Quiꞌquintej a worex quireꞌ rajiꞌ ic Jaj Tsꞌurirex Jesucristo
4
Rajen in wet acsʌꞌorirex,
a mac in jach yaj.
A tenoꞌ,
in cꞌat in tar in wirechex.
Jach quiꞌ in wor quireꞌ a techexoꞌ.
Mʌꞌ ja wirej,
ta wuꞌyex in tꞌʌnob rajen a wacsmʌnex ta worex tiꞌ Cristo.
Rajen caꞌ bin cꞌuchuquen ich caꞌanan tu quin bin boꞌtbir ten Cꞌuj u boꞌorir in cꞌʌb.
Mʌꞌ a yʌn sutex ta pachex a techexoꞌ a mac in jach yajeꞌ.
2 A techoꞌ in wet acsʌꞌorirech Evodia yejer Síntique,
in wet acsʌꞌorirech xan.
Quin chich aric techex,
mʌꞌ a pacran nunquic a tꞌʌnex.
Pꞌeriꞌquint a worex ʌcʌtan tiꞌ Cꞌuj.
3 Bayiriꞌ xan,
a techoꞌ in wet acsʌꞌorirech quireꞌ quet quic beyajex tiꞌ ic Jaj Tsꞌurirex,
chʌc yamtej a jeꞌ xquicaꞌ a tan in tsꞌibtic tiꞌob bajeꞌrer,
pꞌeriꞌ caj beyanʌjenob yejer Clemente yejer u jer yaꞌab mac,
a mac tsꞌibaꞌan ten Cꞌuj ich u juꞌunin a tu tsꞌibaꞌan quir ij cuxtarex munt qꞌuin.
4 Rajraꞌ quiꞌquint a worex quireꞌ rajiꞌ ic Jaj Tsꞌurirex.
Cax a baꞌ cu tareꞌ quin wʌcꞌʌs aric techex,
quiꞌquint a worex.
5 Yʌn esex tiꞌ tu cotor mac soc yerob u jach tsoyir a pixamex,
quireꞌ tabar u yuꞌur ic Jaj Tsꞌurirex.
6 Mʌꞌ a chen tucriquex baꞌ,
chichin.
Tu cotor a baꞌ u cꞌat a pixamex tꞌʌnex Cꞌuj tiꞌ a pixam.
Yʌn cꞌaj techex,
wa rajiꞌ tu yamtechex uch.
Mʌꞌ u yʌn tubur techex mun u yaꞌabir caj u yam techex uch.
7 A baywoꞌ jeꞌ u tsꞌaꞌbʌr techex ten Cꞌuj ta pixamex soc mʌnaꞌ baꞌ ca tucriquex.
Aroꞌ jach manan mʌnaꞌ baꞌ quic tucriquex cax wa tic tucrex uch.
Quireꞌ a jeꞌraꞌ mʌꞌ baꞌ quic bin ic tucrex quireꞌ ij quet manex Cristo.
Ca chen tucriquex a baꞌ jach tsoyoꞌ
8 In wet acsʌꞌorirex,
tan in waꞌaric techex a jeꞌraꞌ,
tabar in tsꞌocsic in tsꞌibtic techex ich a jeꞌ juꞌunaꞌ.
Caꞌ a chen tucrex a baꞌ tajiꞌ,
a baꞌ caꞌ a yʌn sʌjtex,
a baꞌ u jach tajir,
a baꞌ quet yejer u tꞌʌn Cꞌuj,
a baꞌ jach manan tsoy,
a baꞌ tsoy tu tꞌʌn Cꞌuj,
a baꞌ mac cu yaꞌaric jach tsoy tu cotor,
a tsoy ca betiquex raꞌ a yʌn tucrex a tiꞌoboꞌ.
9 A techexoꞌ,
caꞌ a yʌn betex a baꞌ tin chaj a cʌniquex,
a baꞌ tin pꞌʌtaj yejerechex uch,
tu cotor tin waꞌaraj techex wa ta wirex ber tin betajiꞌ.
A baywoꞌ a wet manex yejer Cꞌuj,
a mac a cu tsꞌic toꞌonex baꞌ soc mʌnaꞌ baꞌ quic tucriquex.
Jach quiꞌ in wor quireꞌ ta wʌcꞌʌs cꞌʌꞌotajenex
10 Ʌcʌtan ic Jaj Tsꞌurirex jach manan quiꞌ in wor bajeꞌrer quireꞌ tan ta wʌcꞌʌs cꞌʌꞌotiquenex.
In wer rajraꞌ tan a cꞌʌꞌotiquenex ta pixamex.
Jariꞌ yʌn qꞌuin mʌꞌ cꞌuchaꞌan a worex a wiriquenex soc a yamtiquenex.
11 Mʌꞌ tan in waꞌaric aroꞌ quireꞌ otsichʌjen.
Quireꞌ wa yʌn ten baꞌ,
cax wa mʌnaꞌ ten baꞌ,
mʌꞌ jin tucrej,
a baywoꞌ tin cʌnaj.
12 In wer bic tabar in cuxtar cax otsichʌjen cax ricochʌjen.
A Cꞌujoꞌ tu chaꞌ in wacsic tin wor wa quin mucꞌtic tu cotor baꞌ,
cax wa yʌn ten yaꞌab in woꞌoch,
cax wa wiꞌchʌjen,
cax wa yʌn ten tu cotor in baꞌtac,
cax wa mʌnaꞌ in baꞌtac.
13 Jeroj cꞌuchaꞌan in wor in mucꞌtej tu cotor baꞌ quireꞌ Jesucristo quireꞌ rajiꞌ cu chichquintic in wor.
14 Rajen jach tsoy caj a tucrenex an ten bic mac jach otsichʌjij,
irej wa tan u mucꞌyaj.
15 Mʌꞌ ja wirej,
a techexoꞌ,
a mac cʌjaꞌanob ich u cajar Filipos.
A techexoꞌ,
a werex tin batꞌan tsecꞌtaj u jach tsoyir u tꞌʌn Cꞌuj ta ruꞌumex a techexoꞌ.
A techexoꞌ,
a werex xan,
wa ber tin pꞌʌtaj u ruꞌumin tiꞌ taroꞌ,
wa ber tin pꞌʌtaj Macedonia raꞌ u cꞌabaꞌ u ruꞌumin.
A techexoꞌ,
a werex mʌnaꞌ mac ich u jer ij quet acsʌꞌorirex a mac a tu yamtenob mʌꞌ ju cꞌʌs tsꞌaja tenob baꞌ,
jariꞌ techex ta yamtenex.
16 Tiꞌ toy yʌnen uch ich u cajar Tesalónica tu caꞌten techex ta tuchiꞌtenex a baꞌ in cꞌat uch.
17 A tenoꞌ tin waꞌaraj ta betex tsoy ten.
Mʌꞌ chen jariꞌ tin cꞌʌmaj a baꞌ ta sijatenex,
chen ta quiꞌquintex u yor Cꞌuj xan,
rajen jach manan quiꞌ in wor,
quij Pablo.
18 A tenoꞌ tin cꞌʌmaj tu cotor a baꞌ yʌn ten bajeꞌrer,
a baꞌ jach manan yaꞌab ten bajeꞌrer.
A tenoꞌ jach tsoyen quireꞌ tin cꞌʌmaj a baꞌ ta tuchiꞌtenex yejer Epafrodito.
Ta jach quiꞌquintex yor Cꞌuj quireꞌ a baywoꞌ ta sijatenex.
A Cꞌujoꞌ chʌcaꞌan yiric a mun ta sijatenex,
rajen quiꞌjij yor Cꞌuj,
quireꞌ a baꞌ ta betex ten.
19 Rajen ij Cꞌujirex jeꞌ u tsꞌic techex tu cotor a baꞌ a cꞌatexeꞌ.
Jach manan tsoy jeꞌ u tsꞌabʌr techex ten Cꞌuj quireꞌ a baꞌ tu betaj Jesucristo uch.
20 Rajen caꞌ sʌjtac ij Cꞌujirex munt qꞌuin ten tu cotor mac.
Cu tꞌʌnic u yet acsʌꞌorirob Pablo
21 Tꞌʌnex ten tu cotor mac a yacsmʌnob tu yorob tiꞌ Jesucristo.
Tu cotor ij quet acsʌꞌorirex a tiꞌ yʌnob tin wicnʌn teraꞌ,
cu tꞌʌniquechexob.
22 Tu cotor mac a yacsmʌnob tu yorob tiꞌ Cristo a tiꞌ yʌnob teraꞌ,
cu tꞌʌniquechex xan.
Tu cotor mac a tiꞌ yʌnob tu yatoch u rey César,
a yacsmʌnob tu yorob,
cu tꞌʌniquechex xan.
23 A tenoꞌ in cꞌat tiꞌ ic Jaj Tsꞌurirex Jesucristo caꞌ u quiꞌ cʌnantechex.
Jeroj tsꞌoc in tsꞌibtic techex,
quij Pablo.