A baꞌ cu quiꞌquintic yor Cꞌuj
4
Bin u caꞌ tsꞌocar in wacob techex bajeꞌrer,
in bʌjobechex.
Chich quin wacob techex quireꞌ baxuc u cꞌat Jesucristo caꞌ in chich arej techex.
Rajen quin chich cꞌaticob techex caꞌ a quiꞌ cʌnex a baꞌ tin camsob techex tiꞌ u tꞌʌn Cꞌuj quireꞌ tan a sayʌrex tu pach Jesús.
2 Mʌꞌ wa cꞌaj techex a baꞌ tin camsexob,
a uchoꞌ?
Rajen tin camsechexob quireꞌ baxuc caj u toc araj Jesús ic Jaj Tsꞌurirex.
Rajiꞌ a werex.
3 A Cꞌujoꞌ u cꞌat techex caꞌ a cʌnex Cꞌuj soc mʌnaꞌ a siꞌpirex,
soc mʌꞌ a wacsiquex a siꞌpirex.
A Cꞌujoꞌ mʌꞌ u cꞌat yirechex a manex ich u cꞌasir mac.
4 A Cꞌujoꞌ u cꞌat yiriquechex yejer a raqꞌuiriꞌeꞌ.
Tsoy yiric a Cꞌujoꞌ wa maquix yʌn u raqꞌuirireꞌ.
5 A Cꞌujoꞌ mʌꞌ u cꞌat yirechex a manex yejer a xquic a mʌnaꞌ u mam,
mʌꞌ tsoyiꞌ.
Mʌꞌ ja wirej,
a mac a mʌꞌ yacsmʌnob tu yorob mʌꞌ yer Cꞌuj,
raꞌ cu pachticob xquic.
6 Mʌꞌ a yʌn cʌniquex a tus pʌyiquex u racꞌ a wet acsʌꞌorirex.
Mʌꞌ ja wirej,
ic Jaj Tsꞌurirex jach manan yaj cu bin u tsꞌajic mucꞌyaj a tiꞌoꞌ.
A tenoꞌ baxuc tin chich araj techex a uchoꞌ.
7 A Cꞌujoꞌ tu tetajoꞌonex soc mʌꞌ ic manex ich cꞌas.
Mʌꞌ u cꞌat ij cʌxtiquex ic siꞌpirex.
Tu chen tetajoꞌonex Cꞌuj soc taj quij cacsex tij corex u tꞌʌn Cꞌuj.
8 A mac a cu pꞌastic a jeꞌ tꞌʌnaꞌ,
a quin camsicob techex bajeꞌrer.
Mʌꞌ xib cu pꞌastiquiꞌ,
Cꞌuj cu pꞌastic.
Raꞌiriꞌ a tu tsꞌaj toꞌonex u Tajꞌor u Pixam Cꞌuj.
9 A baꞌ ta cꞌatex a tenoboꞌ jach tsoy a yajquintiquex a wet acsʌꞌorirex.
Chen mʌꞌ baꞌwir quin tsꞌibticob techex ich juꞌun.
Mʌꞌ ja wirej,
Cꞌuj tu toc araj uch caꞌ a pacran yajquintex a bʌjex a wet acsʌꞌorirex.
10 Mʌꞌ ja wirej,
quin wiricob rajraꞌ tan a yajquintiquechex tu cotor a wet acsʌꞌorirex ich u ruꞌumin Macedonia.
Chen a tenoboꞌ in cꞌatob techex,
in bʌjobechex soc jach manan a jach yajquintiquex a wet acsʌꞌorirex.
Rajiꞌ quin chich cꞌaticob techex.
11 Caꞌ a pꞌisex a bʌjex soc mʌnaꞌ baꞌ cu yaꞌaricob soc pꞌeriꞌiꞌ a worex yejer a racꞌobex.
Bayiriꞌ xan,
caꞌ a pꞌisex a bʌjex quir a beyajex.
Mʌꞌ tsoy a pꞌʌtiquex a beyaj.
Caꞌ a beyanʌquex a bʌjiriꞌex.
Cꞌaj techex a tin toc arajob techexeꞌ soc rajraꞌ a beyajex.
12 A baywoꞌ a mac a cu tar,
a mʌꞌ yacsmʌnob tu yorob bin u caꞌ sʌj techex quireꞌ a wacsmʌnex ta worex.
Mʌꞌ ja wirej,
yirob jach sacꞌorechex quireꞌ toc yʌnex a woꞌochex.
Rajen mʌꞌ baꞌ wir ca bin a cꞌatex a woꞌochex ich u jer mac.
Tan u tar Jesucristo
13 A tenoboꞌ,
quij Pablo.
In cꞌatob a werex,
in bʌjobechex baꞌ u ber u quimrir a yacsmʌnob tu yorob.
In cꞌat a werex baꞌ u ber tiꞌ u quimrir soc mʌꞌ a wacꞌtiquex u quimrir,
irechex a mac a mʌꞌ yacsmʌnob tu yorob.
Rajen cu yacꞌticob u bʌj quireꞌ mʌꞌ u jach erob tu cu binob,
rajen cu yacꞌticob u bʌj.
14 Quireꞌ quimij toꞌonex Jesús quireꞌ rajiꞌ quij cacsiquex tij corex tiꞌ Jesús.
Quireꞌ ricꞌ toꞌonex tu quimrir Jesús quireꞌ rajiꞌ quij cacsiquex tij corex tiꞌ Jesús.
Quet bayiriꞌ quij cacsiquex tij corex tiꞌ Cꞌuj,
rajiꞌ cu bin u ricꞌsoꞌonex tij quimrirex a mac a yacsmʌnob tu yorobeꞌ.
Bin u pʌybir Jesús caꞌ bin wʌcꞌʌs uruc teraꞌ.
15 Rajen quin camsicob techex aroꞌ,
quireꞌ raꞌ u tꞌʌn ic Jaj Tsꞌurirex Jesucristo.
Mʌꞌ ja wirej,
wa tiꞌ yʌnoꞌonex caꞌ bin uruc Jesús.
Mʌꞌ pʌyber quic binex caꞌanan quireꞌ pꞌeriꞌ caꞌ bin xicoꞌonex yejer a mac a quimenob a yacsmʌnob tu yorob uch.
16 Pꞌeriꞌ caꞌ bin xicob yejeroꞌonex.
Mʌꞌ ja wirej,
u bʌjiriꞌ Jesús caꞌ bin wʌcꞌʌs tac teraꞌ ich yocꞌocab.
Ta u tar ich caꞌanan caꞌ bin tac.
Jach cꞌam caꞌ bin yustej yejer u mascabir quir u yutstaꞌr.
Cꞌam caꞌ bin u tꞌʌnej yʌjmasirob u tꞌʌn Cꞌuj quireꞌ baxuc araꞌb ten Cꞌuj tiꞌob soc cꞌam u tꞌʌnic.
A mac quimenob uch,
a yacsmʌnob tu yorob rajiꞌob pʌyber cu yʌn riqꞌuir.
17 Caj tsꞌoc u riqꞌuirob a quimeneꞌ,
a cuxaꞌanoboꞌ pachir caꞌ bin xicob a tiꞌoboꞌ.
Tiꞌ quic bin ic muchꞌquinbiroꞌonex ich caꞌanan.
Pꞌeriꞌ caꞌ bin muchꞌquintacoꞌonex ich u muyarir yejer ic Jaj Tsꞌurirex.
A baxucoꞌ tiꞌ yʌnoꞌonex yejer ic Jaj Tsꞌurex munt qꞌuiniꞌ.
18 Rajen pacran quiꞌquintex a wor quireꞌ jeꞌ tar Jesúseꞌ.