Quireꞌ Cristo mʌꞌ ju tucr u bʌjiriꞌeꞌ a mʌꞌ nacsaꞌb ten ich Cꞌuj caꞌanan
2
A techexoꞌ,
a werex tu chichquint a worex Cristo quireꞌ a baꞌ tu betaj Cristo uch.
A werex quiꞌ a worex quireꞌ u yajechex Cristo,
bayiriꞌ a werex cu cʌjtar ta pixʌmex u Tajꞌor u Pixam Cꞌuj,
bayiriꞌ tun,
toc pacran yajquintex a bʌjex.
2 Rajen quiꞌ in wor tiꞌ techex,
chen jach manan a quiꞌquintiquex in wor wa ca betiquex a jeꞌraꞌ.
Caꞌ a pꞌeriꞌquint a tucurex,
caꞌ a pacran yajquintex a bʌjex soc cꞌuchaꞌan a worex soc periꞌ a beyajex.
3 Rajen mʌꞌ a mʌꞌquintiquex u beyajob a wet acsʌꞌorirex.
Mʌꞌ a pacran nojquintiquex a bʌjex soc u tus tucricob jach nojechex a wet acsʌꞌorirex.
4 Caꞌ a sʌjtex a wet acsʌꞌorirex.
Mʌꞌ ja wirej,
jach manan tsoy wa mʌꞌ a nojquintiquex a bʌjex.
Mʌꞌ chen a nonoj bʌjiriꞌex ca pacran yajquintex,
quet caꞌ a pacran yajquintex a bʌjex.
5 Caꞌ a cʌnex u pixam Jesucristo.
6 Mʌꞌ ja wirej,
a Cristojoꞌ u bʌjiriꞌ Cꞌuj,
chen tu pꞌʌt u chichir u mucꞌ yejer u mucꞌ a yʌn tiꞌ uch.
7 Wa ber caj u ways u bʌj Jesús xib.
Rajiꞌ tarij quir u yamtic mac,
rajen caj u chꞌaꞌ u winquirir,
raꞌ u winquirir irej toꞌonex teꞌraꞌ ich yocꞌocab wa ber caj rochaꞌb ten u nʌꞌ uch.
8 Mʌꞌ tu chen chꞌaꞌ u winquirir irej toꞌonex.
Mʌꞌ chen oc tu cꞌurewir,
caj u quibaj u tꞌʌn u Tet tu yaꞌaraj caꞌ xic quimin ich cruz.
9 Caj quinsaꞌb ich cruz,
rajen caj ricꞌsaꞌb Cristo ten Cꞌuj ich u sasirir Cꞌuj.
Tu cotor mac rajen jach manan cu bin sʌjtaꞌbir u cꞌabaꞌ Cristo.
Mʌnaꞌ u jer quet cu bin sʌjtaꞌbir u cꞌabaꞌ ten mac tu cotor jariꞌ Cristo u cꞌabaꞌoꞌ.
10 Mʌꞌ ja wirej,
tu cotoroꞌonex a mac a tiꞌ yʌnob teꞌraꞌ ich yocꞌocab,
bayiriꞌ,
quet yejer a mac a tiꞌ yʌnob ich caꞌananoꞌ,
bayiriꞌ quet yejer a mac a tiꞌ yʌnob ich yaran ruꞌum,
jeꞌ u rʌc xontarob ich Cristo Jesúseꞌ.
11 A raꞌ u qꞌuininoꞌ tu cotoroꞌonex jeꞌ ij cariquex ʌcʌtan tu cotor maqueꞌ:
“A techoꞌ ic Jaj Tsꞌurirex.”
Aroꞌ jeꞌ ij cariquex ich ʌcʌtan tiꞌ Jesucristojeꞌ.
A baywoꞌ jeꞌ u tsicbarob tu cotor mac tiꞌ ic Tetex Cꞌujeꞌ:
“Jach manan tsoy ic Tetex Cꞌuj.”
Caꞌ ic yercꞌacꞌtej tu cotor mac a tiꞌ yʌn ich yocꞌocab quireꞌ a tenoboꞌ an ten biquenob a quiboꞌ
12 A techexoꞌ,
a mac in jach yajechex.
Tiꞌ toy yʌnen tu yʌnechex uch ta wesenex rajraꞌ ta quibex a baꞌ tꞌʌnin Cꞌuj caj u yaꞌaraj techex uch.
Rajen cax mʌnaꞌnen tu yʌnechex bajeꞌrer,
quibex a baꞌ tꞌʌnin Cꞌuj caj u yaꞌaraj techex uch.
Esex tiꞌ mac tu cotor ta cꞌʌmex a cuxtarex a ricꞌbenoꞌ.
Yʌn sʌjtex Cꞌuj.
Yʌn cꞌaj techex wa mʌꞌ cꞌuchaꞌan a worex a betex baꞌ ta junanex.
13 Mʌꞌ ja wirej,
a Cꞌujoꞌ tan u beyaj ta pixamex,
rajen a cꞌatex a betex a baꞌ u cꞌat Cꞌuj techexoꞌ.
Rajiꞌ jeꞌ u yamtiquechexeꞌ soc jeꞌ u cꞌuchur a worexeꞌ a betex a baꞌ u cꞌat Cꞌuj techexoꞌ.
14 Rajen tu qꞌuinin a Cꞌujoꞌ,
cu yaꞌaric u tꞌʌn techex,
toc quibex,
soc mʌꞌ a choquintiquex yor Cꞌuj,
soc mʌꞌ a nunquex u tꞌʌn Cꞌuj.
15 A baywoꞌ mʌꞌ ja bin a pʌyex a siꞌpirex,
a baywoꞌ jeꞌ u tsoytar a pixamex,
a baywoꞌ chʌcaꞌan yiric mac wa techex u pararechex Cꞌuj,
a baywoꞌ xan,
a mac a cu manob ich u siꞌpirob jeꞌ u yiricob wa mʌnaꞌ a siꞌpirexeꞌ.
Robob jeꞌ u yiricob techex an ten biquechex quibeꞌ,
a cu yercꞌacꞌtic u ber mac ich yacꞌbirir.
16 Mʌꞌ ja wirej,
jeꞌ a chaꞌiquex a mac a mʌꞌ u yerob Cꞌuj caꞌ u yirob u berir quir u cuxtarob.
Rajen wa ber caꞌ bin uruc Cristo,
jeꞌ u quiꞌtar in wor quireꞌ tiꞌ yʌnechex ich caꞌanan.
Mʌꞌ ja wirej,
chʌcaꞌan yiric tu cotor mac mʌꞌ jin sʌt in beyaj quireꞌ tiꞌ yʌnechex ich caꞌanan quireꞌ tsoy caj beyanʌjen tu yʌnechex uch.
17 Quireꞌ a techexoꞌ,
ta quiꞌ acsex ta worex tiꞌ Cꞌuj,
rajen mʌꞌ ja wacꞌtex a bʌjex quireꞌ ta mucꞌtex tu tu chucob ta pachex,
rajen quiꞌ a worex.
Bayiriꞌ jach quiꞌ in wor techex xan.
Bayiriꞌ xan,
yejeren wa quin quinsaꞌ,
quiꞌ in wor xan.
18 Quireꞌ jeꞌ u quiꞌtar in wor cax wa quin quinsaꞌ,
rajen quiꞌquint a worex ten xan.
A Pablojoꞌ cu tsicbar tiꞌ a mac cʌjaꞌan ich u cajar Filipos. Cu tsicbar tiꞌob tiꞌ Timoteo yejer Epafrodito
19 Wa baxuc u cꞌat ic Jaj Tsꞌurirex Jesucristo caꞌ in tuchiꞌtej caꞌ tac soc tabar u tar ij quet acsʌꞌorirex Timoteo.
Rajen caꞌ bin uruc Timoteo tin wicnʌn teꞌraꞌ tu yʌnen jeꞌ u tsicbar ten bictabarechex.
Jeroj,
jeꞌ u quiꞌquintic in wor Timoteojeꞌ quireꞌ a baꞌ ta betex a jach tsoyoꞌ techex.
20 Mʌꞌ ja wirej,
mʌnaꞌ u jer mac an ten bic Timoteo a cu yubic tsoyir u pixam a tiꞌoꞌ,
quireꞌ u manej qꞌuin cu jach pꞌisic u bʌj quir u yamtiquechex.
21 U jer mac tu cotor tan u manob u cʌxtob a baꞌ quiriꞌ u nonoj bʌjiriꞌ u cꞌatob tu junanob.
Mʌꞌ ju jach tucrob a baꞌ caꞌ u betob tiꞌ Jesucristo.
22 A techexoꞌ,
a werex wa Timoteo,
jach tsoy u pixam.
Rajiꞌ irej wa in parar,
quireꞌ quet caj binenob in tsecꞌticob u jach tsoyir u tꞌʌn Cꞌuj uch.
23 Rajen wa quin wuꞌyic a baꞌ cu bin tar ten.
Jeroj jeꞌ in tuchiꞌtic Timoteo techex soc pʌyber cu cꞌuchur tu yʌnechex.
24 A tenoꞌ,
tin tꞌʌn wa tsoy tu tꞌʌn tiꞌ ic Jaj Tsꞌurirex,
jach tabar in tar tu yʌnechex xan.
25 Quireꞌ mʌꞌ tabar in tarob tu yʌnechex bajeꞌrer,
rajen in wer jach manan tsoy wa jin wʌcꞌʌs tuchiꞌtic techex ij quet acsʌꞌorirex,
u cꞌabaꞌ Epafrodito.
Rajiꞌ jach tsoy beyanʌjij teꞌraꞌ yejerenob quireꞌ quet tu cotoroꞌonex u soldadojoꞌonex Cristo.
Rajiꞌ caj tuchiꞌtatenob uch soc u yamtiquenob quireꞌ caj tar uch caj u pꞌʌtenob a baꞌ ta sijatenob uch.
26 Rajiꞌ jach tsꞌanaꞌan yor tar u yirechex quireꞌ tucur u caꞌ.
Mʌꞌ ja wirej,
tu yubaj ta wuꞌyex rajiꞌ tu cʌn u yajir.
27 Jach jaj tu cʌnaj u yajir uch,
orac quimic xan.
Chen a Cꞌujoꞌ caj u yira otsir caj u yajquintaj.
Mʌꞌ chen yajquintaꞌb ten Cꞌuj,
a Cꞌujoꞌ caj u yiraj otsiren xan,
quireꞌ wa quimij uch Epafrodito jeꞌ in wacꞌtic caꞌcheꞌ.
28 Rajen tan in wʌcꞌʌs tuchiꞌtic techex Epafrodito bajeꞌrer soc u quiꞌtar a worex,
quireꞌ jeꞌ a wʌcꞌʌs iriquex Epafrodito.
Rajen jeꞌ u quiꞌtar in wor cax tiꞌ toy yʌnen teꞌraꞌ tu cu maꞌcʌr winicob.
29 Quiꞌquint a worex tun,
wa ber caꞌ bin cꞌuchuc Epafrodito tu yʌnechex.
Acsex a tiꞌoꞌ quireꞌ a wet acsʌꞌorirex.
Tu cotor mac a yʌn u pixam irej Epafrodito yʌn sʌjtex a tiꞌoꞌ.
30 Mʌꞌ ja wirej,
jach jaj orac quimic Epafrodito uch quireꞌ tu beyanʌjij tiꞌ Cristo.
Mʌꞌ tu cꞌʌs tucraj wa ju cuxtar quireꞌ yer a cꞌatex a tiꞌoꞌ caꞌ u pꞌis u bʌj tu beyaj quir u yamtiquen.
Rajen jach manan beyanʌjij quir u yamtiquen uch.