Pablo yejer a tus yʌjtꞌʌnirob Cristo
11
A tenoboꞌ tan in tsicbarob irenob a mac a cu sosoc tsicbar.
Chen mucꞌtex a baꞌ in cꞌat in waꞌaric techex.
2 A tenoboꞌ queten yejeren Cꞌuj,
jach manan in cꞌatob mʌꞌ a pꞌʌtiquex Cristo.
Mʌꞌ ja wirej,
tin yam techex soc a wacsiquex ta worex tiꞌ Cristo.
A bajeꞌreroꞌ an ten bic a xquicoꞌ a tabar u chꞌic u mam,
a cu chen yajquintic a mac a cu bin u raqꞌuintej.
Raꞌ irej u tꞌʌn a tabar in waꞌaric techex teraꞌ.
A mac jach manan caꞌ a yajquintex.
rajiꞌ Cristo.
3 An ten bic Eva caj tus araꞌb ten quisin baxuc quin chꞌic u sajquirirob wa jeꞌ u tus aric techex mac soc a pꞌʌtiquex Cristo.
4 Mʌꞌ ja wirej,
cax mac a cu cꞌuchur tu yʌnechex wa baꞌ cu camsiquechex u tirir tiꞌ a baꞌ tin camsechexob uch tiꞌ Cristo,
raꞌ ca quiꞌ sariquex a xiquinex tiꞌ.
Mʌꞌ ja wirej,
u tirir tiꞌ a baꞌ cu camsicob tiꞌ u Tajꞌor u Pixam Cꞌuj.
U tirir tiꞌ a baꞌ cu camsicob tiꞌ u jach tsoyir u tꞌʌn Cꞌuj.
A baꞌ cu camsicob raꞌ mʌꞌ quet yejer a baꞌ tin camsechexob uch.
5 Robob a mac a cu camsiquechex a ray tꞌʌnob cu tus tucricob u bʌjiriꞌ:
“Jach caremenob”,
chen a tenoboꞌ mʌꞌ jin tucrej tiꞌob wa jach carem tenoboꞌ.
6 Cax mac cu yaꞌaric mʌꞌ in werob bic tabar in tsicbarob soc tsoy yubicob mac in tꞌʌnob wa ber quin tsicbarob.
Chen a tenoboꞌ in jach erob a baꞌ quin camsicob.
Mʌꞌ ja wirej,
a techexoꞌ ta quiꞌ uꞌyex in tꞌʌnob a tin tsꞌibtechexob caj in camsajechexob uch.
7 Ta tucrex wa tin betajob cꞌas quireꞌ mʌꞌ tin cꞌataj techexob in taqꞌuin wa ber tin waꞌara techexob u jach tsoyir u tꞌʌn Cꞌuj?
Soc in beticob tsoy techex chich beyajnʌjenob quir in jaric in taqꞌuinob soc in janʌnob wa ber tin camsechexob u tꞌʌn Cꞌuj uch.
8 Wa ber tan in beyajob uch tu quin camsiquechex u tꞌʌn Cꞌuj ta cajarex,
u jer a yacsmʌnob tu yorob ich u jer u cajarob tu tsꞌajob tenob taqꞌuin quir in mʌnic a baꞌ in cꞌatob.
9 Wa ber jamach cʌjaꞌajenob ich a cajarex uch yʌn u qꞌuinin mʌnaꞌ baꞌ quir in janʌnob.
Chen mʌꞌ jin cꞌataj techex a baꞌ in cꞌatob.
Chen robob a mac a cu tar ich u ruꞌumin Macedonia,
ij quet acsaꞌorirex,
robob caj u tsꞌajob tenob a baꞌ in cꞌatob uch.
A baywoꞌ mʌꞌ jin cꞌatechexob a baꞌ in cꞌat uch.
Mʌꞌ biqꞌuin jeꞌ in cꞌatechexob a baꞌ in cꞌat soc mʌꞌ jin pecsob a worex.
10 Mʌꞌ ja wirej,
quireꞌ tin wacsaj tin worob tiꞌ Cristo,
taj quin waꞌaricob.
Jach jaj mʌꞌ jin bin in cꞌatob taqꞌuin tiꞌ a mac a yacsmʌnob tu yorob tu cʌjaꞌanob ich u ruꞌumin Acaya.
Jach quiꞌ in worob quireꞌ baxuc caj in betob.
11 Biquinin tan in waꞌariquechexob a ray tꞌʌnoꞌ?
Mʌꞌ a tucriquex wa mʌꞌ jin yajquin techexob?
A Cꞌujoꞌ yer jach manan in yajquintiquechexob.
12 Mʌꞌ ja wirej,
a tu cʌjaꞌanechex mʌꞌ jin chꞌajob a taqꞌuinex soc a mac a cu camsicob techex mʌꞌ cꞌuchaꞌan yorob yaꞌaricob,
robob cu beticob an ten biquenob quin beticob.
A mac a cu tus aricob robob raꞌiriꞌ yejerenob wa ber cu camsicob an ten biquenob a tenoboꞌ quin camsicob.
13 A ray macoꞌ a cu camsicob a mac a quin tsicbar techexob bajeꞌrer,
robob cu tus aricob wa robob u jach ʌj tseqꞌuirob u tꞌʌn Cristo,
chen mʌꞌ tajiꞌ quireꞌ cu tus aricob mac.
Robob cu tus etsꞌicob ʌjtseqꞌuirob u tꞌʌn Cristo.
14 Mʌꞌ u yʌn jacꞌarex a worex quireꞌ a baꞌ caj in waꞌara techexob quireꞌ u bʌjiriꞌ a quisinoꞌ cu tus cꞌaxic u bʌj soc chʌcaꞌan yirir irej wa yʌjmasir u tꞌʌn Cꞌuj a cu tar ich caꞌanan.
15 Rajen rajiꞌ taj wa mac a cu beyajob tiꞌ quisin xan cu tus esicob u bʌjob irej wa tsoy yor mac.
Chen bic tabar u cuxtarob ich yocꞌocab mac jeꞌ u bin tsꞌabir u mucꞌyaj caꞌ bin cꞌuchuc tu qꞌuinin quireꞌ a baꞌ caj u betob.
A baꞌ caj u mucꞌtaj Pablo quireꞌ yʌjtseqꞌuir Cꞌuj
16 Uꞌyex baꞌ quin wʌcꞌʌs aric techex,
chen mʌꞌ a yʌn tucriquex wa tin sʌt in tucur quireꞌ a baꞌ quin bin in waꞌarej techex.
Chen wa ca tucriquex tin sʌt in tucur jeroj,
chaꞌex in cꞌʌs tsicbar in bʌjiriꞌeꞌ.
17 Raꞌ quin tsicbar techex bajeꞌrer mʌꞌ ju tsꞌaj in tucur Cꞌujiꞌ.
In bʌjiriꞌ quin tsicbar an ten bic mac mʌnaꞌ u tucuroꞌ,
a mac a cu tsicbar u bʌjiriꞌ.
18 A techexoꞌ ta wirex yaꞌab mac a cu camsicob mac,
cu tsicbarob tu cotor a baꞌ cu beticob.
Rajen a ten xanoꞌ,
in cꞌat in tsicbar techex a baꞌ tu cotor quin betic.
19 Quireꞌ bajeꞌrer ca tus tucriquex wa ja neꞌerex baꞌ tu cotor.
Jeroj,
cꞌuchaꞌan a worex bajeꞌrer soc nemʌꞌ biquechex yejeren,
cax yejer u tꞌʌn a cu tar a mac a tu sʌt u tucur.
20 Mʌꞌ ja wirej,
a mac a cu camsicob techex bajeꞌrer tan a tsꞌurintiquex.
Chen a techexoꞌ tiꞌ toy ca mucꞌtiquex tiꞌob,
cax a baꞌ cu beticob techex.
Robob jariꞌ u cꞌat u chꞌicob a taqꞌuinex,
cu yocarob u cꞌʌniquechex.
Cu yaꞌaricob:
“Jot a techexoꞌ”,
cu tacꞌjʌtsꞌiquechex,
chen ca mucꞌtiquex.
21 A tenoboꞌ cax suraquenob in waꞌarej.
A tenoboꞌ mʌꞌ chich in worob quir in beticob a baxuc a caj u betob a tus etsꞌ yʌjtseqꞌuirob u tꞌʌn Cꞌuj.
Chen wa robob cu wʌcꞌʌs tsicbar tsoy u bʌjiriꞌob.
A tenoboꞌ cꞌuchaꞌan in wor in tsicbarob jach manan tsoy in bʌjiriꞌeꞌ jaj ix tʌcoj ca waꞌariquex a Pablojoꞌ caj u sʌt u tucur.
A ray macoꞌ a cu camsicob techex,
cu tsicbarob a baꞌ caj u betajob,
a cu tetic u bʌjob.
A tenoboꞌ tabar in waꞌaric techex in bʌjiriꞌ cax ca waꞌariquex tin sʌt in tucur quireꞌ cꞌuchaꞌan in worob tiꞌ.
22 A ray u winiquirob judiojoꞌ cu yaꞌaricob:
U winiquirenob judio,
baxuc a tenoꞌ u winiquiren judío.
Robob cu yaꞌaricob u winiquirob u ruꞌumin Israel,
baxuc a tenoꞌ u winiquirenoꞌ u ruꞌumin Israel.
Robob cu yaꞌaricob:
Rajiꞌ Abraham u nunquirob,
baxuc ten xan,
rajiꞌ Abraham in nunquir xan.
23 Robob cu yaꞌaricob cu beyajob tiꞌ Cristo.
Chen a ten xanoꞌ,
jach manan quin betic u beyaj Cristo,
mʌꞌ quet u beticob.
Tin tꞌʌn,
ca tucriquex jach taj caj in sʌt in tucur quireꞌ an bic tabar tan in tsicbar techex.
Chen a tenoꞌ jach manan in beyaj,
robob mʌꞌ quet u beyaj yejeren.
Jach manan mucꞌyajnʌjen uch caj u jʌtsꞌob in pach a tiꞌoboꞌ mʌꞌ jach manan a tiꞌoboꞌ.
Yaꞌab u tenin caj purenob tu cu maꞌcʌr winicob,
mʌꞌ jach manan a tiꞌoboꞌ.
Jach yaꞌab u tenin tabar in quinsaꞌ,
mʌꞌ jach manan a tiꞌoboꞌ.
24 Tiꞌ in wet winiquirob judío cinco u tenin caj u jach tsꞌaj in mucꞌyaj,
caj u jʌtsꞌob in pach treinta y nueve u jatsꞌʌr in pach.
25 Tres u tenin caj u jʌtsꞌob in pach yejer cheꞌ,
tenin tu chꞌinob in joꞌr,
tres u tenin u chemin jur tu quin man ich cꞌacꞌnab.
Tiꞌ yʌnen tuririꞌ u qꞌuinin yejer tuririꞌ acꞌbir tiꞌ yʌnen ich cꞌacꞌnab quireꞌ jur a chemoꞌ.
26 Tu quin bin in tsecꞌt u tꞌʌn Cꞌuj yaꞌab u tenin tan in man ich bej orac u cuchen u burij yaꞌarir.
Orac quinsaquen ten a mʌꞌ u winiquirob judío.
Tu quin tsecꞌtic u tꞌʌn Cꞌuj ich u cajarob orac quinsaquen xan.
Orac quinsaquen ten a mac a mʌꞌ taj tu yacsob tu yorob.
Tu quin man ich tʌcay ruꞌum tiꞌ mucꞌyajnʌjen.
Tu quin chꞌʌctic cꞌacꞌnab tiꞌ mucꞌyajnʌjen xan.
27 Yaꞌab mucꞌyajnʌjen quireꞌ wiꞌijen.
Mucꞌyajnʌjen quireꞌ ucꞌchʌjen.
Yaꞌab mucꞌyajnʌjen quireꞌ chich in beyaj.
Yaꞌab u tenin mʌnaꞌ quir in wenʌn.
Yaꞌab u tenin wa ber mʌnaꞌ in woꞌoch mʌnaꞌ in jantej baꞌ.
Yaꞌab u tenin mucꞌyajnʌjen ich chʌcʌm quireꞌ jach queꞌer.
Yaꞌab u tenin mucꞌyajnʌjen quireꞌ mʌꞌ yaꞌab in nocꞌ quir in buquintic.
28 Mʌꞌ jariꞌ aroꞌ,
quin mucꞌyaj jujuntur u qꞌuinin wa ber quin wuꞌyic tin wor u yajirir in wet acsaꞌorirob cax tu yʌnob.
29 Wa ber quin wiric tu yʌn a yacsmʌnob tu yorob a mʌꞌ chichac yorob tiꞌ u tꞌʌn Cꞌuj quin tucric an ten bic cu tucricob xan.
Wa ber qꞌuin tiꞌ yʌn mac a yacsmʌnob tu yorob caj tus araꞌb ten mac soc u yacsicob u siꞌpir quin tucric cax cu yajtar in wor.
30 Jaj ix tiꞌ wa quin wuꞌyic tsoy in wor in bʌjiriꞌeꞌ jeꞌ in wuꞌyic tsoy in wor in bʌjiriꞌeꞌ tiꞌ a baꞌ cu yesic a baꞌ mʌꞌ cꞌuchaꞌan in wor tiꞌ.
31 A baꞌ caj in waꞌaraj techex,
a Cꞌujoꞌ yer wa taj a baꞌ quin waꞌaric.
Rajiꞌ Cꞌuj u Tet ic Jaj Tsꞌurirex Jesucristo.
Rajiꞌ in cꞌat in wiric tu cotor mac caꞌ yaꞌarob munt qꞌuin tiꞌ Cꞌuj:
“Jach caremech Cꞌuj!”
32 Ich u ruꞌumin a cu reyintic u rey Aretas,
tu yʌn u cajar Damasco.
Rajiꞌ a mac gobernador tu ricꞌsaj u tꞌʌnin soc u cꞌʌricob u jor u paꞌteꞌir tunich soc u cʌnantaꞌr ten soldado.
Mʌꞌ ja wirej,
u cꞌat u chuquiqenob caꞌ u mʌquenob tu cu naj maquicob mac.
33 Chen putsꞌen quireꞌ in wet acsaꞌorirob caj u yacsajenob ich yaja xac caj u jocꞌsob ich jor a tiꞌ yʌn ich u paꞌteꞌ tu cu chaꞌanob.
Raꞌ u paꞌtemʌnob u cajarob.
Jeroj,
caj u yemsajenob,
a baywoꞌ caj putsꞌen.