌcʌtan Cꞌuj,
rajen quiꞌ irej baꞌ cu camsaꞌ tiꞌ a yacsmʌnob tu yorob.
11 Barej,
caj in tsecꞌtaj techex Jesucristo uch,
aroꞌ ir a tenoꞌ,
quin tsꞌʌpquintic u tunichir soc u chichtar u yoc yatoch.
Rajen quij cariquex rajiꞌ Jesucristo caj ij tsꞌʌpquintex,
mʌnaꞌ u jer u tsꞌʌpquinir tunich quir u chichtar u yoc yatoch,
jaririꞌoꞌ,
mʌnaꞌ u jer.
12 Yʌn mac cu bin u pʌqꞌuic baꞌ ich yocꞌor u tunichir quir u chichtar u yoc yatoch.
Jaj ix tʌcoj,
cu bin u pʌqꞌuic oro,
a baꞌ jach coꞌojoꞌ.
Wa sʌc taqꞌuin,
a baꞌ jach coꞌoj xanoꞌ.
Wa cu bin u pʌqꞌuic chan tunich a jach coꞌoj xanoꞌ.
Jaj ix tʌcoj,
u jer mac cu bin u pʌqꞌuic u jer baꞌ ich yocꞌor u tunichir quir u chichtar u yoc yatoch.
Jaj ix tʌcoj,
cu bin u pʌqꞌuic cheꞌ,
wa suꞌuc cu pʌqꞌuic,
wa ju sor cu pʌqꞌuic.
13 Chen a mac a cu pʌqꞌuic baꞌ ich yocꞌor u tunichir quir u chichtar u yoc yatoch,
jeꞌ u bin tumtaꞌbir u beyaj.
Caꞌ bin cꞌuchuc tu qꞌuinin,
cꞌacꞌ cu bin tumtic u beyaj.
Cu bin tumtaꞌbir tu qꞌuinin u xur tꞌʌn.
A ray u qꞌuininoꞌ,
cu bin irbir biquiraꞌ u beyaj mac wa tsoy u beyaj,
wa mʌꞌ tsoy u beyaj mac.
14 Wa jix tʌcoj cu chʌc pꞌatar u beyaj,
a baꞌ u pʌcꞌaj yocꞌor u tunichir quir u chichtar u yoc,
caj tsꞌoc u tumtaꞌb ten cꞌacꞌ,
jeroj cu bin quiꞌ acsaꞌbir ten Cꞌuj a mac tsoy u beyaj ich caꞌanan.
Cu bin boꞌotbir u boꞌorir u cꞌʌb ten Cꞌuj.
15 Chen a mac a caj u pʌcꞌaj baꞌ ich yocꞌor u tunichir quir u chichtar u yoc yatoch,
wa yʌn baꞌ caj u pʌcꞌaj,
chen caj toc rʌc erij tuj tumtaꞌb ten Cꞌuj,
jeroj,
sat u beyaj,
cax u bʌjiriꞌ cu bin tacbir ten Cꞌuj quir u cuxtar munt qꞌuin.
Aroꞌ ir a mac a tacbir ten mac tu erij yatoch,
chen rʌc sat u baꞌtac.
16 A tenoꞌ,
in wer a werex wa ju najirechex Cꞌuj quireꞌ tiꞌ acaꞌan techex u Tajꞌor u Pixam Cꞌuj.
17 Wa jix tʌcoj,
wa mac cu cꞌasquintic u najir Cꞌuj an ten bic mac cu cꞌʌxic u yatoch yejer rʌb cheꞌ.
Bin u caꞌ tsꞌaꞌbir u mucꞌyaj munt qꞌuin caꞌ bin xuruc tꞌʌn.
Mʌꞌ ja wirej,
a najoꞌ tu ricꞌsa Cꞌuj quir u beyaj Cꞌuj.
Yʌn cꞌaj techex a bʌjiriꞌex u najirechex Cꞌuj.
18 A tenoꞌ,
quin chich aric techex.
Arex tiꞌ mac:
“Mʌꞌ ja tus aric a bʌjiriꞌ.”
Wa yʌn mac tuꞌ yʌnechex tu ca muchꞌquintiquex a bʌjex quir a wuꞌyiquex u tꞌʌn Cꞌuj wa cꞌuchaꞌan yor u tetic quir u sayir tu pach a mac a camsic u tꞌʌn Cꞌuj,
quireꞌ jach tꞌoj tiꞌ a baꞌ yʌn ich yocꞌocab.
Arex tiꞌ wa ju cꞌat u waysic u bʌj jach tꞌojir,
caꞌ yacsej tu yor.
Chen a ray u qꞌuininoꞌ,
a mac a mʌꞌ yer Cꞌuj bin u caꞌ yaꞌarej tiꞌ:
“Jot a techoꞌ.”
19 Rajen ʌcʌtan tu wich Cꞌuj a baꞌ cu cay aricob a mac a tiꞌ yʌn ich yocꞌocab:
“In neꞌer baꞌ.”
A Cꞌujoꞌ,
cu yaꞌaric:
“Jot aroꞌ”,
quij.
Mʌꞌ ja wirej,
tiꞌ tsꞌibaꞌan ich u tꞌʌn Cꞌuj ten a mac tsꞌaꞌb u tucur ten Cꞌuj quir u tsꞌibtic.
Rajiꞌ caj yaꞌaraj:
“A Cꞌujoꞌ,
mʌꞌ ju chaꞌbʌr a mac a tiꞌ yʌn ich yocꞌocab,
a cu yaꞌaric u neꞌer baꞌ caꞌ u pʌyej u ber u bʌjiriꞌeꞌ.
A Cꞌujoꞌ,
cu macʌr u berob.”
20 Tiꞌ toy yʌn u jer tu tsꞌibaꞌan u tꞌʌn Cꞌuj tu cu yaꞌaric:
“A Cꞌujoꞌ,
yer a baꞌ cu tucric,
a mac a ju neꞌer baꞌ rajen rajiꞌ yer jach jot u tucurob.”
21 Rajen mʌꞌ tsoy a wuꞌyiquex ta worex ir wa jach caremechex quireꞌ a neꞌerex baꞌ.
Baxuc mʌꞌ tsoy a wuꞌyiquex ta worex wa jach caremechex quireꞌ caj sayechex tu pach a mac a cu camsiquex u tꞌʌn Cꞌuj.
22 Mʌꞌ ja wirej,
a Cꞌujoꞌ,
caj u chuc u tsꞌa techex tu cotor baꞌ a cꞌatiquex.
Mʌnaꞌ wa tu tuchiꞌta techex Pablo yejer Pedro yejer Apolos soc u yamtiquechex?
Jeroj,
Cꞌuj caj u tsꞌaja techex a yocꞌocaboꞌ quir a cʌjtarex.
Jeroj,
Cꞌuj caj u tsꞌaja techex quir a cuxtarex,
baxuc caj u tsꞌaja techex a quiminex soc u yamtiquechex.
Jeroj,
Cꞌuj caj u tsꞌaja techex tu cotor baꞌ a tiꞌ yʌn bajeꞌreraꞌ,
baxuc Cꞌuj caj u tsꞌaja techex tu cotor baꞌ,
a cu bin taroꞌ caꞌ bin cꞌuchuc tu qꞌuinin.
A techexoꞌ,
techex yʌnin tu cotor baꞌ.
23 Biquinin a techexoꞌ,
techex yʌnin tu cotor baꞌ,
quireꞌ rajiꞌ yʌninechex Cristo.
Bayiriꞌ xan,
a Cristojoꞌ,
rajiꞌ yʌnin Cꞌuj.