A mac a jach manan cꞌas
2
A techexoꞌ caj a cꞌatex tenob bic tabar caꞌ bin ic muchꞌquintiquex ic bʌjex caꞌ bin uruc ic Jaj Tsꞌurirex Jesucristo.
Chich quin wacob techex in wet acsʌꞌorirechexob.
Raꞌ u qꞌuinin caꞌ bin uruc Jesús.
2 Mʌꞌ a yʌn xacꞌ tucurex mʌꞌ u jacꞌʌr a worex xan.
Cax cu jumbinticob techex.
Cax ta wuꞌyex tiꞌ yʌn u juꞌunin ten.
Quireꞌ ta wuꞌyex cꞌuchij tu qꞌuinin cu yuꞌur ic Jaj Tsꞌurirex.
3 Mʌꞌ a chꞌaꞌic u tabsiquex mac chichin.
Cax mʌꞌ toy tac u qꞌuinin u tar Jesús rajiꞌ cu yʌn cꞌuchur u qꞌuinin a winicoꞌ.
Rajiꞌ cu yʌn yaꞌarej:
Mʌꞌ a cꞌujintiquex Cꞌuj quireꞌ mʌnaꞌ Cꞌuj.
Rajen bin u caꞌ rʌc pꞌʌtob u tꞌʌn Cꞌuj.
Pachir caꞌ bin tac xib a mac jach manan cꞌasoꞌ.
Ara xiboꞌ bin u caꞌ tu cꞌaqꞌuir betaꞌan munt qꞌuin quireꞌ toc araꞌb ten Cꞌuj uch,
quij.
4 Bin u caꞌ xacꞌ tu bʌj tu cotor a baꞌ cꞌujintaꞌb ten winic cax jach Cꞌuj,
cax tus cꞌuj.
Bin u caꞌ u pꞌastob quireꞌ bin u caꞌ yaꞌarej:
A tenoꞌ,
jach caremen,
arayoꞌ mʌꞌ cꞌuchaꞌan yorob teniꞌ quireꞌ jach manan caremen atenoꞌ.
Bin u caꞌ ocar cutar tu japnin naj tu cu naj cꞌujinticob Cꞌuj u winiquirob israel soc yaꞌaric:
A tenoꞌ,
quij,
jach cꞌujenꞌ soc u cꞌujintaꞌr ten mac tu cotor.
5 Mʌꞌ wa cꞌaj techex a uchoꞌ tiꞌ yʌnenob ta wicnʌnex caj in waꞌaraj techex aroꞌ?
6 A werex cu suꞌsaꞌ ten Cꞌuj a mac jach cꞌas hasta cu cꞌuchur tu qꞌuinin cu chaꞌbʌr u tar.
Mʌꞌ ja wirej,
chen Cꞌuj suꞌsic a bajeꞌrer soc mʌꞌ u tar.
7 A mac a jach cꞌasoꞌ,
a bin u caꞌ yes u bʌj,
a tan u muc u beyaj bajeꞌerer.
Hasta cu bin a mac a mʌꞌ ju chaꞌbʌr u tar,
a mac a cu muc u beyaj bajeꞌrer.
8 Caꞌ bin cꞌuchuc tu qꞌuinin u chaꞌbʌr u tar,
bin u caꞌ yesic u bʌj,
a mac a jach manan cꞌasoꞌ.
Rajiꞌ bin u caꞌ quinsbir ten Cꞌuj.
Rajiꞌ bin u caꞌ quinsbir ten u yicꞌar u chiꞌ ic Jaj Tsꞌurirex Jesús.
Jeꞌ chꞌejsaꞌr xan ten u sasirir Cꞌuj caꞌ bin tac Jesús.
9 A mac a jach cꞌasoꞌ bin u caꞌ yesic u bʌj.
Bin u caꞌ yesic u bʌj quireꞌ yamtaꞌ ten quisin.
Aroꞌ bin u caj tar jach chich u mucꞌ,
quireꞌ bin u caꞌ u tus esej jach carem u beyajob irej wa Cꞌuj.
10 A rayoꞌ,
a mac a jach cꞌasoꞌ bin u caꞌ u cꞌʌmob tu cotor cꞌas,
soc u jach tusic tu cotor mac a mʌꞌ ju cꞌʌmob u tꞌʌn Cꞌuj.
Mʌꞌ ja wirej,
robob bin u caꞌob erar ich cꞌacꞌ.
Tiꞌ cu binobiꞌ quireꞌ mʌꞌ u cꞌatob u yacsicob tu yorob u tꞌʌn Cꞌuj soc u cuxtarob munt qꞌuin.
11 Rajen a Cꞌujoꞌ,
jeꞌ u chaꞌic u tabsaꞌrob ten a cu tusoꞌ soc u quibicob a baꞌ mʌꞌ tajiꞌ,
quireꞌ mʌꞌ u cꞌatob u parar Cꞌujiꞌ.
12 A Cꞌujoꞌ cu chaꞌic caꞌ u quibob a mac a cu tusoꞌ soc u bin tuchiꞌtaꞌrob ten Cꞌuj ich cꞌacꞌ.
Quireꞌ mʌꞌ u yacsmʌnob tu yorob tiꞌ Jesucristo rajen bin u caꞌob ich cꞌacꞌ quireꞌ chen robob cu quiꞌquinticob yorob ich a cꞌasoꞌ.
Tetaꞌbechex ten Cꞌuj soc u taꞌquiquechex
13 In wet acsʌꞌorirechexob yajbirechex ten ic Jaj Tsꞌurirex quireꞌ tetaꞌbechex ten Cꞌuj.
Mʌꞌ ja wirej,
a tu yʌnx chun a wuꞌyiquex u tꞌʌn Cꞌuj caj a wacsex ta worex tiꞌ u tꞌʌn.
Rajen rajraꞌ quin waꞌaricob:
“Bayoꞌ Cꞌuj” quireꞌ tetaꞌbechex ten u Tajꞌor u Pixam Cꞌuj.
Mʌꞌ ja wirej,
rajiꞌ tu pʌyechex wa ber caj a quibex u tꞌʌn Cꞌuj soc a wacsiquex ta worex u tajir u tꞌʌn.
14 Rajen a techexoꞌ,
tetaꞌbechex ten Cꞌuj quireꞌ tu tꞌʌnechex wa ber caj in tsecꞌtob techex u jach tsoyir u tꞌʌn Cꞌuj uch.
Caj u tetechex Cꞌuj soc u yacsiquechex ic Jaj Tsꞌurirex tu ruꞌumin tu cu bin u reyintic Cꞌuj.
15 Rajen quin wacob techex in wet acsʌꞌorirechexob,
mʌꞌ u pec a worex.
Quiꞌ cʌnantex u tꞌʌn Cꞌuj a baꞌ ta wuꞌyex in camsicob uch.
Cax a baꞌ tin tsꞌibtob techex uch.
Cax a baꞌ ta wuꞌyex in camsicob techex,
quiꞌ cʌnantex.
16 Bajeꞌrer a Cꞌujoꞌ,
a mac ic Tetex,
quireꞌ cu yajquinticoꞌonex,
tan u chichquintic a worex munt qꞌuin.
Bayiriꞌ xan ic Jaj Tsꞌurirex.
Raꞌ in cꞌatob Cꞌuj techex.
Mʌꞌ ja wirej,
tan ic pajiquex Cꞌuj yejer Jesucristo quireꞌ cu yamticoꞌonex quireꞌ u yajoꞌonex.
17 Quin cꞌatob tiꞌ Cꞌuj caꞌ u quiꞌquintej a worex soc chich a worex quir a betex tu cotor a tsoyoꞌ.
Soc caꞌ a wuꞌyex a baꞌ jach tsoyoꞌ.