3
Mʌꞌ ja wirej,
wa ber caj ricꞌsaꞌb Jesús ten Cꞌuj uch quir u cuxtar quet bayiriꞌ ricꞌsaꞌbechex xan,
quir a cuxtarex soc a manex tu tsoyir.
Rajen caꞌ a cʌxtex a baꞌ tsoy tu tꞌʌn Cristo,
a rajiꞌ tiꞌ yʌn ich u noj Cꞌuj quireꞌ rajiꞌ jach yʌn u mucꞌ Cꞌuj a caremoꞌ.
2 Toc tsꞌajex a tucurex tiꞌ a baꞌ u cꞌat Cꞌuj.
Rajraꞌ caꞌ tucriquex a tiꞌoꞌ soc mʌꞌ a chen cʌxtiquex a baꞌ yʌn teꞌ ich yocꞌocabaꞌ.
3 Quireꞌ a techexoꞌ quimenechex tiꞌ a baꞌ oc a tsꞌurintajex uch,
a tu pʌy a siꞌpirex uch.
Toc yʌn a cuxtarex munt qꞌuin a tan u cʌnantaꞌr ten Cristo techex bajeꞌrereꞌ.
4 Caꞌ bin uruc Cristo a raꞌ cu cʌnantic,
ij cuxtarex munt qꞌuin,
a raꞌ cu bin u tsꞌic toꞌonex.
A raꞌ u qꞌuininoꞌ,
Jesús cu bin esbir ten Cꞌuj ich u sasirir quet yejeroꞌonex a mac a yacsmʌnob tu yorob tiꞌ Cristo.
A baꞌ tic tsꞌurintaj uch yejer a baꞌ tic tsꞌurinta bajeꞌrer
5 Rajen,
in wet acsʌꞌorirex,
toc jumpuriꞌ caꞌ a pꞌʌtex a manex ich a cꞌasirex a tiꞌ yʌn a teraꞌ ich yocꞌocab a ca pachtiquex ta winquirirex.
Jot,
quij,
mʌꞌ a man a wirej a mʌꞌ u mamiꞌ,
bayiriꞌ xan a mʌꞌ man a wirej a mʌꞌ a raqꞌuiꞌ,
quij.
Jot,
mʌꞌ a muc a pʌyej xquic ich u racꞌob.
Jot,
quij,
mʌꞌ a pachtic xquic ta wor,
bayiriꞌ mʌꞌ a pachtic xib ta wor soc mʌꞌ a bin yejer.
Jot,
quij,
mʌꞌ a pachtic u baꞌtac soc tech yʌnin chꞌic yaꞌab.
Mʌꞌ ja wirej,
a mac a cu pachtic u baꞌtac soc rajiꞌ yʌnin yaꞌab,
rajiꞌ quet yejer a cu tus cꞌujinticob u tus cꞌuj.
6 Mʌꞌ ja wirej,
a mac a tiꞌ toy cu manob ich a ray u cꞌasiroꞌ,
caꞌ bin cꞌuchuc tu qꞌuinin u xur tꞌʌn,
bin u caꞌ tsꞌaꞌbʌr u mucꞌyaj ten Cꞌuj a tiꞌoboꞌ.
7 Cꞌaj techex,
a uchoꞌ ta wacsex a siꞌpirex irechex a wet cajarex,
raꞌ u qꞌuinin ta tsꞌurintex a cꞌasiroꞌ a tin tsꞌibtaj techex bajeꞌrer.
8 Quireꞌ bajeꞌrer,
tsꞌoc a pʌyiquex a siꞌpirex an ten bic a uchoꞌ,
rajen cʌnex a wet acsʌꞌorirex xan,
tan a pꞌʌtiquex a cꞌasoꞌ bajeꞌrer.
Rajen,
caꞌ a pꞌʌtex a jeꞌraꞌ,
pꞌʌtex a pꞌujurex.
Pꞌʌtex a tsꞌictarex.
Pꞌʌtex a pꞌactex ta worex a racꞌob.
Pꞌʌt a chejtiquex a racꞌob.
Pꞌʌt a tsicbarex tiꞌ cꞌas.
9 Toc rʌc pꞌʌtex a pacran tusex,
quireꞌ ta toc rʌc pꞌʌtex a baꞌ cꞌasir nani a pʌyiquex uch.
10 Mʌꞌ ja wirej,
a cꞌʌmʌnex a ricꞌben cuxtarex bajeꞌrer,
rajen tan a nequiꞌ cʌniquex Cꞌuj soc ca pꞌeriꞌquintiquex a tucurex yejer Cꞌuj a mac a tu betajechexoꞌ.
11 Rajen cax mʌꞌ u winiquirechex judío,
cax wa ju winiquirechex judío,
cax wa ta quibex a tsꞌiriquex a wotꞌerex an ten nani u beticob u winiquirob judío,
cax wa mʌꞌ ta quibex a tsꞌiriquex a wotꞌerex an ten nani u beticob u winiquirob judío,
cax wa ja werex juꞌun,
cax wa mʌꞌ a werex juꞌun,
cax wa ju cꞌurewechex mac,
cax wa mʌꞌ u cꞌurewechex mac,
a baꞌquir toc jach nojoꞌ wa pꞌeriꞌoꞌonex yejer Cristo quireꞌ rajiꞌ acaꞌan tic pixamex.
12 A techexoꞌ u winiquirechex Cꞌuj.
Quireꞌ tu yajquintechex Cꞌuj rajen tu tetechex soc rajiꞌ yʌninechex.
Quireꞌ tan a cʌniquex Cꞌuj a bajeꞌreraꞌ,
caꞌ a yajquintex a racꞌobex,
quireꞌ caꞌ a yamtex a tiꞌoboꞌ,
mʌꞌ tsꞌutechex yejerob a wet acsʌꞌorirexiꞌ.
Caꞌ a toc tucrex a wet acsʌꞌorirex an bic tsoyoꞌ,
mʌꞌ a cʌxtiquex a baꞌquiriꞌ a bʌjiriꞌex a cꞌatexeꞌ.
Caꞌ a cʌnex nemʌꞌ biquechex yejer a mac a cu pꞌusiquexob,
quireꞌ mʌꞌ ja nunquicobex tiꞌ.
13 Yʌn mucꞌtex u choquintic a worex a wet acsʌꞌorirex.
Cax wa tu choquint a worex a wet acsʌꞌorirex,
yʌn jawsex u siꞌpir a tiꞌoꞌ,
cax wa baꞌquir u choquintic a worex an ten bic toc jawsaꞌb a siꞌpirex ten ic Jaj Tsꞌurirex Jesús.
Yʌn toc jawsex u siꞌpir a wet acsʌꞌorirex xan.
14 Quireꞌ a werex a baꞌ jach manan noꞌjoꞌ wa ca yajquintiquex a wet acsʌꞌorirex.
Rajen cu pꞌeriꞌquinticob yorob u yet acsʌꞌorirob quireꞌ u yajob u bʌj rajen quet yorob yejer yet acsʌꞌorirob.
15 Mʌꞌ ja wirej,
a Cristojoꞌ tu pʌyechex u bʌjiriꞌ soc a pꞌeriꞌquintic a worex yejer Cristo.
Rajen caꞌ a pachtex a pꞌeriꞌquintic a worex yejer a wet acsʌꞌorirex.
Mʌꞌ a betiquex a baꞌquir a cu jocꞌsic yor a wet acsʌꞌorirex.
16 A techexoꞌ,
caꞌ a chaꞌex u tsꞌurintic u tꞌʌn Cꞌuj a pixamex soc cꞌuchaꞌan a worex a pacran camsiquex a bʌjex xan,
soc a pacran chich tꞌʌniquex a bʌjex,
quij,
a baywoꞌ jeꞌ a cꞌʌyiquex u cꞌay Cꞌuj,
soc a waꞌariquex:
“Bayoꞌ tiꞌ Cꞌuj.”
17 Tu cotor a baꞌ beyajir ca betiquex,
cax tu ca tsꞌicbarex,
cax tu ca beyajex caꞌ a wesex tiꞌ mac soc yer mac rajiꞌ yʌninechex wa a Jaj Tsꞌurirex Jesucristo.
Rajiꞌ jeꞌ u yamtiquechex soc a wʌcꞌʌs ariquex:
“Bayoꞌ tiꞌ ic Tetex Cꞌuj.”
Quireꞌ tij cacsex tij corex tiꞌ Cristo caꞌ ij quibex a jeꞌ tꞌʌnaꞌ
18 A mac a chꞌaꞌb raqꞌuinbir ten xib,
a xquicoꞌ caꞌ u quib u tꞌʌn u mam,
quireꞌ tu yacsaj tu yor tiꞌ Cristo.
19 A mac mamintaꞌb ten xquic caꞌ u yajquint u racꞌ,
caꞌ u quiꞌ cʌnantej soc mʌꞌ u tsꞌictar tiꞌ u racꞌ.
20 Arej tiꞌ a pararex,
soc u quibob u tꞌʌn u tet yejer u nʌꞌob soc u quiꞌquinticob yor Cꞌuj.
Rajraꞌ caꞌ u quibob u tꞌʌn u tetob,
quireꞌ tu yacsob tu yorob tiꞌ Cristo.
21 U tetechex a pararex,
mʌꞌ a yʌn tsꞌiquintiquex a pararex soc mʌꞌ a tupsiquex yorob a pararex.
22 A mac cꞌurewintaꞌb ten u jach tsꞌurir.
Rajraꞌ caꞌ a quibex u tꞌʌn a jach tsꞌurirex.
Mʌꞌ a chen quibiquex tu qꞌuinin tu cu tar yir a beyajex soc a wuꞌyiquex yaꞌaric techex a jach tsꞌurirex:
“Jach tsoyechex quireꞌ ca beyajex.”
Caꞌ a quiꞌ beyanʌquechex taj quireꞌ ca sʌjtiquex Cꞌuj.
23 Tu cotor a baꞌ ca betiquex,
quiꞌ beyanenex quireꞌ tan a quiꞌ beyajex tiꞌ Cꞌuj,
cax tiꞌ a jach tsꞌurirex xan ca beyajex.
24 Yʌn cꞌaj techex a Jaj Tsꞌurirex jeꞌ u boꞌotiquechex u boꞌorir a cꞌʌbex wa ja woquex xan.
Jeꞌ a cꞌʌmiquex a cuxtarex munt qꞌuin tiꞌ Cristo xan,
quireꞌ rajiꞌ a Jaj Tsꞌurirex tu ca beyajex tiꞌ xan.
25 A Cꞌujoꞌ quet cu yiric tu cotor mac,
quireꞌ cu boꞌotic u boꞌorir mac,
a baꞌ cu jaric,
cax wa mʌꞌ quiꞌ beyanʌjiꞌ mʌꞌ ju quiꞌ boꞌtar.
Wa tsoy quiꞌ beyanʌjij cu quiꞌ boꞌtaꞌr.