Tiꞌ cu beyaj Pablo yejer u racꞌob ich u cajar Tesalónica
2
A bʌjiriꞌeꞌ,
quij Pablo,
in bʌjobechex a werex caj tarenob in wirechexob.
Caj in tsicbʌtob techex quireꞌ tu tsꞌaj tenob in mucꞌ u Tajꞌor u Pixam Cꞌuj.
2 Mʌꞌ wa cꞌajtechex caj tarenob tu cʌjaꞌanechex uch,
caj cꞌuchenob tu cajar Filipos.
Tiꞌ tu pꞌastenob tu cajar Filipos.
Tiꞌ tu chuc u jʌtsꞌenob in pachob.
Aroꞌ a werex caj u jʌtsꞌob in pachob.
A mac a quin cꞌujinticob a jach Cꞌujoꞌ,
caj u yamtenob caj in tsecꞌtechex soc a najtiquex a jach tsoyir u tꞌʌn Cꞌuj.
3 Cax mʌꞌ u chaꞌicob a wuꞌyiquex u tꞌʌn Cꞌuj,
cax caj u chejtenob,
a tenoboꞌ caj in tsicbatob a wuꞌyex u tꞌʌn Cꞌuj.
Caj tarenob mʌꞌ cꞌas tin waꞌarob techexiꞌ.
In werob u jach tajir u tꞌʌn Cꞌuj.
Mʌꞌ tarenob quir in tus aricob techexiꞌ.
Mʌꞌ tarenob quir in cꞌaticob a taqꞌuinexiꞌ.
Chen jach tarenob,
mʌꞌ ja wirej,
a Cꞌujoꞌ tu tumtaj yirej wa tsoy in worob.
Caj tsꞌoc yiriqueꞌ caj u tuchiꞌtenob caꞌ xiquenob in tsicbarob tiꞌ u jach tsoyir u tꞌʌn Cꞌuj.
4 A mac a yer ic pixamex,
a Cꞌujoꞌ yer ic pixamex.
Rajiꞌ in cꞌatob in quiꞌquinticob yor Cꞌuj.
Mʌꞌ in cꞌatob in quiꞌquinticob yor xibiꞌ tu quin tsicbarob u tꞌʌn Cꞌuj.
5 Quireꞌ caj tarenob mʌꞌ tin tsicbʌtob bic tabar jach tsoyechexiꞌ.
Baxuc a werex.
Mʌꞌ in tusarob techex soc a quiꞌ acsiquenobex.
Mʌꞌ jin tus pachtob u tꞌajʌr in taqꞌuinobiꞌ.
A Cꞌujoꞌ cu yiric mʌꞌ jin tusarob techex.
6 Mʌꞌ tarenobiꞌ quir u sʌjtiquenob u jer winicobiꞌ cax wa techex xan.
Mʌꞌ ja wirej,
cꞌuchaꞌan in worob in cꞌatiquechexob caꞌ a sʌjtenob quireꞌ tu tuchiꞌten ten Cristo quir in tsecꞌtic u jach tsoyir u tꞌʌn Cꞌuj tu yʌnechex.
7 Mʌꞌ tin cꞌatob techex caꞌ a sʌjtenobiꞌ quireꞌ quin quiꞌ yajquinticob techex.
Mʌꞌ ja wirej,
tin cʌnatechexob irenob a nʌꞌenob a techexoꞌ.
Tan in quiꞌ tsemtiquechexob irechex in pararob soc in quiꞌ cʌnantiquexob.
8 A tenoboꞌ jach manʌn caj in yajquintob techex.
Rajen mʌꞌ jariꞌ quin tsꞌicob techex u jach tsoyir u tꞌʌn Cꞌuj,
cax quin quinsaꞌob tiꞌ techex xan.
9 Mʌꞌ ja wirej,
jach manan chich beyajenob uch?
Chich beyanʌjenob tu yʌnechex ich techexoꞌ soc in jaricob in taqꞌuinob soc raꞌ quir in janʌnob.
Chich beyanʌjenob soc mʌꞌ in tꞌʌnicob mac quir u tsꞌic in woꞌochob soc in tsecꞌticob techex u jach tsoyir u tꞌʌn Cꞌuj uch.
10 Raꞌ ta wirex uch.
Caj a wirexiꞌ tiꞌ cʌjaꞌanenobiꞌ ta wicnʌnex uch.
Baxuc Cꞌuj tu yiraj mʌnaꞌ baꞌ tin betob.
Quiꞌ manenob tu tsoyir tu yʌnechex a tu yacsajob tu yorob u tꞌʌn Cꞌuj uch.
Cꞌuj caj yiraj mʌꞌ baꞌ tin betob soc a taꞌquic in joꞌrob.
11 Baxuc xan,
a werex tan in manob in chichquinticob yor a jujunturiꞌ mac soc u manob tu tsoyir,
irenob wa ja tetenex quin manob in chichquinticob yor in pararob.
12 Tin chich arob techex uch,
soc mʌꞌ a manex tu cꞌasir soc a cʌniquex Cꞌuj.
Mʌꞌ ja wirej,
tu pʌyechex Cꞌuj soc quet a reyintiquex Cꞌuj tu sasirir.
13 Rajen rajraꞌ quin tꞌʌnicob Cꞌuj tan in waꞌaricob tiꞌ:
“Bayoꞌ Cꞌuj”,
quen tiꞌ,
quireꞌ in bʌjob a tiꞌ yʌnob tu cajar Tesalónica.
Baxuc quin waꞌaricob tiꞌ Cꞌujoꞌ.
Mʌꞌ ja wirej,
caj a wuꞌyex u tꞌʌn Cꞌuj a tin tsecꞌtajob techex ucheꞌ.
Caj a cꞌʌmajex u tꞌʌn Cꞌuj quireꞌ a werex a jeꞌ tꞌʌnaꞌ tiꞌ u tar ich Cꞌujiꞌ quireꞌ mʌꞌ u tꞌʌn xibiꞌ.
Tan u beyaj techex u tꞌʌn Cꞌuj quireꞌ ta wacsajex ta worex tiꞌ u tꞌʌn Cꞌuj.
Rajen quin wacob u jach tꞌʌn Cꞌuj techex.
14 Yʌn baꞌ a berechex tiꞌ u tꞌʌn Cꞌuj in bʌjobechex caj u chucob a pachex a wet cajarex.
Baxuc xan,
caj u chucob u pachob a wet acsʌꞌorirex Jesucristo tu cu cꞌayob tu ruꞌumin Judea.
Rajiꞌob chucob u pachob ten u yet cajarob u winiquirob judío.
15 Caj u quinsob ic Jaj Tsꞌurirex Jesús u winiquirob judío.
Rajiꞌob caj u quinsob yʌjtsecꞌirob u tꞌʌn Cꞌuj uch xʌn.
Rajiꞌob caj u jocꞌsenob ten yejer Silvano yejer Timoteo.
Mʌꞌ tan u quiꞌquinticob yor Cꞌuj u winiquirob judío.
Jach manan cu tsꞌiquinticob tu cotor mac.
16 Quireꞌ caj binenob in tsecꞌtob u tꞌʌn Cꞌuj ich mʌꞌ u winiquirob judío.
Caj yaꞌarob ten u winiquirob judío:
“Tsꞌoc a tsecꞌtiquex tiꞌob,
tsireꞌej a tsecꞌtiquex tiꞌobeꞌ”,
cax in cꞌatob in tsecꞌtic quir u taꞌquicob u bʌjob.
Mʌꞌ ju chaꞌob in tsecꞌtob u tꞌʌn Cꞌuj.
Rajen tan u jach tꞌajar u siꞌpirob.
Jeroj cꞌuchij tu qꞌuinin bajeꞌrer cu tsꞌiquinticob Cꞌuj.
Jach yaj cu bin yubob a mac a cu tsꞌiquinticob Cꞌujoꞌ.
A Pablojoꞌ u cꞌat u wʌcꞌʌs bin u tsicbʌtic u bʌjob tu cajar Tesalónica
17 Barej caj in jamach pꞌʌtob a techexoꞌ,
in bʌjobechex ta cajarex Tesalónica.
Cax mʌꞌ in wiricob a wichex naꞌan in tucriquechex tin worob.
Jach manan in cꞌat in tar in wiriquechex.
18 A tenoꞌ in cꞌat in wʌcꞌʌs tar in wirechex cax ten Pablojen quin bin tin junan,
quij Pablo.
Rajraꞌ tu suꞌsenob a quisinoꞌ.
Satanás u cꞌabaꞌ.
Cax yaꞌab in cꞌat in tarob in wiriquechex.
Rajraꞌ tu suꞌsenob a quisinoꞌ.
19 Caꞌ bin uruc ic Jaj Tsꞌurirex Jesús,
a werex baꞌ quin pachticob tin worob?
Caꞌ in wirob techex yicnʌn Cꞌuj.
Rajen tan in pajicob u qꞌuinin quir u tar soc in wiricob a wichex.
Jach manan quiꞌ in worob in wiricob techex ich yicnʌn Cꞌuj.
Quireꞌ rajiꞌ cu bin yiraj taj in beyajob a Cꞌujoꞌ.
20 Quireꞌ tu yirob a racꞌobex taj in beyajob.
Mʌꞌ ja wirej,
a techexoꞌ,
jach taj ta nequiꞌquintex in worob.