U beyaj Pablo ich u cajar Tesalónica
2
Mʌꞌ ja wirej,
a tenoꞌ in cꞌat a wertiquex wa quin tucriquechex quet yejer a mac a cʌjaꞌan ta cajarex Laodicea,
bayiriꞌ quet yejer a mac a mʌꞌ yirmʌnob.
2 Quireꞌ a tenoꞌ in cꞌat in chichquintic a worex soc jach manan ca pacran yajquintiquex a bʌjex,
soc a baywoꞌ a werex u tꞌʌn Cꞌuj a ta wacsex ta worex rajiꞌ taj.
Bayiriꞌ xan,
soc jach manan a werex Cristo,
quireꞌ a uchoꞌ,
mac mʌnaꞌ yerob u tꞌʌn Cristo.
3 A Cristojoꞌ jeꞌ u tsꞌic toꞌonex caꞌ ic najtex baꞌ wa quij cꞌatiquex tiꞌ,
soc ij querex a baꞌ tsoy caꞌ ic betex.
4 Bayiriꞌ tan in waꞌaric techex aroꞌ soc mʌꞌ u tusaric techex cax tsoy u tsicbarob techex.
5 Jach taj mʌꞌ tiꞌ yʌnen tu yʌnechex bajeꞌrer,
chen tan in cꞌʌꞌotiquechex.
Jach quiꞌ in wor quireꞌ in wer taj ta wacsex ta worex,
bayiriꞌ,
pꞌeriꞌ a worex ich u beyaj ic Jaj Tsꞌurirex Jesucristo.
6 Raꞌiriꞌ qꞌuin caj a cꞌʌmex Cristo Jesús soc rajiꞌ a Jaj Tsꞌurirex,
yʌn manenex tu tsoyir,
quireꞌ a wet manex Cristo bajeꞌrer.
7 Toc jumpuriꞌ u tsꞌurint a pixamex soc a betiquex a baꞌ cu yaꞌaric techex Jesús,
an ten bic caj camsꞌb ten yʌjcamsayʌjirob techex.
Jeꞌ u nechichtar a worex a wacsiquex ta worex,
rajraꞌ tan a waꞌariquex tiꞌ Cꞌuj:
“Bayoꞌ Cꞌuj”,
quechex tiꞌ.
Ricꞌbenchʌjij ic pixamex ten Cristo
8 Quiꞌ cʌnantex a bʌjex soc mʌnaꞌ mac a cu tarob u camsiquechex tꞌʌn soc mʌꞌ a pꞌʌtiquex bic caj a wacsex ta worex quireꞌ a baꞌ cu tus camsiquechex.
Mʌꞌ ja wirej,
u tusarbar techex u tꞌʌnoꞌ quireꞌ mʌꞌ tajiꞌ,
quireꞌ a baꞌ cu tus camsicob mac raꞌ u tꞌʌn winic,
mʌꞌ u tꞌʌn Cꞌuj.
Quireꞌ a baꞌ cu camsicob raꞌ cu yaꞌaricob u nunquirob.
A ray tꞌʌnoꞌ mʌꞌ u tꞌʌn Cristo.
Robob a yʌjcamsayʌjirob,
cu camsicob u tꞌʌn ich yocꞌocab.
9 Mʌꞌ ja wirej,
a Cristojoꞌ u bʌjiriꞌ Cꞌuj.
10 Quireꞌ tiꞌ yʌn Cristo ta pixamex,
rajen mʌꞌ baꞌwir quir a cꞌʌmiquex u jer.
Mʌꞌ ja wirej,
a Cristojoꞌ yʌn u mucꞌ rajen raꞌ cu tsꞌurintaꞌr ten tu cotor mac a yʌn u mucꞌob xanoꞌ cax a teꞌ yʌn ich yocꞌocab cax a yʌn u mucꞌ ich a quisinoꞌ.
11 Quireꞌ rajiꞌ Cristo yʌninechex,
jeroj ricꞌbenchʌj a pixamex quireꞌ rajiꞌ yʌninechex.
Mʌꞌ ja wirej,
ta pꞌʌtex a cꞌasirex a ta betex uchoꞌ quireꞌ betaꞌb a pixamex ten Cristo soc ricꞌben a pixamex.
12 Mʌꞌ ja wirej,
caj acsaꞌb jaꞌ ta joꞌrex irechex a tꞌajaꞌan a baquerex tu japnin tunich a ten bic tꞌoj u baquer Cristo ich japnin tunich uch.
Jeroj caj tsꞌoc u yacsic jaꞌ ta joꞌrex irechex ricꞌsaꞌbechex ta quimirirex an ten bic Cristo caj ricꞌsaꞌb tu quimirir xan.
Mʌꞌ ja wirej,
ta wacsex ta worex tiꞌ Cꞌuj a mac chich u mucꞌ,
quireꞌ tu ricꞌsaj Jesús tu quimirir xan.
13 A techexoꞌ,
tu cajar Colosas,
quireꞌ quimechex ʌcʌtan tu wich Cꞌuj uch,
quireꞌ acaꞌan techex ta siꞌpirex,
bayiriꞌ xan,
mʌꞌ ta quibex u tꞌʌn Cꞌuj.
Mʌꞌ jariꞌ,
quireꞌ mʌꞌ u winiquirechex judío,
rajen mʌꞌ a werex a baꞌ cu yaꞌaric u tꞌʌn Moisés.
Chen bajeꞌrer,
toc ricꞌsaꞌbechex quir a cuxtarex yejer Cristo,
a mac tu jawsaj a siꞌpirex bajeꞌrer.
14 A Cꞌujoꞌ,
mʌꞌ tu chen jawsaj ic siꞌpirex,
tu rʌc rucꞌsaj u tꞌʌn Moisés,
a cu taꞌquic ic joꞌrex tiꞌ ic siꞌpirex.
A raꞌ u qꞌuinin caj quinsaꞌb Jesús ich cruz,
raꞌiriꞌ u qꞌuinin toc rucꞌsaꞌb u tꞌʌn Moisés.
15 Bareꞌ caj quimij Jesús ich cruz,
a ray u qꞌuininoꞌ,
caj rubsaꞌb u mucꞌ a quisinoꞌ yejer yet quisinin.
Quireꞌ quimij Jesús ich cruz,
Cꞌuj tu yesaj,
tu toc chꞌesaj u mucꞌ quisin,
quireꞌ u parar Cꞌuj cꞌuchaꞌan yor tiꞌ a quisinoꞌ.
Rajen,
mʌꞌ u cꞌuchur yor toꞌonex a quisinoꞌ.
Caꞌ a cʌxtex a baꞌ tsoy tu tꞌʌn Cꞌuj
16 Rajen,
mʌꞌ a chꞌic suraquirex wa mac cu pʌqꞌuic a pachex,
cax a baꞌ ca jantiquex,
cax a baꞌ ca wucꞌurex,
cax wa mʌꞌ a cʌnantiquex u qꞌuinin tu cu quiꞌ janʌnob wa raꞌ ic nʌꞌoꞌ,
cax wa raꞌ yaxqꞌuinoꞌ,
cax wa raꞌ u qꞌuinin tu cu jeꞌrar u winiquirob judío.
17 Aroꞌ a tin chen araj techex,
cu chen camsicoꞌonex,
yʌn toy a cu bin tar caꞌ bin cꞌuchuc tu qꞌuinin soc a werex a jach tajoꞌ,
a rayoꞌ chen u yochir ca wiriquex.
Rajen aroꞌ mʌꞌ nojiꞌ,
quireꞌ caj tarij Cristo ich yocꞌocab jeroj rajiꞌ u bʌjiriꞌ ic Jaj Tsꞌurirex.
18 Mʌnaꞌ mac yʌn aric techex wa mʌꞌ tsoy bic tabar ca cꞌujintiquex Cꞌuj,
quireꞌ tan a wesiquex wa mʌꞌ caremechex.
Tan u chich aricob techex wa caꞌ a cꞌujintiquex u yʌjmasirob u tꞌʌn Cꞌuj.
Robob,
cu tusaricob tu tu wʌyʌcꞌtajob Cꞌuj,
rajen tsoy tu tꞌʌn.
Mʌꞌ a quibiquex tiꞌob quireꞌ cu tusaricob jach caremob.
Cꞌas cu tucricob rajen jot aroꞌ.
19 Robob cu tus tucricob ij quet acsʌꞌorirex,
cax mʌꞌ tan u sayʌrob tu pach a baꞌ cu camsicoꞌonex Cristo,
a mac ic Jaj Tsꞌurirex,
quireꞌ rajiꞌ ic joꞌrex.
Mʌꞌ ja wirej,
rajiꞌ cu chichquintic u mucꞌob tu cotor in winquirirob.
Rajen,
cꞌuchaꞌan ij corex ic beyajex tiꞌ Cristo,
a baywoꞌ jeꞌ ic tsoytarex an ten bic Cꞌuj u cꞌat u tsoyquinticoꞌonex.
20 A techexoꞌ tu cajar Colosas,
a werex caj quimij Cristo quet quimechex xan.
Rajen,
baꞌwir ca chaꞌiquex u jer u chich aricob techex caꞌ a cꞌujintiquex Cꞌuj an ten bic u tus ʌjcamsayʌjirob u tꞌʌn Cꞌuj u cꞌatob.
21 Rajen mʌꞌ a quibiquex a cu yaꞌaricob:
“Mʌꞌ a tʌriquex a jeꞌraꞌ,
quij.
Mʌꞌ a chiꞌiquex aroꞌ,
quij,
mʌꞌ a tumtiquex ara xanoꞌ.”
22 Mʌꞌ ja wirej,
aroꞌ chen u bʌjiriꞌob u tꞌʌnob.
Aroꞌ jariꞌ u tꞌʌn winic tan a quibiquex,
mʌꞌ u tꞌʌn Cꞌujiꞌ.
A uchoꞌ,
mʌꞌ noꞌj quic chen cꞌʌniquex quireꞌ ic jantiquex.
23 A baꞌ cu chich aricob techex caꞌ a cʌnex yejer a baꞌ cu camsiquechex cu tus tucricob jach manan tsoy.
Rajen cu tus cꞌujinticob a baꞌquiriꞌ u bʌjiriꞌob tu tucrajob.
Mʌꞌ ja wirej,
cu tus tucricob mʌꞌ necaremob tu cu tus cꞌujinticob yʌjmasirob u tꞌʌn Cꞌuj.
Tan u tsꞌaꞌbʌr u mucꞌyajob u wʌcꞌʌs winquirir quireꞌ cu tus tucricob jach tsoy tu wich Cꞌuj aroꞌ.
Cax cu beticob aroꞌ mʌꞌ ju cꞌuchur yorob u pꞌʌticob a baꞌ cꞌasir cu pachticob tu yorob xan.