Yʌn tꞌʌnex Cꞌuj soc u yamtiquenob
3
Tiꞌ yʌn u jer in tꞌʌnob quir in wacob techex in bʌjobechex.
Yʌn tꞌʌnex Cꞌuj soc u yamtiquenob Cꞌuj soc seb u cꞌuchur u tꞌʌn ic Jaj Tsꞌurirex ich tu cotor mac ich yocꞌocab.
Tꞌʌnex Cꞌuj soc u cꞌʌmicob u tꞌʌn Cꞌuj irechex caj a cꞌʌmex.
Mʌꞌ ja wirej,
ta quiꞌ acsex ta worex quireꞌ tan a quiꞌ quibiquex.
2 Yʌn tꞌʌnex Cꞌuj xan,
soc u taquiquenob tiꞌ a mac a cu chuquicob in pachob.
Mʌꞌ ja wirej,
tu cotor mac mʌꞌ ju bin u yacsob tu yorob u tꞌʌn Cꞌuj.
3 Cꞌʌꞌotex a Jaj Tsꞌuroꞌ,
rajraꞌ tiꞌ yʌn quir u yamticoꞌonex.
Rajiꞌ jeꞌ u chichquintic a worex.
Rajiꞌ jeꞌ u cʌnantiquechex soc mʌꞌ u chuquiquechex a quisinoꞌ.
4 A tenoboꞌ in werob quireꞌ ic Jaj Tsꞌurirex tan u yamtiquechex.
Rajen cꞌuchaꞌan a worex a quiꞌquibex a baꞌ tin camsob techex uch.
Cax wa bajeꞌrer cax wa ju jer qꞌuin.
5 Quin tꞌʌnicob Cꞌuj techex soc a najtiquex bic tabar u yajquintechex Cꞌuj.
Baxuc quin tꞌʌnicob Cꞌuj techex soc a mucꞌtiquex an ten bic Jesús caj u mucꞌtaj uch.
Caꞌ chich beyanʌcoꞌonex
6 Bajeꞌrer,
in bʌjobechex quin chich aricob techex caꞌ a pꞌʌtex tu junʌn tu cotor a bʌjobex,
a mʌꞌ cꞌor beyajoꞌ.
Mʌꞌ a tꞌʌniquexiꞌ.
Quin wacob techex aroꞌ quireꞌ baxuc u cꞌat ic Jaj Tsꞌurirex Jesucristo.
Caꞌ a pꞌʌtex tu junʌn xan,
quireꞌ mʌꞌ ju quibaj a baꞌ tin camsob techex uch a tiꞌ yʌnenob ta wicnʌnex.
Caj in waꞌarob techex caꞌ chich beyanʌquechex.
7 Mʌꞌ ja wirej,
a techexoꞌ a werex caꞌ a toc cʌnex bic chich beyajob an ten biquenob uch.
Mʌꞌ ja wirej,
chich beyanʌjenob uch,
caj tiꞌ yʌnenob ta wicnʌnex uch.
8 Mʌꞌ jin jantob yoꞌoch winiquiꞌ wa mʌꞌ jin boꞌotobiꞌ.
Jach chich beyanʌjenob,
jach qꞌuicꞌabnʌjenob tu quin beyajob.
Cax aꞌacꞌbir,
cax chun qꞌuin tin beyajob soc mʌꞌ in xupic a taqꞌuinex quir a jansiquenob uch.
9 Cax tsoy quir in cꞌaticob techex,
quir a wacsenobex uch chen mʌꞌ jin cꞌatob quir a jansiquenobex.
Quireꞌ in cꞌatob a cʌniquenob an ten bic in beyajob xan soc tsoy a beyajex xan.
10 Mʌꞌ wa ja cꞌʌꞌotex uch tiꞌ yʌnenob ta wicnʌnex caj in chich arob techex:
A mac a mʌꞌ ju beyaj bayiriꞌ xan mʌꞌ ju yʌn janʌn xan.
11 Aroꞌ quin waꞌaricob techex quireꞌ tin wuꞌyob u jumintaꞌr chʌc yʌn winic tu yʌnechex mʌꞌ tan u beyajob.
Chen bur u qꞌuinin man u caꞌob,
tan yaꞌaricob baꞌ u ber ich u racꞌob.
12 A rayoꞌ a cu manoboꞌ caꞌ in chich arob tiꞌob caꞌ u sar u xiquinob a baꞌ quin wac tiꞌob.
Mʌꞌ chen tenob cu yaꞌaric,
Jesucristo ic Jaj Tsꞌurirex cu yaꞌaric xan:
Caꞌ beyanʌcob soc mʌꞌ u chen manob u jumintej wa tabar u tar Cristo.
Arex tiꞌob caꞌ beyanʌcob soc yʌn yoꞌochob xan.
13 In bʌjobechex mʌꞌ u caꞌanan a worex a betex a baꞌ jach tsoy.
14 Wa tiꞌ yʌn winic ta wicnʌnex a cu maꞌquintic u quibej a baꞌ tin tsꞌibtob ich a jeꞌ juꞌunaꞌ.
Irex maquiꞌ,
tun mʌꞌ a tꞌʌniquex soc u chꞌic suraquir.
15 Mʌꞌ a yʌn pꞌactiquex a tiꞌoꞌ chen arex caꞌ u sar u xiquin yub u tꞌʌn Cꞌuj.
Mʌꞌ ja wirej,
rajiꞌ a wet acsʌꞌorirex xan.
Cu tsꞌocar u tꞌʌn Pablo
16 In cꞌatob caꞌ u quiꞌquint a worex ic Jaj Tsꞌurirex soc mʌnaꞌ baꞌ ca tucriquex.
Cax rajraꞌ cu quiꞌquintic a worex wa baꞌ a berex.
In cꞌatob soc rajraꞌ tiꞌ yʌn Jaj Tsꞌur ta wicnʌnex.