Tsꞌajaꞌan yor Pablo quireꞌ u cꞌat u cꞌuchur ich caꞌanan
3
Rajen in wet acsʌꞌorirex,
tabar in tsꞌocsic a baꞌ tan in tsꞌibtic techex bajeꞌrer ich a jeꞌ u juꞌuninaꞌ.
Quiꞌquint a worex ich ic Jaj Tsꞌurirex.
Cax yaꞌab u tenin caj in tsꞌibtajechex aroꞌ.
Jeꞌ in wʌcꞌʌs tsꞌibtic techex aroꞌ soc mʌꞌ u tusiquex mac.
2 Rajen uꞌyex baꞌ quin waꞌaric techex.
Quiꞌ cʌnantex a bʌjex tiꞌ a mac a mʌꞌ tsoy yorob quireꞌ a baꞌ cu beticob jach cꞌas.
Tan u camsicob a yacsmʌnob tu yorob:
“Yʌn,
quir a tsꞌiriquex a bʌqꞌuerex an ten bic nan u beticob u winiquirob judío.”
Rajen quiꞌ cʌnant a bʌjex tiꞌob.
3 Mʌꞌ ja wirej,
tu cu tsꞌiric u bʌqꞌuer an ten bic nanij cu beticob u winiquirob judío raꞌ u cꞌat u camsicoꞌonex rajiꞌ u tsꞌurir ic pixamex,
rajiꞌ u Tajꞌor u Pixam Cꞌuj.
A baywoꞌ cꞌuchaꞌan ij corex taj quij cꞌujintiquex Cꞌuj.
A baywoꞌ ij querex jeꞌ u taquicoꞌonex Jesucristo.
A baywoꞌ mʌꞌ raꞌ quir u taquicoꞌonex Cꞌuj quireꞌ a baꞌ quic betiquex.
4 Wa jix tiꞌ u tacbaroꞌonex Cꞌuj quireꞌ a baꞌ tic betex a jach manan tsoyoꞌ,
jeroj a tenoꞌ,
tu toc taquen Cꞌuj mʌnaꞌ u jer baꞌ caꞌ in betej quir u taquiquen Cꞌuj.
5 Quireꞌ caj manij tuririꞌ semana uch.
Caj tsꞌoc u rochiquen in nʌꞌ caj u tsꞌiraj in chan bʌqꞌuer an ten bic nan u beticob u winiquirob judío.
Quireꞌ a tenoꞌ u chꞌic pararen in nunquir Israel.
Raꞌ in woꞌnen u winiquirob benjamín,
a mac jach noꞌj ich u winiquirob israel.
In chꞌic sucuꞌun tsicbajnʌjij u tꞌʌn hebreo.
A uchoꞌ u winiquiren fariseo.
Caj in tus tucraj tan in jach quibic u tꞌʌn Cꞌuj a ricꞌsaꞌb u winiquirob israel.
Rajen in wer uch Cꞌuj jeꞌ u yiriquen an ten bic taj in woreꞌ.
6 A tenoꞌ caj in tus tucraj uch jach manan tan in cꞌujintic Cꞌuj.
Rajen caj in chuc u pachob a mac a yacsmʌnob tu yorob.
Mʌꞌ ja wirej,
tin tus tucraj tan in quibic u tꞌʌn Cꞌuj a araꞌb ten Cꞌuj tiꞌ u winiquirob israel,
rajen in wer Cꞌuj jeꞌ u yiriquen an ten bic taj in woreꞌ.
7 A baꞌ tin jach pachtaj uch a bajeꞌrereꞌ,
jot mʌꞌ baꞌwir a tenoꞌ.
In chen cꞌat Cristo caꞌ u yiren jach tsoy tu tꞌʌn.
8 Toc jumpuriꞌ caj in rʌc toc pichꞌintaj tu cotor baꞌ soc bajeꞌrer in wer Cristo Jesús an ten bic in Jaj Tsꞌurir.
Raꞌ jach manan tsoy.
Mʌꞌ ja wirej,
quireꞌ a baꞌ tu betaj Jesucristo,
rajen toc jumpuriꞌ tin toc rʌc pichꞌintaj tu cotor baꞌ an ten bic u pꞌupꞌir baꞌ.
Toc teniꞌ tin cꞌub in bʌj tu cꞌʌb Cristo.
9-10 U manej qꞌuin in wet man yejer Cristo,
tiꞌ yʌnen ʌcʌtan tiꞌ a Cristojoꞌ.
A Cꞌujoꞌ mʌꞌ ju yiren taj in wor quireꞌ a baꞌ tin betaj a jach tsoyoꞌ.
A Cꞌujoꞌ,
cu yiriquen taj in wor quireꞌ tin wacsaj tin wor tiꞌ Cristo.
Mʌꞌ ja wirej,
quireꞌ tij cacsex tij corex rajen Cꞌuj cu yiricoꞌonex an ten bic Cꞌuj a taj yoroꞌ.
Rajen in cꞌat caꞌ in cʌn Cristo soc mʌꞌ in chen tsꞌurintic tu cotor in siꞌpir an ten bic Cristo mʌꞌ ju tsꞌurint u siꞌpir,
rajen chen cꞌuchaꞌan yor tiꞌ wa ber caj riqꞌuij tu tꞌajaꞌan u baquer uch.
Rajen quin mucꞌtic a baꞌ cu tar ten an bic Cristo caj u mucꞌtaj soc quin quimij tiꞌ in siꞌpir an ten bic Cristo quimij a tiꞌoꞌ.
11 Mʌꞌ ja wirej,
in cꞌat in riqꞌuir ich u quimirir soc in cuxtar.
12 Mʌꞌ toy tsꞌocac u cꞌuchur in wor tiꞌ tu cotor aroꞌ,
quireꞌ mʌꞌ toc jach manan tsoyen.
Chen tan in pꞌisic in bʌj cu bin tsꞌaꞌbir ten,
wa quin cꞌuchur in cꞌʌmej tiꞌeꞌ rajen cu pʌyen Cristo.
13 Mʌꞌ ja wirej,
in wet acsʌꞌorirex,
mʌꞌ jin waꞌarej wa cꞌuchaꞌan in wor in tsꞌocsic a baꞌ tin tsꞌibtaj sam techex,
quij Pablo.
Uꞌyex baꞌ quin betic,
in cꞌat u tubur ten a baꞌ toc man in betic uchoꞌ.
A tenoꞌ tan in tucric a tu quin bin cꞌuchur bajeꞌrereꞌ.
14 Rajen tan in quiꞌ pꞌisic in bʌj bajeꞌrereꞌ soc u quiꞌ acsiquen Cꞌuj quireꞌ a baꞌ tu betaj Cristo uch.
Caꞌ bin cꞌuchuquen ich a caꞌananoꞌ,
quij,
cu boꞌotic u boꞌorir tuj in pꞌis in bʌj Cꞌuj.
15 Rajen a toꞌonexoꞌ a mac a tsꞌaꞌb ten Cꞌuj tu cotor baꞌ,
caꞌ ij quiꞌ tucrex tic pixamex tiꞌ soc a baywoꞌ quij Pablo.
Chen wa tiꞌ yʌn mac tuꞌ yʌnechex,
a mac a mʌꞌ baxuc u pixamob cu tucricob,
a Cꞌujoꞌ jeꞌ u tsꞌaꞌbʌr u najticobeꞌ.
16 Cax tu cotoroꞌonex mʌꞌ quet a baꞌ quic najtiquex aroꞌ.
Chen caꞌ ij quibex a baꞌ tu pʌy ic berex bajeꞌrereꞌ.
17 In wet acsʌꞌorirex,
cʌnex in pixam,
rajraꞌ caꞌ a quiꞌ pʌctex tu cotor mac a bayiriꞌ tu cʌnob in pixam xan.
18 Jach suꞌ caj in waꞌaraj techex tiꞌ in racꞌob wa jach cꞌas cu beticob quireꞌ chʌcaꞌan yiric wa cu pꞌacticob Cristo.
Mʌꞌ tu jach acsa tu yorob wa Cristo quimij ich u cruz toꞌonex.
A bajeꞌrereꞌ ocꞌar in caꞌ cax tan in waꞌaricob tiꞌob.
19 Quireꞌ bin u caꞌ satʌrob u pixamob.
Mʌꞌ ja wirej,
cu chen quibicob a baꞌ cu pachticob tu winquirir.
Mʌꞌ ja wirej,
cu binob ich cꞌas,
mʌꞌ ju chꞌa suraquirob ich u pixamob.
Tan u pachticob tu pixamob a baꞌ tiꞌ yʌn ich yocꞌocab.
20 A tenob tiꞌ yʌn in ruꞌumob ich caꞌananiꞌ quireꞌ tan in pajicob yuꞌur in wʌjtaquirob ich caꞌanan quireꞌ rajiꞌ in Jaj Tsꞌurirob Jesucristo.
21 Mʌꞌ ja wirej,
mʌnaꞌ u chichir u mucꞌ ic winquirirex a yʌn toꞌonex bajeꞌrereꞌ.
Rajiꞌ,
Cristo caꞌ bin uruc,
jeꞌ u tsꞌic toꞌonex u jer ricꞌben ic winquirirexeꞌ an ten bic Cristo u mucꞌ u winquirir rajiꞌ yʌn,
a baꞌ jach manan tsoy,
quireꞌ rajiꞌ yʌn tu cotor ic mucꞌ,
rajen rajiꞌ u tsꞌurir tu cotor baꞌ,
rajen cꞌuchaꞌan yor u betic u tsꞌic u mucꞌ ic winquirirex.