Soc yiriquechob ta wacsaj ta wor
3
Tito,
quen,
caꞌ a waꞌarej tiꞌ a mac a cu camsicob u tꞌʌn Cꞌuj.
Arej tiꞌob caꞌ u quibob u tꞌʌn u jach tsꞌurir tu cajar.
Bayiriꞌ tiꞌ gobierno,
caꞌ u quibob u tꞌʌn.
Arej tiꞌob caꞌ u tꞌajquintob u bʌj tu beyaj wa tsoy u beyaj.
Wa mʌꞌ tsoy u beyajob arej tiꞌob:
“Jot”,
quij.
2 Arej tiꞌob,
soc mʌꞌ u pꞌasticob mac,
soc mʌꞌ u tsꞌiquinticob mac.
Arej tiꞌob soc nemʌꞌ bic u tsicbar tiꞌ mac,
soc chan ber cu tsicbar tiꞌ u yet acsʌꞌorirob.
Bayiriꞌ yejer a mac a mʌꞌ yacsmʌnob tu yorob u tꞌʌn Cꞌuj.
3 Cꞌʌꞌotej,
Tito,
quen.
A toꞌon uchoꞌ mʌꞌ jic najtej a baꞌ tsꞌibaꞌan ich u tꞌʌn Cꞌuj uch.
An ten bic toꞌon uch,
Tito,
mʌꞌ jij quibaj u tꞌʌn mac.
Baxuc tiꞌ a mʌꞌ yacsmanob tu yorob bajeꞌrer.
Wa cu pʌyicoꞌon ic racꞌob uch,
tij quibaj ic bin tu cꞌasir mac uch.
Quireꞌ satoꞌon tiꞌ u tꞌʌn Cꞌuj uch.
Cꞌʌꞌotej,
Tito,
a toꞌonoꞌ rajiꞌ quic tsꞌurintic a baꞌ quic pachtic cꞌas uch.
A wa quij quiric tij quich uch Tito.
Quic jach pachtic cꞌas.
A uchoꞌ quic man tu cꞌasir tan u qꞌuextar ij cor.
Quic wʌcꞌʌs pꞌactic ic bʌj.
Bayiriꞌ xan quic pacran pꞌactic ic racꞌob xan.
4 Barej Tito,
caj u yesa toꞌon Cꞌuj bic tabar u tsoyir Cꞌuj cu yajquinticoꞌonex.
Rajen caj u tuchiꞌtaj u parar ij cʌjtaquirex quir u yamticoꞌonex,
a mac a teꞌ cʌjaꞌan ich yocꞌocab.
5 Mʌꞌ ja wirej,
Tito,
cax wa tic chen betajex tsoyoꞌ,
chen mʌꞌ rajiꞌ quir u taquicoꞌonex Cꞌuj.
Tu chen tacajoꞌonex quireꞌ tu yajquintoꞌonex quireꞌ u cꞌat u yamticoꞌonex soc mʌꞌ ic binex cꞌacꞌ.
Caj u rʌc rucꞌsa ic siꞌpirex wa ber caj u tacajoꞌonex.
Caj u tsꞌaj toꞌonex u jer ij corex rajen u pararoꞌonex Cꞌuj bajeꞌrereꞌ.
Rajiꞌ Cꞌuj ic Tetex bajeꞌrereꞌ.
Mʌꞌ ja wirej,
caj u tsꞌaja toꞌonex u jer quir ij cuxtarex munt qꞌuin.
A baywoꞌ ricꞌben winicoꞌonex quireꞌ u Tajꞌor u Pixam Cꞌuj.
6 A Jesucristojoꞌ caj u masaj toꞌonex u Tajꞌor u Pixam Cꞌuj quireꞌ rajiꞌ ij cʌjtaquirex.
Jach manan caj u tsꞌaja toꞌonex u Tajꞌor u Pixam Cꞌuj.
7 Tu cotor aroꞌ,
caj betaꞌb ten Cꞌuj toꞌonex soc ʌcʌtan u wich tsoy yiricoꞌonex Cꞌuj.
Mʌꞌ ja wirej,
u bʌjiriꞌ a Cꞌujoꞌ caj u yajquintoꞌonex soc u yamticoꞌonex.
A baywoꞌ,
ʌcʌtan tu wich Cꞌuj tsoy yiricoꞌonex.
Rajen tan ic pajiquex u qꞌuinin quir u yacsicoꞌonex soc ic cuxtarex munt qꞌuin.
8 A jeꞌ tꞌʌnaꞌ,
a tin waꞌara tech sam jach taj,
Tito.
Rajen jach tsoy caꞌ a camsej tiꞌob a tu yacsob tu yorob.
In cꞌat caꞌ a chich arej tiꞌ a yacsmʌnob tu yorob u tꞌʌn Cꞌuj.
Arej tiꞌob caꞌ manacob tu tsoyir soc u yamticob u racꞌob.
Arej caꞌ u pꞌis u bʌjob caꞌ u yamtob u racꞌob.
Jach tsoy caꞌ a camsej tiꞌob aroꞌ,
Tito.
Quireꞌ caꞌ ic yamtic mac tu cotor.
9 Tsireꞌeꞌ Tito.
Pꞌʌtej joqꞌuen mʌꞌ a wocar tu cu chiꞌicob u niꞌ.
Mʌꞌ baꞌwir cu chiꞌicob u niꞌ quireꞌ a techoꞌ,
Tito,
mʌꞌ tech a chiꞌicob u niꞌ quireꞌ rajraꞌ u cꞌatic bic tabar u nunquir uch,
quij.
Mʌꞌ ja wirej,
raꞌ cu yʌnx chun u tsꞌictacob.
Quireꞌ mʌꞌ ja chiꞌibar u niꞌ,
a techoꞌ,
Tito,
quireꞌ a jeꞌraꞌ u tꞌʌn Moisés.
Cax cu yaꞌaricob:
“Mʌꞌ tsoy aroꞌ.”
Rajiꞌ mʌꞌ u yamtob mac cu chen pꞌusic yorob.
10 Wa tiꞌ yʌn mac tan u tsꞌiquintic u yet acsʌꞌorirob tu cu muchꞌquinticob u bʌjob.
Arej tiꞌ,
caꞌ u pꞌʌt u tsꞌiquintic u yet acsʌꞌorirob.
Wa cu caꞌ tsꞌiquintic u yet acsʌꞌorirob.
Arej tiꞌ,
Tito,
wa mʌꞌ ju yub a tꞌʌn,
Tito,
jocꞌsej tu cu cꞌayob.
Arej tiꞌ,
mʌꞌ u caꞌ tar tu cu cꞌayob quireꞌ caꞌten cu tsꞌiquintic u yet acsʌꞌorir.
11 Mʌꞌ ja wirej,
Tito,
saꞌtʌr a xiboꞌ quireꞌ mʌꞌ ju yubic u tꞌʌn,
tu cu cꞌayob,
bayiriꞌ xan yer baꞌ u siꞌpir a xiboꞌ.
Caj tsꞌoc u tꞌʌn Pablo tiꞌ Tito
12 Wa ber caꞌ bin in tuchiꞌt a wet beyaj,
Tito.
Cax wa Tíquico,
quin tuchiꞌtic cax wa Artemas,
quin bin in tuchiꞌtej caꞌ tac.
Soc rajiꞌ cu pꞌatar tu beyaj ich u petenin Creta.
Sebquint a cꞌuchur tin wicnʌn ich u cajar Nicópolis,
quireꞌ in cꞌat in mas u qꞌuinin queꞌer ich u cajar Nicópolis.
13 Yamtej Zenas yejer Apolos,
Tito.
A Zenasoꞌ,
u jach er u tꞌʌn Moisés,
a ic nunquiroꞌ.
Quiꞌ yamtej tiꞌob,
Tito,
tu cu binob u tsecꞌt u tꞌʌn Cꞌuj wa yʌn tech taqꞌuin.
Wa yʌn noqꞌueꞌ,
jʌse tiꞌob Zenas yejer Apolos,
soc mʌnaꞌ baꞌ u cꞌatob tu cu beyajob.
14 Mʌꞌ ja wirej,
Tito,
caꞌ a camsic tiꞌ a bʌjob,
soc u yamticob u yet acsʌꞌorirob.
Cax mʌꞌ u yet acsʌꞌorirob,
arej u yamtob.
Camsej tiꞌob,
Tito,
soc u yamticob u yet acsʌꞌorirob a mʌnaꞌ u yoꞌochoꞌ.
Wa mʌnaꞌ u nocꞌoꞌ,
arej tiꞌob u jʌsej tiꞌob.
Soc a baywoꞌ,
mʌꞌ u pacꞌar ten mac,
soc mʌꞌ yaꞌaricob:
“Mʌꞌ cꞌor a yacsmʌnob tu yorob,
rajen mʌnaꞌ baꞌ yʌn tiꞌob.”
Tꞌʌn a yacsmʌnob tu yorob, Tito
15 Tu cotor mac a tiꞌ yʌnob tin wicnʌn cu yacob,
caꞌ in tꞌʌnech Tito.
Caꞌ a tꞌʌnej tu cotor mac a jin jach yajeꞌ,
tub yʌnech a tu yacsajob tu yorob u tꞌʌn Cꞌuj.
Quin tꞌʌnic Cꞌuj caꞌ u quiꞌ cʌnantech Cꞌuj,
Tito.
Bayiriꞌ tu cotor mac a tu yʌnech,
Tito.
Quin tꞌʌnic Cꞌuj caꞌ quiꞌ cʌnantaꞌ ten Cꞌuj,
xan.
Jeroj tsꞌoquij Tito,
quij Pablo.