A baꞌ tu wʌyʌcꞌtaj Pablo tiꞌ Cꞌuj
12
Mʌꞌ baꞌwir quin waꞌaric techex tiꞌ a baꞌ tin betaj soc tsoy a wiriquenex.
Tin tꞌʌn,
jach tsoy caꞌ in waꞌarej techex a baꞌ tu yesaten Jesús uch.
Jeꞌ in waꞌaric a baꞌ tin wiraj caj wʌyacꞌnʌjen.
2 Bajeꞌrer yʌn yaꞌab yaxqꞌuin caj in wacsaj tin wor tiꞌ Cristo.
Yʌn catorce yaxqꞌuin caj payen ich caꞌanan tu yʌn ic Jaj Tsꞌurirex Jesús.
Chen mʌꞌ in wer wa yejer in winquirir caj binen,
wa mʌꞌ yejer in winquirir caj binen,
wa tin chen wʌyʌcꞌtaj.
Jaririꞌ u bʌjiriꞌ Cꞌuj yer baꞌ in ber a tenoꞌ.
3 Rajiꞌ Cꞌuj yer wa binen yejer in winquirir wa mʌꞌ binen yejer in winquirir.
4 Chen in wer a Jaj Tsꞌuroꞌ caj u pʌyajen tu cʌjaꞌan ich caꞌanan.
A baywoꞌ caj in wuꞌyaj u tꞌʌn a mʌꞌ u chaꞌbʌr in tsicbar techex quireꞌ a baꞌ caj u yaꞌaraj ten.
5 Quireꞌ a baꞌ caj in wuꞌyaj ich caꞌanan cꞌuchaꞌan in wor in tsicbar tsoy in bʌjiriꞌeꞌ,
chen a tenoꞌ mʌꞌ tsoy in tsicbar in bʌjiriꞌeꞌ chen jeꞌ in tsicbar tsoy in bʌjiriꞌeꞌ a baꞌ quiriꞌ mʌꞌ cꞌuchaꞌan in wor tiꞌeꞌ.
6 Cax wa jin cꞌat in tsicbar tsoyen chen aroꞌ mʌꞌ socsoc tsicbar in caꞌiꞌ,
a jeraꞌ tan in waꞌaric jach taj,
barej,
mʌꞌ jin bet aroꞌ.
Jariꞌ in cꞌat a wirenex bic tabar quin cuxtar,
bayiriꞌ a baꞌ ta wuꞌyajex in waꞌaric techex soc cꞌuchaꞌan a worex a wiriquex wa tajiꞌ.
7 A ray tꞌʌnoꞌ caj in wuꞌyaj uch jach manan tsoyir.
Chen Cꞌuj mʌꞌ u cꞌat yiriquen wa quin tus tucric wa jach caremen quireꞌ a baꞌ caj in wuꞌyaj ich caꞌanan uch.
Rajen rajiꞌ cu chaꞌic u tar quir in mucꞌyaj raꞌ irej wa qꞌuiꞌix tuj u tup in bʌqꞌuer a quisinoꞌ.
8 Quireꞌ a ray mucꞌyajoꞌ caj in tꞌʌnaj Cꞌuj mʌnaꞌ u nup u tenin caꞌ u rucꞌsej ten.
9 Chen Cristo caj u yaꞌaraj ten:
“Jariꞌ soc a wer wa jin jach yajech soc chʌcaꞌan yiric mac ten,
quij Jesús,
tan in chichquintic a mucꞌ Pablo tu ca beyaj a techoꞌ.”
Baxuc caj u yaꞌaraj ten.
Mʌꞌ ja wirej,
a baxucoꞌ chʌcaꞌan yiric mac Cristo cu chichquintic in mucꞌ tiꞌ a baꞌ quin betic.
Rajen quiꞌ in wor wa mʌꞌ chich in mucꞌ.
10 Rajen quiꞌ in wor wa ber quin mucꞌyaj.
Yʌn qꞌuin wa ber cu pꞌastiquenob mac.
Yʌn qꞌuin wa ber mʌnaꞌ baꞌ quir in jantic.
Yʌn qꞌuin wa ber cu chuquicob in pach mac.
Yʌn qꞌuin wa ber quin mucꞌyaj quireꞌ u beyaj a quin betic tiꞌ Cristo.
Chen tan in quiꞌquintic in wor quireꞌ wa ber chʌcaꞌan yiric mac wa mʌꞌ chich in mucꞌ jeroj tun,
chʌcaꞌan yiric mac rajiꞌ Cristo tan u chichquintic in mucꞌ tiꞌ a baꞌ quin betic.
A Pablojoꞌ tan u tucric tiꞌ a mac a yacsmʌnob tu yorob ich u cajar Corinto
11 A tenoꞌ quin socsoc tsicbar tsoy in bʌjiriꞌeꞌ quireꞌ a techexoꞌ caj a tsꞌʌrex in pach in wʌcꞌʌs tsicbar in wʌcꞌʌs bʌjiriꞌeꞌ.
Biquinin mʌꞌ ja tsꞌib tenex tsoyen tiꞌ u ʌjꞌetsꞌ tseqꞌuirob u tꞌʌn Cꞌuj a tu yʌnechexoꞌ.
Mʌnaꞌ mac jach tsoy quetenob baxuquenob tsoyirenoboꞌ cax cu yaꞌaricob:
“Jotenob a tenoboꞌ.”
12 Wa ber tiꞌ yʌnen tu yʌnechex uch caj in tsicbʌtaj techex u tꞌʌn Cꞌuj soc chʌcaꞌan yiricob mac tu tuchiꞌten Cristo quir in beyaj tiꞌ.
Quireꞌ ich in beyaj a caj in betaj tiꞌ Cristo nemʌꞌ biqueniꞌ,
caj in mucꞌtaj tu cotor a baꞌ caj u yaꞌaraj mac.
A carem beyajoꞌ a baꞌ mʌꞌ yirmʌnob mac uch rajiꞌ cu yesic techex jach jaj tu tuchiꞌten Cristo.
13 A tenoꞌ caj cuxrʌjen uch tu yʌnechex an ten bic in cʌjtar tu yʌn tu cotorob mac a yacsmʌnob tu yorob.
Jariꞌ mʌꞌ jin cꞌatej techex caꞌ a jansenex.
Caꞌ a jawsenex wa mʌꞌ tsoy caj in betaj techex.
14 Jeroj tabar in wʌcꞌʌs tar in wirechex,
raꞌ a mʌnaꞌ u nup u tenin in tar in wirechex.
Chen a tenoꞌ mʌꞌ jin cꞌʌs cꞌata techex chichin a taqꞌuinex wa ber caꞌ cꞌuchuquen tu yʌnechex.
A tenoꞌ jeꞌ in wesic techex in yajquintiquechex.
Mʌꞌ ja wirej,
a tetoꞌ cu pꞌisic u bʌj u cʌxt u taqꞌuin quir u cʌnatic u chan pararob.
A chan pararobeꞌ,
mʌꞌ ju cʌnant u tet.
15 A tenoꞌ quin quiꞌquintic in wor caꞌ in rʌc xup in taqꞌuin yejer tu cotor a baꞌ ten yʌnin quir in yamtiquechex soc a taquic a bʌjex.
Cax quin xupic in mucꞌ xan quireꞌ techex,
quiꞌ in wor.
Chen tin tꞌʌn cax jach manan quin yajquintiquechex a techexoꞌ.
Chen a techexoꞌ,
mʌꞌ ja neyajquintenex.
16 A techexoꞌ,
a werex wa ber yʌn baꞌ in cꞌat uch,
mʌꞌ jin cꞌʌs cꞌataj techex chichin.
Chen yʌn mac tu yʌnechex a tan u pʌqꞌuicob in pach,
tan u yaꞌaricob tan in tusaric techex.
17 A techexoꞌ ca tucriquex wa caj in tuchiꞌtaj mac soc u tus jaric u taqꞌuin tu yʌnechex?
Mʌꞌ jin tuchiꞌtaj mac,
quij.
18 Wa ber caj in tuchiꞌtaj Tito quir u tꞌʌniquechex,
yet binac u jer ij quet acsaꞌorirex.
Arex ten wa caj u jarajob taqꞌuin tu yʌnechex.
Techex,
a werex a Titojoꞌ caj u betaj an ten bic a tenoꞌ quin betic.
A Titojoꞌ u chen cꞌat u betej tsoy techex yejer u tꞌʌn a caj u camsechex.
Chen mʌꞌ ju cꞌat u taqꞌuin techexiꞌ.
19 Mʌꞌ a yʌn tucriquex wa quin tsicbar a jeꞌ tꞌʌnaꞌ tiꞌ techex soc tsoy a wiquenex,
mʌꞌ raꞌ.
Mʌꞌ ja wirej,
a tꞌʌnoꞌ a quin tsicbaroꞌ raꞌ u cꞌat Cristo caꞌ tsicbanʌquen techex.
A tꞌʌnoꞌ a quin tsicbar techex in wet acsaꞌorirex quin cʌxtic bic tabar quin chichquintic a worex tiꞌ u tꞌʌn Cꞌuj.
20 Mʌꞌ ja wirej,
sajquen caꞌ bin cꞌuchuquen tu yʌnechex wa quin wiriquechex,
jaj ix tʌcoj,
jeꞌ in wiric techex mʌꞌ ja manex tu tsoyir.
Jaj ix tʌcoj,
jeꞌ in wiriquex ca nunquiquex u tꞌʌn a racꞌobex,
wa quin wiric qꞌuex a worex techex.
Wa jix tiꞌ,
tsꞌiquex,
wa jix tiꞌ ca cʌxtiquex baꞌ tiꞌ a nonoj bʌjiriꞌex,
wa jix tiꞌ,
cu yaꞌaricob cꞌas tiꞌ u yet acsaꞌorirob,
wa jix tiꞌ cu pꞌasticob u yet acsaꞌorirob,
wa jix tiꞌ yʌn mac a cu tus tucric u bʌjiriꞌ wa jach carem.
Wa jix tiꞌ,
cu pꞌusicob u yorob u yet acsaꞌorirob.
Tin tꞌʌn,
mʌꞌ ja bin a quib in tsicbar techex an bic tabar a cꞌatex ten,
quireꞌ jeꞌ u jocꞌar in wor quireꞌ cꞌas ca betiquex.
21 Rajen sajquen tiꞌ a baꞌ quin bin in wirej caꞌ bin cꞌuchuquen tu yʌnechex.
Jeroj,
jeꞌ in chꞌic suraquir ʌcʌtan tu wich Cꞌuj quireꞌ a baꞌ ca betiquex.
A tenoꞌ tin tꞌʌn,
jeꞌ in wocꞌar wa quin wiric mac mʌꞌ ju jʌs u bʌjob tiꞌ a cꞌasoꞌ,
bayiriꞌ ca manex yejer xquic a toc yʌn u mamoꞌ.