5
Barej mʌꞌ baꞌ wir quin tsꞌibticob techex in wet acsʌꞌorirechex ber qꞌuin caꞌ bin uruc Jesús.
Mʌꞌ ij querex wa tan jaꞌ caꞌ bin tac Jesús.
Wa yaxqꞌuin caꞌ bin tac.
2 Quireꞌ a techexoꞌ a quiꞌ erex ber caꞌ bin uruc Jaj Tsꞌur mʌnaꞌ mac yer ber caꞌ bin tac.
Raꞌ u qꞌuinin mʌꞌ tan a pajiquex u tar Jaj Tsꞌur raꞌ u qꞌuinin caꞌ bin tac.
Jeꞌ u tareꞌ baxuc u tar a mac a chꞌaꞌ a baꞌtaquex.
Baxuc caꞌ bin tac Cristo.
3 Wa ber qꞌuin cu yaꞌaric winic:
mʌnaꞌ baꞌ yʌn ten,
quiꞌ in wor a tenoꞌ.
Mʌnaꞌ mac cu tar u chuquiquen.
Jeroj,
seb cu bin tar u yajir jach manan yaj cu bin yubej irej wa a xquicoꞌ.
A cu yajtar u nʌcꞌ,
yubic u chiꞌibar quireꞌ tabar u chuquic yʌrʌcꞌ och.
Caj cꞌuchij tu qꞌuinin mʌꞌ tu cu putsꞌur a mac a mʌꞌ yacsmʌnob tu yorob u tꞌʌn Cꞌuj.
4 Chen atechexoꞌ,
in bʌjobechex ta wacsechex ta worex tiꞌ u tꞌʌn Cꞌuj.
Mʌꞌ ja wirej,
caꞌ bin tac ic Jaj Tsꞌurirex mʌꞌ u jacꞌʌr a worex quireꞌ ta wacsex a worex.
Ta toc quiꞌ cʌnantechex a bʌjex quireꞌ tan a pajiquex u qꞌuinin quir u tar ic Jaj Tsꞌurirex.
5 Iroꞌonex a mac a cu tar yor quireꞌ caj jocꞌoꞌonex tu sasirir Cꞌuj.
Bajeꞌrer mʌꞌ u pararoꞌonex quisin quireꞌ mʌꞌ ic manex tu yacꞌbirir quisin.
6 Rajen mʌꞌ tsoy yʌn ic wenʌnex irob a mac a cu manob tu yacꞌbirir quisin a mac a mʌꞌ yacsmʌnob tu yorob.
Quiꞌ pꞌisex a bʌjex quireꞌ tabar u tar ic Jaj Tsꞌurirex.
Rajen mʌꞌ tsoy a manex tu cꞌasiriꞌ.
7 Mʌꞌ ja wirej,
a mac a cu wenʌn cu wenʌnob jach acꞌbir.
A cu carchʌjʌrob cu carchʌjʌrob jach acꞌbir xan.
8 Chen a toꞌonexoꞌ,
quij Pablo,
quireꞌ tij cacsex tij corex tiꞌ Cꞌuj caj jocꞌoꞌonex tu sasir Cꞌuj.
Caꞌ ij cʌnex a soldado.
Baxuc a toꞌonexoꞌ caꞌ ij quiꞌ acsex tij corex tiꞌ Cꞌuj,
quet caꞌ ij yajquintex ij quet acsʌꞌorirex.
Mʌꞌ ja wirej,
a baywoꞌ ta quiꞌ cʌnantiquechex a bʌjex irechex a soldadojoꞌ a cu cʌnantaꞌr u tsem ten mascab.
Caꞌ ic pajex u qꞌuinin quir u taꞌquicoꞌonex iroꞌonex a soldado a cu pꞌoquintic u taꞌ mascab soc mʌꞌ u chꞌacʌr u joꞌr soc u taꞌquic u bʌj xan.
9 Mʌꞌ ja wirej,
a Cꞌujoꞌ tan u taꞌquicoꞌonex soc mʌꞌ ij querarex ich cꞌacꞌ.
Tu chen tetajoꞌonex quir u taꞌquicoꞌonex.
Rajiꞌ taꞌquicoꞌonex ic Jaj Tsꞌurirex,
Jesucristo.
10 A Jesúsoꞌ caj quimij toꞌonex quir ij cuxtarex munt qꞌuin ich caꞌanan yejer Jesús.
Cax cuxaꞌanoꞌonex caꞌ bin tac cax toc quimen caꞌ bin tacoꞌonex.
11 Rajen pacran chichquintex a worex bayiriꞌ xan pacran yajquintex a bʌjex soc a pacran yamtiquex a bʌjex an ten bic tan a betiquex bajeꞌrer.
Chichquintaꞌb yorob ten Pablo a mac a tu yacsaj tu yor
12 A tenob Pablojen yejer Silvano yejer Timoteo,
quin chich cꞌaticob techex in wet acsʌꞌorirexob caꞌ a quiꞌ sʌjtex a mac a cu quiꞌ beyajob tu yʌnechex.
Mʌꞌ ja wirej,
tan u camsiquechexob soc a cʌniquechex u tꞌʌn Cꞌuj.
Caꞌ a quiꞌ uꞌyiquechex u tꞌʌn araꞌ a cu quiꞌ beyajob tu yʌnechexeꞌ.
13 Caꞌ a quiꞌ sʌjtex a cu beyajob tu yʌnechexeꞌ quireꞌ cu beyajob tiꞌ Cꞌuj.
Rajen caꞌ a quiꞌ yajquintex a cu beyajob tiꞌ Cꞌuj.
Quiꞌ quiꞌ yajquintej.
Bayiriꞌ caꞌ a quiꞌquintex u yorob a wet acsʌꞌorirex soc mʌꞌ u tsꞌictarob.
14 A tenoboꞌ quin chich aricob techex in bʌjobechex,
caꞌ a qꞌueyex a mac a mʌꞌ cꞌor u beyaj,
soc sacꞌor u bayaj.
Caꞌ a chichquintiquex yor a mac a mʌnaꞌ yoreꞌ.
Caꞌ a yamtex a mac mʌꞌ ju quiꞌ acsa tu yoreꞌ.
Mʌꞌ a yʌn choquintic a worex yejer a wet acsʌꞌorirex soc mʌꞌ biquechex yejer a wet acsʌꞌorirex.
15 Quiꞌ cʌnantex a bʌjex soc mʌꞌ a bʌbʌpʌquic a bʌjex yejer a racꞌobex.
Barej manenex tu tsoyir yejer a racꞌobex ich yocꞌocab.
16 Cax a baꞌ cu tar rajraꞌ a quiꞌquintic a worex.
17 Rajraꞌ a tꞌʌniquex Cꞌuj.
18 Cax wa baꞌ a berex.
Arej tiꞌ Cꞌuj:
“Bayoꞌ”,
quex tiꞌ Cꞌuj,
ta tsꞌaj ten Cꞌuj.
Quireꞌ baxuc u cꞌat Cꞌuj yubic a tꞌʌniquex a tiꞌoꞌ.
U cꞌat Cꞌuj a baxuc yubicoꞌ quireꞌ a techexoꞌ ta wacsex ta worex u tꞌʌn Jesucristo.
19 Mʌꞌ a yʌn tupsiquex yor u Tajꞌor u Pixam Cꞌuj quireꞌ raꞌ cu beyaj techex.
20 Mʌꞌ a yʌn pꞌastiquex a mac a cu tsecꞌtic u tꞌʌn Cꞌuj quireꞌ yamtaꞌb ten Cꞌuj.
21 Tumtex a wirex wa tsoy tu cotor baꞌ soc a werex wa tiꞌ u tar ich Cꞌuj.
Chen a tsoyoꞌ raꞌ ca chꞌiquechex,
chen a mʌꞌ tsoyoꞌ,
jot.
22 Toc rʌc pꞌʌtex a cꞌasoꞌ.
23 A tenoboꞌ,
quin tꞌʌnicob Cꞌuj a mac a cu yamtiquechex caꞌ quiꞌac a worex.
Baxuc xan,
quin tꞌʌnicob Cꞌuj caꞌ u yamtechex Cꞌuj soc mʌnaꞌ baꞌ ca tucriquex ta pixamex.
Baxuc a winquirirex,
soc mʌꞌ a wacsiquex a siꞌpirex hasta cu wʌcꞌʌs ur ic Jaj Tsꞌurirex Jesucristo.
24 Mʌꞌ ja wirej,
a Cꞌujoꞌ u bʌjiriꞌ pʌyoꞌonexeꞌ,
rajen cu yajquinticoꞌonex.
Rajen a Cꞌujoꞌ taj cu yaꞌaric toꞌonex:
Jeꞌ u taꞌquicoꞌonexeꞌ.
A Pablojoꞌ cu tꞌʌnic tu cotor mac
25 Tꞌʌnex Cꞌuj ten in wet acsʌꞌorirechexob baxuc xan in wet beyajob.
26 Rʌc tꞌʌnex a bʌjex.
Quiꞌ tꞌʌnex a bʌjex.
27 A jeꞌ juꞌunaꞌ quin chich aricob techex quir a xaquiquex tu ca muchꞌquintiquex a bʌjex soc u yubicob a wet acsʌꞌorirex.
Toc xaquex yubob a wet acsʌꞌorirex.
Raꞌ quin wacob techex quireꞌ Cꞌuj cu yiric.
28 Caꞌ xiquechex ta beyajex caꞌ u quiꞌ cʌnan techex ic Jaj Tsꞌurirex Jesucristo.
Jeroj tsꞌoquij,
quij Pablo.